23
སྙིང༌རྗེ༌ དང༌ འོས༌པ༌།
23:1-9
1 ཡ༌ཝའེ༌ མོ༌ཟེས༌ལ༌ མོལས༌, “ཟུན༌ཇན༌ སྤེ༌ར༌གུན༌ ཁྱེབས༌ མ༌ཅུག༌ ཡང༌ ངན༌པ༌ མིའ༌ རོགས༌ ཅོས༌ཏེ༌ ཟུས༌མའེ༌ སྤང༌པོ༌ མ༌ཏང༌།
2 ངན༌པ༌ ཅོ༌ཁན༌ནི༌ མི༌ཚོགས༌སི༌ སྟིང༌རང༌ནེ༌ མ༌ཆ༌། ཁྲིམས༌ཁུང༌ང༌ སྤང༌པོ༌ ཏང༌ ཟ༌ནེ༌ མི༌ཚོགས༌ ཉམ༌པོ༌ ཁའ༌ཆམས༌ཏེ༌ ཁྲིམ༌སྤོན༌ལ༌ འོས༌པ༌ མན༌ཁན༌ནི༌ ཐག༌ཅད༌ ཏང༌ མ༌ཅུག༌།
3 ཁྲིམས༌ཁུང༌ངི༌ ནང༌ང༌ ཉལ༌བ༌ཅན༌ ཞིག༌གི༌ ཤགས༌སི༌ ཐག༌ཅད༌ ཏང༌ ཟ༌ནེ༌ ཉལ༌བ༌ཅན༌ ཨིན༌ཅེས༌པོའེ༌ ཁོའ༌ ཆོགས༌ མ༌ཅོ༌།”
4 “ཀལ༌ཏེས༌ ཁྱོ༌ཞའེ༌ གྲ༌འོའེ༌ ལང༌ཏོ༌ ཡ༌ བུང༌བུ༌ གྲོལ༌ཏེ༌ ཁོར༌ཨིན༌ ཐོང༌ན༌ ཏེ༌བོ༌ ལོགས༌ཏེ༌ ཁོའེ༌ ཁང༌པ༌ ཁྱེར༌གོས༌།
5 ཀལ༌ཏེས༌ ཁྱོ༌ཞའ༌ ནཕ༌རད༌ ཅོ༌ཁན༌བོའེ༌ བུང༌བུ༌ རྒལ༌ལི༌ ནན༌ཏེ༌ གྱེལ༌ཏེ༌ ཐོང༌ན༌ ཏེ༌བོའ༌ སྣང༌མེད༌ མ༌ཅོའ༌, བུང༌བུ༌ ལང༌ཅེས༌ལ༌ ཁོའ༌ རོགས༌ ཅོ༌གོས༌།”
6 “ཁྲིམས༌ཁུང༌ངི༌ ནང༌ང༌ ཉལ༌བ༌ཅན༌ནི༌ ཤགས༌པོའ༌ འོས༌པའེ༌ ཐག༌ཅད༌ ཐོབ༌ཅེས༌ ཏན༌ཏན༌ ཅོ༌གོས༌།
7 ཟུས༌མ༌ སྐྱོན༌ མ༌ནེ༌ མི༌ཀལ༌ཅེས༌ ཏན༌ཏན༌ ཅོས༌, ཡང༌ ནོངས༌མེད༌ ཡ༌ ཀྲང༌པོ༌ མི༌ཞིག༌ག༌ ཤི༌ཅེས༌སི༌ ཁྲིམས༌ཅད༌ མ༌ཏང༌། ཏེ༌ཙོགས༌ ངན༌པ༌ ཅོ༌ཁན༌བོའ༌ ངའེ༌ ཤགས༌པ༌ མི༌ཏང༌།”
8 “ཕག༌སུབ༌ མ༌ལེན༌, ཅིའ༌ཟེར༌ན༌ ཏེ༌བོའེ༌ ཁྱོ༌རང༌ང༌ ཐོང༌ཁན༌བོ༌ སྣང༌མེད༌ ཅོ༌ཅུགས༌ཏེ༌ ཀྲང༌པོ༌ སྤང༌པོ༌ ཏང༌ཅེས༌པོའེ༌ ནང༌ང༌ གྱུར༌ཇ༌ ཁྱོང༌ ཅུག༌ག༌ནོག༌།”
