20
བཀའ༌རྒྱ༌ རྕུ༌།
20:1-26
1 དཀོན༌མཆོག༌གི༌ འི༌ ཞལ༌ཏ༌ ཚང༌མ༌ སལས༌,
2 “ཁྱོ༌ཞ༌གུན༌, ཨི༌ཇིབ༌བི༌ ནས༌སའེ༌ ནང༌ང༌ ཚེ༌ཡོག༌ག༌ ཡོད༌ཁན༌བོའེ༌ ནང༌ནེ༌ ཕིངས༌ཏེ༌ ཁྱོང༌ཁན༌ ང༌ ཡ༌ཝ༌ ཁྱོ༌ཞ༌གུན༌ནི༌ དཀོན༌མཆོག༌ ཨིན༌།”
3 “ཁྱོ༌ཞའེ༌, ང༌ ཅིག༌པོ༌ མ༌ནེ༌ ཞན༌ སུའང༌ དཀོན༌མཆོག༌ རྩིས༌ཏེ༌ ཅོལ༌ མ༌གོས༌།”
4 “ཁྱོ༌ཞ༌གུན༌ནི༌ ནམ༌ཁའེ༌ ནང༌ང༌ ཡ༌ ཇིག༌རྟེན༌ནི༌ཀ༌ ཡ༌ ས༌ཀྱད༌དི༌ ཡོག༌ག༌ ཡ༌ ཚོའེ༌ ནང༌ང༌ ཡོད༌ཁན༌གུན༌ནི༌ ཟོས༌ཏེ༌ ནང༌ང༌ སྐུན༌དྲ༌ ཅོ༌ མ༌གོས༌།
5 ཏེ༌གུན༌ནི༌ དུན༌ལ༌ གོ༌ མ༌སྒུ༌ ཡ༌ ཏེ༌གུན༌ལ༌ མ༌ཅོལ༌ ཅིའ༌ཟེར༌ན༌ ང༌ ཡ༌ཝ༌ ཁྱོ༌ཞ༌གུན༌ནི༌ དཀོན༌མཆོག༌ ཚིག༌རི༌ཅན༌ དཀོན༌མཆོག༌ ཨིན༌། ང༌ ཕངས༌ཏེ༌ སྡིག༌པ༌ ཅོ༌ཁན༌གུན༌ནི༌ མི༌རབས༌ སུམ༌པ༌ དང༌ ཞི༌པ༌ ཚག༌པའེ༌ ཕྲུ༌གུ༌གུན༌ལ༌ ངའེ༌ ཆད༌པ༌ ཏང༌ཨིན༌།
6 ཨིན༌ནའང༌ ངའ༌ ཅམས༌པ༌ ཅོས༌ཏེ༌ ངའེ༌ ཁྲིམས༌གུན༌ལ༌ ཁའ༌ ཉན༌ཁན༌གུན༌ནི༌ མི༌རབས༌ སྟོང༌ ཚག༌པ༌ ངའེ༌ གྱུར༌ཇ༌ མེད༌ཁན༌ནི༌ ཅམས༌པ༌ སྟན༌ཨིན༌།”
7 “ཁྱོ༌ཞ༌གུན༌ནི༌, ཡ༌ཝ༌ ཁྱོ༌ཞའེ༌ དཀོན༌མཆོག༌གི༌ ཚན༌ ཏོན༌མེད༌ལ༌ ཀོལ༌ མ༌གོས༌ ཅིའ༌ཟེར༌ན༌ ཡ༌ཝའེ༌ ཚན༌ ཏོན༌མེད༌ལ༌ ཀོལ༌ཁན༌གུན༌ལ༌ ཁོང༌ངི༌ སྐྱོན༌མེད༌ ཐེའ༌ མི༌ཛད༌།”
8 “ཤབ༌བད༌དི༌ ངལ༌ཚོའེ༌ ཞག༌ ཨིད༌ཏུ༌ ཅོས༌ཏེ༌ ཏེ༌བོ༌ ཏམ༌པ༌ བོར༌།
9 ཁྱོ༌ཞ༌གུན༌ནི༌ ཞག༌ དྲུག༌པོའེ༌ ནང༌ང༌ ལས༌ ཚང༌མ༌ ཅོ༌གོས༌,
