35
Elihu e ʒuhuckerâ dâŋ mume arec jahec â moc ewec
1 Elihuzi ʒuhuckerâ dâŋ kecʒiŋuc muwec:
2 “O Hiobe, go ‘Anuture maio bahacmâc jukopac,’
iŋuc mutec mi sâckekac.
3 Me Anutu ʒiŋuc wiocnetec wâc mi sâckeocmu:
‘Nore sâqocnezi go wiac moc sâcne egareocmu me?
No sâqocne tâmiric juhape
wiac biaŋne moc mi fua‐narewec i.’
4 Irec ʒiŋuc manac: Go â âgofâcge ŋoŋe mâmâc
dâŋ okacne bâtikie‐ŋarezo ekopac.
5 Faic qânikiŋ fokac ira ʒâŋe fitec feoc,
erâ karoraczi gowaru ferâ fokac
i wâc honezemec.
6 Irec go iŋucnezi sâqocne bahuc
Anutu wemo wiac moc ecnecmu?
Me hehesic bocjaha bâfuahuc
e sâcne moc bawahacmu me?
7 Go tiŋne juhuc Anutu wiac mocte
sâcne moc bafickecmu me?
Aricne, e goraonec wiac i me i
moc roocte mi muekac.
8 Go sâqocne bahuc ŋic âgofâcge
jaŋe hâcne bâʒâic‐jopacmu,
â wiac biaŋne ebac ehuc
jaŋe hâcne bafic‐jopacmu.
9 “Ŋic jaŋe fific guguriŋ faio juhuc
kio huse eeŋgopieŋ,
ehuc, moczi bafic‐nâpozejec muhuc
wira wâwâsic eeŋgopieŋ.
10 Ehuc ine dapâc qisiricko juhuc
Anutu bâbâfua‐jeŋiczi bafic‐jopaocte
tâpiri focneekac e mi riwaseckeeŋgopieŋ.
11 Jaŋe iŋuc ehuc Anutu maŋɋârâŋ tahac‐nâpome
wipe qowi jaŋere sâc jâuruŋgopeneŋ
e mi numucneeŋgopieŋ.
12 Jaŋe maŋfefe ehuc ŋic sindaŋne jueŋgopieŋte
babafic fua‐jareocte kio wâwâsic ehapie
Anutuzi mi bafic‐jopaekac.
13 Anutu e bapafâre runezi
ŋic iŋucne hone manac mi ejareekacte
wira wâwâsic ecnepie fâri tâmiric eekac hâcne.
14 O Hiobe, go ‘Anutu mi honeekopac’ mukomeczi
sifu rumerâ ere woŋec juzemec,
gore dâŋ erao fokac.
15 Go ʒiŋuc hâcne manasuhuc jukomec:
Anutu e mi bâtiŋ‐nâpoekac
erâ sâqocne bapene iŋuc me iŋuc
wâc mi enâreekac.
16 Go iŋuc muhuc fuŋne mi mana tarahuc
dâŋ kosa murakomec,
irec ʒuhuckerâ dâŋ mutec fâri tâmiric
jaha eocmu i tâtâc fokac.”