9 “ཞན༌ཡུལ༌ལི༌ མི༌གུན༌ལ༌ གོབ༌ནོན༌ མ༌ཏང༌, ཏེ༌ཟུག༌ ཅོ༌ན༌ ཀ༌ཟུག༌ཤིག༌ ཡོང༌ཅེན༌ ཁྱོ༌ཞ༌གུན༌ལ༌ གྱུས༌ ཨིན༌ནོག༌ ཅིའ༌ཟེར༌ན༌ ཨི༌ཇིབ༌པ༌གུན༌ནི༌ ཁྱོ༌ཞའ༌ ཏེ༌ཙོགས༌ ཅོས༌ཏེ༌ ཨིན༌པིན༌།”
ཤབ༌བད༌དི༌ ངལ༌ཚོ༌།
23:10-13
10 “ལོ༌ དྲུག༌ ཁྱོ༌ཞ༌གུན༌ནི༌ ས༌ཀྱད༌གུན༌ བད༌ཏེ༌ སྟོན༌ཐོག༌ ལྡུམ༌,
11 ཨིན༌ནའང༌ ལོ༌ རྡུན༌པའེ༌ ནང༌ང༌ ཏེ༌གུན༌ མ༌བད༌ད༌ བོར༌ ཏེ༌ནེ༌ ཏེ༌ཀ༌ སྐྱེས༌ཁན༌གུན༌ ཉལ༌བ༌ཅན༌གུན༌ནི༌ ཟའ༌ལ༌ ཁྱེར༌ཏེ༌ ལག༌ལུས༌པོ༌ རིའི༌ སེམས༌ཅན༌གུན༌ནི༌ ཟའ༌ཉན༌ཨིན༌། ཏེན༌ན༌ ཙོགས༌ ཁྱོ༌ཞ༌གུན༌ནི༌ རྒུན༌ཚས༌ དང༌ ཨོ༌ལིཝ༌ཝི༌ ལྕང༌མ༌གུན༌ ཉམ༌པོའང༌ ཅོས༌།”
12 “རྡུན༌ཞག༌གི༌ ཞག༌མ༌ དྲུག༌པོ༌ ལས༌ ཅོས༌ ཨིན༌ནའང༌ ཞག༌མ༌ རྡུན༌པའེ༌ ཞག༌ག༌ ལས༌ མ༌ཅོའ༌ ངལ༌ཚོ༌ གོས༌། ཏེ༌ནེ༌ ཁྱོ༌ཞའེ༌ ཚེ༌ཡོག༌གུན༌, ལས༌ལ༌ ཀོལ༌ཁན༌ནི༌ སེམས༌ཅན༌གུན༌ དང༌ ཞན༌ཡུལ༌ལི༌ མི༌གུན༌ ངལ༌ཚོས༌ཏེ༌ སྟོབས༌གུན༌ སོ༌ ཐུབ༌ཨིན༌།”
13 “ང༌ ཡ༌ཝའེ༌ ཁྱོ༌ཞ༌གུན༌ལ༌ ཟེར༌ཁན༌ ཚང༌མ༌ ཅོས༌། ལྷ༌ལྷ༌མོ༌ གུན༌ལ༌ མོས༌ལམ༌ མ༌ཞུ༌, ཏེ༌གུན༌ནི༌ མིང༌ངའང༌ མ༌ཁུར༌།”
ཏུས༌ཆེན༌ སུམ༌།
23:14-19
14 “ལོ༌ ཅིག༌གི༌ ནང༌ང༌ ངའ༌ རྩི༌ཝ༌ ཅོ༌ཅེས༌ལ༌ ཏུས༌ཆེན༌ སུམ༌ རྩིས༌།
15 ཏང༌པོ༌, ངའེ༌ བཀའ༌ ཏང༌ཁན༌ ནང༌ཞིན༌ ཁྱོ༌ཞ༌གུན༌ ཨི༌ཇིབ༌ནེ༌ བིང༌ཏེ༌ ཡོང༌ཁན༌ནི༌ ཨ༌བིབ༌བི༌ ཟླ༌ཝའེ༌ ནང༌ང༌ ལྡམས༌ཁན༌ནི༌ ཏུས༌པོའེ༌ཀ༌ སྐྱུར༌ མེད༌ཁན༌ནི༌ ཏ༌གི༌ ཏུས༌ཆེན༌ རྩིས༌། འི༌ ཏུས༌ ཞག༌ རྡུན༌ སྐྱུར༌ མེད༌ཁན༌ནི༌ ཏ༌གི༌ ཟོ༌།”
