28
ዳዊቴ ማዛሙሬ
1 ኣቤት ጎዳዉ! ታ ዛላዉ!
ታኒ ኔና ጼይጊሺን
ታስ ሲሲ ኢጾፋ፤
ታ ዋሲሺን ኔ ጮኡ ጊኮ
ታኒ ዱፎን ጌሊዛ
ኣሳታ ማላ ጊዳና።
2 ታ ኩሼዛ ኔ ጌሻ
ኣቆሶ ሚጫዳ ዎሲሺኔ
ታና ማዳርኪ ጋዳ
ታ ዋሲሺን ኔ ሲያ።
3 ባ ዎዚናን ኢታ ቆፒሼ
ባ ላጌታራ ሳሮቴꬅ ሃሳይዛ
ኢታ ኦꬂዛይታራ
ታና ኢስታራ ጋꬃ ኤፎፓ።
4 ኔ ኢስታስ ኢስታ ኢታቴꬃ ማላኔ
ኢስታ ኦሶ ማላ ኢማ፤
ኢስታስ ኢስታ ኩሼ
ኦሶ ማላ ዛራ፤
ኢስቲ ኦꬂዳ ኢታ ኦሶዛስ
ሃሎ ኬሳ።
5 ኢስቲ ጎዳ ኦሶስ ዉዱ ጎንታ
ኢጺዳ ጊሻስ፥
ኢዛ ኩሼ ኦሶታስ ሶሆ
ኢሞንታ ኣጊዳ ጊሻስ፥
ኢዚ ኢስታ ላላና፤
ዛሪዲካ ኬጼና።
6 ታ ዎሳ ሲዪዳ ጊሻስ፥
ጎዳይ ጋላቴቶ።
7 ጎዳይ ታስ ዎልቃኔ ጎንዳሌ፤
ታ ዎዚናይ ኢዛን ኣማኔቴስ፤
ሄሳን ታኒ ማዴታዲስ፤
ሄሳ ጊሻስ
ታ ዎዚናይ ኢዛን ኡፋዬቴስ፤
ታኒ ኢዛ ዬꬃን ሳባና።
8 ጎዳይ ባ ዴራስ ዎልቃ፤
ኢዚ ባ ቲይዳ ካዎዛ
ኣሺዛ ሚጻ።
9 ጎዳዉ! ኔ ዴራ ኣሻ፤
ኔስ ጊዲዛይታ ኣንጃ፤
ኢስታ ሄንꬃንቻይ
ኔና ጊዳ፤
ኔኒ ኢስታ ሜርናስካ ቶካ።