12
ཡ༌ཝ༌ གོམས༌ཏེ༌ སྐྱོད༌།
12:1-30
1 ཨི༌ཇིབ༌བི༌ ནང༌ང༌ ཡ༌ཝའེ༌ མོ༌ཟེས༌ དང༌ ཨ༌རོན༌ལ༌ མོལས༌,
2 “ཏ༌ནེ༌ཕར༌ལ༌ ཁྱོ༌ཞ༌གུན༌ནི༌ ཕིའ༌ འི༌ ཟླ༌ཝ༌བོ༌ ལོའེ༌ ཟླ༌ཝ༌ ཏང༌པོ༌ གྱུར༌ཨིན༌།
3 ཨིས༌ར༌ཨེལ༌པ༌ ཚང༌མའ༌ ཟེར༌, ‘འི༌ ཟླ༌ཝའེ༌ ཞག༌ རྕུ༌པའེ༌ ཞག༌ག༌ ནང༌ཚངས༌ རེ༌རེའེ༌ སྲོག༌ཆོད༌དི༌ ཕིའ༌ ལུ༌གུ༌ ཡ༌ རི༌གུ༌ ལྡམ༌གོས༌།
4 ཀལ༌ཏེས༌ ནང༌ཚངས༌ ཆུ༌ངུན༌ ཡོད༌ཅེས༌པའེ༌ ལུ༌གུ༌ ཡ༌ རི༌གུའི༌ ཤ༌ གང༌པོ༌ ཟའ༌ མ༌ཉན༌ན༌, ཁོང༌རང༌གུན༌ནི༌ ཁྱིམ༌ཚེས༌པ༌ ཉམ༌པོ༌ ཛོམས༌ཏེ༌ བགོ༌གོས༌། ནང༌ཚངས༌སི༌ མི༌ རེ༌རེའེ༌ ཟའ༌ ཉན༌ཅེས༌སི༌ ཚད༌ ནང༌ཞིན༌ ལུ༌གུའི༌ ཤ༌བོ༌ བགོ༌གོས༌།
5 ཁྱོ༌ཞ༌གུན༌ནི༌ ལྡམ༌ཁན༌ནི༌ ལུ༌གུ༌ ཡ༌ རི༌གུ༌, ལོ༌ ཅིག༌ ཆའ༌ཁན༌ ཕོ༌ ཡང༌ སྐྱོན༌ མེད༌ཁན༌ ཡོང༌གོས༌།
6 ཏེན༌ན༌ ཟླ༌ཝའེ༌ ཞག༌ ཅུབ༌ཞི༌པ༌ ཚག༌པ༌ ཏེ༌ སེམས༌ཅན༌བོའ༌ སྟ༌སྟོག༌ ཅོ༌གོས༌། ཏེ༌ནེ༌ ཏེན༌ན༌ ཞག༌ག༌ ཉི༌མ༌ སྐྱོད༌ ཟ༌ནེ༌ ཨིས༌ར༌ཨེལ༌པ༌ ཚང༌མའེ༌ སེམས༌ཅན༌བོ༌ སད༌གོས༌།
7 ཁོང༌གུན༌ནི༌ ཏེ༌བོའེ༌ ཁྲག༌ ཙ༌པིག༌ ཁོ༌རང༌གུན༌ནི༌ ཟན༌ ཟའ༌སའེ༌ ཁང༌པའེ༌ སྒོའེ༌ རིབ༌ཞི༌ ཐའ༌མ༌ དང༌ སྟག༌ གུན༌ནི༌ཀ༌ སྐུ༌གོས༌།
8 ཏེན༌ན༌ ཚན༌ལ༌ ཤ༌བོ༌ མེ༌ཀ༌ སྲགས༌ཏེ༌ ཁན༌ཀྲེ༌ ཚ༌མིག༌ དང༌ སྐྱུར༌ མེད༌ཁན༌ནི༌ ཏ༌གི༌ ཉམ༌པོ༌ ཟ༌གོས༌།
9 ཤ༌བོ༌ ཤར༌ཞེན༌ ཡ༌ ཆུའི༌ ནང༌ང༌ ཙོས༌ཏེ༌ ཟའ༌ མ༌གོས༌ ཨིན༌ནའང༌ གོ༌, རྐང༌པ༌ དང༌ ནང༌ཆ༌ གུན༌ ཐེས༌ཏེ༌ ཤ༌ ཚང༌མ༌ མེའ༌ སྲགས༌ཏེ༌ ཟ༌གོས༌།