10 ཨིན༌ནའང༌ ཞག༌ རྡུན༌པ༌བོ༌ ངལ༌ཚོའེ༌ ཞག༌ ཨིན༌ནོག༌ ཀ༌བོ༌ ཡ༌ཝ༌ ཁྱོ༌ཞའེ༌ དཀོན༌མཆོག༌ག༌ ཏང༌གོས༌། ཏེ༌ ཞག༌ག༌ སུ༌ཞིག༌གིའང༌ ལས༌ ཅོ༌ མ༌གོས༌། ཁྱོ༌ཞ༌, ཁྱོ༌ཞའེ༌ བུ༌ཚ༌ ཡ༌ བུ༌མོ༌, ཁྱོ༌ཞའེ༌ ཚེ༌ཡོག༌ བུ༌ཚ༌ ཡ༌ བུ༌མོ༌གུན༌, ཁྱོ༌ཞའེ༌ སེམས༌ཅན༌གུན༌ ཡ༌ ཞན༌ཡུལ༌ལི༌ མི༌ ཁྱོ༌ཞ༌གུན༌ནི༌ ཡུལ༌ལ༌ དུག༌ཁན༌ ཚང༌མའེ༌ ལས༌ ཅོ༌ མ༌གོས༌།
11 ཞག༌ དྲུག༌གི༌ ནང༌ང༌ ཡ༌ཝའེ༌ ནམ༌ཁའ༌, ཇིག༌རྟེན༌, ཚོ༌ དང༌ ཏེ༌གུན༌ནི༌ ནང༌ང༌ ཡོད༌ཁན༌ ཚང༌མ༌ ཅོའ༌ ཛདས༌ ཨིན༌ནའང༌ ཞག༌ རྡུན༌པའེ༌ ཞག༌ག༌ ཁོང༌ ངལ༌ཚོའ༌ ཛདས༌། ཏེན༌ན༌བོའེ༌ཕིའ༌ ཡ༌ཝའེ༌ ཤབ༌བད༌དི༌ ཞག༌པོའ༌ ཅིན༌ལབས༌ སལ༌ཏེ༌ ཏམ༌པ༌ ཛདས༌།”
12 “རང༌ངི༌ ཨ༌བ༌ དང༌ ཨ༌མའ༌ རྩི༌ཝ༌ ཅོས༌། ཏེ༌ནེ༌ ང༌ ཡ༌ཝ༌ ཁྱོ༌ཞའེ༌ དཀོན༌མཆོག༌གི༌ ཏང༌ཅེས༌ཅན༌ནི༌ ས༌ཆ༌བོའེ༌ ནང༌ང༌ ཁྱོ༌ཞ༌གུན༌ནི༌ མི༌ཚེ༌ རིང༌མོ༌ ཕུད༌ ཐུབ༌ཨིན༌།”
13 “མི༌ མ༌སད༌།”
14 “རང༌ངི༌ ཞིད༌མད༌ མན༌པ༌ ཞན༌མ༌ ཉམ༌པོ༌ ལུས༌བྲེལ༌ མ༌ཅོ༌།”
15 “རྐུན༌མ༌ མ༌རྐུ༌།”
16 “སུ༌ཞིག༌གི༌ གྱབ༌གལ༌ལ༌ སྤང༌པོ༌ ཟུན༌བ༌ མ༌ཏང༌།”
17 “ཞན༌མའེ༌ ཁང༌པའེ༌ ཕིའ༌ དོད༌པ༌ མ༌ཅོ༌། ཞན༌མའེ༌ ན༌མ༌, བུ༌ཚ༌ ཡ༌ བུ༌མོ༌ ཚེ༌ཡོག༌, ལང༌ཏོ༌ ཡ༌ བུང༌བུ༌, ཡ༌ ཞན༌མའེ༌ ཨིན༌ཁན༌ ཅི༌ཞིག༌གི༌ ཕིའ༌ དོད༌པ༌ མ༌ཅོ༌།”
18 མི༌གུན༌ནི༌, བྲུག༌ལྡིར༌ དང༌ སྐམ༌ལག༌ ཡང༌ ཏུང༌ངི༌ སྐད༌ ཀྲག༌པོ༌ དང༌ རི༌ནེ༌ ཏུད༌པ༌ བིང༌ང༌ ཐོང༌ང༌ཅིག༌ ཁོང༌གུན༌ ཇིགས༌ཏེ༌ དར༌ཨིན༌ ཐག༌རིང༌ང༌ ལངས༌ཏེ༌ དུགས༌
