13
གོ༌སྐྱེས༌ བུ༌ཚའེ༌ ཕིའ༌ བཀའ༌ཁྲིམས༌།
13:1-16
1 ཡ༌ཝའེ༌ མོ༌ཟེས༌ལ༌ མོལས༌,
2 “གོ༌སྐྱེས༌ བུ༌ཚ༌ ཚང༌མ༌ ངའེ༌ ཕིའ༌ ཕེ༌གོས༌, ཨིས༌ར༌ཨེལ༌པ༌ མི༌ དང༌ སེམས༌ཅན༌ གུན༌ནི༌ གོ༌སྐྱེས༌ བུ༌ཚ༌ ཚང༌མ༌ ངའེ༌ ཨིན༌།”
3 ཏེ༌ནེ༌ མོ༌ཟེས༌སི༌ མི༌གུན༌ལ༌ ཟེརས༌, “ཁྱོ༌ཞ༌གུན༌ ཨི༌ཇིབ༌བི༌ ཚེ༌ཡོག༌ནེ༌ བིངས༌ཏེ༌ ཡོང༌ཁན༌ནི༌ འི༌ ཞག༌པོ༌ ཏུས༌གྱུན༌ ཨིད༌ཏུ༌ བོར༌ ཅིའ༌ཟེར༌ན༌ ཡ༌ཝའེ༌ ཁོང༌རང༌ངི༌ ཁྱུད༌ ཉམ༌པོ༌ ཁྱོ༌ཞ༌གུན༌ ཏེ༌ནང༌ནེ༌ ཕིངས༌ཏེ༌ ཁྱོང༌ང༌ ཛདས༌། སྐྱུར༌ ཡོད༌ཁན༌ ཟན༌ མ༌ཟའ༌།
4 དི༌རིང༌ ཨ༌བིབ༌ ཟླ༌ཝའེ༌ གོ༌མའེ༌ ཞག༌ག༌ ཁྱོ༌ཞ༌གུན༌ ཨི༌ཇིབ༌ནེ༌ བིངས༌ཏེ༌ ཆེན༌།
5 ཡ༌ཝའེ༌ ཁྱོ༌ཞའེ༌ ཕ༌མེས༌པོ༌གུན༌ལ༌ འོ༌མ༌ དང༌ རང༌རྩི༌ གྱུག༌སའེ༌ ཀེ༌ནན༌པ༌གུན༌, ཧེད༌པ༌གུན༌, ཨ༌མོར༌པ༌གུན༌, ཧིཝ༌པ༌གུན༌ དང༌ ཡེ༌བས༌པ༌གུན༌ནི༌ ས༌ཆ༌ ཏང༌ཅེས༌ལ༌ ནའ༌ ཁུར༌ར༌ ཛད༌ཁན༌བོའེ༌ ནང༌ང༌ ཁྱེར༌ར༌ ཛད༌ད༌ཅིག༌ ཁྱོ༌ཞ༌གུན༌ནི༌ ལོ༌ཞུང༌ ཟླ༌ཝ༌ ཏང༌པོའེ༌ ནང༌ང༌ འི༌ གའ༌སྟོན༌བོ༌ རྩི༌གོས༌།
6 ཞག༌པོ༌ རྡུན༌ ཁྱོ༌ཞ༌གུན༌ནི༌ སྐྱུར༌ མེད༌ཁན༌ནི༌ ཏ༌གི༌ ཟ༌གོས༌ ཡང༌ ཞག༌མ༌ རྡུན༌པའེ༌ ཞག༌ག༌ ཡ༌ཝའེ༌ རྩི༌ཝའེ༌ ནང༌ང༌ གའ༌སྟོན༌ རྩིས༌།
7 ཏེ༌ ཞག༌མ༌ རྡུན༌ ཁྱོ༌ཞའ༌ སྐྱུར༌ མེད༌ཁན༌ནི༌ ཏ༌གི༌ ཟ༌གོས༌། ཁྱོ༌ཞའེ༌ ས༌ཆ༌ གང༌པོའེ༌ ནང༌ང༌ སྐྱུར༌ ཡོད༌ཁན༌ ཅི༌ཞིག༌གའང༌ ཡོང༌ མ༌གོས༌།”
8 “ཏེ༌ ཞག༌ག༌ ཁྱོ༌ཞའེ༌ ཁྱོ༌ཞ༌རང༌ངི༌ ཕྲུ༌གུ༌གུན༌ལ༌ ཤོད༌, ‘ང༌ ཨི༌ཇིབ༌ནེ༌ ཕིངས༌ཏེ༌ ཁྱོང༌ ཟ༌ནེ༌ ཡ༌ཝའེ༌ ཛད༌ཁན༌བོ༌ ཨིད༌ཏུ༌ ཅོ༌ཨིན༌ ངའེ༌ འི༌ གའ༌སྟོན༌ རྩིའད༌།’
