22
Elifaʒizi Hiobe dâŋ okacne bâtikiecneme arec jahec â moc ewec
1 Hiobe e iŋuc mume Temaŋŋic Elifaʒizi dâŋ okacne kecʒiŋuc bâtikiecnewec:
2 “Ŋiczi Anutu bafickepene erao wiac bibiaŋkene
i moc fokac me?
Aricne, ŋiczi maŋɋârâŋhec juipiehuc sifu
Anutu babafickene i mi fokac.
3 Anutuzi tiŋne jujuge irec maname moc biaŋkeocmu?
Me bahac fâsâc jucmu izi sâcne moc bafickeocmu?
4 Go araŋ bacnehuc juekicte dâŋgieo râecguhuc
qa bâtiŋ egarekac me?
5 Aricne, go hehesicge guru sâko,
â kiŋge tatara tâmiric fokacte iŋuc egarekac.
6 Go qomâfâcge jaŋerao tofage fowec
i bazu‐gareniŋte woŋec juhuc
ŋaqi qoruc wiac‐jeŋic jowac rotec
biuctac erâ jumbiŋ.
7 Go nânâre hâmohuc docke betaŋ embiŋ
jaŋe nânâ opâ jare gumec mi emeŋ.
8 Go ŋic tâpirihec â ʒâŋe biŋehec jumeŋte
mâreŋ furu jaha ro rauc emeŋ.
9 Go hozec jaŋe hone bafic mi ejaremeŋ,
â bekâ mâsiŋ jaŋe bâʒâic‐jopahuc
wâcwiac‐jeŋic jowac romeŋ.
10 Eme irec hâcne wiwiticzi rârecguhuc foha
honerâ ututuŋ jaha bipic tatara egarekac.
11 Tatamacgezi herisierâ dapâc eha
wiac moc mi honekomec,
â opâ rumizi qâurucguzo ekac.
12 “Anutu e sambâŋne sambâŋne jowaru‐fârerâ faic jâmbâŋ jukac,
ehuc bâpiŋ faic jaha ŋeraŋgopieŋ
jaŋerao mi fime wahaekac me?
13 Goki ine ʒiŋuc mu wioc ekomec:
‘Anutuzi wemo wiac moc manaekac?
E karoraczi foŋkeha fimârâŋkehuc honec‐nâporâ
dâŋnâŋec sâcne mutaraocmu me?’
14 Erâ wâc ʒiŋuc manasukomec: ‘E sambâŋ â mâreŋ
jahere ŋoŋondeŋko rac warec ehuc
karorac ɋâfoŋnezi sâockeme mi honec‐nâpoekac.’
15 Go ŋic sindaŋne jaŋe
hata raŋɋa‐jeŋic bâjâpe ware jumbieŋ
ijaha âtecmurâ mukomec me?
16 Manakic, jaŋe dameŋ‐jeŋic mi maickeha omae‐fârembiŋ,
rumizi rocjopame hâmo miziec efârembiŋ hâcne.
17 Jaŋe Anutu ʒiŋuc âzâcnembiŋ: ‘Go behec‐nâpoc,’
erâ ʒiŋuc manambiŋ wâc: ‘Anutu e bapafârezi
juipiehuc iŋuc me iŋuc sâcne mi enâreocmu.’
18 Iŋuc muhapie Anutuzi sifu jaha
mafa mâriri bâfua‐jareme juhâmombiŋ.
No ine ŋic sindaŋne jaŋere dâŋ
mana maŋ mi ezepac.
19 Ŋic sindaŋne jaŋe bâbâtiŋ fua‐jareme
ŋic biaŋne jaŋe honec‐joparâ bubiaŋ manaeŋgopieŋ,
â bahac tâmiric jaŋe gâwie‐iareeŋgopieŋ.
20 Jaŋe ʒiŋuc muhuc iŋuc eeŋgopieŋ:
‘Kisâfâc‐nâŋec jaŋe imac‐jopakicne,
â wiac fojarewec i ʒoczi ʒâseŋke‐fârewec.’
21 “O Hiobe, go manac: Go Anutu râsi mocwâc mi ecnehuc
ehec maŋ mocjaha erâ juzepirec;
go iŋuc etec jambuŋgume juhâc qâhâmocmu.
22 Micticnaonec mu qaqazuc dâŋ wahame manazemec,
ehuc dâŋticne mana maŋ erâ juzemec.
23 Go Anuturao risiehuc maŋhuhuŋ juzemec,
ehuc ficgao wiac hehesicne ebac eeŋgopieŋ
i bârârietec arictac ezejec.
24 Go gol wiac fogarekac i behetec omaezejec,
â Ofiri mâreŋkonec gol i opâo qânâ ŋerakac
jaŋere ŋondeŋko hefacketec rârâŋnezejec.
25 Go Anutu bapafâregere manatec furi sâko ezejec,
eme eki gol â siliwa guru sâko irec sâc egarezejec.
26 Go iŋuc ehuc erao roweckecmuo
ine ʒiŋuc mana taracmu:
Eki hâcne ʒeri bubiaŋ fârine bâfua‐nareekac.
27 Erâ e numucnetec mana‐gareocmu,
â mumupaŋ dâŋ mumeŋ
i wâc soŋaŋkehuc jucmu.
28 Go gie batec fârinehec efâreocmu,
â tatamaczi hatage batamaeocmu.
29 Anutuzi ŋic maŋfefehec bawahac‐jopaekac,
â maŋhuhuŋ jueŋgopieŋ
jaŋe ine bâpiaŋ‐jopaekac.
30 Go bahac tâmiric jucmu
ehuc wiac ebac etec sâckeocmuo
ine Anutuzi ʒârâ ʒâpâonec bataracguocmu.”