11
Israe ŋic jaŋe Kanaaŋ mâreŋ faicne rombiŋ
1-2 Hazoro haere ŋicwofuŋ Jabiŋ e biŋe i manarâ ŋicwofuŋ kecʒiŋuc jaŋerao dâŋ râeme rawec: Madoŋ haere ŋicwofuŋ Jobabe â Simoroŋ haere ŋicwofuŋ â Akisafa haere ŋicwofuŋ, â tiki mâreŋ faicpec â sopâc mâreŋko Kinerote riqic juwicpec â wâneŋko â ʒoaŋ huhunaopec Nafado mâreŋko,
3 erâ Kanaaŋ ŋic ʒoaŋ wewefunaopec â huhunaopec tiki mâreŋko jumbiŋ: Amori ŋic, Hitiŋic, Periʒi ŋic â Jebusi ŋic, erâ Hiwiŋic Mizipa mâreŋko Herimoŋ tiki fuŋnao jumbiŋ, ŋicwofuŋ â ŋicguru i sasawa jaŋerao dâŋ râeme rawec hâcne.
4 Eme jaŋe momori guru dindiŋfâc‐jeŋic hâwecko moŋgeŋ fokac irec sâc, erâ becâsic â keretac wiac‐jeŋic bocjaha amec‐joparâ fisimbiŋ.
5 Eme ŋicwofuŋ sasawa i jaŋe roroc efârerâ raku Meram opâo tumaŋne‐fârerâ Israe ŋic jaŋehec qaqac eniŋte teuŋ âterâ fombiŋ.
6 Eme Wofuŋzi Josua ʒiŋuc âzâcnewec: “Go jaŋere mi hâwicguoc. Tomâcko dameŋ ʒiŋucne hâcne noni joparâ Israe ŋic ŋoŋere meo râec‐jopa‐fârepemu. Go ine becâsicfâc‐jeŋic jaŋere rua hetâcnerâ keretac wiac‐jeŋic ʒoczi turuŋketec ʒazejec.”
7 Eme Josua e momorifâc‐ticne jaŋehec ututuŋ jaha Merom opâo fisi‐jarewec.
8 Eme Wofuŋzi Israe ŋic jaŋere meo râec‐jopame jopa jâpec ejare raku Sidoŋ‐Raba â Misirefo‐Maim haeo, erâ ʒoaŋ wewefunaopec ine Mizipe wâneŋko fisimbiŋ. Erâ moc mi akic‐jopa huŋgaŋkehuc ima samaki bacjopa‐fârembiŋ.
9 Eme Josua e Wofuŋzi âzâcnewec irec sâcko becâsicfâc‐jeŋic jaŋere rua hetâcne‐fârewec â keretac wiac‐jeŋic ine ʒoczi turuŋkeme ʒafârewec.
10 Eme Josua e dameŋ ira mocwâc risierâ Hazoro hae rorâ ŋicwofuŋ‐ticne ʒikazi imackewec. Hazoro hae i mâmâc jaha ŋicwofuŋ sasawa jaŋere hae qizec ŋewec.
11 Eme Israe ŋic jaŋe wiac jujune moc mi akic‐jopa huŋgaŋkehuc bâsirowec‐jopa‐fârembiŋ, â Hazoro hae ine Josuazi turuŋkeme ʒawec.
12 Eme hae sasawa â ŋicwofuŋfâc‐jeŋic jaŋe ine Wofuŋte kiŋaŋŋic Mosezi mutâcnewec irec sâcko Josuazi rocjoparâ ʒikazi imac‐jopahuc bâsirowec‐jopa‐fârewec.
13 Â hae gâcne tikio ŋerawec i ine Israe ŋic jaŋe ʒoczi moc mi turuŋkepie ʒawec, Hazoro hae sawa Josuazi turuŋkeme ʒawec.
14 Eme hae irec bulimakao â wiac sasawa Israe ŋic jaŋe jaŋacne biŋe rocjopambiŋ. Â ŋic ine moc mi akic‐jopahuc ʒikazi imac‐jopa‐fârembiŋ.
15 Wofuŋzi kiŋaŋŋic‐ticne Mose âzâcne mutâc ewec irec sâc Mosezi Josua mutâcnecnewec. Eme Josua e irec sâc wiac efârewec. E Wofuŋzi Mose mutâcnecnewec i moc mi hetiriwec.
Josuazi mâreŋ rofârewec
16 Josua e iŋuc ehuc tiki mâreŋ â Negebe mâreŋ erâ Goseŋ mâreŋ â wâneŋ â sopâc mâreŋ, erâ Israere tiki mâreŋ â wâneŋ‐ticne, mâreŋ i sasawa ro rauc efârewec.
17 I Halaka tikionec Seiri mâreŋkopec feraku Baali‐Gada, Herimoŋ tikifuŋko Lebanoŋ wâneŋko fisikac i ro rauc efârewec hâcne. Ehuc Josuazi ŋicwofuŋfâc‐jeŋic rocjoparâ imac‐jopa‐fârewec.
18 Josua e dameŋ ʒora ŋicwofuŋ i jaŋehec ʒika qahuc juwec.
19 Hae moczi Israe ŋic jaŋehec wama qaqac i moc mi ewec. Gibeoŋ haere ŋecjucfâc, Hiwiŋic hâcne, jaŋehec sawa embiŋ. Hae mâreŋ gâcne i Israe ŋic jaŋe ʒika qahuc rofârembiŋ.
20 Wofuŋ e mâsi‐ticne bahuc râsi jaŋere maŋ bârâŋgeŋkeme Israe ŋic jaŋehec ʒika qazore faharembiŋ. I Israe ŋic jaŋe Wofuŋzi Mose mutâcnecnewec irec sâcko buuruc moc mi qajarehuc omaec‐jopaniŋte iŋuc hâcne fuawec.
21 Dameŋ ijaha Josua e fisirâ Anaka ŋic, tiki mâreŋkonec, Heboroŋ, Debiri â Anaba haeonec, erâ Juda tiki mâreŋkonec â Israe tiki mâreŋkonec jaŋe mâmâc sasawa bârârâŋ‐jopawec; Josua e hae‐jeŋichec bâsirowec‐jopawec hâcne.
22 Israe ŋic jaŋere mâreŋko Anaka ŋic moc mi akic‐jopapie jumbiŋ. Hae ʒiŋuc ira afecne maczi jurambiŋ: Gaza, Gati â Asidode.
23 Wofuŋzi dâŋ sasawa Mose âzâcnewec irec sâcko Josuazi mâreŋ i rofârewec. Ehuc ŋic guru‐jeŋic sâc mâreŋ dâkâne dâkâne ro rauc eniŋte Josuazi Israe ŋic jarewec. Eme ʒika fowarewec i tara‐fâreme mâreŋ ira wama fuarâ fowec.