19
Hiobezi dâŋ okacne bâtikie‐jareme arec memoc ewec
1 Bilidadi e iŋuc mume Hiobezi dâŋ okacne kecʒiŋuc bâtikiecnewec:
2 “Ŋoŋe dâŋ nazahuc bâʒâicnuŋgopieŋ
i wezimucko moc beheniŋmu?
3 Ŋoŋe mu ruruc enarekupie arec 10 ekac,
ehuc musoriŋnuniŋte
sifu mi mimieŋgopieŋ.
4 Manaŋgopieŋ, no wiac hehesicne moc bâfuape muzac
ine bahac i no nahacne biŋe ezac.
5 Ŋoŋe ŋaŋacne ʒiŋuc muŋgopieŋ:
‘Nâŋe e sirickerâ biaŋne juŋgopeneŋ,’
iŋuc muhuc ʒârâ ʒâpâ‐nanere
manapie bahac‐nanere okacne ekac.
6 Wiac ʒi Anutuzi maŋgâŋ bâfua‐narewec,
e bitiŋ râe‐nareme kicnuocte iŋuc ewec
i ŋoŋe mi honeŋgopieŋ me?
7 No bâbâʒâic‐ticnere manape mi sâckeha owacke‐bipieekopac,
erâ dâŋnane mutiŋneocte
wira wâwâsic ecnepe arictac eekac.
8 Anutuzi hata‐nane hebâzickeme razore quŋkekopac,
erâ wâc ekizia mume hatagâŋ‐naneo dapâc fuarâ fokac.
9 E moneŋ mafa‐nane nowac rofârewec,
ehuc ʒâŋe biŋe‐nane wâc bawahame rârâŋnewec.
10 E râpe‐naneo â mai‐naneo rârec bârârec enarehuc nukac,
erâ jâc fârehuc unuckeeŋgopeneŋ
irec sâc jaha mamanac‐nane unuckerâ
behecnume betaŋkerâ hâmozo ekopac.
11 Anutuzi nore aarickeme kimbeŋ‐ticnere ʒocbâruŋ tuŋke‐narekac,
ehuc, râsi‐nane sâqoc qaqocne muhuc mana wahacnukac.
12 E momorifâc‐ticne jaŋe râsi enareniŋte sorec‐jopame
ficboze‐nane râreckehuc teuŋ âterâ somâcnuŋgopieŋ.
13 “Anutu e qomâfâc‐nane ejareme
râpecnurâ taic juŋgopieŋ;
â hone manac enare jumbieŋ jaŋe
mana‐narepie ŋic furune tinac ekopac.
14 Soctofafâc‐nane â âgofâc‐nane
jaŋe behecnu‐fârembiŋ.
15 Iqicnurâ ficnaneo ŋeŋe fofo ejumbieŋ
jaŋe nore nikec‐jopawec,
â kiŋaŋ narufâc‐nane jaŋe nore mafa â jaba
muhuc ʒâŋe ruruŋnueŋgopieŋ.
16 Kiŋaŋ qaqa‐nane wiracnepe dâŋ okacne
mi bâtikie‐nareekac,
â baficnuocte numucnepe qataraekac.
17 Ŋonâŋ‐nane e micâsu‐nanere takickeekac,
â hahac ɋafâc‐nane jaŋe bâec bacnueŋgopieŋ.
18 Naru motec jaŋe qaisocnueŋgopieŋ,
ehuc honecnurâ nifepupu enareeŋgopieŋ.
19 Âgo fuŋfuŋfâc‐nane jaŋe honecnurâ mamakâc‐jopaekac,
â maŋzi ʒâfic‐jopahuc jupo
jaŋe wâc râsi enareeŋgopieŋ.
20 No sahac‐nane waha‐fâreme siec sawa jukopac,
â busâqocko juhape juju‐nane omaezo ekac.
21 Ŋoŋe ine âgofâc‐nane,
irec nore busâqoc moc mananʒapiŋ me!
22 Ŋoŋe Anutuzi fific guguriŋ enarekac
irec sâc jaha wemocte enareŋgopieŋ?
Ŋoŋe bâʒâicnu warembiŋ i manapie mi sâckekac me?
23 “Dâŋ mukopac i moc qâreŋkenʒapiŋ me!
Qâreŋ i papia qizec moc maŋnao râenʒapiŋ.
24 Qâreŋ i aeŋzi qânâ sanaŋko heutuckepie
fofo sanaŋ fohuc juzac me!
25 No manakopac: Fifirue‐nane jukac,
eki hâcne mimic mâreŋ faio domazokac.
26 Eme sahac‐nane ʒaŋke‐fâreha
sahac biuc tâmiric Anutu honezokopac.
27 Riŋnane rorâ domaha honepemu,
nahacne ʒâŋezi honepemu, moczi mâcne.
Bunane bâruŋkerâ afec tâpiacne ekac.
28 Ŋoŋe ʒiŋuc muŋgopieŋ:
‘Nâŋe weniŋuc erâ bâʒâickenaŋmu?’
Erâ ‘Ʒârâ ʒâpâ fuacnekac
irec fuŋne i e jahacnao fokac.’
29 Irec ŋazape mananiŋ:
Ŋic kiŋ iŋucne hureeŋgopieŋ jaŋe ʒikare biŋe,
irec ŋoŋe ʒikare hâwic‐ŋopaoc.
Erâ ʒiŋuc wâc mananiŋ:
Mumutara‐nâŋec moc jukac.”