34
Elihuzi Anuture maname sâckewec
1 Elihu e ʒuhuckerâ dâŋ kecʒiŋuc muwec:
2 “O ŋicbureŋ, ŋoŋe ‘Maŋɋârâŋhec juŋgopeneŋ’
iŋuc muŋgopieŋte ʒi dâŋnanere hazec râeniŋ.
3 Nâŋâc nânâ wiac nâhonehuc, biaŋne me sâqocne
irec fuŋne mana taraeŋgopeneŋ;
iŋuc jaha ŋoŋe wemocte dâŋ moc manahuc,
i maŋɋârâŋ dâŋ me mâcne
irec fuŋne mi mana taraŋgopieŋ?
4 Irec ʒi dâŋ fuakac i biaŋne me sâqocne
i mana wosâc erâ fârine mutaniŋkenaŋ.
5 Hiobe e ʒiŋuc mukac: ‘No bahacmâc jukopac,
ehame Anutuzi ine sifu dâŋnane mi dopeckeekac.’
6 E ʒiŋuc hâcne mukac: ‘No burec ehuc,
bahac bâfuapo iŋuc wemocko mupemu.
No bahacmâc juhape sifu huc wic
bâbâsomiene tâmiric fua‐narewec.’
7 Ŋoŋe ŋic Hiobe iŋucne moc honec‐jopa jumbieŋ me?
E Anutu araŋ moc mi bacneekac.
8 E ŋic sindaŋne jaŋere guruo juocte aŋackeekac,
ehuc ŋic hehesicne jaŋere hata wâc âteekac.
9 E ʒiŋuc hâcne muekac:
‘Ŋic moc e Anuture dâŋ mana rereŋ eocmu
e wiac fârine i me i moc mi bâfuaocmu.’
10 “Ŋic mamanahec ŋoŋe irec hâcne dâŋnanere hazec râeniŋ:
Anutu bapafâre erao eebapa sindaŋne â hehesicne moc mi fokac.
11 E ŋic nâŋâc wiac ebac eeŋgopeneŋ
irec katucne bazu‐nâreekac,
ehuc juju bapa‐nâŋecte sâcko furine nâreekac wâc.
12 Jâmbomac, Anutu bapafâre e wiac sindaŋne moc mi eekac,
erâ dâŋnâŋec moc mi muhasickeekac.
13 Anutu e mo ŋic mozi tâpiri bâfuacnewec?
Me mozi mâreŋ sâko mâreŋ irec guriŋ bapa âkendâŋnewec?
14 Anutu e jahacne sawa manasuhuc
juju bâbâfua Mâro‐ticne nâwoc rome muzac
15 ine ŋic nâŋâc ʒeŋgoma hâmorâ
mocwâc gâc wândoc efârenʒapeŋ.
16 “Ŋoŋe maŋɋârâŋhec juŋgopieŋko
hazec râehapie dâŋ ŋazape mananiŋ.
17 Anutu e mumutiŋ dâŋ qaisockehuc guriŋ bapa gie baekac,
ŋoŋe iŋuc muhuc tiŋne â tâpiri rune qorickezo muŋgopieŋ me?
18 Anutuzi hâcne ŋicwofuŋ â guriŋ bapa ŋic
fekicne gâcne jaŋe
sindaŋ hârindaŋ ehuc bâbâsifuc gie bapie
mana‐jareme gâpâreekac.
19 Eki ŋic ʒeŋgoma bâfuac‐nâpowecte
ŋic fekicne me moneŋ mafa sâkohec jaŋere maname feha
hapetac jaŋere maname wawahane moc mi eekac.
20 Jaŋe ŋafeo ututuŋ jaha hâmoniŋmu.
Anutu e ŋafe ʒâŋiŋkoa fisi‐jareme siroweniŋmu,
e gie sâko moc mi bahuc acmâc jaha jopaocmu hâcne.
21 “Ŋic nâŋâc hata raeŋgopeneŋ
i Anutuzi hone‐fâreekac.
22 Ŋiczi dapâc qisiric maŋnao raʒirâ
Anuture maio soŋkerâ juju i moc mi fokac.
23 Ŋic nâŋâc Anuture maio fuapene
dâŋnâŋec mutaraocte ʒâfo moc mi banâreekac.
24 E ŋic tâpirihec mu indiŋ boc mi ejarehuc
mâc bârâriec‐jopaekac,
ehuc âkehocfâc‐jeŋic râec‐jopaekac.
25 E eebapa‐jeŋicte fuŋne hone mana tarac eekacte
ŋafeoa tuŋjopahuc qanʒaŋ‐jopaekac.
26 E ŋic sindaŋne jaŋe
ŋic gâcne jaŋere ʒâŋe faio imac‐jopaekac hâcne.
27 Jaŋe Anutu bâjâpeniŋte takic‐jopame behembiŋ,
â sâcmutâc dâŋticne râpeckembiŋte iŋuc ejareekac.
28 Jaŋe ŋic qarâ suriŋne qa bâʒâic ejarepie
Anutu kio wâwâsic ecnepie
wira wâwâsic‐jeŋic manawec.
29 E ŋic nâŋâcne wira wâwâsic mi manaocmuo
ine mozi dâŋ moc sâcne mucneocmu?
 ʒâŋe mai‐ticne bâsoŋke‐nâreocmuo
ine ŋic mocjaha me guru sâkozi sâcne mi honenaŋmu.
30 Ehame ŋic ʒâʒâicne jaŋe guriŋ bapa gie bahapie
aka wâc sâcne mi hejarenaŋmu.
31 “Hiobe, go Anuturao sâqocnege mufuahuc
sâqocne mocwâc mi bacmurâ mupaŋkemeŋ me?
32 Go Anutuzi bahacge gaza gowatuc eocte moc numucnemeŋ?
 wiac hehesicne râpecke‐fârecmurâ musanaŋkemeŋ me?
33 Anutuzi wiac ebac eekac irec manatec mi sâckeha
eki gore dâŋ reŋkehuc wiac ebac eocte mukic me?
Erâ i nore wiac mâcne, i gore wiac,
irec maŋgao dâŋ fokac i nâzâzemec.
34 Ŋic mamanahec jaŋe dâŋnanere manapie sâckeocmu,
â ŋic maŋɋârâŋhec jaŋe nore dâŋ manarâ ʒiŋuc muniŋmu:
35 ‘Hiobe e ŋic mutucne jaŋe dâŋ mueŋgopieŋ
irec sâc mukacte fâri tâmiric efârekac.’
36 Irec ŋoŋe dâŋticne mana wosâc ehuc ʒiŋuc mananiŋmu:
E ŋic sindaŋne jaŋe dâŋ mueŋgopieŋ
irec sâc jaha mukac hâcne.
37 E sâqocne‐ticne râpeckeocte mi ecnekac,
irec ʒâŋe fai‐nâŋecko âke sisic dâŋ muhuc
Anutu maŋbâiŋ ecnekac.”