24
Anutu e ŋic sindaŋne hone qâoma ejareekacte Hiobezi maname sâqorewec
1 “Anutu e okac babazure ʒâfo wemocte mi râeekac,
â kiŋaŋ qacneeŋgopieŋ jaŋere dâŋ mutiŋneocte
wemocte dameŋ mi baekac?
2 Ŋic sindaŋne jaŋe mâreŋ‐jeŋic bâsokaniŋte
ma âke sueeŋgopieŋ,
erâ lama fiuc rocjoparâ jaŋacne lamafâc
jaŋehec bâturec‐jopaeŋgopieŋ.
3 Jaŋe bekâ mâsiŋ jaŋere doŋgi kâŋgâc jowac roeŋgopieŋ,
â hozec jaŋe sahac taha‐jeŋic râeniŋte moneŋ basahapie
jaŋere bulimakao sakareeŋgopieŋ.
4 Erâ ŋic qarâ suriŋne hatao bâfuac‐joparâ jâpec‐jopaeŋgopieŋ,
â ŋic hapetac ejarepie wiserâ ra soŋkeeŋgopieŋ.
5 Iŋuc ejarepie hapetac jaŋe jaŋacne â
naru motecfâc‐jeŋic jaŋere nânâ bâfuaniŋte
kâte doŋgi iŋucne mâreŋ burocnao
babasa gie baeŋgopieŋ.
6 Ŋic sindaŋne jaŋe hapetac ʒoɋac ejarepie
gie‐jeŋicko nânâ qa roro eeŋgopieŋ,
erâ waiŋ bâtirikicne i wâc ro nusec eeŋgopieŋ.
7 Jaŋe ŋaqi qoruc‐jeŋic arictacte
ŋafeo biuctac foeŋgopieŋ,
â mâmâteŋ dameŋko bilaŋke rufaniŋte basaeŋgopieŋ.
8 Tikio hoe sâko heekac izi hembânâŋ‐jopaekac,
â fic basahuc ine qânâuŋko jâjâwâckehuc ŋeeŋgopieŋ.
9 Ŋic sindaŋne jaŋe bekâ mâsiŋ
kiŋaŋ qaqafâc‐jeŋic bacjopaeŋgopieŋ,
â qarâ suriŋne jaŋere tofa taraocte
naru motecfâc‐jeŋic rocjopaeŋgopieŋ.
10 Ŋic hapetac jaŋe ŋaqi qoruc tâmiric biuctac jueŋgopieŋ,
erâ bomboŋfâc‐jeŋic jaŋere nânâ qa roro
eipiehuc sifu nânâre hâmoeŋgopieŋ.
11 Jaŋe oliwa hândâŋne bâpisickepie opâne wahaekac,
â waiŋ hândâŋ‐jeŋic âte pisickehuc
sifu opâre wâc hâmoeŋgopieŋ.
12 Haeo hâmozo eeŋgopieŋ jaŋere ki owa fuaekac,
â ʒâpâ jopakicne jaŋe babafic moc fua‐jareocte
wira wâwâsic eeŋgopieŋ,
ehame Anutuzi ine sifu mi mana‐jareekac.
13 “Ŋic gâcne jaŋe tatamac râsi ecneeŋgopieŋ,
ehuc Anuture eebapa hone mana tarac
eniŋte takic‐jopaekac
â hata‐ticne wâc mi bâjâpeeŋgopieŋ.
14 Ʒikaŋic jaŋe ŋic hapetac â qarâ suriŋne
jopaniŋte furic araraŋtea fahareeŋgopieŋ,
â ŋafeo ine ŋic jaŋere wâcwiac fiuckeeŋgopieŋ.
15 Boe sau ŋic jaŋe wâc iŋuc jaha
hae ŋafeocte woŋec jueŋgopieŋ,
ehuc ŋic moczi moc mi hone tarac‐nâpozejec
muhuc ʒâŋe mai‐jeŋic sâockeeŋgopieŋ.
16 Fiuc roro jaŋe ŋafeoa ficmotâc heropierâ wiac fiuc roeŋgopieŋ,
ʒoaŋko ine tatamac dic bacnehuc soŋkeeŋgopieŋ.
17 Jaŋe ʒoaŋ tatamacte hâwic‐jopaekac,
dapâc qisiricte ine manapie âgo babafic‐jeŋic eekac.
18 “Ŋic sindaŋne jaŋe eebapa‐jeŋiczi opâ rumi
iŋucne erâ jowac‐jopame arictac eeŋgopieŋ,
â mâreŋ ruckerâ jueŋgopieŋ i Anutuzi sâweckeekac,
irec hesarac gie baniŋte mocwâc mi raeŋgopieŋ.
19 Maniŋ titikuczi ʒoaŋ fârorocte kereŋkerâ omaeekac,
irec sâc jaha sâqocne bapazi
ŋic jujune jaŋere mâreŋkonec rârâŋneocmu.
20 Eme neŋgoc‐ticnezi mecne, me ŋic gâcne jaŋe mecne
ere mocwâc mi manasuniŋmu,
ehame umbeŋzi nanʒaŋneme arictac eocmu.
21 “E hozec bâʒâic‐jopawecte
â ŋokac hufiŋne hone bafic mi ejarewecte
iŋuc hâcne fuacneocmu.
22 Anutu e mesanaŋ‐ticnezi ŋic tâpirihec
jaŋe bawahac‐jopaekac,
ehuc juju‐jeŋic jowac rome hâmoeŋgopieŋ.
23 Jaŋe Anutuzi wama faio juniŋte
mana‐jarezo murâ mana‐jareocmu,
erâ wâc hata‐jeŋicko rahapie dameŋ sâc
hone jâjâpec‐jopaocmu.
24 Ŋic sindaŋne jaŋe iŋuc ejareme dameŋ bembeŋne mac
gie‐jeŋic bapie fârinehec eocmu,
izi ine ututuŋ jaha hofâ qinʒiŋ
iŋucne ururuckeniŋmu.
Jaŋe sopâc kecɋaŋ qâtâcnepene ɋaŋaekac
irec sâc jaha ɋaŋaniŋmu.
25 Fuŋne iŋuc fokac i mozi mickeocmu?
Me mozi dâŋnanere maname burec eha
dâŋ moc sâcne muocmu?”