21
ཨིབ༌རི༌པ༌ ཚེ༌ཡོག༌།
21:1-11
1 ཡ༌ཝའེ༌ མོ༌ཟེས༌ལ༌ མོལས༌, “འི༌ ཁྲིམས༌གུན༌ ཨིས༌ར༌ཨེལ༌པ༌གུན༌ལ༌ ཏོང༌།”
2 “ཀལ༌ཏེས༌ ཁྱོ༌ཞའེ༌ ཨིབ༌རི༌པ༌ ཚེ༌ཡོག༌ ཉོ༌ན༌ ཁོའེ༌ ཁྱོ༌ཞའེ༌ ཕིའ༌ ལོ༌ དྲུག༌ ལས༌ ཅོ༌གོས༌། ཨིན༌ནའང༌ ལོ༌ རྡུན༌པའེ༌ ནང༌ང༌ ཅའང༌ བུ༌ལོན༌ མེད༌པ༌ ཁོའ༌ རང༌ཝང༌ ཏང༌གོས༌།
3 ཀལ༌ཏེས༌ ཚེ༌ཡོག༌གི༌ ལས༌ གོ༌ཟུག༌ ཟ༌ནེ༌ ཁོ༌ ན༌མ༌ མ༌ཅོ༌ཁན༌ ཨིན༌ན༌ ཁོ༌རང༌ ཅིག༌པོའ༌ རང༌ཝང༌ ཏོང༌ ཨིན༌ནའང༌ ལས༌ གོ༌ཟུག༌ ཟ༌ནེ༌ ཁོའ༌ ན༌མ༌ ཡོད༌ན༌ ཁོང༌ ཉིས༌ཀོའ༌ རང༌ཝང༌ ཏང༌གོས༌།
4 ཀལ༌ཏེས༌ ཁོའེ༌ སྤོན༌བོའེ༌ ཁོའ༌ ན༌མ༌ ཅོ༌ཅུགས༌ཏེ༌ ཁོའ༌ ཕྲུ༌གུ༌ ཇོར༌ན༌, ཁོ༌རང༌ ཅིག༌པོ༌ མ༌ནེ༌ རང༌ཝང༌ མི༌ ཐོབ༌, ཁོའེ༌ ན༌མ༌ དང༌ ཕྲུ༌གུ༌གུན༌ སྤོན༌བོའེ༌ ཕིའ༌ ལས༌ ཅོ༌ཨིན༌ དུགས༌ གོས༌།”
5 “ཨིན༌ནའང༌ ཚེ༌ཡོག༌གི༌, ‘ངའེ༌ སྤོན༌བོ༌, ང༌རང༌ངི༌ ན༌མ༌ དང༌ ཕྲུ༌གུ༌ གུན༌ལ༌ ཅམས༌པ༌ ཅོའད༌ ཡང༌ ང༌ རང༌ཝང༌ གོས༌ས༌ མེད༌’ ཟེར༌ན༌
6 ཏེ༌ནེ༌ ཁོའེ༌ སྤོན༌བོའེ༌ ཁོ༌ ཏམ༌པ༌ ཀུར༌རི༌ དུན༌ལ༌ ཁྱེར༌ཏེ༌ སྒོའེ༌ཀ༌ དུག༌ཅུགས༌ཏེ༌ ལྕགས༌ ཙེབ༌ཙེབ༌ ཤིག༌ ཉམ༌པོ༌ ཁོའེ༌ ནམ༌ཅོག༌ག༌ བི༌ཡང༌ ཕུད༌གོས༌། ཏེ༌ནེ༌ ཁོ༌ མི༌ཚེ༌ གང༌པོའེ༌ ཕིའ༌ ཁོའེ༌ ཚེ༌ཡོག༌ གྱུར༌ཨིན༌།”
