26
Hiobezi dâŋ okacne bâtikie‐jareme arec 8 ewec
1 Bilidadi e iŋuc mume Hiobezi dâŋ okacne kecʒiŋuc bâtikiecnewec:
2 “Eha i, no ŋic tâpiri â sasanaŋ tâmiric jukopacte
go sowine baficnucmurâ ʒoɋac sâko ekomec.
3 Jei, ŋic maŋɋârâŋ tâmiric â mutuc matacne no
sowine baficnuhuc mamana sâko tahacnukomec.
4 Erâ go muc: More mârozi maŋgao juhuc baafecguha
dâŋ keci mukomec,
â dâŋ sasawa mukomec i mozi mana‐fâreomu?
5 Hâmoc haezi ɋiɋiteckeekac,
â ŋecjucfâc‐ticne jaŋe hâwic‐jopaha
ɋarac ɋarac qaeŋgopieŋ.
6 Hâmoc hae hâcne i Anuture maio tâtâc fokac,
wiac izi me izi sâcne moc mi sâockeocmu.
7 Anutuzi faic mâreŋte qânikiŋ qaratiewec fokac,
â mâreŋ ine sawao hewec ŋekac.
8 Anutu eki hâcne mume hoe opâzi karorac maŋnao ŋeekac,
ehuc soŋaŋkeha karoracko fusucmarâ sifu mi fâuckeekac.
9 Erâ ekizia wâc mume
mosazi karorac maŋnao soŋkeekac.
10 Eki hâwec qaŋeŋne râehame
dapâc â tatamac âke râwiŋ‐jofawec.
11 Erâ ekizia wâc mume ɋuŋ parandaŋ heme
tiki jaŋe qiriŋ qaeŋgopieŋ.
12 E tâpiri‐ticnezi hâwec bâniniŋkeme benoŋ bawec,
â maŋɋârâŋ focnekacte Rahaba oâ sâko imackewec.
13 Ere micrombâŋzi karorac ficne sueme rahame qânikiŋ fuawec,
â mesanaŋ‐ticnezi oâ sâko keci wisehame qâhâmowec.
14 Manakic, wiac mukopac keci
i tâpiri‐ticnere jauraŋne sawa,
nâŋe dâŋsaŋuc‐ticne sawa manaeŋgopeneŋ.
Tâpiri ɋuŋɋasaŋ‐ticnere fuŋne ine mozi sâcne mana taraocmu?”