“ལག༌པ༌ སྟོང༌པ༌ སུ༌ཞིག༌གའང༌ ངའེ༌ དུན༌ལ༌ མ༌ཡོང༌།”
16 “ཉིས༌པ༌; སྟོན༌ཐོག༌ རྔ༌ཅེས༌སི༌ ཏུས༌ཆེན༌ རྩིས༌, ཏེ༌ཏུས༌ ཁྱོ༌ཞ༌གུན༌ནི༌ གོ༌མའེ༌ སྟོན༌ཐོག༌ རྔ༌ཁན༌ནི༌ ཁག༌ཤིག༌ ངའ༌ ཕུལ༌གོས༌།”
“སུམ༌པ༌; ལོའེ༌ སྟིང༌ཇུག༌གི༌ སྟོན༌ཐོག༌ ཚང༌མ༌ ནང༌ང༌ ལྡུམས༌ཏེ༌ ཁྱོང༌ཅེས༌སི༌ ཏུས༌ཆེན༌ རྩིས༌, ཀ༌བོའེ༌ ནང༌ང༌ རྒུན༌ དང༌ ཞན༌ ཤིང༌ཏོག༌ གུན༌ནའང༌ ཐེས༌ཏེ༌ ཨིན༌།”
17 “ལོའེ༌ ནང༌ང༌ ལན༌ སུམ༌ ཁྱོ༌ཞའེ༌ བུ༌ཚ༌ ཚང༌མ༌ ཡ༌ཝ༌ དཀོན༌མཆོག༌གི༌ དུན༌ལ༌ ཁོང༌ང༌ ཅོལ༌ཅེས༌ལ༌ ཛོམ༌གོས༌།”
18 “ངའ༌ སེམས༌ཅན༌ སྲོག༌ཆོད༌ལ༌ ཕུལ༌ ཟ༌ནེ༌ ཏེ༌བོ༌ ཉམ༌པོ༌ སྐྱུར༌ཅན༌ནི༌ ཏ༌གི༌ མ༌ཕུལ༌། སེམས༌ཅན༌ནི༌ ཚིལ༌ ཆོད༌པ༌ ཕུལ༌ཁན༌གུན༌ སྟིང༌མ༌ཞག༌གི༌ ང༌མོ༌ ཚོག༌པ༌ བོར༌ མ༌གོས༌།”
19 “ཁྱོ༌ཞའེ༌ ཏབ༌ཁན༌ནི༌ སྟོན༌ཐོག༌གི༌ གོ༌མའེ༌ བྲས༌བུ༌ གྱལ༌ཤོག༌པོ༌ ཡ༌ཝ༌ ཁྱོ༌ཞ༌གུན༌ནི༌ དཀོན༌མཆོག༌གི༌ ཆོད༌ཁང༌ང༌ ཁྱོང༌།”
“རི༌གུའི༌ ཤ༌ ཏེ༌བོའེ༌ ཨ༌མའེ༌ འོ༌མའེ༌ ནང༌ང༌ མ༌ སྐོལ༌།”
དཀོན༌མཆོག༌གི༌ ཕོ༌ཉའེ༌ ལམ༌ གྲལ༌གྲིག༌ ཛད༌ཨིན༌།
23:20-33
20 “ངའེ༌ ཁྱོ༌ཞ༌གུན༌ནི༌ སྔུན༌སྔུན༌ལ༌ ཕོ༌ཉ༌ ཀལ༌ཨིན༌, ཁོའེ༌ བེས༌སི༌ ནང༌ང༌ ཁྱོ༌ཞ༌གུན༌ སྐྱོབས༌ཏེ༌ ངའེ༌ གྲལ༌གྲིག༌ ཅོ༌ཁན༌ནི༌ ནས༌སའེ༌ ནང༌ང༌ ཁྱེར༌ཨིན༌།
