19
སི༌ནཱའི༌ རི༌།
19:1-25
1 ཨིས༌ར༌ཨེལ༌པ༌གུན༌ ཨི༌ཇིབ༌བི༌ ཡུལ༌ནེ༌ བིངས༌ཏེ༌ སྟིང༌ནེ༌ ཟླ༌ཝ༌ སུམ༌པའེ༌ གོ༌མའེ༌ ཞག༌ག༌ ཁོང༌གུན༌ སི༌ནཱའི༌ ཐང༌སྟོང༌ང༌ ལེབ༌།
2 ཨིས༌ར༌ཨེལ༌པ༌གུན༌ རེ༌ཕི༌དིམ༌ནེ༌ བིང༌ཏེ༌ སི༌ནཱའི༌ ཐང༌སྟོང༌ང༌ ལེབ༌ ཡང༌ ཏེ༌རུ༌ ཁོང༌གུན༌ནི༌ སི༌ནཱའི༌ རིའི༌ དུན༌ལ༌ ཀུར༌ ཙུགས༌ཏེ༌ དུགས༌།
3 མོ༌ཟེས༌ རིའི༌ཀ༌ ཀེན༌ལ༌ དཀོན༌མཆོག༌ག༌ ཐུག༌ག༌ལ༌ སོང༌། ཡ༌ཝའེ༌ ཁོའ༌ རི༌གོ༌ནེ༌ བོད༌ད༌ ཛད༌ཏེ༌ མོལས༌, “ཁྱོ༌རང༌ངི༌ ཨིས༌ར༌ཨེལ༌པ༌, ཡ༌ཀོབ༌བི༌ པུར༌གྱུད༌གུན༌ལ༌ འི༌བོ༌ ཟེར༌,
4 ‘ངའེ༌ ཨི༌ཇིབ༌པ༌གུན༌ལ༌ ཅོ༌ཁན༌གུན༌ ཁྱོ༌ཞའེ༌ ཐོང༌ཏེ༌ ཨིན༌ནོག༌། ལག༌གི༌ ཤོག༌པའེ༌ ནང༌ང༌ ཕྲུ༌གུ༌ ཁུར༌ཏེ༌ འུར༌ར༌ ཙོགས༌ལ༌ ངའེ༌ ཁྱོ༌ཞ༌གུན༌ ཁུར༌ཏེ༌ ང༌རང༌ངི༌ཀ༌ ཁྱོངས༌པིན༌།
5 ཏ༌ ཀལ༌ཏེས༌ ཁྱོ༌ཞའེ༌ ངའེ༌ ཁའ༌ཉན༌ཏེ༌ ང༌དང༌ངི༌ པར༌ལ༌ ཆད༌དོན༌ ཅོ༌ཁན༌གུན༌ བོར༌ན༌, ཇིག༌རྟེན༌ གང༌པོའེ༌ མི༌ ངའེ༌ ཨིན༌ཁན༌གུན༌ནི༌ ནང༌ནེ༌ ཁྱོ༌ཞའ༌ ཚང༌མའེ༌སང༌ མང༌ང༌ རིན༌ཅན༌བོ༌ གྱུར༌ཨིན༌།
6 ཡང༌ ཁྱོ༌ཞའ༌ ངའེ༌ བླ༌མ༌གུན༌ནི༌ གྱལ༌སྲིད༌ དང༌ ཏམ༌པ༌ གྱལ༌ཁམས༌པོ༌ གྱུར༌ཨིན༌།’ འི༌ སྤེ༌ར༌གུན༌ ཁྱོ༌རང༌ངི༌ ཨིས༌ར༌ཨེལ༌པ༌གུན༌ལ༌ ཤོད༌།”
7 ཏེ༌ནེ༌ མོ༌ཟེས༌ ལོགས༌ཏེ༌ སོང༌ ཡང༌ སྤོན༌བོ༌གུན༌ལ༌ བོད༌ཏེ༌ ཡ༌ཝའེ༌ ཤོད༌ མོལ༌ཁན༌ ཚང༌མ༌ ཁོང༌གུན༌ལ༌ ཤདས༌།
8 མི༌ཚང༌མ༌ ཅིག༌ སོང༌ཏེ༌ ལན༌ཏངས༌, “ཡ༌ཝའེ༌ མོལ༌ཁན༌ ཚང༌མ༌ ང༌ཞ༌གུན༌ནི༌ ཅོ༌ཨིན༌” ཡང༌ མོ༌ཟེས༌སི༌ འི༌ ལོན༌བོ༌ ཡ༌ཝའ༌ ཞུས༌།
