23
Hiobezi dâŋ okacne bâtikie‐jareme arec 7 ewec
1 Elifaʒi e iŋuc mume Hiobezi dâŋ okacne kecʒiŋuc bâtikie‐jarewec:
2 “No sifu ʒiŋuczia wâc Anuture manape mi sâckekac,
no kio wâwâsic ehape meticnezi bâmâcnukac jaha.
3 Jai, no wena rarâ e bâfuapemu
i moczi moc nazame manazapo me!
Me e wena jukac i moczi moc nazame
manarâ ra erao fisizapo!
4 Erâ dâŋ bajukopac i âzâcnezapo,
ehuc wiac ebac epe sâckeekac
irec fuŋne wâc mujâmbâŋkezapo.
5 Eme eki dâŋ okacne weniŋuc bâtikie‐narezac
i wâc manazapo.
6 E râsi sâko enarehuc tâpiri‐ticnere fuŋne norao moc bataniŋkezac me?
Aricne, e dâŋ âzâcnehape hazec râerâ dâŋnane manazac.
7 No siocmâc jukopacte Anutuhec dâŋgie sâcne bazapo,
eme eki dâŋnane mutarahuc kiŋnane behe sanaŋkezac.
8 “Manaŋgopieŋ, no ʒoaŋ wewefunao rahuc
Anutu basa‐bipieekopac,
â ʒoaŋ huhunao rahuc babasa gie bape
arictac jaha wâc eekac.
9 Anutu e faic mâreŋko gie bahuc juha
moc mi honeekopac,
me juwic mâreŋko ra juhame
ere ʒâŋe fipe rame arictac eekac wâc.
10 Eki ine hata raekopac sâc i mana‐fâreekac,
irec e moc esâicnuocmuo ine ʒiŋuc honeocmu:
Ŋic e maŋɋaɋac juekac.
11 No ere kike hata bâjâperâ raekopac,
ehuc qanaopec me fâreopec rahuc
hata‐ticne moc mi beheekopac.
12 No mumutâc dâŋticne mana rereŋ eekopac,
ehuc no nahacne maŋte dâŋ mâcne,
ere micdâŋ bâjâpeekopac hâcne.
13 Anutu e ŋiczi iŋuc me iŋuc ecnepene
hec hetikic moc mi eocmu,
e wiac i me i ezo murâ ejâmbâŋkeocmu.
14 E nore dâŋ iŋuc me iŋuc maŋkerâ bajukac
i fârinehec eocte giene baocmu,
erâ nore dâŋ sawa mâcne, e dâŋ wiac
iŋucne gâcne wâc maŋkerâ jukac jaha.
15 No irec hâcne hâwicnume ere maio ɋarac ɋarac qaekopac,
erâ irec manasuhuc maŋnane gâckeekac.
16 Anutuzi bawahacnume hâbi‐nane goroŋkeekac,
e bapafârezi hâhâwic henareme
ʒâic busâqoc faio juekopac.
17 Dapâczi foŋnume wiac moc mi honeekopac i jâmbomac,
erâ i dapâczi mâcne, Anutuzi bâʒâicnume maŋnane omaeekac.