27
ዳዊቴ ማዛሙሬ
1 ጎዳይ ታስ ፖኦኔ
ታና ኣሺዛይሳ፤
ሂስቲን ታኒ ኦናስ ያያኔ?
ጎዳይ ታ ሼምፖይስ
ኣቲዛ ሚጻ፤
ሂስቲን ታኒ ኦናስ ባባኔ?
2 ኢታ ኣሳቲ፥ ታ ሞርኬቲኔ
ታ ባልጋራቲ
ታና ዎꬋናዉ
ታኮ ሆርዶፊ ዪዛ ዎዴ፥
ኢስቲ ባስ ꬉጴቲዲ ኩንዳና።
3 ሞርኬ ቶራይ
ታና ዶዲዛኮካ
ታ ዎዚናይ ያዬና፤
ኦላይ ታ ቦላ ዎራጂዳኮካ፥
ታኒ ጎዳን ኣማኔታይስ።
4 ታኒ ጎዳ ኢሲ ሚሽ ኦይቻይስ፤
ሄሲካ ታኒ
ታ ዴኦ ላይꬅ ኡባን
ጎዳ ኬꬃን ዴኣናሳ፤
ታኒ ጎዳ ቦንቾ ሎኦቴꬃ ቤኣናሳ፤
ኢዛ ኬꬃንካ
ኢዛ ኮያሼ ዴኣናሳ።
5 ሄሳ ጊሻስ ሜቶ ጋላስ
ኢዚ ታና ባ ዲዛሶን ጌንꬃና፤
ባ ዱንካኔን
ታና ቆቲ ኣሻና፤
ꬎቃ ዛላ ቦላካ
ኢዚ ታና ኤሳና።
6 ሄ ዎዴ ታና ዶዲዳ
ታ ሞርኬታፔ ቦላራ
ꬎቁ ꬎቁ ጋና፤
ታኒ ኢዛ ዱንካኔዛ ሲንꬃን
ኡፋይሳ ያርሾ ያርሻና፤
ታኒ ጎዳስ ዲጻናኔ
ዬጻና።
7 ኣቤት ጎዳዉ!
ታኒ ኔና ጼይጊዛ ዎዴ
ኔኒ ታስ ኮያ፤
ታስ ቃꬌታ፤ ታና ሲያ።
8 ኔኒ፥ «ታ ሲንꬃ
ኮዪቴ» ጊዳ ዎዴ፥
ታ ዎዚናይ፥
«ኣቤት ጎዳዉ! ኤኖ፤
ታኒ ኔ ሲንꬃ ኮያና» ጊዴስ።
9 ኣቤት ታና ኣሺዛ ታ ጾሳዉ!
ኔኒ ታና ማዲዛዴ፤
ኔ ሲንꬃ ታፔ ጌንꬆፋ፤
ታና ኔ ኣይሌ ሃንቄታዳ
ኔፔ ሃሶፋ።
ታና ኦሎፓኔ ኣጎፋ።
10 ታ ኣዋይኔ
ታ ኣያ ታና ኣጊኮካ
ጎዳይ ታና ሺሺ ኤካና።
11 ኣቤት ጎዳዉ!
ኔ ኦጌ ታና ታማርሳ፤
ታ ሞርኬታ ጊሻስ
ታና ሱሬ ኦጌራ ካሌꬃ።
12 ዎርዶ ማርካቲ
ታ ቦላ ማካላቴꬃን
ዴንዲዳ፤
ሄሳ ጊሻስ ኔ ታና
ኢስታ ኢታ ኣሞስ ኣꬃ ኢሞፋ።
13 ታኒ ሼምፖራ ፓጻ ዳሼ
ጎዳ ኪያቴꬅ ቤያናይሳ
ሂዶታ ኦꬃይስ።
14 ጎዳን ኣማኔታ፤
ሚና፥ ሂዶታ ቃንጾፋ፥
ጎዳን ኣማኔታ።