9
Anutuzi Saulo ŋicwofuŋ rowosâewec
1 Benjamiŋ guruo ŋic moc juwec ʒâŋene Kisi. E Abielere ŋokâ â ŋosa‐ticne ʒâŋene Zeroro, â apa‐ticnere ʒâŋe Bekorata â apa ŋiric ŋuruc‐ticnere ʒâŋe ine Afia. Kisi e ŋic mafa sâkohec juwec.
2 Eme ere ŋokâ sahac hawari biaŋ moc juwec ʒâŋene Saulo. Israe guruo e iŋucne moc mi juwec. E ŋic gâcne sasawa jowaru‐fârerâ ŋic ʒoricne juwec.
3 Eme Saulo mamac‐ticne Kisi ere doŋgi jaŋe sifuckembiŋ. Irec Kisizi ŋokâ‐ticne Saulo ʒiŋuc âzâcnewec: “Go faharerâ kiŋaŋŋic moc jowatec rarâ doŋgi basac‐jopanic.”
4 Iŋuc âzâcneme jahe faharerâ Eferaim tiki mâreŋ â Silisa mâreŋ i fotâcne‐fârehuc basac‐jopa‐fârepic, ehuc moc mi bâfuac‐jopapic. Erâ Salim mâreŋ fotâcne‐fârehuc basac‐jopapire arictac jaha ewec. Eme irecnec Benjamiŋ mâreŋ fotâcnehuc basac‐jopa‐fârepic wâc.
5 Eme Zufu mâreŋko fisirâ Saulozi kiŋaŋŋic‐ticne mâmâc jupic e ʒiŋuc âzâcnewec: “Waretec risienac. Mamac‐nane e doŋgi jaŋere mana mezac ekaczi nâhâcnere erâ maŋ kukumbuc ezackohec.”
6 Mume kiŋaŋŋiczi ʒiŋuc âzâcnewec: “Manakic, hae ʒira Anuture ŋic moc jukac. E ŋic jaŋe araŋ bacneeŋgopieŋ. E dâŋ sasawa muekac i fârinehec efâreekac. Irec nâhâc erao ranac. Eme eki hata jukoperec ʒirec fârine sâcne nâsâocmu mecne.”
7 Iŋuc mume Saulozi kiŋaŋŋic‐ticne ʒiŋuc âzâcnewec: “Nâhâc ira ranacmuo ŋic e wemo wiac râcnenacmu? Henâhecko poroŋ fowec i omae‐fârewec. Eme Anuture ŋic e taha wemo râcnenacmu? Ʒi wiac moc mi bajukoperec.”
8 Iŋuc mume kiŋaŋŋiczi Saulo dâŋ ʒiŋuc bâtikiecnewec: “No siliwa dâkâne moc bajukopac ʒi. Irec wiac weniŋuc jaha enacte nâsâocmu ine Anuture ŋic e i râcnepemu.”
9 Mârâc jaha Israe guruo ŋic moczi Anutu mu wioc ecneocte rahuc ʒiŋuc mujujec: “Warepie findaŋdâŋ mumu ŋictao ranaŋ.” Â dameŋ ʒiŋuczia porofete mujareeŋgopieŋ jaŋe mârâc jaha ine findaŋdâŋ mumu ŋic mujare jumbieŋ.
10 Eme Saulozi kiŋaŋŋic‐ticne ʒiŋuc âzâcnewec: “Sâcne mukic, murâ waretec ranac.” Iŋuc mume Anuture ŋic juwec hae ira rapic.
11 Jahe haeo fisinicte heâŋko fehapire ŋokac naru jaŋe opâ fianiŋte haeonec wahapie bâfuac‐joparâ ʒiŋuc wio‐jarepic: “Honeniŋ, findaŋdâŋ mumu ŋic e ʒira jukac me?”
12 Iŋuc wiopire ŋokac jaŋe dâŋ ʒiŋuc bâtikie‐jactembiŋ: “Ooc, e kecocni mac rakac, biac gasackenic. E ŋic ŋokac jaŋe furu mâreŋko taha bâzi wiac bâmockeŋgopieŋte miŋecgac hâcne hae ʒira fisijec.
13 E nânâ nâocte furu mâreŋko biac fezacte ŋohe haeo raʒirâ izia bâfuanic. Ŋic ŋokac jaŋe Samuezi hâcne taha wiac jambuŋkeme nâniŋte ere woŋec ŋeŋgopieŋ. Eki jambuŋkeme jaha ine hefârec‐jopakicne jaŋe nâniŋmu. Irec biac rarâ bâfuanic.”