10 ཁྱོ༌ཞ༌གུན༌ནི༌ ཏེ༌ ནང༌ནེ༌ ཅའང༌ ང༌མོ༌ ཚོག༌པ༌ ལུས༌ཅུག༌ མ༌གོས༌, ཀལ༌ཏེས༌ ལུས༌ན༌ ཏེ༌བོ༌ མེ༌ ནང༌ང༌ སྲག༌གོས༌།
11 ཏེ༌གུན༌ ཟའ༌ ཟ༌ནེ༌ ཁྱོ༌རང༌གུན༌ ཀོས༌སི༌ སྐྱེ༌རགས༌ ལྡམས༌ཏེ༌, རྐང༌པའ༌ པ༌བུ༌ གོན༌ཏེ༌ ལག༌པའེ༌ ནང༌ང༌ གྲུལ༌ཅེས༌སི༌ བེར༌ཀ༌ ཁུར༌ཏེ༌ བེས༌ལ༌ ཆ༌ཅེས༌སི༌ ཕིའ༌ གྲལ༌གྲིག༌ ཅོས༌ཏེ༌ གྱོགས༌པ༌ ཟ༌གོས༌, ཏེ༌བོ༌ ཡ༌ཝ༌ གོམས༌ཏེ༌ སྐྱོད༌ཁན༌ནི༌ ཏུས༌ཆེན༌ ཨིན༌ནོག༌།’ ”
12 “ཏེན༌ན༌ ཚན༌ལ༌ ང༌ ཨི༌ཇིབ༌བི༌ ནས༌སའེ༌ ནང༌ང༌ སོང༌ཏེ༌ མི༌ དང༌ སེམས༌ཅན༌ གུན༌ནི༌ གོ༌སྐྱེས༌ བུ༌ཚ༌ ཚང༌མ༌ སད༌ཨིན༌ ཡང༌ ཨི༌ཇིབ༌པའེ༌ ལྷ༌ལྷ༌མོ༌ ཚང༌མ༌ལ༌ ཆད༌པ༌ ཏང༌ཨིན༌, ང༌ ཡ༌ཝ༌ ཨིན༌།
13 སྒོའེ༌ཀ༌ ཁྲག༌ སྐུ༌ཁན༌བོ༌ ཁྱོ༌ཞ༌གུན༌ དུག༌ཁན༌ནི༌ ཁང༌པའེ༌ སྟགས༌ ཨིན༌། ཁྲག༌ ཐོང༌ང༌ཅིག༌ ང༌ ཁྱོ༌ཞ༌གུན༌ནི༌ ཁང༌པ༌ གོམས༌ཏེ༌ ཆེན༌ ཡང༌ ཨི༌ཇིབ༌པ༌གུན༌ལ༌ ཏང༌ཅེས༌ཅན༌ནི༌ ཆད༌པ༌ ཁྱོ༌ཞ༌གུན༌ལ༌ མི༌ཏང༌།”
14 “ཁྱོ༌ཞ༌གུན༌ནི༌ ཡ༌ཝའེ༌ ཛད༌ཁན༌བོ༌ ཨིད༌ཏུ༌ ཅོ༌ཨིན༌ འི༌ ཞག༌པོ༌ མི༌རབས༌ནེ༌ མི༌རབས༌ ལོ༌ཞུང༌, ཏུས༌ཆེན༌ནི༌ ཚུལ༌ལ༌ རྩི༌གོས༌། འི༌བོ༌ ཏུས༌གྱུན༌ནི༌ ཕིའ༌ བཀའ༌ཁྲིམས༌ཤིག༌ ཨིན༌།
15 ཞག༌པོ༌ རྡུན༌ནི༌ ཕིའ༌ ཁྱོ༌ཞ༌གུན༌ སྐྱུར༌ མེད༌ཁན༌ནི༌ ཏ༌གི༌ ཟ༌གོས༌། ཞག༌ ཏང༌པོའེ༌ ཞག༌ག༌ ཁྱོ༌རང༌གུན༌ནི༌ ཁང༌པའེ༌ ནང༌ང༌ ཡོད༌ཁན༌ནི༌ སྐྱུར༌ ཚང༌མ༌ མེད༌ཁན༌ ཅོས༌། འི༌ ཞག༌ རྡུན༌ནི༌ རིངས༌ལ༌ སྐྱུར༌ ཡོད༌ཁན༌ནི༌ ཏ༌གི༌ ཟའ༌ཁན༌གུན༌ ཨིས༌ར༌ཨེལ༌པ༌ ཐེ༌མ༌གོས༌།
