8
Bilidadizi Hiobe dâŋ okacne bâtikiecnewec
1 Hiobe e iŋuc mume Suhiŋic Bilidadizi dâŋ okacne kecʒiŋuc bâtikiecnewec:
2 “Micgaonec dâŋ racne sasawa wahakac
i mo dameŋko moc behecmu?
3 Manakic, Anutu e wiac sâctiri moc mi eekac,
erâ dâŋ tiŋne i moc mi muhasickeekac.
4 Otâ ŋokâfâcge jaŋe sâqocne bahuc Anutu bunao bapie
juju bapa‐jeŋicte sâcko okacne bazu‐jarewec hâcne.
5 Irec go Anutu bapafâre e wira wâwâsic ecnehuc
aki anonoc egareocte numucnezemec.
6 Go iŋuc ehuc maŋɋaɋachec â siocmâc juhaŋtec
Anutuzi mocwâc maicgurâ hone soŋaŋ egarehuc
go â wiacfâcge ŋoŋe juju biaŋ tahac‐ŋopaocmu.
7 Anutu e iŋuc egarehuc mafa mâriri mârâc fogarewec
irec sâc sirickehuc tahacguocmu.
8 “Ŋic mârâc jumbiŋ jaŋe maŋɋârâŋ dâŋ mujumbieŋ
irec mu gufuc ec,
ehuc mamacfâc‐nâŋec jaŋe weniŋuc mana tarambiŋ
i hone manazemec.
9 Nâŋâc ɋâricne fuambeneŋ tinac ekacte
wiac moc mi manaeŋgopeneŋ,
juju dameŋ‐nâŋec i owâ ririŋte
nâkumuc fuaekac iŋucne.
10 Ŋic maŋɋârâŋhec mârâc jumbiŋ jaŋere dâŋ honec,
ehuc jaŋe weniŋuc mujumbieŋ i mana tarazemec.
11 “Hehembaŋ i opâ sohoŋ tâmiricko sâcne mi fuaekacte
mâreŋ kereŋnao mi bâfuaeŋgopeneŋ.
12 Opâzi ʒicke kereŋ eme wiac i soka sanaŋ mi ehuc
ɋaŋa ururuc eha hetâcnerâ wiac i me i bapane mi eekac.
13 Anuture nikec‐jopaekac ŋic i jaŋe hehembaŋte sâc,
jaŋe Anutu râpeckerâ jujure woworic mocwâc mi bâfuaniŋmu.
14 Jaŋe bameŋte qâruruo roweckepie tâcneocmu,
â ŋaferuŋ mucko basanaŋkezo muhuc bâtâcneniŋmu.
15 Jaŋe ficjeŋic ʒaŋkekicne ira roweckepie rândiŋkeocmu
me dopeckezo epie sifu ŋenʒaŋnerâ waha qaocmu.
16 Ŋic hehesicne jaŋe, hoezi hofâ qinʒiŋ tâpiri jareme
fua sokac erâ hae mâreŋ sâcke‐fâreeŋgopieŋ irec sâc.
17 Gâtâ‐jeŋiczi qânâ râreckehuc basanaŋkeekac,
erâ sachawecko raʒic wefuc ehuc qiŋ herâ domaekac.
18 Eme ŋiczi unucke behec epene
dodoma tacticne sawa foocmu.
19 Manakic, ŋic hehesicne e irec sâc hâcne,
e omaeme jujutac‐ticnao ŋic moczi fuarâ juocmu.
20 “Erâ manac: Anutu ŋic bahacmâc mi behec‐jopaocmu,
â ŋic hehesicne jaŋe wâc mi bafic‐jopaocmu.
21 E micge baafeckeme gâgâwi faio jucmu,
ehame nameŋ bipicgao ʒeridâŋzi sasawa fohuc juzejec.
22 Eme qaisocgueŋgopieŋ jaŋe mimi bâfua‐jareocmu
â ŋic sindaŋne jaŋere fic hae bâsiroweocmu.”