17
1 “No juju dameŋ‐nane biac qosackekac,
erâ maŋnane wâc omaekac,
ehame ʒâŋeruŋzi sawa woŋec‐nane fokac.
2 Ŋic jaŋe rârec bârârec mu ruruc enareeŋgopieŋ,
ehuc mu âke sisic enarepie honec‐jopaekopac.
3 “O Anutu, no siocmâc jukopacte
dâŋnanere kiwiric nowac roc,
moczi moc dâŋnane sâcne mi dopeckeocmu.
4 Go gahac maŋ mamanasu‐jeŋicte motâc hemeŋ,
irec gokizia aka hejaretec
jaŋe sowine huc ʒâic fuacnekac,
iŋuc munarehuc bubiaŋ mi mananʒepieŋ.
5 Muqâqiŋ dâŋnâŋec moc ʒiŋuc fokac:
Ŋic moczi âgofâc‐ticne moneŋte erâ doc bacjopaocmuo
ine naru motecfâcne jaŋe ʒârâ hâriŋ faio feniŋmu.
6 “Eme ŋic jaŋe muqâqiŋ dâŋ irec manasuhuc mu ruruc enareeŋgopieŋ,
ehuc ʒâŋe mai‐naneo tâfecnueŋgopieŋ.
7 No ʒâic busâqoc faio juhuc ʒâŋe hâpoc tinac ekopac,
â me kike‐nane wâc sisiŋ ekac.
8 Irec tiŋne jueŋgopieŋ jaŋe honecnupie hâhâwicne eekopac,
â ŋic bahac fâsâc jaŋe nore ŋic hehesicne muhuc
mana sâqore‐nareeŋgopieŋ.
9 Ŋic tiŋne jaŋe hata‐jeŋic
paŋʒâic jaha bâjâpeeŋgopieŋ,
erâ bahacmâc jueŋgopieŋ
jaŋe sanaŋ qaŋqaŋkeeŋgopieŋ.
10 Ajoc, ŋoŋe ʒeŋgoma harierâ dâŋŋeŋic mocwâc muzo murâ muniŋ,
ehame no sifu ŋondeŋ‐ŋeŋicko ŋic maŋɋârâŋhec moc mi bâfuapemu.
11 Juju dameŋ‐nane biac wise tâmirewec,
mamana biri‐nane i fâri tâmiric ewec
â woworic‐nane wâc omaewec.
12 Âgofâc‐nane jaŋe ʒiŋuc nazaŋgopieŋ:
‘Dapâczi herisieme tatamac ekac,
irec go tatamaczi maicguzo ekac,’
no ine sifu dapâcko jaha ŋekopac.
13 No hâmoc haere sawa mamanac jukopac,
no ira hâcne hurâ dapâczi foŋnuha fopemu.
14 Ehuc ʒâŋeruŋ ʒiŋuc âzâcnepemu:
‘Go hâcne mamac‐nane,’
â umbeŋzi nâcnuniŋmu jaŋe ʒiŋuc jazapemu:
‘Ŋoŋe hâcne neŋgoc seŋfâc‐nane.’
15 Ehame woworic‐nane wena moc fua‐nareocmu?
Me mozi moc honerâ nowatuocmu?
16 No hâmoc haeo huhape jujure woworic‐nanezi
mocwâc mi bâjâpecnuocmu.”