16 ཞག༌ ཏང༌པོ༌ དང༌ རྡུན༌པའེ༌ ཞག༌ག༌ ཁྱོ༌ཞ༌གུན༌ ཅོལ༌ཅེས༌ལ༌ ཛོམ༌གོས༌། ཏེ༌ ཞག༌གུན༌ལ༌ ཟའ༌ཅེས༌ལ༌ ཁར༌ཇི༌ གྲལ༌གྲིག༌ ཅོ༌ཅེས༌ མ༌སྟོག༌ ཞན༌ལས༌ ཅོ༌ མ༌གོས༌།”
17 “སྐྱུར༌ མེད༌ཁན༌ནི༌ ཏ༌གི༌ ཏུས༌ཆེན༌ རྩིས༌ ཅིའ༌ཟེར༌ན༌ འིན༌ན༌ ཞག༌ག༌ ངའེ༌ ཁྱོ༌ཞའེ༌ མི༌སྡེ༌གུན༌ ཨི༌ཇིབ༌ནེ༌ ཕིངས༌ཏེ༌ ཁྱོངས༌པིན༌། ཁྱོ༌ཞ༌གུན༌ནི༌ འི༌ ཞག༌པོ༌ ཏུས༌ཆེན༌ནི༌ ཚུལ༌ལ༌ མི༌རབས༌ནེ༌ མི༌རབས༌ རྩིས༌།
18 ཟླ༌ཝ༌ ཏང༌པོའེ༌ ཞག༌ 14 པའེ༌ ཕི༌ཏོག༌ནེ༌ ཞག༌ 21 པའེ༌ ཕི༌ཏོག༌ ཚོག༌པ༌ ཁྱོ༌ཞ༌གུན༌ སྐྱུར༌ཅན༌ནི༌ ཏ༌གི༌ ཟའ༌ མ༌གོས༌།
19 ཞག༌པོ༌ རྡུན༌ནི༌ ཕིའ༌ ཁྱོ༌ཞའེ༌ ཁང༌པའེ༌ ནང༌ང༌ སྐྱུར༌ ཐོབ༌ མ༌གོས༌། ཀལ༌ཏེས༌ ཏེན༌ན༌ ཡུལ༌ལ༌ སྐྱེ༌ཁན༌ ཨིས༌ར༌ཨེལ༌པ༌ ཡ༌ ཞན༌ཡུལ༌པ༌, སུ༌ཞིག༌གི༌ སྐྱུར༌ ཡོད༌ཁན༌ནི༌ ཏ༌གི༌ ཟའ༌ན༌ ཁོ༌ ཨིས༌ར༌ཨེལ༌པ༌ ཐེ༌མ༌གོས༌།
20 ཏེ༌ ཏུས༌ལ༌ ཁྱོ༌ཞ༌གུན༌ སྐྱུར༌ ཡོད༌ཁན༌ནི༌ ཟན༌ ཟའ༌ མ༌གོས༌། ཁྱོ༌ཞ༌གུན༌ ཀ༌རུ༌ ཚུགས༌ཏེ༌ ཡོད༌ནའང༌ སྐྱུར༌ མེད༌ཁན༌ནི༌ ཏ༌གི༌ ཟའ༌ གོས༌།”
21 མོ༌ཟེས༌སི༌ ཨིས༌ར༌ཨེལ༌པ༌ སྤོན༌བོ༌ ཚང༌མ༌ བོད༌ཏེ༌ ཁྱོངས༌ ཡང༌ ཟེརས༌, “ནང༌ཚངས༌ རེ༌རེའེ༌ ལུ༌གུ༌ ཡ༌ རི༌གུ༌ ལྡོམ༌ ཡང༌ ཏེ༌བོ༌ སད༌ཏེ༌ དཀོན༌མཆོག༌ གོམས༌ཏེ༌ སྐྱོད༌ཁན༌ནི༌ ཏུས༌ཆེན༌ རྩིས༌།
