37
1 “Wiac iŋucne fuame hâcne buhândâŋ‐nanezi
fâfârerâ ɋarac ɋarac qaekac.
2 Oi, ŋicbureŋ, ŋoŋe sasawa Anutu marac fânâŋ‐ticnere hazec râeniŋ,
ehuc micticnaonec parandaŋ fânâŋ wahaekac i wâc mananiŋ.
3 Eki hâcne mume bâbâric‐ticnezi
mâreŋ qaŋeŋne ŋifeckonec
sawa hetâcnehuc ŋifecko ra qataraekac.
4 Bâbâriczi iŋuc ehame Anutu marac fânâŋ
sâko‐ticnezi jai jowarecko rame
micʒonʒoŋ‐ticne mana‐fâreeŋgopeneŋ,
ehame bâbâriczi sueme sue bâricne raekac.
5 Anuture micte wiac fuaekac
i hone wawarecnehec,
erâ i ŋiczi mi mamana tarane.
6 Eki hâcne mume mâreŋko sinou wahaekac,
erâ wâc ekizia mume hoe micsâko heekac.
7 E iŋuc ehuc ŋic ʒeŋgoma giere aka henâreekac,
ehame ŋic bâfuac‐nâpowec
nâŋâc ʒiŋuc mana taraeŋgopeneŋ:
I Anuture gie hâcne.
8 Wiac i fuame qowi jaŋe wiwiri hawec‐jeŋicko
ra soŋkerâ ŋec foc eeŋgopieŋ.
9 Mâŋâŋ ɋicwânʒâŋneheczi
tiki mâreŋkonec wahaekac,
â mâŋâŋ mâmâteŋ sâko‐ticnehec
i wâc tiki mâreŋkonec jaha fisiekac.
10 Anuture micrombâŋzi aisi bâfuaekac,
ehame opâ jaŋe sanaŋke‐fâreeŋgopieŋ.
11 Erâ Anutuzia wâc mume hoe heocte
karoraczi gâpâreekac,
ehame karoraczi bâbâric‐ticne
bârâwiŋneme sâcke‐fâreekac.
12 Karoraczi Anuture mic reŋkerâ
ririsiehuc rac warec eekac,
ehuc mâreŋ ira me ira fuarâ
Anutuzi gie mutâcnecneekac i bafâreekac.
13 Anutu e ŋic nâŋâc dameŋ mocko bâtiŋ‐nâpoocte,
â dameŋ mocko ehâmo‐nâreocte
mume mâreŋko hoe heekac.
14 “O Hiobe, go ʒiŋuc manac:
Anutuzi wiac qeŋ bipinehec ebac eekac
i moc hone warec ezemec.
15 Anutu e weniŋuc erâ wiac i jaŋe giedâŋ mujareekac,
ehuc bâbâric mucneme karorac maŋkonec
waharâ tamaehuc raekac,
i go moc manaekic me?
16 Me Anutu e wiac bapa sariczi karorac bâfuame
weniŋuc erâ faic sawao ririsiehuc rac warec eekac
irec fuŋne go wâc manaekic me?
17 Aricne, go jowarec mâŋâŋzi
qahuc hae mâreŋ qâkereŋkeme
fâroroc‐ticnere fofoŋac hecmu sawa.
18 Go Anutuzi sambâŋ qaratieha sâcne bafickecmu,
me aeŋ wiac rike sueŋkepene sanaŋkeekac
irec sâc sambâŋ batec sanaŋkerâ foocmu me?
19 Maŋnâŋec omaeha dâŋ munaŋte quŋkeŋgopeneŋte
Anutu wemo dâŋ moc âzâcnenaŋmu
i goki qazu‐nârec.
20 No Anutuzi dâŋnane manaocte
mocwâc mi numucnepemu,
no iŋuc epe imacnuzacte hâwicnume
behekopac hâcne.
21 “Mâŋâŋ qahuc karorac ficne sueme
tâtieha qânikiŋ fuame
ʒoaŋ ʒâziriŋko fipene ʒâŋe‐nâŋec âke hâpome
fiqe ruruc eeŋgopeneŋ.
22 Faic mâreŋkonec furic râehame ware fisikac,
ehame Anutu huriri saŋguac â huriri
bojac bojac‐ticne hone ʒâireŋgopeneŋ.
23 Anuture tâpiri i qeŋ bipinehec,
irec ere maŋfuŋko sâcne mi ra fisinaŋmu,
e tiŋne rune jukacte
ŋic dâŋnâŋec mutiŋne‐fâreekac.
24 Ehame, ‘nâŋe maŋɋârâŋhec juŋgopeneŋ’, iŋuc mueŋgopieŋ
ŋic i jaŋe hone takic ejareekac.
Irec ŋic nâŋâc ʒeŋgoma ere hâwic‐nâpozejec.”