19
1 Ŋic hapetaczi siocmâc juocmu izi fefene eocmu, â ŋic moneŋ mafaheczi burecdâŋ muocmu izi wawahane eocmu.
2 Ŋic moc e mamana tâmiric jume mi sâckeocmu, â moc e hata raocte ʒoɋac boc ehuc hata qâsorieocmu.
3 Ŋic gâcne jaŋe wiac mutucne ehuc sisipiric bâfuaeŋgopieŋ, ehuc Wofuŋtao âki heeŋgopieŋ.
4 Ŋic moneŋ mafa sâkohec e âgo bocjaha fuacneeŋgopieŋ, â ŋic hapetac e ine âgofâc‐ticne jaŋe râpeckeeŋgopieŋ.
5 Ŋic moc e dâŋgieo domahuc dâŋ musifuckeocmu e okacne roocmu, â moc e burecdâŋ muocmuzi bâbâtiŋ sâcne mi wisecneocmu.
6 Ŋic bocjaha jaŋe ŋic ʒâŋe biŋehec bâbâmiriŋ dâŋ jazaeŋgopieŋ, â ŋic bokifac jaŋehec ââgo ehuc juniŋte boc ejareekac.
7 Ŋic hapetac e hahac ɋafâc‐ticne jaŋe qaisockeeŋgopieŋte âgofâc‐ticne jaŋe wâc behe‐jâmbâŋkeeŋgopieŋ; ehame e âgo bacjopaocte gie sâko bâipiehuc juekac.
8 Go gahacne manasuhuc mamana fuŋne fuŋne rozemec, erâ mamana rokomec i bajuhuc juhâc qâhâmozemec.
9 Ŋic moc e dâŋgieo domahuc dâŋ muhasickeocmuzi bâbâtiŋ roocmu, â ŋic moc e burecdâŋ muocmuzi sipirickeocmu.
10 Ŋic mutuc matacne jaŋe moneŋ mafa sâkohec mi junʒepieŋ, â kiŋaŋ qaqa jaŋe ŋic fekicne ŋicbomboŋ mi ejarenʒepieŋ.
11 Ŋic mamanahec e kimbeŋ aaric‐ticne sâcne fâre wahaocmu, â ŋic moczi wiac sâqocne moc ecneme hone takirehuc behecneme sâcke‐hâmoocmu.
12 Ŋicwofuŋzi aarickeme owackeekac i laioŋte owa iŋucne, â âgo miriŋ‐ticnezi ine titikuczi kecɋaŋ bâgunuckeekac irec sâc ekac.
13 Motec mutuc matacnezi mamac‐ticne sipirickeekac, â ŋokac râŋgeŋnere dâŋzi hoe micpiic heekac irec sâc ehuc tatakic bâfua‐nâreekac.
14 Fic hae â moneŋ mafa wiac i neŋgoc mamacfâc‐nâŋec jaŋere merâfâc roeŋgopeneŋ, â ŋokac mamanahec ine Wofuŋzi sawa bâfua‐nâreekac.
15 Go ojoŋ juzo murâ juzemec, erâ guŋ fohuc nânâre hâmozemec.
16 Ŋic moc e Anuture sâcmutâc dâŋ mana rereŋ eocmuzi juhâc qâhâmoocmu, â moc e qâsuaocmuzi ine hâmo sipiric eocmu.
17 Ŋic hapetac ehâmo‐jarehuc manapie Wofuŋ ecneŋgopeneŋ ezejec, eki hâcne okacne bazu‐ŋareocmu.
18 Ŋoŋe naru motecfâc‐ŋeŋic piticne jaba juhapie qa bâtiŋ ejarenʒepieŋ, iŋuc mi eniŋmuo ine sisipiric hatao rahapie bafic‐jopaŋgopieŋ eocmu.
19 Ŋic moc e dameŋ sâc aaric onʒoŋ jaha manahuc juocmuo ine ecnepene furi râezejec, â hone qâoma ecnenaŋmuo ine aaric‐ticnere ʒoczi nâŋâcne faio feocmu.
20 Go ŋic jaŋe baficguhuc dâŋ biaŋne gazapie mana rereŋ ezemec, go iŋuc erâ juku maŋɋârâŋhec ecmu.
21 Ŋic nâŋâc mamanazi wiac fuŋne fuŋne irec dâŋ mana biric ezo murâ sâcne enaŋmu, ehame Wofuŋte micdâŋzi ine fârinehec eocmu.
22 Buchâro nânâ i wiac mamakâcne. Nâŋâc ŋic hapetac ere manapene fefene eha burecŋicte manapene wawahane eekac.
23 Go Wofuŋ araŋ bacnehuc juzemec. Go iŋuc ehuc dameŋ ʒora wama faio juhâc qâhâmohaŋtec sisipiric wiac izi me izi moc mi maicguocmu.
24 Ŋic gâcne jaŋe qâoma sâko ehuc nânâ wiac micjeŋicko râeniŋte takic‐jopame mâc ŋeeŋgopieŋ.
25 Ŋic pepec penaroŋhec jaŋe qa bâtiŋ ejarepie fuŋne‐jeŋic mananʒepieŋ, ŋic maŋɋârâŋhec jaŋe mu bâtiŋ ejarepie ine mamana‐jeŋic ɋârâŋkeocmu.
26 Motec sindaŋne â qaqaharicnezi sawa mamac‐ticne bâʒâickeocmu â neŋgoc‐ticne ficticnaonec jâpeme raocmu.
27 O motec‐mae, go ʒuhuckerâ mamana rozore takicguocmuo ine juwicnao mamana romeŋ i wâc nikecguocmu.
28 Mumutaniŋ ŋic hehesicnezi dâŋgie tiŋnere maname fâri tâmiric eekac, â ŋic sindaŋne jaŋe wiac hehesicnere aŋac‐jopaekac.
29 Kâcbiŋ i ŋic mu âke sisic eeŋgopieŋ jaŋere biŋe bâfuakicne, ŋic mutucne sahac fefe eeŋgopieŋ jaŋe hâcne ʒikare biŋe.