10
Hiobezi juju‐ticnere ki mamakuc ewec
1 “No ʒuhuckerâ juzore takicnukac,
irec mu heŋɋâŋ dâŋnane i
manabâc tâmiric mufuapemu,
erâ buʒâiczi maŋnane bâumbeŋkeha dâŋ mupemu.
2 Ehuc Anutu dâŋ kecʒiŋuc âzâcnepemu:
Go mi behecnuc,
erâ fuŋne weniŋucte mana‐naretec sâqorekac i nazac.
3 Bâʒâicnukomec i manatec biaŋkekac me?
Me go gahacne mezi wiac bâfuameŋ i qaisockehuc
ŋic sindaŋne jaŋere juju hone ʒiziweckomec
i wâc manatec sâckekac me?
4 Me ŋiczi wiac hone manac eeŋgopieŋ
irec sâc sawa hone manac eekic me?
5 Mâreŋŋic nâŋere juju dameŋ fokac
irec sâc jaha gore juju dameŋ wâc fokac me?
6 Iŋuc mi fokacko ine wemocte kiŋ bahac‐nane
moc bâfuacmurâ babasa gie bakomec,
ehuc sâqocne‐nanere fuŋne bajaŋgeŋkecmurâ ʒoɋac ekomec?
7 No kiŋ bahac tâmiric jukopac,
erâ moczi moc gore meonec sâcne mi bataracnuocmu
i go mana‐jâmbâŋkekomec.
8 Go gahacne mezi bâfuacnumeŋ,
erâ ine me izia bâsirowecnuzo ekomec.
9 Go mâreŋ qâhâckerâ bâfuacnumeŋ
i moc manasunʒaŋ me!
Me mocwâc gâc wândoc epemurâ mukomec me?
10 Go mamac‐nanezi bâfuacnuocte tâpiri râcnemeŋ,
erâ gokizia wâc mana‐narehaŋ
neŋgoc‐nanere bumaŋko fua sokac epo.
11 Go hâcne sahac biuchec bâfuacnumeŋ,
ehuc siec â rua râec‐jofahuc
sahac‐nane basanaŋkemeŋ.
12 Go maŋjauŋ enarehuc juju tahacnumeŋ,
erâ wâc ehâmo‐naretec biaŋne juwarepo.
13 Ʒi ine kecʒiŋuc mana tarakopac:
Go wiac i fuŋnehec enare warehuc jumeŋ.
14 Go nore ʒiŋuc manasumeŋ:
E sâqocne baocmu me mâcne,
iŋuc muhuc hone jâjâpecnuhuc jumeŋ;
i sâqocne‐nane mi bâtâmirecmurâ iŋuc hâcne emeŋ.
15 No sâqocne bape izia mana‐naretec bahacnehec eekac,
ŋifec ine wiac biaŋne ebac epe
sifu manatec sâqoreekac.
Irec no mana hâtâwehuc mimiekopac.
16 No wiac i me i ebac epe biaŋke‐bipieha
sifu laioŋ momori iŋucne erâ jâpecnuekic,
erâ i sawa mâcne, go sipiricnucmurâ
mâsi wiac fuŋne fuŋne baekic.
17 Go dameŋ sâc ŋiczi musâqorecnuniŋte fânoc hejareekic,
ehame nore erâ aaricgezi ɋârâŋkeme
kisâfâc‐nane ɋâricne mocwâc bâfuac‐jopaekic.
18 “Go wemocte mana‐naretec
neŋgoc bumaŋkonec fuapo?
No ŋiczi moc mi honecnuhapie
biac hâmozapo me!
19 No neŋgoc bumaŋkonec fuarâ
izia ʒâŋeruŋko huzapo me!
Eme mi fuapo irec sâc eme muzac biaŋkezac.
20 Mâreŋko juju dameŋ‐nane i biac qosackezo ekac,
irec go behecnutec piticne mac juhâmorâ hâmozepac.
21 No dameŋ mi ʒoraha hae mâreŋ dapâc qisiricko
â hâmocte nâkumucko rarâ
mocwâc mi risie‐jâmbâŋkepemu.
22 Hae mâreŋ ira duŋdapâc qisiric
â wiac gâgâpâcne foha tatamaczi omaeme
dapâczi dapâc jaha fohuc juekac.”