9 འི༌ གའ༌སྟོན༌ རྩི༌ཅེས༌པོ༌ ཁྱོ༌ཞ༌གུན༌ནི༌ ལག༌པ༌ དང༌ ཐོད༌པའེ༌ཀ༌ སྟགས༌ ཙོགས༌ ཨིན༌། ཏེ༌བོའེ༌ ཁྱོ༌ཞ༌གུན༌ ཡ༌ཝའེ༌ ཁོང༌རང༌ངི༌ ཁྱུད༌ཅན༌ ཆག༌གི༌ ཡོག༌ག༌ ཨི༌ཇིབ༌ནེ༌ ཕིངས༌ཏེ༌ ཁྱོང༌ང༌ ཛད༌ཁན༌བོ༌ ཤད༌ཅེས༌ལ༌ ཨིད༌ཏུ༌ སྐུལ༌ཨིན༌།
10 འི༌ གའ༌སྟོན༌བོ༌ ལོ༌ཞུང༌ འིན༌ན༌ ཏུས༌ལ༌ རྩི༌གོས༌།”
11 “ཡ༌ཝའེ༌ ཁྱོ༌ཞའ༌ དང༌ ཁྱོ༌ཞའེ༌ ཕ༌མེས༌པོ༌གུན༌ལ༌ ནའ༌ ཁུར༌ར༌ ཛད༌ཁན༌ ནང༌ཞིན༌ ཁྱོ༌ཞའ༌ ཀེ༌ནན༌པ༌གུན༌ནི༌ ས༌ཆའེ༌ ནང༌ང༌ ཁྱོང༌ང༌ ཛད༌ཏེ༌ སྟིང༌ནེ༌
12 ཁྱོ༌ཞ༌གུན༌ནི༌ བུ༌ཚ༌ གོ༌སྐྱེས༌ དང༌ ཁྱོ༌ཞའེ༌ སེམས༌ཅན༌གུན༌ནི༌ གོ༌སྐྱེས༌ ཕོ༌ ཚང༌མ༌ ཡ༌ཝའ༌ ཕུལ༌གོས༌ ཅིའ༌ཟེར༌ན༌ ཁོང༌ ཚང༌མ༌ ཡ༌ཝའེ༌ ཨིན༌ནོག༌།
13 ཨིན༌ནའང༌ ཁྱོ༌རང༌གུན༌ནི༌ ཁོང༌ངི༌ ཀ༌ནེ༌ གོ༌སྐྱེས༌ བུང༌བུ༌ ཕོ༌ ཚང༌མ༌ ཏེ༌བོའེ༌ ཚབས༌ལ༌ ལུ༌གུ༌ ཞིག༌ ཆོད༌པ༌ ཕུལ༌ཏེ༌ ལོགས༌ཏེ༌ ཉོ༌ཉན༌ ཨིན༌། ཀལ༌ཏེས༌ ལོགས༌ཏེ༌ མ༌ཉོ༌ན༌ ཏེ༌བོའེ༌ ཇིང༌བ༌ ཅགས༌ཏེ༌ སོད༌། ཁྱོ༌ཞ༌གུན༌ནི༌ གོ༌སྐྱེས༌ ཕྲུ༌གུ༌ བུ༌ཚ༌ ཚང༌མ༌ ལོགས༌ཏེ༌ ཉོ༌གོས༌།”
14 “ཡོང༌ཅེས༌ཅན༌ནི༌ ཏུས༌སི༌ ནང༌ང༌ ཁྱོ༌ཞའེ༌ ཕྲུ༌གུ༌གུན༌ནི༌ འི༌ ཏོན༌ ཅི༌ ཨིན༌ནོག༌ ཟེར༌ཏེ༌ ཏྲི༌ན༌, ཁྱོ༌ཞ༌གུན༌ནི༌ ཁོང༌གུན༌ལ༌ ཟེར༌, ‘ཡ༌ཝའ༌ ཁྱུད༌ཅན༌ནི༌ ང༌དང༌གུན༌ ཨི༌ཇིབ༌བི༌ ཚེ༌ཡོག༌ནེ༌ ཕིངས༌ཏེ༌ ཁྱོང༌ང༌ ཛད༌ཏེ༌ ཨིན༌ནོག༌།
15 ཨི༌ཇིབ༌བི༌ གྱལ༌པོའེ༌ སྙིང༌སྐྱོང༌པོ༌ གྱུར༌ཏེ༌ ང༌ཞ༌གུན༌ ཆ༌ མ༌ཅུག༌ ཟ༌ནེ༌ ཡ༌ཝའེ༌ ཨི༌ཇིབ༌པ༌གུན༌ནི༌ མི༌ དང༌ སེམས༌ཅན༌ནི༌ གོ༌སྐྱེས༌ བུ༌ཚ༌ ཚང༌མ༌ སད༌ད༌ ཛད༌། ཏེ༌ གྱུན༌ཚན༌ནི༌ ཕིའ༌ ང༌ཞའེ༌ སེམས༌ཅན༌ནི༌ གོ༌སྐྱེས༌ བུ༌ཚ༌ ཚང༌མ༌ ཡ༌ཝའ༌ ཕུལ༌ལད༌ ཨིན༌ནའང༌ ཡ༌ཝའེ༌ ཀ༌ནེ༌ ང༌ཞའེ༌ ང༌ཞ༌རང༌ངི༌ གོ༌སྐྱེས༌ བུ༌ཚ༌གུན༌ ལོགས༌ཏེ༌ ཉོ༌གོས༌།’