7 “ཀལ༌ཏེས༌ མི༌ཞིག༌གི༌ ཁོ༌རང༌ངི༌ བུ༌མོ༌བོ༌ ཚེ༌ཡོག༌ག༌ ཙོང༌ན༌, ཚེ༌ཡོག༌ བུ༌ཚ༌གུན༌ ཙོགས༌ལ༌ ཁོའ༌ རང༌ཝང༌ མ༌ཏང༌།
8 ཀལ༌ཏེས༌ སྤོན༌བོ༌ ཏེ༌ བུ༌མོ༌ བོར༌ཅེས༌ལ༌ ཐད༌ད༌ མེད༌ན༌ ཁོ༌ ཁོ༌རང༌ངི༌ ཨ༌བ༌ ལོགས༌ཏེ༌ ཙོང༌གོས༌། སྤོན༌བོའེ༌ ཁོའེ༌ ཨ༌བ༌ ཉམ༌པོ༌ ཅོ༌ཁན༌ནི༌ ཆད༌དོན༌ ཅགས༌ཏེ༌ བུ༌མོ༌བོ༌ ཞན༌མི༌ཞིག༌ག༌ ཙོང༌ མི༌ཆོག༌།
9 ཀལ༌ཏེས༌ སྤོན༌བོའེ༌ བུ༌མོ༌ ཉོ༌ཁན༌བོ༌ ཁོ༌རང༌ངི༌ བུ༌ཚ༌ ཏང༌ན༌ ཁོའེ༌ ཏེ༌ བུ༌མོ༌བོའ༌ རང༌ངི༌ བུ༌མོ༌ ཙོགས༌ ཐོབ༌ཏང༌ ཏང༌གོས༌།
10 ཀལ༌ཏེས༌ སྤོན༌བོའེ༌ ཞན༌ཡང༌ ན༌མ༌ ཁྱོང༌ན༌ ཏེ༌ནེ༌ ཁོའེ༌ གོ༌མའེ༌ ན༌མའ༌, སྔུན༌ལ༌ ཏང༌ཁན༌ ཙོགས༌ ཟའ༌ཅེས༌, ཀོས༌ལག༌ དང༌ ཐོབ༌ཏང༌གུན༌ ཏང༌གོས༌།
11 ཀལ༌ཏེས༌ ཁོའེ༌ བུ༌མོ༌བོའ༌ ཏེ༌ སུམ༌ཀོ༌ མ༌ཏང༌ན༌ ཏེ༌ནེ༌ པེ༌ནེ༌ ཅིག༌གའང༌ ཤལ༌གོས༌ མེད༌པ༌ ཁོའེ༌ བུ༌མོ༌བོའ༌ རང༌ཝང༌ ཏང༌གོས༌།”
མ༌སྐྱོན༌ ཅོ༌ན༌ ཁྲིམས༌།
21:12-36
12 “མིའ༌ རྡུངས༌ཏེ༌ སད༌ཁན༌ནི༌ མི༌བོ༌ སད༌གོས༌།
13 ཨིན༌ནའང༌ ཏེ༌བོ༌ མིང༌ནའང༌ མ༌ཅོའ༌ དཀོན༌མཆོག༌གི༌ ཇུང༌ཅུགས༌ཏེ༌ ཨིན༌ན༌ ཏེ༌ནེ༌ ཁོ༌ ངའེ༌ ལྡམས༌ཁན༌ནི༌ ས༌ཆའ༌ ཤོར༌ཏེ༌ ཆ༌གོས༌།
14 ཨིན༌ནའང༌ སུ༌ཞིག༌གི༌ ཅུས༌ངན༌ ལྡིངས༌ཏེ༌ སུ༌ཞིག༌ མིང༌ནའང༌ སད༌ན༌, ངའེ༌ ཆོད༌ཁྲིའི༌ ཀ༌ནེ༌ ཁོ༌ དྲུད༌ཏེ༌ ཁྱེར༌ ཡང༌ སོད༌།”
15 “ཨ༌བ༌ ཡ༌ ཨ༌མ༌ རྡུང༌ཁན༌ནི༌ མི༌བོ༌ སད༌གོས༌།”
