7
1 Iŋuc mupie Kiriati‐Jearim hae rune jaŋe hurâ Wofuŋte katapa bafe Abinadare tikio ŋewec ira râembiŋ. Ehuc Abinadare ŋokâ Eleaʒazi Wofuŋte katapa i soŋaŋkeocte mufiriembiŋ.
2 Wofuŋte katapa i Kiriati‐Jearim haeo hepie dameŋ ʒoricnea ŋehuc juwec. Eme jara 20 tarame Israe ŋic ʒeŋgoma jaŋerao Wofuŋ bâbâjâpere qiriŋ piticne fuawec.
Samuezi Israe ŋic jaŋere mumutara ŋic juwec
3 Eme Samuezi Israe guru ʒiŋuc jazawec: “Ŋoŋe maŋ hâcbuc jaha Wofuŋtao risieŋgopieŋko ine guru‐ŋeŋickonec nemu jabane â Asitaroto nemure ɋâŋ qâqâtâc i behe‐fârenʒepieŋ. Iŋuc erâ maŋŋeŋic Wofuŋtao sawa râerâ e buc kiŋaŋ qacnepie Filisa ŋic jaŋere meonec sâcne batarac‐ŋopaocmu.”
4 Iŋuc jazame Israe ŋic jaŋe Baali â Asitaroto nemu jahere ɋâŋ qâqâtâc wiac behe‐fârerâ Wofuŋ sawa kiŋaŋ qacnembiŋ.
5 Eme Samuezi muwec, “Israe ŋic sasawa ŋoŋe Mizipa haeo tumaŋne‐fârepie no ŋoŋere erâ Wofuŋ numucnepemu.”
6 Iŋuc mume Israe ŋic jaŋe Mizipa haeo tumaŋne‐fârembiŋ, ehuc opâ fiarâ Wofuŋte maio hesiembiŋ. Iŋuc erâ ʒoaŋ ira nânâ sowa juhuc sâqocne barâ Wofuŋ bunao bambiŋ i mufua‐fârembiŋ. Eme Mizipa haeo hâcne Samuezi Israe ŋic jaŋerao mumutara gie bawec.
7 Ehame Filisa ŋic jaŋe Israe ŋic Mizipa haeo tumaŋnembiŋ biŋe i manarâ Filisa ŋic fekicne jaŋe râsi fisi‐jarembiŋ. Eme Israe ŋic jaŋe biŋe manarâ Filisa ŋic jaŋere hâwic‐jopawec.
8 Hâwic‐jopame Samue ʒiŋuc âzâcnembiŋ: “Go nâŋere erâ Wofuŋ Anutu‐nâŋec kio wâwâsic eecne i mi behezemec. Iŋuc etec e Filisa ŋic jaŋere meonec batarac‐nâpozejec.”
9 Iŋuc mupie Samuezi lama motecne susuonec moc rorâ hâcbuc jaha Wofuŋ bâzi rikecnewec. Iŋuc erâ Israe ŋic jaŋere erâ Wofuŋ kio wâwâsic ecneme Wofuŋzi nunumu‐ticne manawec.
10 Samue e bâzi rikehuc juhame Filisa ŋicjaŋe Israe ŋic jopaniŋte bembeŋko fisimbiŋ. Eme Wofuŋzi ʒoaŋ ira dâŋsâko eme ɋuŋ parandaŋ hehuc Filisa ŋic maŋ bâsifuc ejareme Israe ŋic behec‐joparâ wisembiŋ.
11 Wisepie Israe ŋic jaŋe Mizipa haeonec faharerâ Filisa ŋic jopa jâpec ejare raku Bete‐Kara hae juwicnao fisimbiŋ.
12 Eme Samue e qânâ moc rorâ Mizipa â Jesana hae ŋondeŋ‐jekicko herâ ʒâŋene Ebeneʒe muwec. I ʒiŋuc muhuc ʒâŋe i muwec: “Wofuŋzi mâreŋ ŋondeŋ ʒira hâcne ŋezic‐nâpojec.”
13 Eme Filisa ŋic bawahac‐jopambiŋte Israe ŋic jaŋere mâreŋko mocwâc mi raʒimbiŋ. Erâ wâc Samuere dameŋko Wofuŋzi Filisa ŋic bomac‐jopawec.
14 Eme Filisa ŋic jaŋe Israe ŋic jaŋere hae rombiŋ, Ekoroŋkonec raku Gati haeo fisikac i Israe ŋic jaŋe mocwâc jowac rofârembiŋ. Erâ hae i jaŋere mâreŋ forawec i wâc iŋuc jaha Filisa ŋic jaŋeraonec mocwâc rombiŋ. Ehame Israe ŋic â Amori ŋic jaŋerao wama fuarâ fowec.
15 Samue e mâreŋko juju dameŋ‐ticne fowec irec sâc Israe ŋic jaŋere mumutara ŋic juwec.
16 Ehuc jarane jarane Bete â Giligali â Mizipa hae râreckerâ Israe ŋic jaŋerao mumutara gie bahuc juwec.
17 Iŋuc erâ Rama hae‐ticnao mocwâc risie jujec. Ehuc ira wâc Israe ŋic jaŋerao mumutara gie bajujec. Erâ ira Wofuŋte alata moc bawec.