22 ཧི༌སོབ༌བི༌ བུར༌སའེ༌ ཁག༌ཞིག༌ ཁྲག༌གི༌ ནང༌ང༌ ཅུགས༌ཏེ༌ ཁྱོ༌ཞའེ༌ སྒོའེ༌ རིབ༌ཞི༌ ཐའ༌མ༌ དང༌ སྟག༌ གུན༌ནི༌ཀ༌ སྐུས༌། ཁྱོ༌ཞའ༌ ཅིག༌གའང༌ ང༌མོ༌ ཚོག༌པ༌ ཁང༌པ༌ནེ༌ ཕི༌ལོག༌ག༌ མ༌ཆ༌།
23 ཡ༌ཝ༌ ཨི༌ཇིབ༌པ༌གུན༌ སད༌ད༌ལ༌ སྐྱོད༌ ཟ༌ནེ༌ ཁོང༌ངི༌ སྒོའེ༌ རིབ༌ཞི༌ ཐའ༌མ༌ དང༌ སྟག༌ གུན༌ནི༌ཀ༌ ཁྲག༌ ཟིགས༌ཏེ༌ ཁྱོ༌ཞ༌གུན༌ནི༌ ཁང༌པ༌ གོམས༌ཏེ༌ སྐྱོད༌ཨིན༌ ཡང༌ ཤི༌ཅུག༌ཁན༌ནི༌ ཕོ༌ཉ༌ ཁྱོ༌ཞའེ༌ ཁང༌པའེ༌ ནང༌ང༌ ཆ༌ཅུག༌ག༌ མ༌ཛད༌ད༌ ཁྱོ༌ཞ༌གུན༌ སྐྱོབ༌བ༌ ཛད༌ཨིན༌།”
24 “ཁྱོ༌ཞའ༌ དང༌ ཁྱོ༌ཞའེ༌ པུར༌གྱུད༌གུན༌ནི༌ ཏེ༌བོ༌ ཏུས༌ཆེན༌ནི༌ ཚུལ༌ལ༌ ཏུས༌གྱུན༌ རྩི༌གོས༌།
25 ཡ༌ཝའེ༌ ཞལ༌ཆད༌ ཛད༌ཁན༌ནི༌ ས༌ཆའེ༌ ནང༌ང༌ ཁྱོ༌ཞ༌གུན༌ ལེབས༌ཏེ༌ སྟིང༌ནེའང༌ ཁྱོ༌ཞ༌གུན༌ནི༌ འི༌ ཏུས༌ཆེན༌བོ༌ རྩི༌གོས༌།
26 ཁྱོ༌ཞའེ༌ ཕྲུ༌གུ༌གུན༌ནི༌ ‘འི༌ ཏུས༌ཆེན༌བོ༌ ཅི༌ ཨིན༌ནོག༌’ ཟེར༌ཏེ༌ ཏྲི༌ན༌,
27 ཁོང༌གུན༌ལ༌ ཤོད༌, ‘འི༌བོ༌ ཡ༌ཝའ༌ གོམས༌ཏེ༌ སྐྱོད༌ཁན༌ནི༌ ཏུས༌ཆེན༌ནི༌ སྲོག༌ཆོད༌པོ༌ ཨིན༌ནོག༌, ཅིའ༌ཟེར༌ན༌ ཁོང༌ངི༌ ཨི༌ཇིབ༌པ༌གུན༌ལ༌ ཆད༌པ༌ སལ༌ ཟ༌ནེ༌ ཨིས༌ར༌ཨེལ༌པ༌ ཨི༌ཇིབ༌བི༌ ནང༌ང༌ ཡོད༌ཁན༌གུན༌ནི༌ ཁང༌པའེ༌ ཀ༌ནེ༌ གོམས༌ཏེ༌ སྐྱོད༌།’ ” ཏེ༌ནེ༌ མི༌ཚང༌མའེ༌ ས༌ ཐུག༌ ཅུགས༌ཏེ༌ གོ༌ སྒུས༌ཏེ༌ ཡ༌ཝའ༌ ཅོལས༌།
28 ཡ༌ཝའེ༌ མོ༌ཟེས༌ དང༌ ཨ༌རོན༌ལ༌ བཀའ༌ སལ༌ཁན༌ ནང༌ཞིན༌ ཨིས༌ར༌ཨེལ༌པ༌གུན༌ནི༌ ཅོས༌།
