36
Elihu e Anutu fekicne juju‐ticnere mumbiaŋkewec
1 Eme Elihuzi ʒuhuckerâ Hiobe dâŋ kecʒiŋuc âzâcnewec:
2 “Go mi takicguha ʒuhuckerâ hazec râezemec,
ehame no Anuture micte dâŋ gazape manazemec.
3 No ŋic mamana sâkohec jukopacte
mamana fonarekac irec sâcko dâŋ muhuc
Anutu bâbâfua‐nane e tiŋne rune jukac
irec fuŋne mutaniŋkezepac.
4 No ŋic maŋɋârâŋheczi gore maio domape honecnukomec,
irec no dâŋ gazakopac i fârine sasawa.
5 “Manakic, Anutu e tâpiri sâko‐ticnehec,
erâ mamana tara â maŋɋârâŋ irec fuŋqizecne jukacte
ŋic kosa behe qaisoc mi enâreekac.
6 E sâqocne bapa mi akic‐jopaekac,
ŋic tac qararacne jaŋere dâŋ ine
mutiŋnehuc dopeckeekac.
7 E ŋic tiŋne ŋezic‐jopaekac,
ehuc mana‐jareme ŋicwofuŋ jaŋe iŋucne
gie‐jeŋic bahuc juhapie
ʒâŋe biŋe‐jeŋic fuarâ raŋɋa raŋɋa foekac.
8 Me ŋic jaŋe sâqocne‐jeŋicte
kâpâcwâru ficko ferâ ŋehapie
9 Anutuzi eebapa‐jeŋic sâqocne â qaqatara
erâ maŋfefe‐jeŋicte fuŋne bataniŋkeekac.
10 Ehuc uŋsawaŋ dâŋticnere hazec râehuc
hehesic‐jeŋic râpeckeniŋte fânoc hejareekac.
11 Ehame jaŋe Anutu dâŋticne mana rereŋ ehuc
kiŋaŋ qacneniŋmuo
ine wama faio juhâc qâhâmohapie dameŋ‐jeŋic taraocmu.
12 Me dâŋticne mana rereŋ mi eniŋmuo
ine ŋic mutucne jaŋe iŋucne hâmorâ
hâmoc haeo huniŋmu.
13 “Ŋic hehesicne jaŋe aariczi aaric bâfuaeŋgopieŋ
ehuc Anutuzi qa bâʒâic ejareme
maŋjeŋic bârisiehuc bafic‐jopaocte
wira wâwâsic mi ecneeŋgopieŋ.
14 Sasecte ʒoczi ŋic ʒacjopame hâmoeŋgopieŋ
irec sâc jaha jaŋe socɋâri juhuc juju‐jeŋic omaekac.
15 Anutuzi ŋic jaŋe fuŋne‐jeŋic mana taraniŋte
ʒârâ ʒâpâ faio râec‐jopaekac,
â ʒârâ hâriŋ bâfua‐jarehuc
maŋhazec‐jeŋic bâuŋtoekac.
16 Anutu e go iŋuc jaha
ʒârâ hâriŋkonec bataracgume
mârâc jaha mazuc mâriri fogarewec
irec sâc mocwâc fua‐gareme wama faio
juhâc qâhâmocmurâ manasuhuc jukac.
17 “Ehame goki ine ŋic sindaŋne jaŋere sâc ehuc
dâŋ muhasickekomecte
okacne fua‐garekac hâcne.
18 Go aariczi maŋge fusucmame mu âke sisic ezicte
â moneŋ mafazi fârecgume hata qâsoriezicte
rucge bahuc juzemec.
19 Wira wâwâsicgezi fâri tâmiric eocmu
â go gahacne tâpirizi wâc sâcne mi baficguocmu.
20 Go hae ŋafeocte boc mi hejâpezemec,
ŋafeo hâcne ŋicne ŋicne jaŋe
sipiricke‐fâreeŋgopieŋ.
21 Irec go aimuŋ juhuc
ŋic sindaŋne jaŋere hata mi âtezemec,
hata iŋucnao razicte hâcne
ʒârâ hâriŋzi fua‐garewec.
22 Manakic, Anutu e tâpiri sâko‐ticnehec,
e qaqazu sasawa jowaru‐fârehuc fekicne sâko jukac.
23 Mo ŋiczi Anutu eebapa‐ticnere dâŋ mutâcnecneocmu?
Me mozi ʒiŋuc sâcne âzâcneocmu:
‘Go wiac ebac etec sâqoreekac.’
24 “Irec go manac: Ŋic jaŋe juwicnaonecteaŋ
Anutu muteŋke wefuhuc jumbiŋ,
go irec manasuhuc iŋuc jaha wâc muteŋkezemec.
25 Anutuzi wiac ebac ewec sasawa
i ŋic jaŋe hone‐fârembiŋ,
mocjaha, mamana tara ine sifu mi mana tarambiŋ.
26 Manakic, ŋic nâŋâc Anutu fekicne
juju‐ticnere fuŋne mi manaeŋgopeneŋ,
â jara dameŋ‐ticne i wâc wowosene tâmiric.
27 Anutu eki hâcne mume mâreŋ â hâwec
jahere rombâŋzi sawao feekac,
izi ine herisierâ hoe eekac.
28 Erâ ekizia mume hoezi karorac maŋkonec waharâ
ŋic nâŋâc ʒeŋgoma heŋgumuŋ‐nâpoekac.
29 Karoraczi weniŋuc erâ rac warec eekac,
â ɋuŋ parandaŋzi weniŋuc erâ herâ fârehuc raekac
i ŋic nâŋâc moc mi mana taraeŋgopeneŋ.
30 Erâ ekizia wâc mume bâbâriczi sawa hetâcnerâ tamae raekac,
ehame hâwec fâhâŋnao sifu dapâc qisiric jaha fokac.
31 E iŋuc ehuc ŋifec ŋic nâŋâc okacne bazu‐nâreekac,
â ŋifec ine nânâ opâ aameo tahac‐nâpoekac.
32 E mejahec‐ticnezi bâbâric basanaŋkeha
hata‐ticnao jaha bâricnehuc raekac.
33 Ehame ɋuŋ parandaŋzi fuŋne‐ticne ʒiŋuc bataniŋkeekac:
E wiac sindaŋne sasawa i honehuc bune qâʒâfickeekac.