9
Hiobezi dâŋ okacne mume arecne jajahec ewec
1 Bilidadizi iŋuc âzâcneme Hiobe e dâŋ okacne kecʒiŋuc bâtikiecnewec:
2 “Eha, dâŋ mukomec i mârâc jaha mana‐fârepo;
mâc ine ŋiczi weniŋuc erâ Anuture maio
bahac fâsâc domaocmu?
3 Me ŋiczi Anutuhec dâŋ mu qaqatarac sâcne eocmu?
Aricne, e Anutuzi wiocneme arecne wâŋ tauseŋ eocmuo
ine okacne mocjaha mac bâtikiecneocte eipieocmu.
4 Manakic, Anutu e maŋɋârâŋ â tâpiri sâkohec juekac,
irec ŋic moczi sanaŋkerâ maŋbâiŋ sâcne mi ecneocmu.
5 E tiki ututuŋ jaha bârâriec‐jopaekac,
ehuc aaricko bâsirowec‐jopaekac.
6 Anutuzi mume homeŋ bame mâreŋzi ɋiɋiteckeekac,
erâ mâreŋte ŋesiŋ i wâc qiriŋ qaekac.
7 Anutu e ʒoaŋ aka hecneme mi wefuocmu,
â bâpiŋ hecke‐jareme mi tamaeniŋmu.
8 E moczi moc bafickeha sambâŋ mi qaratiewec,
erâ temboŋzi huhuckerâ feha
fainao âte sanaŋkehuc rawec.
Eki hâcne bâpiŋ bâfuac‐jopahuc
kecʒiŋuc jaŋe wâc râec‐jopawec:
9 Raru, demeŋ ɋafâc, rowaŋ qosac
erâ juwic mâreŋte bâpiŋ wiac.
10 E wiac qeŋ bipinehec, ŋiczi mi mamana tarane
â mâsi wiac wowosene tâmiric baekac.
11 Manakic, Anutu e nowarume mi ʒâŋitaekopac,
me fâre niniŋkehuc rame mi hone taraekopac wâc.
12 E wiac i me i nâwoc rozo mume
mozi aka hecneocmu?
Me mozi ʒiŋuc moc wiocneocmu:
‘Go wemo wiac ekomec?’
13 “Anuture aariczi biac mi omaekac,
e râsifâc‐ticne jaŋe Rahaba oâ sâkozi
maŋbâiŋ ecneha bafickembiŋte bâsirowec‐jopawec.
14 Anuture fuŋne iŋuc fohame
no weniŋuc erâ dâŋ okacne sâcne bâtikiecnepemu?
15 No bahacmâc juipiehuc
dâŋ okacne bâtikiecnepemurâ eipiekopac,
irec e mumutara‐nane jukacte mana‐nareocte
numucnezo sawa manasukopac.
16 No ere maio fuapemurâ mana‐narezac mecne,
erâ ine sifu dâŋnanere hazec mi mecne râezac.
17 Eki hâcne mume fuŋne tâmiricko
wiac hâhâwicnezi fuarâ sipiricnuekac.
18 E nokafe hezipore aka henareekac,
ehuc wiac enareekac sasawa
izi mamana sâqoc sawa bâfua‐nareekac.
19 No sanaŋkerâ Anutu ʒoɋac sâcne ecnepemu?
Me dâŋgieo râezo mupe mozi sâcne ecneme raocmu?
20 No nahac bahacmâc â siocmâc juekopac,
erâ ine sifu dâŋ mupe sâqoreekac.
No kiŋ tâmiric juekopac,
erâ ine sifu Anutuzi mana‐nareme
kiŋhec jukopac tinac eekac.
21 No bahacmâc juekopac,
erâ ine juju‐nanere manape fârine mi eekac,
irec no ʒuhuckerâ juzore takicnukac.
22 Juju biaŋne me sâqocne i erao fuŋne mocjaha efâreekac,
irec no ʒiŋuc mukopac:
E ŋic bahacmâc â sindaŋne mâmâc bâsirowec‐jopaekac.
23 Ŋic bahacmâc moc e wiac hâhâwicne fuacneme
ututuŋ jaha hâmome
Anutuzi hâhâwic‐ticnere erâ gâwiecneocmu.
24 Anutu e mâreŋ sâko mâreŋ
i ŋic sindaŋne jaŋere meo râewec fokac,
ehuc mumutara ŋic ʒâŋe tiŋtuŋ bacjopawec.
Me Anutuzi wiac i mi ewecko ine mo ŋiczi ewec?
25 “Ŋiczi gasackeeŋgopieŋ irec sâc
ʒoaŋ gie bapa‐nanezi gasackehuc
juju biaŋ moc mi bâbâfua‐nare mâc nowarueŋgopieŋ.
26 Â juju dameŋ‐nane i woke marojâczi bakicnere gasackehuc raekac
irec sâc beraŋnea gasackehuc ratâmireekac.
Pizu pizuzi qâqâc motecne honerâ tara wahaekac irec sâc hâcne.
27 No ʒâic‐nanere nikecnuocte
ʒeri bubiaŋ hawari bâfuarâ dâŋ gâgâwi ezepac.
28 No iŋuc muhape jaha
ʒâic busâqoc‐nanezi mocwâc maicnume ʒiŋuc manaekopac:
Anutu e nore maname kiŋhec ekac.
29 Anutu e nore maname iŋuc ekacte
no wemocte tiŋke biaŋ epemurâ maŋgâŋ giene bapemu?
30 Sâqocne‐nane fokac
i saifezi ʒure bâtâmirec eene mi ekac.
31 Me eene muzac ine Anutu e sifu
sohoŋ dodocko tuŋnume huzapo,
eme ŋaqi qoruc‐nane ɋaɋacne
i mocwâc babajune mi ezac.
32 Anutu e ŋic muzac ine dâŋ okacne sâcne bâtikiecnezapo,
ehame dâŋgie bahuc dâŋnâhec mufâsâezapec.
33 Ʒi ine ŋicŋondeŋ‐nâhec moc mi jukacte
moczi moc Anutu â no
dâŋnâhec sâcne mi mutara‐nâcteocmu.
34 Anutu e ʒuhuckerâ mocwâc mi bâtiŋnuzejec,
e norao wiac hâhâwicne bârârieme omaezejec.
35 E iŋuc eme no maŋnanere fuŋne manakopacte
ere hâhâwic mi bajuhuc dâŋnane sâcne mupemu.