38
Anutuzi fuŋkerâ dâŋ muhuc Hiobe mutuc‐ticnere fuŋne bataniŋkewec
1 Eme Wofuŋ e ʒâʒâkiriŋ mâŋâŋmaŋko juhuc Hiobe dâŋ kecʒiŋuc mu wioc ecnewec:
2 “Go mo ŋic mo irec maŋɋârâŋ‐nanere manabâc ekomec?
Manakic, go iŋuc ehuc mutucgere fuŋne sawa bataniŋkekic.
3 Irec go ŋic jâmbâŋ jukomecko faharerâ bifuŋge jomac,
ehame no dâŋ mu wioc egarepe okacne bâtikie‐narec.
4 “Go wena juhaŋtecne mâreŋ bâfuapo?
Irec go mamana sâko moc fogarekacko nazac.
5 Mozi sosoka‐ticnere sâc moc mutâcne‐narewec,
me mozi sâcticne manaocte mucsâc fârewec?
6-7 Wâtuŋ wiac‐ticne i wemo wiaczi dopeckeme qiŋ herâ domakac?
Me mozi bâpiŋ jaŋe ʒeri gae hehapie
â Anutu aŋelofâcne jaŋe kiwac qawac ehuc semuja hehapie
jâmâ wâtuŋ‐ticne râeme huwec?
8 “Hâwec sâko e mâreŋmaŋkonec qâcqâc qahuc wefume
mozi fofo‐ticnao foocte kanaŋ hecnewec?
9 Noni hâcne hâweŋzi foŋkehuc
karoraczi rufacnepo.
10 Noni hâcne hâwec maticne bafârepo,
ehuc motâc hecnehuc basanaŋkepo.
11 Erâ wâc nonizia ʒiŋuc âzâcnepo:
‘Go ʒira ware mickezemec,
ʒira hâcne siri sâkogezi bazuhuc fozejec.’
12 “O Hiobe, go ɋiegaonecteaŋ fuŋkerâ juwefuhuc
mutec hae moc furewec me?
13 Me goki mutec hae fureme
tatamaczi mâreŋ sâcke‐fâreha
ŋic sindaŋne jaŋe haesoŋ‐jeŋickonec moc wahambiŋ me?
14 Ʒoaŋ tatamacko mâreŋ wâcne facne jaŋe
qoruc hawari biaŋ irec sâc fua tâcneeŋgopieŋ.
15 Ʒoaŋte tatamaczi ŋic sindaŋne batamaec‐jopahame
gie‐jeŋic sâqocne baniŋte quŋkeeŋgopieŋ.
16 “Go hâwec ʒâkâŋ maŋnao hurâ
hâwec ʒâŋene moc honemeŋ,
me hâwec fâhâŋnao rac warec moc emeŋ me?
17 Me hâmoc hae dapâc qisiric sanaŋ‐ticnehec
irec motâc i ŋic moczi moc gowatuwec me?
18 Mâreŋ sâko mâreŋ irec sâc weniŋuc fokac
i go moc manakomec me?
Go wiac mukopac sasawa
irec fuŋne moc manakicko
dâŋ okacne bâtikie‐narec.
19 “Ʒoaŋ tatamac i wenirec ware fuaekac,
â dapâc qisiricte qizecne wena fokac
i go moc manakomec me?
20 Jahe wena ra mickenicmu
i goki sâcne jasa jofatuc ecmu?
Me sâcne bârisiec‐jofacmu?
21 Go wiac i sâcne efârecmu, i no manakopac,
go ʒiŋuczia ŋicqizec jâmbâŋ jukomec,
erâ go juhaŋtecne jaha
mâreŋ sâko mâreŋ bâfuapo i!
22 “No sinou â aisi hândâŋ râe guruc eekopac
situâc ficnane i go moc ra honemeŋ me?
23 No wiac i ʒârâ hâriŋ â ʒika dameŋte biŋe
bâmockerâ râe guruc eekopac hâcne.
24 Ʒoaŋ wefuekac â mura mâŋâŋzi fuŋkerâ qawareku fisiekac
go hae hata ira moc rameŋ me?
25 “Mozi hoe micsâkore wâc moc bawec,
me mozi ɋuŋ parandaŋte hata bâʒâwewec?
26 Me mozi mume
hoezi ŋic mi jujuo tuhu mâreŋko heekac?
27 Me mozi mâreŋ hâfu roroc ekicne
i bâgunuckeme sopâc kecɋaŋ wefuekac?
28 “Hoere mamac moc jukac me?
Me mozi maniŋ titikucte mamac bâbâfua ekac?
29-30 Aisi â titikuc i mo neŋgocte bumaŋkonec fuame
opâ sasawa jaŋe sanaŋkerâ qânâ iŋucne eeŋgopieŋ
â hâwec fainezi aisi efâreekac?
31 “Go demeŋ ɋafâc jaŋe sâcne dâtâc‐jopacmu?
Me bobiri ʒâʒâfic‐ticne sâcne goroŋkecmu me?
32 Goki mutec bâpiŋ sasawa
jaŋe dameŋ‐jeŋicko fua soŋ eniŋmu?
Me mombaŋ bâpiŋ neŋgoc motec jaŋere hata
sâcne jaza jowatuc ecmu me?
33 Go karoracte mumutâc fokac i moc manakicko
ine mutec mâreŋte biŋe wâc sâcne eocmu me?
34 “Go karorac giedâŋ mucnetec gâpârehuc hoe erâ
waha sâcne hembânâŋguocmu me?
35 Me bâbâriczi bâricneocte âzâcnetec
sâcne waha fua‐garerâ ʒiŋuc gazaocmu:
‘No gore kiŋaŋ qapemurâ warekopac hâcne?’
36 Opâ rumi fisiocmu i mozi gararaweŋ wipe
jazame manaeŋgopieŋ?
Me hoe heocmu i mozi qâqâc ŋicne jaŋe
mufua‐jareme manaeŋgopieŋ?
37 Maŋɋârâŋhec moczi karorac sâcne woseocmu me?
Me mozi karorac herisierâ hoe hoŋkeme wahame
38 mâreŋzi qâhâckerâ bobohotac eekac?
39-40 “Laioŋ jaŋe qânâ hawec‐jeŋicko fohapie
me sopâc uupicko ruc bahuc juhapie
kâcɋene jaŋere nânâ sâcne bâfuacmu
me laioŋ motecne jaŋe nânâ gumec‐jopatec
nâ gapec sâcne eniŋmu me?
41 Kâec kâec jaŋe nânâre hâmohuc
sawao rac warec ehapie
me motecfâc‐jeŋic jaŋe nânâre numu‐narepie
mozi nânâ wiac‐jeŋic bâfua‐jareekac?