21
Hiobezi dâŋ okacne bâtikie‐jareme arec 6 ewec
1 Eme Zofari e iŋuc mume Hiobezi dâŋ okacne kecʒiŋuc bâtikie‐jarewec:
2 “Ŋoŋe hazec râehapie dâŋ ŋazape mananiŋ;
ŋoŋe iŋuc eniŋmuo ine manape bâmiriŋnuŋgopieŋ eocmu.
3 Irec ŋoŋe mana‐narehapie dâŋ ŋazape,
eme mupe tarame ine ʒuhuckerâ
mu ruruc enarezo murâ enareniŋ.
4 No ŋic jaŋehec mu qaqatarac mi ekopac,
erâ ʒi maŋnane omaekac i fuŋnehec.
5 Ŋoŋe moc honecnuniŋ me!
Erâ bipic‐ŋeŋic tarame fâsâerâ ŋeniŋ!
6 No wiac fua‐narewec irec manasurâ
sahac‐nane gâgâmârâha ɋarac ɋarac qakopac.
7 Anutuzi wemocte ŋic sindaŋne jaŋe mana‐jareme
tâpirihec erâ mafa sâkohec juku
ŋicqizec eeŋgopieŋ?
8 Ehame naru motec ŋosafâc‐jeŋic jaŋe wâc
ʒâŋe fai‐jeŋicko biaŋne soka sanaŋ eeŋgopieŋ.
9 Anutuzi ŋic sindaŋne jaŋe mi bâtiŋ‐jopaekac,
â wiacfâc‐jeŋic jaŋe wâc wama faio juhapie
wiac hâhâwicne moczi moc mi sipiric‐jopaekac.
10 Bulimakaofâc‐jeŋic jaŋe
hufiŋne mi juhuc biaŋne fua sawec eeŋgopieŋ.
11 Naru motecfâc‐jeŋic jaŋe
lama motecne iŋucne mamasiri ehuc
kiwac qawac eeŋgopieŋ.
12 Erâ gae woŋgâŋ ehuc kulele fâzeeŋgopieŋ,
â mimi ŋokaczi dâŋeme manarâ ʒeri bari eeŋgopieŋ.
13 Jaŋe juju‐jeŋic wama faio jutaraeŋgopieŋ,
ehuc ʒâic wiac moc mi manahuc hâmoeŋgopieŋ.
14 Ŋic sindaŋne jaŋe Anutu ʒiŋuc âzâcneeŋgopieŋ:
‘Go behec‐nâpoc, nâŋe gore eebapa
hone mana tarac enaŋte takic‐nâpoekac.
15 Bapafâre go mo, irec nâŋe go kiŋaŋ qagarenaŋmu,
me go numu‐garepene
fârine wemo wiac moc bâfua‐nârecmu?’
16 Jaŋe ʒiŋuc hâcne mueŋgopieŋ: ‘Wiac fârine i
nâŋe nâŋâcne tâpirio bâfuaeŋgopeneŋ.’
Irec no jaŋere dâŋzi âgo moc mi enareekac.
17 “Ŋic sindaŋne jaŋere lambe moc ficne hâpokicne me?
Me wiac hâhâwicnezi moc fua‐jareekac me?
Me Anutuzi aaricko qa bâtiŋ moc ejareekac me?
18 Me mâŋâŋzi padi jawa bawiseekac
irec sâc moc ejareme wiseeŋgopieŋ?
19 Ŋoŋe ʒiŋuc muŋgopieŋ: ‘Anutu e naru motec jaŋe
mamacfâc‐jeŋic jaŋere sâqocnere erâ
qa bâtiŋ ejareekac.’
20 Iŋuc mâcne, Anutu e sâqocne bapa
jaŋe jaŋacne bâtiŋ‐jopazejec,
ehame sâqocne‐jeŋicte iŋuc ejareekac
i mana taranʒepieŋ.
21 Ŋic moc e juju dameŋ‐ticne tarazo ehame
naru motecfâc‐ticne jaŋe faicnao juhâmoniŋmu me mâcne
irec mana mezac moc eocmu me?
22 Ŋic moczi Anutu mamana moc sâcne qazucneocmu?
Me Anutu bapafâre ere dâŋ moc
sâcne mutiŋneocmu?
23 Ŋic gâcne jaŋe huc ʒâic
â mana mezac tâmiric
wama faio juku hâmoeŋgopieŋ.
24 Jaŋe biuc wokemaŋ sâkohec,
â siec ɋârâc‐jeŋic fufusuc jaha foha
hâmoeŋgopieŋ hâcne.
25 Â ŋic gâcne jaŋe ine
jujuhâmo moc mi fua‐jareha
ʒaic fâro faio juku hâmoeŋgopieŋ.
26 Erâ ŋic i me i jaŋe mâmâc hâmopie ducjopaeŋgopieŋ,
ehame umbeŋzi fai‐jeŋicko gerec gerec baekac.
27 “Manaŋgopieŋ, no maŋŋeŋicko dâŋ fokac
i manakopac,
â wiac hehesicne enareniŋte dâŋ birickeŋgopieŋ
i kâuc mi bakopac.
28 Ŋoŋe ʒiŋuc muhuc wioŋgopieŋ:
‘Ŋic fekicne ere fic wena?
 ŋic hehesicnezi ŋec juc eekac ere boze wena?’
29 Hae mâreŋ honeniŋte
rac warec ehuc jueŋgopieŋ
ŋic i jaŋehec dâŋ muc manac moc embiŋ me?
Ehuc dâŋ bajueŋgopieŋ
i moc manambiŋ me?
30 Manarâ muzac ʒiŋuc mananʒapiŋ:
Anutuzi aaric faio bâbâtiŋ gie baekac
dameŋ ira ŋic sindaŋne jaŋe ŋezic‐jopaekac.
31 Ŋic sindaŋne jaŋe mozi mai qanʒaŋ jaha
fuŋne‐jeŋic mutaniŋkeocmu,
me wiac hehesicne ebac eeŋgopieŋ
irec okacne bazu‐jareocmu?
32 Ŋic sindaŋnezi hâmome ʒâŋeruŋko reŋke raeŋgopieŋ,
ehuc ʒâŋeruŋ‐ticne hone soŋaŋ eeŋgopieŋ.
33 Erâ ŋic guru sâko jaŋe qâŋɋâŋ‐ticne rame
bâjâperâ raeŋgopieŋ,
ehuc nombâŋko hume aimuŋ jaha hemackeeŋgopieŋ.
34 Ehame ŋoŋe ine weniŋuc enareŋgopieŋ?
Ŋoŋe mumusifuc â dâŋ racne
izi bâmiriŋnuzo eŋgopieŋ,
ŋoŋe dâŋ bâtikie‐nareŋgopieŋ
i burec dâŋ sasawa.”