29 ཚན༌ སྐྱིལ༌ལ༌ ཡ༌ཝའེ༌ ཨི༌ཇིབ༌བི༌ ས༌ཆའེ༌ ནང༌ང༌ གོ༌སྐྱེས༌ བུ༌ཚ༌གུན༌ སད༌ད༌ ཛདས༌, ཁྲིས༌ ཐོབ༌ཅེས༌ཅན༌ནི༌ གྱལ༌པོའེ༌ བུ༌ཚ༌ནེ༌ ཏངས༌ཏེ༌ ཙོན༌པའེ༌ གོ༌སྐྱེས༌ བུ༌ཚ༌ ཚོག༌པ༌, ཡང༌ སྲལ༌ཁན༌ནི༌ སེམས༌ཅན༌གུན༌ནི༌ གོ༌སྐྱེས༌ ཕོ༌གུན༌ནའང༌ སད༌ད༌ ཛདས༌།
30 ཏེན༌ན༌ ཚན༌ལ༌ གྱལ༌པོ༌, ཁོའེ༌ སྤོན༌བོ༌གུན༌ དང༌ ཨི༌ཇིབ༌པ༌ ཚང༌མ༌ ལངས༌ ཡང༌ ཨི༌ཇིབ༌ གང༌པོའེ༌ ནང༌ང༌ ངུ༌སྐད༌ ཀྲག༌པོ༌ ཚོར༌ ཅིའ༌ཟེར༌ན༌ ཕྲུ༌གུ༌ མ༌ཤི༌ཁན༌ནི༌ ཁང༌པ༌ ཅིག༌གའང༌ མེད༌པིན༌།
ཨིས༌ར༌ཨེལ༌པ༌གུན༌ ཨི༌ཇིབ༌ནེ༌ སོང༌།
12:31-42
31 ཏེན༌ན༌ ཚན༌ལ༌ གྱལ༌པོའེ༌ མོ༌ཟེས༌ དང༌ ཨ༌རོན༌ བོད༌ཏེ༌ ཁྱོངས༌ ཡང༌ ཟེརས༌, “ཁྱོ༌ཞའ༌ ཨིས༌ར༌ཨེལ༌པ༌གུན༌ ངའེ༌ ཡུལ༌ནེ༌ བིང༌ཏེ༌ སོང༌། ཁྱོ༌ཞའེ༌ ཟེར༌ཁན༌ ནང༌ཞིན༌ ཡ༌ཝའ༌ ཅོལ༌ལ༌ སོང༌།
32 ཁྱོ༌ཞའེ༌ ར༌ལུག༌ དང༌ ཞན༌ སེམས༌ཅན༌གུན༌ ཁྲིད༌ཏེ༌ ངའེ༌ ཡུལ༌ནེ༌ བིང༌ཏེ༌ སོང༌ ཡང༌ ངའང༌ ཅིན༌ལབས༌ སལ༌ཅེས༌ལ༌ མོས༌ལམ༌ ཞུས༌།”
33 ཨི༌ཇིབ༌པ༌གུན༌ནི༌ ཁོང༌གུན༌ལ༌ གྱོགས༌པ༌ ཁོང༌ངི༌ ཡུལ༌ནེ༌ ཆ༌ཅེས༌ལ༌ འུ༌ཙུག༌ ཏངས༌ཏེ༌ ཟེརས༌, “ཁྱོ༌ཞ༌གུན༌ མ༌ཆའ༌ན༌ ང༌ཞའ༌ ཚང༌མ༌ ཤིའ༌ནོག༌།”
34 ཏེ༌ནེ༌ ཨིས༌ར༌ཨེལ༌པ༌གུན༌ སྐྱུར༌ མ༌ཏང༌ཁན༌ནི༌ པག༌པའེ༌ ལག༌ཕིས༌སི༌ ནང༌ང༌ ཏུམས༌ཏེ༌ ལ༌གིན༌ནི༌ ནང༌ང༌ ཁོང༌རང༌གུན༌ནི༌ སྤུང༌པའེ༌ཀ༌ ཁུར༌ཏེ༌ སོང༌།
35 ཨིས༌ར༌ཨེལ༌པ༌གུན༌ནི༌ མོ༌ཟེས༌སི༌ མོལ༌ཁན༌ ནང༌ཞིན༌ ཨི༌ཇིབ༌པ༌གུན༌ལ༌ སེར༌ དང༌ མུལ༌ལི༌ ཅ༌ལག༌ དང༌ ཀོས༌ལག༌ གུན༌ ཏོང༌ ཟེརས༌།