9 ཡ༌ཝའེ༌ མོ༌ཟེས༌ལ༌ མོལས༌, “མི༌གུན༌ནི༌ ངའེ༌ ཁྱོ༌རང༌ ཉམ༌པོ༌ སྤེ༌ར༌ ཏང༌ཁན༌བོ༌ ཚོར༌ཅེས༌སི༌ ཕིའ༌ སྲིན༌ ཐུག༌མོ༌ཞིག༌གི༌ ནང༌ང༌ ང༌ ཁྱོ༌རང༌ངི༌ཀ༌ ཡོང༌ཨིན༌། ཏེ༌ནེ༌ ཁོང༌གུན༌ནི༌ ཁྱོ༌རང༌ངི༌ཀ༌ ཨིད༌ཤེས༌ ཅོ༌ཨིན༌།” ཏེ༌ནེ༌ མི༌གུན༌ནི༌ ཟེར༌ཁན༌གུན༌ མོ༌ཟེས༌སི༌ ཡ༌ཝའ༌ ཞུས༌།
10 ཡ༌ཝའེ༌ མོ༌ཟེས༌ལ༌ མོལས༌, “མི༌གུན༌ ཡོད༌ས༌ སོང༌ ཡང༌ དི༌རིང༌ དང༌ ཐོ༌རེ༌ ཁོ༌རང༌གུན༌ རྩང༌མ༌ ཅོ༌ཅུགས༌ཏེ༌ ཀོས༌ལག༌གུན༌ ཁྲུ༌ ཟེར༌།
11 ཞག༌ སུམ༌པའེ༌ ཞག༌ག༌ ཁོང༌གུན༌ གྲལ༌གྲིག༌ ཡོང༌གོས༌ ཅིའ༌ཟེར༌ན༌ ཏེ༌ ཞག༌ག༌ མི༌ ཚང༌མའེ༌ དུན༌ལ༌ ང༌ བབས༌ཏེ༌ སི༌ནཱའི༌ རིའི༌ཀ༌ ཡོང༌ཨིན༌།
12 རིའི༌ ལྡན༌ ཀྱིར༌སྐོར༌ཏེ༌ སྟགས༌ ཏོང༌ ཡང༌ ‘མི༌གུན༌ལ༌ ཏེ༌བོ༌ གོམས༌ཏེ༌ རིའི༌ཀ༌ མི༌ཆ༌ཅེས༌ ཡ༌ རིའ༌ ལག༌པ༌ མི༌རྩེ༌ཅེས༌ལ༌ ཟེར༌། ཀལ༌ཏེས༌ སུ༌ཞིག༌གི༌ རིའ༌ ལག༌པ༌ རྩེ༌ན༌ ཁོ༌ སད༌གོས༌།
13 སུ༌ཞིག༌གིའང༌ ཁོའ༌ ལག༌པ༌ རྩེ༌ མ༌གོས༌, ཁོའ༌ རྡོའ༌ གྱབས༌ཏེ༌ ཡ༌ དའ༌ ཏངས༌ཏེ༌ སད༌གོས༌། མི༌ ཨིན༌གྲོ༌ ཡ༌ སེམས༌ཅན༌ རིའ༌ ལག༌པ༌ རྩེས༌ཁན༌བོ༌ སད༌གོས༌།’ ཏུང༌བོ༌ རིང༌མོ༌ ཤེད༌ཅན༌ ཕུའ༌ཅིག༌ མི༌གུན༌ རིའི༌ཀ༌ ཡོང༌ནའང༌ གྲིག༌།”
14 ཏེ༌ནེ༌ མོ༌ཟེས༌ རི༌ནེ༌ བབས༌ཏེ༌ སོང༌ ཡང༌ མི༌གུན༌ལ༌ ཁོ༌རང༌གུན༌ རྩང༌མ༌ ཅོས༌ཏེ༌ ཁོང༌གུན༌ནི༌ ཀོས༌ལག༌གུན༌ ཁྲུ༌ཅུགས༌།
15 ཡང༌ མོ༌ཟེས༌སི༌ མི༌གུན༌ལ༌ ཟེརས༌, “ཁྱོ༌རང༌གུན༌ ཞག༌ སུམ༌པའེ༌ ཕིའ༌ གྲལ༌གྲིག༌ ཅོས༌ ཡང༌ འི༌ ཏུས༌ལ༌ ཞིད༌མད༌ ཉམ༌པོ༌ ལུས༌བྲེལ༌ ཅོ༌ མ༌གོས༌།”
16 ཞག༌མ༌ སུམ༌པའེ༌ ང༌མོ༌ བྲུག༌ལྡིར༌ ཡང༌ སྐམ༌ལག༌ བར༌, རི༌ཀ༌ སྲིན༌ ཐུག༌མོ༌ བབས༌ ཡང༌ མ༌ ཤེད༌ཅན༌ ཏུང༌ སྐད༌ ཚོར༌། ཀུར༌ ཙུག༌སའེ༌ ནས༌སའེ༌ ནང༌ང༌ ཡོད༌ཁན༌ མི༌ ཚང༌མ༌ ཇིགས༌ཏེ༌ དར༌།
