27
Hiobezi ŋic sindaŋne jaŋere dâŋ mukac
1 Hiobezi iŋuc jazahuc ʒuhuckerâ dâŋ ʒiŋuc muwec:
2 “Anutu jujune e bapafârezi dâŋnane mi mutiŋnehuc
busâqoc bâfua‐narekac
erao ɋetickehuc dâŋ ʒiŋuc mupaŋkekopac:
3 No nokafe hehuc jufepemu sâc
â Anuture Mâro jujunezi juju bâfua‐nareocmu sâc
4 micnaneonec dâŋ hehesicne moc mi wahazejec,
â nameŋ‐nanezi burecdâŋ moc mi muzejec.
5 No bahacmâc jukopac, iŋuc manapaŋkehuc jufekuhape
hâmoc dameŋ‐nane maickeme ʒiŋuc moc mi ŋazapemu:
Ŋoŋe nore dâŋ muŋgopieŋ i fârine sasawa.
6 Maŋnanezi mumu hehec mi enarekac,
irec no bahacmâc jukopac,
dâŋ i moc mi behe‐jâmbâŋkepemu.
7 “No râsi enarehuc dâŋnane qaeŋgopieŋ jaŋe,
ŋic sindaŋne â kiŋhec okacne fua‐jareekac
sâc ijaha fua‐jarezejec.
8 Anutuzi ŋic hehesicne juju‐jeŋic jowac roha
wemo wiaczi woworic‐jeŋic eocmu?
9 Wiac hâhâwicnezi maic‐jopahame
Anutu wira wâwâsic ecnepie
sâcne moc mana‐jareocmu me?
10 Aricne, jaŋe dameŋ sâc Anutu bapafâre e numucnehuc
ere aŋac manapie muzac sâckezac.
11 Ŋoŋe mana‐narehapie Anutu tâpiri ɋuŋɋasaŋ‐ticnere
fuŋne ŋaza qazuc epemu,
ehuc Anutu bapafâre e dâŋ weniŋucne mana biric ewec
i wâc mutâcne‐ŋarepemu.
12 Opoŋ, ŋoŋe ŋaŋac wiac i hone manac efârembiŋzi
wemocte dâŋ racne keci boc muŋgopieŋ?
13 “Ŋic sindaŋne â ʒâʒâicne jaŋe
Anutu bapafâre eraonec okacne bâbâtiŋ
kecʒiŋuc fua‐jareocmu:
14 Jaŋe ŋokâfâc‐jeŋic bocjaha fuarâ juniŋmu mecne,
erâ sifu ʒikao rarâ hâmo‐fâreniŋmu,
â naru motecfâc‐jeŋic gâcne
jaŋe nânâre hâmo sipiric eniŋmu.
15 Ŋokâfâc‐jeŋic ʒanʒaŋne mac jaŋe ine
huc mimicnezi rocjopame omaepie
hozecfâc‐jeŋic jaŋe ki mamakuc mi ejareniŋmu.
16 Ŋic sindaŋne jaŋe moneŋ wiac rufere sâc fojareha
ŋaqi qoruc wiac‐jeŋic ŋic gâcne jaŋere sâc
sirickehuc bajuniŋmu mecne.
17 Iŋuc fojarehame ŋic tiŋne jaŋe jowac rorâ bajuniŋmu,
â ŋic sioc tâmiric jaŋe moneŋ‐jeŋic bâtâc baniŋmu.
18 Ŋic sindaŋne jaŋe fic baeŋgopieŋ
i ŋeŋe sanaŋ aricne,
i bameŋte qâruru irec sâc,
erâ kiŋaŋ qaqazi gie soŋaŋkeekac
ere boze wamba iŋucne.
19 Jaŋe moneŋ mafa ɋâfoŋne fojareha jufeku
ŋafe mocko waha guŋ foniŋmu,
izi hae fureme faharerâ basaniŋmu.
20 Wiac hâhâwicnezi rumi sâko iŋucne fisi‐jareocmu,
ehame mâŋâŋ ɋicwânʒâŋneheczi
ficne suec‐jopame wise tâmireniŋmu.
21 Â jowareczi wâc iŋuc jaha ficne suec‐jopame
fic hae‐jeŋic beherâ ratâmireniŋmu.
22 Eme wise‐bipiehapie
mâŋâŋzi moc mi akic‐jopahuc imac‐jopaocmu.
23 Ŋic sindaŋne jaŋe iŋuc fua‐jareme ŋic tucne jaŋe,
sowine wiac iŋuc fua‐jarekac muhuc nifepupu ejareniŋmu.