39
Hiobe fuŋne‐ticnere babataniŋ dâŋ jaha
1 “Kâte noniŋ jaŋe mo dameŋko motec rocjopaeŋgopieŋ
i go moc manakomec me?
Me kâte bulimakao jaŋe motec rocjopahapie
moc honec‐jopaekic?
2 Jaŋe mosa wezimuc kiwec‐jopa juku
motec rocjopaeŋgopieŋ,
go irec dameŋ moc manakomec me?
3 Jaŋe waha fohuc motec rocjoparâ
izia mocwâc âke mâteŋ‐jopaekac.
4 Eme motec jaŋe neŋgoc mamac jaŋehec kâteo juhuc
soka sanaŋ erâ behec‐jopa wiseeŋgopieŋ.
5 “Mozi kâte doŋgi rambaŋko râec‐jopawec,
me mozi firuec‐jopame kosa
rac warec eeŋgopieŋ?
6 Noni hâcne mâreŋ burocnezi fic hae‐jeŋic
eocte ira râec‐jopapo,
erâ wâc nonizia mana‐jarepe
hâwec wâneŋko jueŋgopieŋ.
7 Jaŋe hae fânâŋ sâko‐jeŋichec
dic bajareeŋgopieŋ,
ehame ŋic ŋoŋere gie baniŋte
moczi moc sâcne bâmâteŋ‐jopaocmu.
8 Tiki mâreŋzi nânâ opâ bâfua‐jareekac,
jaŋe ira hâcne juhuc sopâc kecɋaŋ biaŋne
bâfuaniŋte babasa gie baeŋgopieŋ.
9 “Â kâte bulimakao momori
jaŋe gore gie sâcne baniŋmu,
me ŋafeo gore sapaoa sâcne domaniŋmu me?
10 Go bulimakao iŋucne jaŋe kioŋ râe‐jaretec
mâreŋ bâbâfâuc sâqe sâcne fâreniŋmu,
me giegao râec‐jopatec mâreŋ bambanʒaŋ sarac
i wâc sâcne fâreniŋmu me?
11 ‘Jaŋe tâpiri sâko‐jeŋichec,’
go iŋuc muhuctecne gie ŋemâcne mujaretec
sâcne bagareniŋmu me?
12 Jaŋe qa roro dameŋko nânâ wiacge
sâcne baware‐gareniŋmu,
me jacgoŋ bâbâmârâŋ tomaonec hândâŋne
ro nusec sâcne egareniŋmu me?
13 “Qera e fafakec‐ticne fâro jaha fucfuc qaekac,
erâ ine sifu qeʒo iŋucne furuc furuc qahuc
sawao mi raekac.
14 E hândâŋ‐ticne mâreŋ nuruŋko râeekac,
â sohoŋ hehetaniŋ hândâŋ‐ticne e ine taicko ŋehuc
hoticnezi hâroŋkeha juku âteʒuekac.
15 Qera e, ŋic me qowi wiac jaŋe fisirâ âtenʒaŋneniŋmu,
iŋuc mi muhuc sohoŋ hehetaniŋ‐ticne
kosa râeekac hâcne.
16 Eme juku âteʒume hone jauŋ mi ecneekac,
ehuc hândâŋ râeocte ʒâic manaekac
irec mocwâc mi manasuekac.
17 Noni hâcne qera maŋmutuc bâfuapore iŋuc eekac,
no maŋɋârâŋ moc mi bâfuacnepo.
18 Gagasac‐ticne ine hâhâwicne jâmbâŋ,
irec ŋic â qâto wise‐nâreekac.
19 “O Hiobe, becâsic tâpiri‐jeŋic
i goki moc râe‐jaremeŋ,
me upe gere‐jeŋic i goki bâfua‐jaremeŋ me?
20 Goki mujaretec hâpic gisic jaŋe iŋucne
tara he tara he raeŋgopieŋ,
me masu fura qapie ŋic ŋoŋe hâwic‐ŋopaekac me?
21 Jaŋe tâpiri‐jeŋicte manapie feha
mejeŋiczi mâreŋ fârâeŋgopieŋ.
22 Jaŋe boc mi hâwic‐jopaekac,
â ʒikare erâ wâc mi wiseeŋgopieŋ.
23 Rufâc‐jeŋic jaŋe ʒikare wiac bajueŋgopieŋ
izi fânâŋkehuc ʒoaŋko bâricneekac.
24 Becâsic jaŋe tâpiri wânʒâŋ‐jeŋichecte
gagasac jaha raeŋgopieŋ,
ʒikare qeŋ dâŋeme mocwâc niniŋkerâ
sâcne mi domaniŋmu.
25 Qeŋ dâŋeme sâc masu fura qaeŋgopieŋ,
erâ taicko rahuc ʒikare âsu fâreeŋgopieŋ,
ehuc momori micne jaŋe dâŋ mutâcne‐jarepie manaeŋgopieŋ.
26 “Goki piʒu piʒu jaŋe furuc furuc qaqare
fuŋne qazu‐jaremeŋte
fafakec‐jeŋic mâreŋ juwicpe qaratieeŋgopieŋ me?
27 Me tucwipe sâko jaŋe sareŋ‐jeŋic hozi‐jeŋicko baniŋte
gore dâŋte woŋec moc jueŋgopieŋ me?
28 Aricne, jaŋe jâc ʒoricnao fic hae baeŋgopieŋ,
ehame jâcbotâŋ susukune
izi fic hae sanaŋ‐jeŋic eekac hâcne.
29 Eme irecnec fahare sâohuc nânâ qowi
bâfuaniŋte wosaŋeŋ gie baeŋgopieŋ.
30 Ehuc wiac âsu gârecnezi fârec‐jopame
nâniŋte tumaŋneeŋgopieŋ,
â motecfâc‐jeŋic jaŋe ine qowi
socnehec nâeŋgopieŋ.”