16
Hiobezi dâŋ okacne bâtikie‐jareme arec jahec â jahec ewec
1 Elifaʒizi dâŋ iŋuc âzâcneme Hiobezi dâŋ okacne kecʒiŋuc bâtikiecnewec
2 “No dâŋ keciŋucne mârâc jaha biac mana‐fârepo,
ŋoŋe ine mu bâmiriŋ enarezo muhuc
mâc bâʒâicnuŋgopieŋ.
3 Ŋoŋe dâŋ racne muŋgopieŋ
i wezimucko moc beheniŋmu?
Me wemo wiaczi maŋbâiŋ eŋareha dâŋ keciŋucne
sasawa boc bâtikie‐nareŋgopieŋ.
4 Manaŋgopieŋ, no ŋoŋere sâc jurâ muzac
ine ŋoŋe dâŋ mufâreŋgopieŋ
ijaha wâc muzo murâ muzapo.
Erâ dâŋ muŋgopieŋ irec qâtâc heŋarehuc
dâŋ wokemaŋ bocjaha eŋare raku
dâŋŋeŋic qazo murâ qazapo.
5 Erâ ŋifec ine dâŋ ŋazahuc hâbi sâcne qazu‐ŋarezapo,
ehuc dâŋ murahuc jaha bâmiriŋ‐ŋopazapo wâc.
6 “Eme ʒi dâŋ i me i mupe
ʒâic‐nanezi sifu mi behecnuocmu,
â niniŋkerâ dâŋemâc ŋehuc wâc mi afeckepemu.
7 Anutu e tâpiri‐nane bâomaewec,
ehuc otâ ŋokâfâc‐nane qâhâmoc‐jopawec.
8 E râsi enarehuc ro basanaŋ enarewec,
irec sahac‐nane waha‐fâreme siec sawa ekopac,
â ŋic jaŋe honecnupie kiŋhec jukopac tinac ekac.
9 Anutu e nore aaric manahuc bâsuc qâsucnuekac,
erâ mic kizu‐narehuc ʒâŋe bâbâroŋ honecnuekac.
10 Ŋic jaŋe mu ruruc enareeŋgopieŋ,
erâ orâŋnu‐fârehuc me tatapezi
mauc‐naneo nueŋgopieŋ.
11 Anutuzi ŋic sindaŋne jaŋerao qikiŋnuwec,
â ŋic hehesicne jaŋere meo râecnuwec.
12 No wama faio juhâmopo,
ehame Anutuzi ine upe‐naneo rocnurâ
qa tutuŋ enarehuc qanʒaŋnuwec.
E tepe motec‐ticnezi murucnuocte ma âkendâŋnuwec.
13 E orâŋ bârâŋ enarehuc tepe motec qâtâcneme
sahac‐nane kimârâŋkehuc sipiricke‐fâreekac.
14 E ʒuʒuhuc jaha ʒâpâ nume soc ruahuc foekopac,
e momori ŋic jaŋe râsifâc‐jeŋic jopaeŋgopieŋ
irec sâc enareekac hâcne.
15 No makuc barâ mateŋ qonaŋkerâ jukopac,
erâ tâpiri‐nane omaeme ʒafe ruarâ ŋekopac.
16 No kio wâwâsic epe ʒâŋe mai‐nane bâruŋkewec,
â ʒâŋe hâpi‐nane siwiŋnerâ kitutuckewec.
17 Erâ no wiac sindaŋne moc mi bâfuapo,
â Anuturao nunumu i maŋɋaɋac juhuc numuekopac.
18 “O mâreŋ, go wiac gâgâpâcne maŋgâŋ enarekicne
i mi hesoŋkezemec,
â dâŋnane mutiŋneniŋte kio wâwâsic egarepe
mi bâniniŋnuzemec.
19 Manaŋgopieŋ, sambâŋko mumutiŋ ŋic moc jukac
eki hâcne baficnuhuc
dâŋnane mutiŋne‐jâmbâŋkeocmu.
20 No âgofâc‐nane jaŋe sâke kiki enarehapie
Anutuzi ʒâŋeuc‐nane honehuc
nunumu‐nane manaocte mukopac.
21 Ŋic moczi âgo‐ticne bafickehuc
dâŋgieo dâŋticne dopeckeekac,
irec sâc moczi moc Anuture maio
nore dâŋ dopeckeocte enarekac.
22 No jara‐nane afecne sawa fokac,
i tarame hata rapemu
irecnec mocwâc ririsiene mi fokac.