17 ཏེ༌ནེ༌ མོ༌ཟེས༌སི༌ མི༌གུན༌ ཀུར༌ ཙུག༌སའེ༌ ནས༌ས༌ནེ༌ ཕིངས༌ཏེ༌ དཀོན༌མཆོག༌ ཉམ༌པོ༌ ཐུག༌ག༌ལ༌ ཁྱེརས༌། ཡང༌ ཁོང༌གུན༌ རིའི༌ ལྡན༌ནི༌ཀ༌ ལངས༌ཏེ༌ དུགས༌།
18 སི༌ནཱའི༌ རི༌ ཏུད༌པའེ༌ ཀབས༌ཏེ༌ ཡོད༌པིན༌ ཅིའ༌ཟེར༌ན༌ ཡ༌ཝ༌ མེའེ༌ ནང༌ང༌ ཏེ༌ཀ༌ བབས༌ཏེ༌ སྐྱོདས༌། མེ༌ ཀྲག༌པོ༌ བར༌ཁན༌ནི༌ ཏུད༌པ༌ ཙོགས༌ལ༌ ཏུད༌པ༌ ཀེན༌ལ༌ ཆའད༌པིན༌ ཡང༌ རི༌ གང༌པོ༌ མ༌སྲན༌ཏྲེ༌ སྐུལ༌ལ༌ ཛདས༌།
19 ཏུང༌ངི༌ སྐད༌པོ༌ མང༌ནེ༌ མང༌ང༌ ཤེད༌ཅན༌ སོང༌། ཏེ༌ནེ༌ མོ༌ཟེས༌སི༌ སྤེ༌ར༌ ཏངས༌ ཡང༌ དཀོན༌མཆོག༌གི༌ བྲུག༌ལྡིར༌ ཙོགས༌ ཤེད༌ཅན༌ སྐད༌དི༌ ནང༌ང༌ ལན༌སལས༌།
20 ཡ༌ཝ༌ སི༌ནཱའི༌ རི༌ གོའེ༌ཀ༌ བབས༌ཏེ༌ སྐྱོདས༌ ཡང༌ མོ༌ཟེས༌ལ༌ རི༌གོའ༌ ཡོང༌ཅེས༌ལ༌ མོལས༌། མོ༌ཟེས༌ རི༌ཀ༌ ཀེན༌ལ༌ སོང༌།
21 ཡ༌ཝའེ༌ ཁོའ༌ མོལས༌, “ཐུར༌ལ༌ བབས༌ཏེ༌ སོང༌ ཡང༌ མི༌གུན༌ལ༌ སྤང༌པུད༌ཏེ༌ ཟེར༌, ‘ཡ༌ཝ༌ དཀོན༌མཆོག༌ ལྟའ༌ཅེས༌ལ༌ སྟགས༌ ཏང༌ཁན༌བོ༌ གོམས༌ཏེ༌ མ༌ཡོང༌, ཀལ༌ཏེས༌ ཡོང༌ན༌ ཁྱོ༌ཞའ༌ མང༌པོ༌ ཤི༌ཨིན༌།
22 ང༌ ཡ༌ཝའེ༌ དུན༌ལ༌ ཡོང༌ཅེས༌ཅན༌ནི༌ བླ༌མ༌གུན༌ནའང༌ རྩང༌མ༌ ཅོ༌གོས༌, ཏེ༌ མ༌ནེ༌ ངའེ༌ ཁོང༌གུན༌ལ༌ ཆད༌པ༌ ཏང༌ཨིན༌།’ ”
23 མོ༌ཟེས༌སི༌ ཡ༌ཝའ༌ ཟེརས༌, “མི༌གུན༌ རི༌ཀ༌ ཡོང༌ མི༌ཆོགས༌ ཅིའ༌ཞུ༌ན༌ ཉེ༌རང༌ངི༌ ང༌ཞའ༌ རི༌བོ༌ ཏམ༌པ༌ རྩིས༌ཏེ༌ སྟགས༌ ཏང༌ཅེས༌ ཡང༌ ཏེ༌སང༌ ཐལ༌ཏེ༌ མི༌ ཡོང༌ཅེས༌ལ༌ བཀའ༌ སལས༌།”
24 ཡ༌ཝའེ༌ ལན༌སལས༌, “ཡོག༌ག༌ སོང༌ ཡང༌ ཨ༌རོན༌ ཁྲིད༌ཏེ༌ ཁྱོང༌། ཨིན༌ནའང༌ བླ༌མ༌གུན༌ ཡ༌ མི༌གུན༌, སྟགས༌ ཏང༌ཁན༌བོ༌ གོམས༌ཏེ༌ ཡ༌ཝ༌ ཡོད༌སའ༌ ཡོང༌ཅེས༌ ཅོ༌ མ༌གོས༌ ཏེ༌ཟུག༌ ཅོ༌ན༌ ངའེ༌ ཁོང༌གུན༌ལ༌ ཆད༌པ༌ ཏང༌ཨིན༌།”
25 ཏེ༌ནེ༌ མོ༌ཟེས༌ ཡོག༌ག༌ མི༌གུན༌ ཡོད༌ས༌ སོང༌ ཡང༌ ཁོང༌གུན༌ལ༌ ཡ༌ཝའེ༌ མོལ༌ཁན༌གུན༌ ཤདས༌།