18
Bilidadizi Hiobe dâŋ okacne bâtikiecneme arec jajahec ewec
1 Eme Suhiŋic Bilidadi e Hiobe dâŋ kecʒiŋuc bâtikiecnewec:
2 “O Hiobe, ŋic go iŋucne jaŋe niniŋkerâ dâŋemâc moc sâcne mi ŋeniŋmu me?
Go dâŋ moc beherâ hazec râehaŋtec dâŋ gazanʒapeŋ me!
3 Go wemocte nâŋere manatec bulimakao jaŋere sâc
mutuc matacne eŋgopeneŋ tinac ekac?
4 Manakic, go gahacne aariczi bâʒâicgukac.
Me mâreŋzi gore erâ tuhutac sâcne fuarâ foocmu?
Me tiki jaŋe gore jâmbâŋ erâ moc ŋerârieniŋmu me?
5 “Ŋic sindaŋnere ʒoc tatamac bâhâponiŋmu,
eme mocwâc mi bâruŋkeocmu.
6 Ficboze‐ticnao tatamaczi herisieme dapâc eocmu,
â lambe‐ticne domakac i ficne hâponiŋmu.
7 E âte sanaŋkeweczi âte qindoc ekac,
â e jahacne dâŋzi bitiŋ ecneha raʒime kikac.
8 E jahacne kikezi ecneme
rândiŋkerâ uficko jowakac,
erâ wâc kike‐ticnezia fâreme nombâŋko hukac.
9 E bitiŋzi kike‐ticne rorâ basanaŋkekac.
10 E wiwitic soŋsoŋko râekicne i bâfuame rokac,
â hatagâŋ‐ticnao nombâŋ ropie hukac.
11 E hata raekac sâc wiac hâhâwicnezi
orâŋ bârâŋ ecnehuc kikeo kikeo ecneekac.
12 E moneŋ mafa sâko focneweczi
nânâre hâmo sipiric ekac,
â sisipiriczi rârec bârârec woŋec‐ticne fokac.
13 Wic ukicneheczi sahac‐ticne sâcke‐fâreme
me kike‐ticne gârecke ʒaŋ ekac.
14 E ficboze‐ticnao juhâmoweckonec fâre ferâ
ŋicwofuŋ moc ʒâŋene Hâmoc ere maŋfuŋko râeŋgopieŋ.
15 Erâ ficboze‐ticne opâsic â saifezi ʒure emasaŋ epie
ŋic furune jaŋe ira ŋec juc eniŋmu.
16 Mâreŋmaŋko gâtâ‐ticne kereŋkeme hâmokac
â tieŋ taeŋnezi ɋaŋa ururuc ekac.
17 Ʒâŋe biŋe‐ticnezi bembeŋko mecne
ʒoricko mecne rârâŋne‐fârekac,
ehame ŋic moczi moc ere mocwâc mi manasukac.
18 E ŋic ŋondeŋkonec tuŋkepie raocmu,
â tatamac‐ticne sârockepie dapâcko huocmu.
19 E ɋâricfâc‐ticne moc mi fuarâ juniŋmu,
â fic hae‐ticnao ʒâŋetucfâc‐ticne wâc omaeniŋmu.
20 Ʒoaŋ wewefunao me huhunao jueŋgopieŋ
jaŋe biŋe‐ticne manarâ
gâgâmârâhuc bipic tatara ejareocmu.
21 Ŋic sindaŋne jaŋe iŋuc hâcne fua‐jareocmu,
jaŋe Anutu tatara ecneeŋgopieŋte
wiac iŋuc hâcne fua‐jareme omae‐fâreniŋmu.”