28
Ŋic maŋɋârâŋhec jueŋgopieŋ jaŋere dâŋ
1 “Mâreŋmaŋko siliwa â gol fokac
i ŋic jaŋe wise gufuc ehuc rorâ
ʒocko rike dockepie ɋaɋackeekac.
2 Erâ aeŋ omane â bâbâroŋ iŋuc jaha
mâreŋmaŋko qânâhec bobohotac erâ fokac
i ŋic jaŋe wâc wise gufuc ehuc
rorâ ʒocko rike dockepie wosâeekac.
3 Mâreŋmaŋko duŋdapâc fokac i ŋic jaŋe
lambezi batamaepie omaeekac,
ehame ira qânâ wiac forakac irec fuŋne mananiŋte
wise gufuc ehuc gie sâko baeŋgopieŋ.
4 Jaŋe ŋic jujuo me rac warec eeŋgopieŋko mâcne,
taicko sawa hawec sâko wise gufuc ehuc
repao hurâ qaŋatierâ domahuc
ŋiczi hone manac mi ejarehapie gie baeŋgopieŋ.
5 Mâreŋ fainao nânâ monʒaŋ fuarâ foekac,
â maŋnao wiac foraekac i ine
ʒoczi qânâ ʒâtâcne fâuckerâ foekac irec sâc.
6 Mâreŋ maŋnao qânâ gâcne bâfuaeŋgopieŋ
i qânâ furi sâko,
â qânâo gol uucnezi wâc bohotarâ foekac.
7 “Hawec gufueŋgopieŋ irec maŋne
i piʒu piʒu jaŋe mi honeeŋgopieŋ,
â tucwipe jaŋe wâc irec faicnao mi sâoeŋgopieŋ.
8 Laioŋ jaŋe mecne me qowi momori gâcne jaŋe mecne
mâreŋ ira rac warec moc mi eeŋgopieŋ.
9 “Ŋic jaŋe haroŋaŋ sâko henʒaŋ qanʒaŋneeŋgopieŋ,
erâ tiki fuŋnao wise gufuc epie
tiki jaŋe rândiŋkeeŋgopieŋ.
10 Tiki maŋnao qânâ sanaŋ fokac i gufu koparic ehuc
qânâ furi sâko bâfuaeŋgopieŋ.
11 Erâ opâ hatane hatane i hebâzickehuc
mâreŋ maŋnao wâcwiac soŋkerâ fokac
i wâc bataniŋkeeŋgopieŋ.
12 “Maŋɋârâŋte fuŋne i wenirec bâfuazo?
 mamana tara irec fuŋne i wena fokac?
13 Ŋic nâŋâc irec hata moc mi manaeŋgopeneŋ,
â ŋic jujune nâŋâcne mâreŋko
sâcne mi bâbâfuane.
14 Hâwec ʒâkâŋ sâko fâhâŋnaonec dâŋ ʒiŋuc wefukac:
‘Maŋɋârâŋ i norao bâbâfuane mi ekac.’
15 Maŋɋârâŋ i golzi rorone mi ekac,
â siliwazi furi bapane wâc mi fokac.
16 Maŋɋârâŋ i Ofiri mâreŋko gol fokac
ihec sâc hehene mi ekac,
erâ qânâ furi sâkore furizi
irec sâc wâc mi bâfuakac.
17 Maŋɋârâŋ i gol irec sâc boc sirickekac,
erâ eri wiac gol â galasi furi sâkozi bakicne
irec sâc mâmâc jâurukac.
18 Maŋɋârâŋ i wiac qame hukicne,
qânâ furi sâko fuŋne fuŋne
irec sâc siricke‐fârekac hâcne.
19 Maŋɋârâŋ i wiac qeŋ bipinehec,
irec qânâ furi sâko bâbâŋeŋ
me gol ɋaɋacne ihec sâc hehene mi ekac.
20 “Hâc, eme maŋɋârâŋ i wenirec fuaekac,
â mamana tara irec fuŋne wena fokac?
21 Wiac jujune jaŋe sâcne mi honeeŋgopieŋ,
â sawa wipe jaŋe fururuc qahuc
wâc mi honeeŋgopieŋ.
22 Erâ hâmoc â sisipiric jahe ʒiŋuc mukopirec:
‘Nâhe irec biŋe bâroŋ sawa manaekoperec.’
23 “Anutu e irec fuŋne buc manaekac,
â maŋɋârâŋ wena bâbâfuane
i eki wâc buc manaekac.
24 Eki hâcne ʒâŋe fime rame mâreŋ qaŋeŋne honeekac,
â sambâŋ rurumaŋnao wiac sasawa fokac
i hone‐fâreekac wâc.
25 Eki hâcne mâŋâŋ tâpiri‐ticne râcnewec,
erâ hâwec sâcticne wâc mutâcnewec.
26 Erâ ekizia wâc hoezi wena heocte mupaŋkewec,
â karoraczi gâpâreha bâbâriczi
ɋuŋ parandaŋte hata baocte mucnewec.
27 Anutu e dameŋ ira hâcne maŋɋârâŋte
fuŋʒuhucne hone tararâ bataniŋkewec,
erâ basanaŋkehuc irec fuŋne mutaniŋkewec.
28 Ehuc ŋic kecʒiŋuc jazawec:
‘Manaŋgopieŋ, Wofuŋ araŋ babacne
izi maŋɋârâŋ fârine,
erâ hehesic râpeckerâ juju
izi mamana tara fârine.’ ”