16 “སུ༌ཞིག༌གི༌ སང༌ཝའེ༌ ནང༌ང༌ མི༌ཞིག༌ རྐུས༌ཏེ༌ ཁོ༌ ཙོང༌ ཚར༌ ཡ༌ མ༌ཚར༌ར༌ ཡོད༌ན༌, རྐུན༌མ༌བོ༌ ཐོབ༌བ༌ཅིག༌ ཁོ༌ སད༌གོས༌།”
17 “ཨ༌བ༌ ཡ༌ ཨ༌མ༌ རྔན༌ ཏབ༌ཁན༌ནི༌ མི༌བོ༌ སད༌གོས༌།”
18 “ཀལ༌ཏེས༌ ཛིང༌མོ༌ ཏང༌ ཟ༌ནེ༌ ཅིག༌པོའེ༌ ཅིག༌པོའ༌ རྡོའ༌ ཡ༌ མུལ༌ཁྲུག༌ གྱབ༌ན༌ ཨིན༌ནའང༌ མི༌བོ༌ ཤི༌ མ༌ཤིའ༌ མལ༌ཙེ༌ཀ༌ ལུས༌ཏེ༌
19 སྟིང༌ནེ༌ ཁོ༌ གྱལ༌ཏེ༌ ཕི༌ལོག༌ག༌ བེར༌ཀ༌ སྟེན༌ཏེ༌ གྲུལ༌ཉན༌ན༌ རྡུང༌ཁན༌བོའ༌ ཆད༌པ༌ མི༌ཕོག༌ ཨིན༌ནའང༌ ཕོག༌ཁན༌བོའེ༌ ཏུས༌ གོད༌ལ༌ ཆའ༌ཁན༌བོའེ༌ ཕིའ༌ ཁོའེ༌ རིན༌ ཤལ༌གོས༌ ཡང༌ ཁོ༌ སིང༌ གྱལ༌གྱལ༌ ཚག༌པ༌ ཁོའེ༌ སྟ༌སྟོག༌ ཅོ༌གོས༌།”
20 “ཀལ༌ཏེས༌ སུ༌ཞིག༌གི༌ ཁོ༌རང༌ངི༌ བུ༌ཚ༌ ཡ༌ བུ༌མོ༌ ཚེ༌ཡོག༌ག༌ བེར༌ཀ༌ ཉམ༌པོ༌ རྡུངས༌ཏེ༌ ཁོ༌ ཤི༌ན༌ ཏེ༌ནེ༌ དག༌པོ༌བོའ༌ ཆད༌པ༌ ཕོག༌གོས༌།
21 ཨིན༌ནའང༌ ཚེ༌ཡོག༌པོ༌ ཞག༌པོ༌ ཅིག༌ ཡ༌ ཉིས༌ སོན༌ཏེའ༌ ལུས༌ན༌ དག༌པོ༌བོའ༌ ཆད༌པ༌ མི༌ཕོག༌ ཅིའ༌ཟེར༌ན༌ ཡོག༌པོ༌ དག༌པོའེ༌ གྱུ༌ནོར༌ ཨིན༌ནོག༌ ཡང༌ ཏེ༌བོ༌ ཁོའེ༌ ཕིའ༌ ཀོད༌ཀ༌ ཨིན༌ནོག༌།”
22 “ཀལ༌ཏེས༌ བུ༌ཚ༌ ཉིས༌སི༌ ནོལ༌ཨིན༌ ཡོད༌ ཟ༌ནེ༌ བུ༌མོ༌ སྐྱེ༌ཅེས༌མ༌ ཞིག༌ག༌ ཕོག༌ཏེ༌ ཁོའེ༌ ཕྲུ༌གུ༌ ཤིགས༌ཏེ༌ ཨིན༌ནའང༌ སྲན༌ཏྲེ༌ མ༌སྐྱོན༌ སོང༌ཏེ༌ མེད༌ན༌, བུ༌མོའེ༌ མག༌པའེ༌ ཏོང༌ ཟེར༌ཁན༌ནི༌ པེ༌ནེ༌, ཁོའེ༌ ཁྲིམ༌སྤོན༌ནི༌ ཐག༌ཅད༌ཁན༌ ནང༌ཞིན༌ ཏང༌གོས༌།
