75
Anutu e dâŋ mumutara tiŋne
1 Daŋge gazaŋgopeneŋ, o Anutu, nâŋe daŋge gazaŋgopeneŋ;
ʒâŋege riwaseckeeŋgopeneŋzi mâsigere binaŋ baeŋgopeneŋ.
2 “No dameŋ bapo i maickeme
mumutara gie‐nane bâtiŋnehuc bapemu.
3 Mâreŋ â ŋecjucfâcne biric boroc ezo murâ eniŋ,
noni mâreŋ wâtuŋne keteŋkepo.
4 No maŋfefehec jazapemu, ‘Penaroŋ mi eniŋ,’
â ŋic sindaŋne jazapemu, ‘Pepecne mi eniŋ.
5 Maŋfefehec jaŋe penaroŋ mi eniŋte
â sahacfefe jaŋe pepecdâŋ mi eniŋte jazaekopac.’ ”
6 Mumutara gie i ʒoaŋ wewefunaonec me huhunaonec
me mâreŋ tuhuonec mi fuaekac;
7 Anutu e buc mumutara gie baekac,
ehuc ŋic moc bawahaekac â moc bâfeŋneekac.
8 Wofuŋ e meticnezi râqâc moc badomakac,
irec maŋnao waiŋ opâ momori bâmockekicne ŋekac;
eme i hâcne qoŋgiŋke‐jareme mâreŋŋic sindaŋne
jaŋe nâku fâhâŋne hâtâ qiŋqiŋne wâc nâzickeniŋmu.
9 No ine dameŋ sâc ʒeri bari epemu,
no Jakobore Anutu mumuteŋ gae hecnepemu.
10 Ŋic sindaŋne jaŋere tâpiri bawaha‐fârezo
ŋic tiŋne jaŋere tâpiri ine bafaharezo.