16 ཡ༌ཝའེ༌ ཁོང༌རང༌ངི༌ ཁྱུད༌ ཉམ༌པོ༌ ང༌དང༌གུན༌ ཨི༌ཇིབ༌ནེ༌ ཕིངས༌ཏེ༌ ཁྱོང༌ང༌ ཛད༌ཁན༌བོ༌ ཨིད༌ཏུ༌ བོར༌ཅེས༌ལ༌ འི༌བོ༌ ང༌དང༌གུན༌ནི༌ ལག༌པ༌ དང༌ ཐོད༌པའི༌ཀ༌ སྟགས༌ ཙོགས༌ ཨིན༌ནོག༌།”
ཚོ༌ མར༌པོ༌ རྒལས༌།
13:17-14:25
17 ཨི༌ཇིབ༌བི༌ གྱལ༌པོའེ༌ མི༌གུན༌ ཆ༌ཅུག༌ག༌ཅིག༌, དཀོན༌མཆོག༌གི༌ ཁོང༌གུན༌ ཕི༌ལིས༌ཏི༌པའེ༌ ས༌ཆའེ༌ ལམ༌ནེ༌ ཁྲིད༌ཏེ༌ ཁྱེར༌ར༌ མ༌ཛདས༌, ཞན༌ ཏེ༌ ལམ༌བོ༌ ཉེ༌ཤོག༌པོ༌ ཨིན༌པིན༌། དཀོན༌མཆོག༌གི༌ མོལས༌, “མག༌ ཏང༌གོས༌ན༌ མི༌གུན༌ནི༌ སམ༌བ༌ གྱུར༌ཏེ༌ ཁོང༌གུན༌ ལོགས༌ཏེ༌ ཨི༌ཇིབ༌བ༌ ཆ༌སྲིད༌ཅེས༌ ཨིན༌ནོག༌།”
18 ཏེ༌བོའེ༌ཕིའ༌ ཁོང༌ངི༌ ཁོང༌གུན༌ ཐང༌སྟོང༌ གྱུད༌ཏེ༌ ཚོ༌ མར༌པོ༌ ཆོགས༌ལ༌ ཁྱེར༌ར༌ ཛདས༌། ཨིས༌ར༌ཨེལ༌པ༌གུན༌ནི༌ མག༌ ཏང༌ཅེས༌ལ༌ ལག༌ཆ༌ ཁུར༌ཏེ༌ ཡོད༌པིན༌།
19 མོ༌ཟེས༌སི༌ ཡོ༌སེབ༌བི༌ རུས༌པ༌གུན༌ ཁུརས༌ ཅིའ༌ཟེར༌ན༌ ཡོ༌སེབ༌བི༌ ཨིས༌ར༌ཨེལ༌པ༌གུན༌ལ༌ ནའ༌ ཁུར༌ཅུགས༌ཏེ༌ ཟེརས༌, “དཀོན༌མཆོག༌གི༌ རོགས༌ ཛད༌ཏེ༌ ཁྱོ༌ཞའ༌ ཐར༌ཅུག༌ ཟ༌ནེ༌ ཁྱོ༌ཞའེ༌ ངའེ༌ རུས༌པ༌གུན༌ ཁྱོ༌ཞའ༌ ཉམ༌པོ༌ འི༌ ས༌ཆ༌ནེ༌ ཁྱེར༌གོས༌།”
20 སུ༌ཀོད༌ནེ༌ བིང༌ཏེ༌ ཨིས༌ར༌ཨེལ༌པ༌གུན༌ནི༌ ཐང༌སྟོང༌ངི༌ ཟུར༌ལ༌ ཨི༌ཐམ༌ ཟེར༌སའེ༌ ས༌ཆའེ༌ཀ༌ ཀུར༌ ཙུགས༌ཏེ༌ དུགས༌།
21 ཡ༌ཝའ༌ ཉི༌མའ༌ ལམ༌སྟན༌ཁན༌ སྲིན༌ནི༌ ཀ༌ཝ༌ ཡང༌ ཚན༌ལ༌ འོད༌ ཏང༌ཁན༌ མེའེ༌ ཀ༌ཝ༌ ཙོགས༌ལ༌ ཁོང༌གུན༌ནི༌ སྔུན༌སྔུན༌ལ༌ སྐྱོདས༌། ཏེ༌ནེ༌ ཁོང༌གུན༌ ཉི༌མ༌ དང༌ ཚན༌ ཉིས༌ཀོ༌ གྲུལ༌ཐུབ༌།
22 ཉི༌མ༌ སྲིན༌ དང༌ ཚན༌ལ༌ མེའེ༌ ཀ༌ཝ༌ ཏུས༌གྱུན༌ ཁོང༌གུན༌ ཉམ༌པོ༌ ལུས༌།