23 ཨིན༌ནའང༌ མ༌སྐྱོན༌ སྲན༌ཏྲེ༌ ཆ༌ན༌ ཏེ༌ནེ༌ ཆད༌པ༌བོ༌ མ༌སྐྱོན༌བོ༌ནའང༌ ཟོབས༌ གོས༌, སྲོག༌གི༌ ཚབས༌ལ༌ སྲོག༌,
24 མིག༌གི༌ ཚབས༌ལ༌ མིག༌, སོ༌ ཚབས༌ལ༌ སོ༌, ལག༌པའེ༌ ཚབས༌ལ༌ ལག༌པ༌, རྐང༌པའེ༌ ཚབས༌ལ༌ རྐང༌པ༌,
25 མེའ༌ ཙིག༌ཁན༌ནི༌ ཚབས༌ལ༌ མེའ༌ ཙིག༌ཅུག༌ཅེས༌, མ༌ཁའེ༌ ཚབས༌ལ༌ མ༌ཁའ༌, ཕོག༌ཁན༌ནི༌ ཚབས༌ལ༌ ཕོག༌ཅུག༌ཅེས༌།”
26 “ཀལ༌ཏེས༌ སུ༌ཞིག༌གི༌ ཁོ༌རང༌ངི༌ བུ༌ཚ༌ ཡ༌ བུ༌མོ༌ ཚེ༌ཡོག༌གི༌ མིག༌ག༌ ཕོག༌ ཅུགས༌ཏེ༌ ཞ༌ར༌ གྱུར༌ན༌ ཏེ༌བོའེ༌ ཚབས༌ལ༌ ཁོའེ༌ ཚེ༌ཡོག༌པོའ༌ རང༌ཝང༌ ཏང༌གོས༌།
27 ཀལ༌ཏེས༌ ཁོའེ༌ བུ༌ཚ༌ ཡ༌ བུ༌མོ༌ ཚེ༌ཡོག༌གི༌ སོ༌ ཕུད༌ཏེ༌ ཡོད༌ན༌ ཏེ༌བོའེ༌ ཚབས༌ལ༌ ཁོའེ༌ ཡོག༌པོ༌བོའ༌ རང༌ཝང༌ ཏང༌གོས༌།”
28 “ཀལ༌ཏེས༌ ལང༌ཏོའེ༌ སུ༌ཞིག༌ག༌ ར༌ཅོ༌ གྱབས༌ཏེ༌ སད༌ན༌ ཏེ༌ ལང༌ཏོའ༌ རྡོའ༌ གྱབས༌ཏེ༌ སད༌གོས༌ ཡང༌ ཏེ༌བོའེ༌ ཤ༌ ཟའ༌ མ༌གོས༌ ཨིན༌ནའང༌ ཏེ༌བོའེ༌ དག༌པོའ༌ ཆད༌པ༌ མི༌ཕོག༌།
29 ཨིན༌ནའང༌ ལང༌ཏོའ༌ རྡུང༌ཅེས༌སི༌ ལོབས༌ ཡོད༌ན༌ ཡང༌ དག༌པོའ༌ སྤང༌པུད༌ཏེའང༌ ལང༌ཏོ༌ ལྡམས༌ཏེ༌ མ༌བོར༌ར༌ ཏེ༌བོའེ༌ མི༌ སད༌ན༌ ལང༌ཏོ༌བོའ༌ རྡོའ༌ གྱབས༌ཏེ༌ སོད༌ ཡང༌ དག༌པོ༌བོའང༌ སད༌གོས༌།