19 མི༌གུན༌ནི༌ མོ༌ཟེས༌ལ༌ ཟེརས༌, “ཉེ༌རང༌ངི༌ ང༌ཞ༌གུན༌ལ༌ སྤེ༌ར༌ སལ༌ན༌ ང༌ཞའེ༌ ཉན༌ཨིན༌། ཨིན༌ནའང༌ དཀོན༌མཆོག༌ག༌ ང༌ཞའ༌ ཞལ༌ཏ༌ མི༌སལ༌ཅེས༌ལ༌ ཞུ༌ཝ༌ ཕུལ༌, ཏེ༌མན༌ན༌ ང༌ཞ༌གུན༌ ཤིའ༌ནོག༌།”
20 མོ༌ཟེས༌སི༌ ལན༌ཏངས༌, “ཇིགས༌ མ༌ཇིགས༌། དཀོན༌མཆོག༌གི༌ ཇིགས༌སི༌ ནང༌ང༌ ཁྱོ༌ཞ༌གུན༌ནི༌ སྡིག༌པ༌ མི༌ཅོ༌ཅེས༌སི༌ ཕིའ༌ ཁོང༌ ཁྱོ༌ཞ༌གུན༌ལ༌ ཚོད༌ལྟ༌ ལེན༌ན༌ལ༌ སྐྱོད༌ཏེ༌ ཨིན༌ནོག༌།”
21 ཨིན༌ནའང༌ མི༌གུན༌ ཐག༌རིང༌ང༌ དུགས༌ ཡང༌ མོ༌ཟེས༌ སྲིན༌ ཐུག༌མོ༌ ནག༌པོའེ༌ དུན༌ལ༌ སོང༌ ཀ༌རུ༌ དཀོན༌མཆོག༌ ཞུགས༌ཏེ༌ ཡོད༌པིན༌།
22 ཡ༌ཝའེ༌ མོ༌ཟེས༌ལ༌ མོལས༌, “ཨིས༌ར༌ཨེལ༌པ༌གུན༌ལ༌ ཟེར༌, ‘ངའེ༌ ཁྱོ༌ཞའ༌ ནམ༌ཁའ༌ནེ༌ སྤེ༌ར༌ ཏང༌ཁན༌བོ༌ ཁྱོ༌ཞའེ༌ ཐོང༌ཏེ༌ ཨིན༌ནོག༌།
23 ངའེ༌ ཚབས༌ལ༌ ཅོལ༌ཅེས༌ལ༌ ཁྱོ༌ཞ༌གུན༌ནི༌ མུལ༌ དང༌ སེར༌རི༌ སྐུན༌དྲ༌གུན༌ ཅོ༌ མ༌གོས༌།’ ”
24 “ ‘ངའེ༌ ཕིའ༌ ཀ༌ལག༌གི༌ ཆོད༌ཁྲི༌ རྩིག༌ ཡང༌ ཏེ༌ཀ༌ ར༌ལུག༌ དང༌ བ༌ལང༌ མེའ༌ སྲོགས༌ཁན༌ནི༌ ཆོད༌པ༌ དང༌ ཞི༌དེ༌ ཆོད༌པ༌ ཕུལ༌། ངའེ༌ ཅོལ༌ ཟེརས༌སའེ༌ ནས༌སའེ༌ཀ༌ ངའ༌ ཅོལ༌གོས༌, ཏེ༌ཀ༌ ང༌ ཡོངས༌ཏེ༌ ཁྱོ༌ཞ༌གུན༌ལ༌ ཅིན༌ལབས༌ ཏང༌ཨིན༌།
25 ཀལ༌ཏེས༌ ཁྱོ༌ཞ༌གུན༌ནི༌ ངའེ༌ ཕིའ༌ རྡོའེ༌ ཆོད༌ཁྲི༌ རྩིག༌ན༌ རྡོའ༌ ལྡེ༌མོ༌ ཅགས༌ཁན༌ མ༌ཀོལ༌ ཅིའ༌ཟེར༌ན༌ ཁྱོ༌ཞའེ༌ རྡོའ༌ ཅག༌ག༌ལ༌ ལག༌ཆ༌ ཀོལ༌ལ༌ཅིག༌ ཏེ༌བོ༌ ཏམ༌པ༌ མི༌ ལུས༌།
26 སྲེས༌ཀ༌ ཡོད༌ཁན༌ནི༌ ཆོད༌ཁྲི༌ ཡོང༌ མ༌གོས༌ ཅིའ༌ཟེར༌ན༌ ཏེ༌ཀ༌ ཛགས༌ ཟ༌ནེ༌ མི༌གུན༌ནི༌ བླ༌མའེ༌ ཟུགས༌པོའེ༌ ཁག༌ མ༌ ཀབ༌ཁན༌བོ༌ ཐོང༌སྲིད༌ཅེས༌ ཨིན༌ནོག༌།’ ”