36 ཡ༌ཝའེ༌ ཨིས༌ར༌ཨེལ༌པ༌གུན༌ལ༌ ཆོགས༌སྐྱོར༌ ཐོབ༌ཅུགས༌ཏེ༌ ཁོང༌གུན༌ནི༌ ཏོང༌ ཟེར༌ཁན༌ ཚང༌མ༌ ཨི༌ཇིབ༌པ༌གུན༌ནི༌ ཏངས༌། ཏེན༌ན༌ཟུག༌གི༌ ཁོང༌གུན༌ནི༌ ཨི༌ཇིབ༌པ༌གུན༌ནི༌ གྱུ༌ནོར༌གུན༌ ཁྱེརས༌།
37 ཨིས༌ར༌ཨེལ༌པ༌གུན༌ རམ༌སིས༌སི༌ གྱལ༌ས༌ནེ༌ སུ༌ཀོད༌དི༌ གྱལ༌ས༌ སོང༌། ལག༌ དྲུག༌གི༌ མི༌ གྲུལ༌ཏེ༌ སོང༌ ཏེ༌ནང༌ང༌ ཕྲུ༌གུ༌ དང༌ བུ༌མོ༌ གུན༌ མ༌ཐེའ༌ ཨིན༌པིན༌།
38 ཨིས༌ར༌ཨེལ༌པ༌ མན༌ཁན༌ནི༌ མི༌ མང༌པོ༌ ཁོང༌ ཉམ༌པོ༌ སོང༌, ར༌ལུག༌ དང༌ ཞན༌ སེམས༌ཅན༌ནི༌ ཁྱུ༌ མང༌པོའང༌ ཡོད༌པིན༌།
39 ཁོང༌གུན༌ནི༌ ཨི༌ཇིབ༌ནེ༌ ཁྱོང༌ཁན༌ནི༌ པག༌པའེ༌ སྐྱུར༌ མེད༌ཁན༌གུན༌ལ༌ ཏ༌གི༌ ཅོས༌། པག༌པའེ༌ ནང༌ང༌ སྐྱུར༌ མེད༌པིན༌ ཅིའ༌ཟེར༌ན༌ ཁོང༌གུན༌ ཨི༌ཇིབ༌ནེ༌ གྱོགས༌པ༌ བིང༌གོས༌པ༌ ཁོང༌གུན༌ལ༌ ཟན༌ གྲལ༌གྲིག༌ ཅོ༌ཅེས༌སི༌ ཏུས༌ མ༌ཐོབ༌།
40 ཨིས༌ར༌ཨེལ༌པ༌གུན༌ ཨི༌ཇིབ༌བི༌ ནང༌ང༌ ལོ༌ 430 དུགས༌ཏེ༌ ཨིན༌པིན༌།
41 ལོ༌ 430 སྟིང༌ཇུག༌གི༌ ཞག༌ག༌ ཡ༌ཝའེ༌ མི༌སྡེ༌ ཚང༌མ༌ ཨི༌ཇིབ༌ནེ༌ བིངས༌ཏེ༌ སོང༌།
42 ཏེ༌ ཚན༌ལ༌ ཡ༌ཝའེ༌ ཨིས༌ར༌ཨེལ༌པ༌གུན༌ སྐྱོབས༌ཏེ༌ ཨི༌ཇིབ༌ནེ༌ ཕིངས༌ཏེ༌ ཁྱེར༌ར༌ ཛདས༌། ཨིས༌ར༌ཨེལ༌པ༌ ཚང༌མའེ༌ མི༌རབས༌ནེ༌ མི༌རབས༌ ཁོང༌གུན༌ནི༌ ཕ༌མེས༌པོ༌གུན༌ ཡ༌ཝའེ༌ སྐྱོབས༌ཏེ༌ ཕིང༌ང༌ ཛད༌ཁན༌ནི༌ ཚན༌བོ༌ ཨིད༌ཏུ༌ ཅོ༌ཨིན༌ ལོ༌ཞུང༌ རྩི༌གོས༌།
པེ༌སག༌གི༌ ཏུས༌ཆེན༌ རྩི༌ཅེས༌སི༌ ཁྲིམས༌།
12:43-51
