8
Israe ŋic jaŋe ŋicwofuŋte numumbiŋ
1 Samue e ŋicqizec jâmbâŋ ehuc ŋokâ jahecne ejacteme jahe Israe ŋic jaŋerao mumutara gie bapic.
2 Samue mârâc ŋokâ‐ticnere ʒâŋe Joele, â ere faicnao fuawec ere ʒâŋe ine Abia. Jahe Bere‐Seba haeo mumutara gie bahuc jupic.
3 Eme ŋokâ jahec‐ticne jahe mamac‐jekicte kike hata sâcne mi bâjâpehuc moneŋte ejacteha ŋic jaŋeraonec bâbâmiriŋ moneŋ rohuc jupic, ehuc gie bâsifuckepic.
4 Iŋuc epire Israe soŋaŋ jaŋe roroc efârerâ Samuerao Rama haeo fisimbiŋ.
5 Ehuc ʒiŋuc âzâcnembiŋ: “Manakic, go ŋicqizec ekomec, ehame ŋokâ jahecge jahe gore kike hata sâcne mi bâjâpekopirec. Irec nâŋe ŋicguru gâcne ŋicwofuŋhec juŋgopieŋ irec sâc jaha ŋicwofuŋ moc âkendâŋne‐nâretec soŋaŋ‐nâpoha junaŋte muŋgopeneŋ.”
6 Eme Samue e ŋicwofuŋzi soŋaŋ‐jopame juniŋte mumbiŋ irec maname mi sâckeme Wofuŋ numucnewec.
7 Numucneme Wofuŋzi Samue ʒiŋuc âzâcnewec: “Ŋic jaŋe wiac sasawa muŋgopieŋ i mana‐jarezemec. Jaŋe go mi surecguŋgopieŋ, jaŋe noni Wofuŋ ejarekopacte no surecnuŋgopieŋ hâcne.
8 Jaŋe Aigita mâreŋkonec jowac‐jopa wefuhape wiac enarembiŋzi enare warehuc juŋgopieŋ jaha. Jaŋe no râpecnuhuc nemu gâcne kiŋaŋ qajarembiŋ. Ehuc jaŋe no enarembiŋ sâc ijaha go egareŋgopieŋ wâc.
9 Irec go dâŋjeŋic manac. Mocjaha, uŋdâŋ jaza‐jâmbâŋkerâ ŋicwofuŋzi weniŋuc juhuc soŋaŋ‐jopaocmu i mutâcne‐jare‐fârezemec.”
10 Iŋuc âzâcneme Samuezi ŋic ŋokac ŋicwofuŋte numucnembiŋ jaŋe Wofuŋte dâŋ sasawa jaza‐fârewec.
11 Ehuc muwec, “Ŋicwofuŋ e hata ʒiŋuc âtehuc soŋaŋ‐ŋopaocmu: E ŋokâfâc‐ŋeŋic rocjoparâ keretacfâc‐ticne soŋaŋkeniŋte â becâsicko ŋehuc keretacfâc‐ticne bânie‐jareniŋte âkendâŋ‐jopaocmu.
12 Erâ momori guru 1 tauseŋ jaŋere micne â 50 jaŋere micne iŋuc âkendâŋ‐jopaocmu. Erâ gâcne mâreŋ qanʒaŋnehuc ukic he sarac erâ fârine qa roro eniŋte râec‐jopaocmu â gâcne jaŋe ine ʒikare wiac â keretacte wiac baniŋte râec‐jopaocmu.
13 Erâ wâc otâfâc‐ŋeŋic iŋuc jaha rocjoparâ wiac âsu biaŋ bâbâmocke â ʒegoc bapa â poroŋ bapa râec‐jopaocmu.
14 Erâ giegaŋ‐ŋeŋic biaŋne jâmbâŋ â waiŋ gie â oliwa jufu‐ŋeŋic i ŋowac rorâ kiŋaŋ qaqafâc‐ticne jareocmu.
15 Erâ wiac hândâŋne irecnec 10‐konec wâŋ i ŋowac rorâ fekicne â kiŋaŋ qaqafâc‐ticne jareocmu.
16 E kiŋaŋ qaqafâc‐ŋeŋic ŋic â ŋokac, erâ bulimakao â doŋgifâc‐ŋeŋic biaŋne i ŋowac rorâ gie‐ticnao râec‐jopaocmu.
17 Erâ lama â noniŋfâc‐ŋeŋic i 10‐konec wâŋ jaha ŋowac rome ŋoŋe kiŋaŋ qaqafâc‐ticne erâ juniŋmu.
18 Dameŋ i maickeocmu ira ŋoŋe ŋaŋac ŋicwofuŋ rowosâembiŋ ere takic‐ŋopame Wofuŋ kio wâwâsic ecneniŋmu, ehame Wofuŋzi ine dâŋŋeŋic mi manaocmu.”
19 Iŋuc jazame ŋic ŋokac jaŋe Samuere dâŋte takic‐jopame ʒiŋuc mumbiŋ: “Aricne, nâŋe ŋicwofuŋ mocte rurumaŋko junaŋte enârekac.
20 Ehuc ŋicguru gâcne jaŋere sâc erâ juhapene ŋicwofuŋzi soŋaŋ‐nâpohuc bânie‐nârerâ ʒika giere guriŋ banârezejec.”
21 Eme Samue e ŋic ŋokac jaŋeraonec dâŋ manawec irec sâc jâmbâŋ Wofuŋ âzâcne‐fârewec.
22 Âzâcne‐fâreme Wofuŋzi Samue dâŋ kecʒiŋuc bâtikiecnewec: “Go dâŋjeŋic manarâ ŋicwofuŋ moc âkendâŋne‐jarec.” Iŋuc âzâcneme Samue e Israe ŋic ŋokac râec‐jopame hae‐jeŋic sâc rafârembiŋ.