20
Zofarizi Hiobe dâŋ okacne bâtikiecneme arec jajahec ewec
1 Hiobe e iŋuc mume Namati ŋic Zofarizi dâŋ okacne kecʒiŋuc bâtikiecnewec:
2 “O Hiobe, go dâŋ mutec maŋnane sâqoreme
irec okacne bâtikie‐garepemurâ bunane bâruŋkekac.
3 Go mu bawahac enârehuc dâŋ mukomec irec okacne
gazapemurâ moc mi quŋkekopac.
4-5 Juwicnaonecteaŋ mâreŋko ŋic fuarâ juwefumbiŋ
dameŋ irec maŋnao ŋic sindaŋne jaŋe ʒeri bubiaŋ faio dameŋ ʒora boc mi jujumbieŋ
i go mi manakic me?
6 Jaŋe pepec‐jeŋiczi soka ʒorac erâ feku
sambâŋ âke uaocmu mecne,
erâ soka sanaŋ efeku qizec‐jeŋiczi
karorac heuaocmu mecne,
7 erâ sifu jaŋe jaŋacne ho iŋucne
ʒaŋke omaec eniŋmu,
ehame honec‐jopa jumbieŋ jaŋe ʒiŋuc
mu wioc eniŋmu: ‘Jaŋe wena?’
8 Jaŋe hosâc iŋucne omaeniŋmu,
â guŋ manahuc mana ɋâɋârerâ manapene arictac eekac
irec sâc arictac eniŋmu.
9 Eme honec‐jopa jumbieŋ
jaŋe mocwâc mi honec‐jopaniŋmu,
â ŋec juc eeŋgopieŋ hae irecnec
rârierâ siroweniŋmu.
10 Ehame ŋokâfâc‐jeŋic jaŋe ine ŋic hapetac
hone jauŋ ejareniŋmu,
ehuc mamacfâc‐jeŋic jaŋe ŋic moneŋ mafa
jowac rombiŋ i bârisie‐jareniŋmu.
11 Ŋic sindaŋne jaŋe socɋâri jaŋe iŋucne
sanaŋkerâ tâpirihec eeŋgopieŋ,
erâ sifu dameŋ mi ʒoraha ʒâŋeruŋko huniŋmu.
12-13 “Ŋic sindaŋne e sâqocnere maname
aŋacne eha hesoŋkehuc bajuekac,
erâ aŋac‐ticne manahuc juocte sakareekac.
14 Eme aŋac i hobu‐ticnao hurâ herisiehuc
sopâc homare micopâ irec sâc eekac.
15 E moneŋ mafa wiac fiuc rorâ ɋâckeekac
i Anutuzi ecneme hobu‐ticnaonec
mocwâc wefume maŋuekac.
16 E wiac sâqocne nâkâcneekac
i homare micopâ irec sâc,
irec qotâzi ŋic kicjopame hâmoeŋgopieŋ
irec sâc jaha hâmoekac.
17 E wokemaŋ opâne me baŋac me susu
mâririhec fuame hone aŋac ezacte
aka hecnekicne.
18 E mafa wiac hure hemârec eekac i jâoc roniŋmu,
ehame nareŋ gareŋ ehuc moneŋ mafa bâfuawec
i bubiaŋ manahuc babaju i wâc mi eocmu.
19 E ŋic hapetac bâʒâic‐jopahuc hone qâoma ejarewec,
â ŋic gâcne jaŋere fic wiac kâŋgâc jowac rowecte
iŋuc hâcne fuacneocmu.
20 “Ŋic bu mâmâcnezi wiac sâcticne sirickeha ro qâzuc eekac,
erâ sifu fosanaŋkeme ʒeri bubiaŋ mamana i moc mi eekac.
21 E nânâ âmbâŋ naha tiwâne moc mi foekac,
iŋuc eekacte moneŋ mafa sâko‐ticne omaeocmu.
22 E wiac sasawa mazuc mâriri focne‐bipieha
ʒârâ hâriŋte tâpirizi qa sipiric ecneme arictac eocmu.
23 E wiac i me i nâzo murâ nâzejec,
ehame Anutuzi kimbeŋ â aaric‐ticne
hoŋkeme ere faio feocmu.
24 E aeŋzi ʒika bakicne i wisecneocte muha
tepe motec aeŋ bâbâroŋzi bakicne izi kimârâŋkeocmu.
25 Ehuc bunao raʒirâ râpenao hemârâŋkeme,
tepe motec micnao soc fome honerâ
bipic tatara ecneocmu.
26 Ehame wiac sasawa râe qâzuc ewec
i sipirickerâ omaeocmu,
â ŋicmezi ʒoc mi ruqekicne izi e jahacne mecne
â wiacfâcne mâmâc ʒâseŋ‐jopa‐fâreocmu.
27 Sambâŋzi kiŋticne bataniŋkeocmu,
â mâreŋzi râsi ecnehuc dâŋticne mutaraocmu.
28 Anuture aariczi rumi iŋucne fisicnerâ
moneŋ mafa wiac‐ticne qâurucke‐fâreocmu.
29 Ŋic sindaŋne jaŋe wiac iŋuc hâcne fua‐jareocte
Anutuzi mupaŋkewec.”