30 ཨིན༌ནའང༌ ལང༌ཏོའེ༌ སད༌ཁན༌ནི༌ ཉེན༌གྲུང༌གུན༌ནི༌ ཁོའེ༌ སྲོག༌གི༌ ཚབས༌ལ༌ པེ༌ནེ༌ ཏོང༌ ཟེར༌ན༌ ཏེ༌ནེ༌ དག༌པོའེ༌ ཏོང༌ ཟེར༌ཁན༌ནི༌ པེ༌ནེ༌ ཏངས༌ཏེ༌ ཁོ༌རང༌ངི༌ སྲོག༌ ཉོ༌གོས༌།
31 ཏེན༌ན༌ ལང༌ཏོའེ༌ སུ༌ཞིག༌གི༌ ཕྲུ༌གུ༌ སད༌ན༌ དག༌པོ༌བོའ༌ ཏེན༌ན༌ ཙོགས༌ ཆད༌པ༌ ཕོག༌གོས༌།
32 ཏེན༌ན༌ ལང༌ཏོའེ༌ བུ༌ཚ༌ ཡ༌ བུ༌མོ༌ ཚེ༌ཡོག༌ ཤིག༌ སད༌ན༌, ལང༌ཏོའེ༌ དག༌པོའེ༌ ཚེ༌ཡོག༌གི༌ དག༌པོའ༌ མུལ༌ལི༌ པེ༌ནེ༌ སུམ༌ཅུ༌ ཤལ༌གོས༌ ཡང༌ ལང༌ཏོའ༌ རྡོའ༌ གྱབས༌ཏེ༌ སད༌གོས༌།”
33 “སུ༌ཞིག༌གི༌ ས༌དོང༌ང༌ ཀབ༌ཁན༌བོ༌ ཐེན༌ན༌ ཡ༌ ཁོའེ༌ ས༌དོང༌ བྲུས༌ཏེ༌ ཁའ༌ མ༌ཀབ༌ཁན༌བོའེ༌ ནང༌ང༌ ལང༌ཏོ༌ ཡ༌ བུང༌བུ༌ བུད༌ན༌,
34 ས༌དོང༌ངི༌ དག༌པོའེ༌ སེམས༌ཅན༌བོའེ༌ ཚབས༌ལ༌ ཏེ༌བོའེ༌ དག༌པོའ༌ པེ༌ནེ༌ ཏང༌གོས༌, ཡང༌ སེམས༌ཅན༌ ཤི༌ཁན༌ནི༌ ཤ༌བོ༌ ཁོའེ༌ གྱུར༌ཨིན༌།”
35 “སུ༌ཞིག༌གི༌ ལང༌ཏོའེ༌ ཞན༌ཞིག༌གི༌ ལང༌ཏོ༌ སད༌ན༌, སོན༌ཏེའ༌ ཡོད༌ཁན༌ནི༌ ལང༌ཏོ༌ ཙོངས༌ཏེ༌ དག༌པོ༌ ཉིས༌ཀོའེ༌ པེ༌ནེ༌ དང༌ སེམས༌ཅན༌ ཤི༌ཁན༌ནི༌ ཤ༌ དྲན༌དྲའ༌ བགོ༌གོས༌།
36 ཨིན༌ནའང༌ ལང༌ཏོ༌བོའ༌ རྡུང༌ཅེས༌སི༌ ལོབས༌ ཡོད༌ཏེའང༌ དག༌པོའེ༌ ཏེ༌བོ༌ ལྡམས༌ཏེ༌ མ༌བོར༌ར༌ ཨིན༌ན༌, ལང༌ཏོ༌ ཤི༌ཁན༌ནི༌ དག༌པོའ༌ ཁོའེ༌ ཞན༌ ལང༌ཏོ༌ཞིག༌ ཏང༌གོས༌། ཨིན༌ནའང༌ སེམས༌ཅན༌ ཤི༌ཁན༌ནི༌ ཤའ༌ ཁོའེ༌ གྱུར༌ཨིན༌།”