14 Eme jahe haeo fepic. Ferâ Samue e furu mâreŋko feocte jaheraopec warehame bâfuapic.
15 Eme Saulozi fisiwec ʒoaŋ irec juwicnao Wofuŋzi Samue fuacnerâ ʒiŋuc âzâcnewec:
16 “No tomâcko dameŋ ʒiŋucne Benjamiŋ mâreŋkonec ŋic moc gorao sorepe wareocmu. Eme goki Israe ŋicfâc‐nane jaŋere micne bapa erâ juocte wokemaŋ ruacnezemec. Eme eki hâcne ŋicfâc‐nane micne bajarehuc Filisa ŋic jaŋere meonec batarac‐jopaocmu. Ŋicfâc‐nane jaŋe fific guguriŋko hâcne juhuc kio wâwâsic enarepie manakopac.”
17 Eme Samuezi Saulo bâfuame Wofuŋzi ʒiŋuc âzâcnewec: “No ŋic ere hâcne gazapac. Ŋic eki hâcne ŋicfâc‐nane soŋaŋ‐jopaocmu.”
18 Eme Saulozi haere sacmotâcko Samuere maŋfuŋko fisirâ ʒiŋuc âzâcnewec: “Findaŋdâŋ mumu ŋic ere fic wena ŋekac i nowatuc.”
19 Mume Samuezi Saulo dâŋ ʒiŋuc bâtikiecnehuc muwec: “Findaŋdâŋ mumu ŋic no ʒi hâcne.” Iŋuc murâ muwec, “Ŋohe miŋecgac nohec mâmâc nânâ nânicmu irec furu mâreŋko bânierâ hefânic. Eme dâŋ bajukomec sâc irec okacne tomâcko gaza‐fârerâ râec‐ŋofape ranicmu.
20 Ʒoaŋ gie bapa jahec â moc juwicnao doŋgi sifuckembiŋ i biac bâfuac‐jopambieŋ, irec go manabâc boc mi ezemec. Israe ŋic jaŋerao wiac furi sâko forakac i go â mamacgere garikiŋfâc ŋoŋere biŋe eocmu hâcne.”
21 Mume Saulozi dâŋ ʒiŋuc bâtikiecnewec: “No Benjamiŋ ŋic, Israe kikefuŋ guru waha qaqane moc irecnec hâcne. Erâ garikiŋfâc‐nane jaŋe Benjamiŋ guruo ŋic wawahane jâmbâŋ juŋgopieŋ. Irec go wemocte dâŋ iŋucne nazakomec?”
22 Eme Samue e Saulo â kiŋaŋŋic‐ticne rocjofame ufuŋko ferâ ŋic 30 heririŋ hefârec‐jopakicne ŋembiŋ ŋeŋe irec micnao râec‐jofame ŋepic.
23 Ehame Samuezi ʒegocŋic ʒiŋuc âzâcnewec: “Qowi garehuc râetec ŋeocte gazapac i bawarec.”
24 Iŋuc âzâcneme ʒegocŋic e qowi ŋefacne i rorâ Saulore maŋfuŋko hewec. Iŋuc eme Samuezi muwec, “Qowi dâkâne ʒi gore biŋe râekicne. Tiwâ bâzi ʒirec manasuhuc ŋic hefârec‐jopapo dameŋ ira qowi ʒi gore biŋe râekicne hâcne, irec nâc.”
25 Mume Saulo e ʒoaŋ ira Samuehec mâmâc nânâ nâpic. Eme jaŋe furu mâreŋkonec haeo waharâ Samuezi Saulohec ficbupuo dâŋ dâŋ epire tarame Saulo e ijaha fofo bacnembiŋko fowec.
26 Hae fure pârâckeme Saulo e ficbupuo guŋ jaha fohame Samuezi Saulo wiwickehuc muwec, “Faharec, eme râecgupe rac.” Iŋuc mume Saulo e fahareme Samuehec mâmâc hatao hurâ rapic.
27 Raku hae mendâŋko fisirâ Samuezi Saulo ʒiŋuc âzâcnewec: “Kiŋaŋŋicge ecnetec bânieoc.” Mume iŋuc ewec. Eme Samuezi muwec, “Go piticne domatec Anuture dâŋ mufua‐garepemu.”