43 ཡ༌ཝའེ༌ མོ༌ཟེས༌ དང༌ ཨ༌རོན༌ལ༌ མོལས༌, “འི༌གུན༌ པེ༌སག༌གི༌ ཏུས༌ཆེན༌ནི༌ ཁྲིམས༌གུན༌ ཨིན༌:”
“ཞན༌ཡུལ༌ལི༌ མི༌ སུ༌ཞིག༌གའང༌ པེ༌སག༌གི༌ ཁར༌ཇི༌ ཟའ༌ མི༌ཆོག༌།
44 ཁྱོ༌ཞའེ༌ ཉོས༌ཁན༌ ཚེ༌ཡོག༌གུན༌ནི༌ ཀལ༌ཏེས༌ སུན༌ནད༌ ཅོས༌ཏེ༌ ཨིན༌ན༌ ཏེ༌བོ༌ ཟའ༌ནའང༌ གྲིག༌ཏེ༌ ཨིན༌ནོག༌།
45 སྐབ༌སྟོགས༌སི༌ ཕིའ༌ ཁྱོ༌ཞའེ༌ ཡུལ༌ལ༌ དུག༌ཁན༌ནི༌ མི༌ དང༌ ལ༌པ༌ གུན༌ནི༌ ཟའ༌ མི༌ཆོག༌།”
46 “ཤ༌བོ༌ ཁང༌པའེ༌ ནང༌ང༌ ཟ༌གོས༌ ཏེ༌བོ༌ ཁང༌པ༌ནེ༌ ཕི༌ལོག༌ག༌ ཁྱེར༌ མ༌གོས༌ ཡང༌ རུས༌པ༌ ཅིག༌གའང༌ ཅག༌ མ༌གོས༌།
47 ཨིས༌ར༌ཨེལ༌པ༌ མི༌ཚོགས༌ གང༌པོའེ༌ འི༌ གའ༌སྟོན༌ རྩི༌གོས༌།”
48 “ཨིན༌ནའང༌ ཡ༌ཝ༌ གོམས༌ཏེ༌ སྐྱོད༌ཁན༌ནི༌ གའ༌སྟོན༌ རྩིའ༌ ཐད༌ཁན༌ ཞན༌ཡུལ༌པ༌ ཁྱོ༌ཞ༌གུན༌ནི༌ ནང༌ཚངས༌སི༌ ནང༌ང༌ ཡོད༌ཁན༌ནི༌ བུ༌ཚ༌ ཚང༌མའ༌ སུན༌ནད༌ ཅོ༌གོས༌། ཏེ༌ནེ༌ ཁོང༌གུན༌ ཏེན༌ན༌རུ༌ སྐྱེ༌ཁན༌ ཨིས༌ར༌ཨེལ༌པ༌ ཙོགས༌ གྱུར༌ཏེ༌ གའ༌སྟོན༌ནི༌ ནང༌ང༌ ཐུས༌ནའང༌ གྲིག༌ཏེ༌ ཨིན༌ནོག༌། ཨིན༌ནའང༌ སུན༌ནད༌ མ༌ཅོ༌ཁན༌གུན༌ནི༌ ཏེ༌ ཤ༌ ཟའ༌ མི༌ཆོགས༌།
49 ཏེན༌ན༌ བཀའ༌ཁྲིམས༌གུན༌ ཏེ༌རུ༌ སྐྱེས༌ཁན༌ནི༌ ཨིས༌ར༌ཨེལ༌པ༌གུན༌ དང༌ ཁྱོ༌ཞའེ༌ ཕྲོའ༌ ཡོད༌ཁན༌ནི༌ ཞན༌ཡུལ༌ལི༌ མི༌གུན༌ནི༌ ཕིའང༌ ཨིན༌།”
50 མོ༌ཟེས༌ དང༌ ཨ༌རོན༌ལ༌ ཡ༌ཝའེ༌ བཀའ༌ སལ༌ཁན༌ ནང༌ཞིན༌ ཨིས༌ར༌ཨེལ༌པ༌ ཚང༌མའེ༌ ཅོས༌།
51 ཡང༌ ཏེན༌ན༌ ཞག༌ག༌ ཡ༌ཝའེ༌ ཨིས༌ར༌ཨེལ༌པ༌གུན༌ སྡེ༌ སྡེ༌ ནང༌ང༌ ཨི༌ཇིབ༌ནེ༌ ཕིང༌ཏེ༌ ཁྱོང༌ང༌ ཛདས༌།