21 ནང༌སྟག༌ ཏངས༌ཏེ༌ ཁོའེ༌ ཁའ༌ཉོན༌། ཁོའེ༌ གྱབ༌གལ༌ལ༌ ངོ༌ལོག༌ མ༌ཅོ༌ ཅིའ༌ཟེར༌ན༌ ཁོ༌ ངའེ༌ ཚབས༌ ཨིན༌ ཡང༌ ཁོའེ༌ ཁྱོ༌ཞའེ༌ ངོ༌ལོག༌ ཅོ༌ཁན༌གུན༌ལ༌ ཤགས༌པ༌ མི༌ཏང༌།
22 ཀལ༌ཏེས༌ ཁྱོ༌ཞ༌གུན༌ནི༌ ཁོའེ༌ ཁའ༌ཉན༌ཏེ༌ ངའེ༌ བཀའ༌ ཏང༌ཁན༌ ཚང༌མ༌ ཅོ༌ན༌, ངའ༌ ཁྱོ༌ཞའེ༌ གྲ༌འོ༌གུན༌ནི༌ གྲ༌འོ༌ ཡང༌ ཁྱོ༌ཞའ༌ གྱབ༌གལ༌ ཅོ༌ཁན༌གུན༌ལ༌ ངའེ༌ གྱབ༌གལ༌ ཅོ༌ཨིན༌།
23 ངའེ༌ ཕོ༌ཉ༌ ཁྱོ༌ཞ༌གུན༌ནི༌ སྔུན༌སྔུན༌ལ༌ ཆེན༌ ཡང༌ ཁྱོ༌ཞ༌གུན༌ ཨ༌མོར༌པ༌, ཧེད༌པ༌, པེ༌རིཟ༌པ༌, ཀེ༌ནན༌པ༌, ཧིཝ༌པ༌, ཡང༌ ཡེ༌བས༌པ༌ གུན༌ནི༌ ས༌ཆའེ༌ ནང༌ང༌ ཁྱེར༌ཨིན༌ ཡང༌ ངའེ༌ ཁོང༌གུན༌ མེད༌ཁན༌ ཅོ༌ཨིན༌།
24 ཁོང༌ངི༌ སྐུན༌དྲ༌གུན༌ནི༌ དུན༌ལ༌ གོ༌ མ༌སྒུ༌ ཡ༌ ཏེ༌གུན༌ལ༌ ཅོལ༌ མ༌ཅོལ༌ ཡང༌ ཁོང༌གུན༌ནི༌ ཆོས༌ ཅོ༌ ཚུལ༌གུན༌ ལེན༌ མ༌ལེན༌། ཁོང༌གུན༌ནི༌ སྐུན༌དྲ༌གུན༌ ཁྲེས༌ཏོར༌ ཅོ༌གོས༌ ཡང༌ ཁོང༌གུན༌ནི༌ རྡོའེ༌ ཀ༌ཝ༌ ཏམ༌པ༌ ཐེ༌ཁན༌གུན༌ ཏུམ༌པ༌ ཏུམ༌པའེ༌ ནང༌ང༌ ཅོག༌།
25 ང༌ ཡ༌ཝ༌ ཁྱོ༌ཞའེ༌ དཀོན༌མཆོག༌ག༌ ཅོལ༌ ཡང༌ ངའེ༌ ཁྱོ༌ཞའེ༌ ཟའ༌ཅེས༌ དང༌ ཐུང༌ཅེས༌ གུན༌ནི༌ཀ༌ ཅིན༌ལབས༌ ཏང༌ཨིན༌ ཡང༌ ཁྱོ༌ཞ༌གུན༌ལ༌ ཟུ༌མོ༌ ཡོང༌ མི༌ཅུག༌།
26 ཁྱོ༌ཞའེ༌ ཡུལ༌ལ༌ བུ༌མོ༌ སུ༌ཞིག༌གིའང༌ ཕྲུ༌གུ༌ མི༌ཞིག༌ ཡ༌ ཕྲུ༌གུ༌ མ༌ཇོར༌ར༌ མི༌ལུས༌། ངའེ༌ ཁྱོ༌ཞ༌གུན༌ལ༌ མི༌ཚེ༌ རིང༌མོ༌ ཏང༌ཨིན༌།”
27 “ངའེ༌ ཁྱོ༌ཞའེ༌ སྔུན༌ལ༌ ཇིགས༌ནང༌ ཀལ༌ཏེ༌ ཁྱོ༌ཞ༌གུན༌ནི༌ གྱབ༌གལ༌ལ༌ ནོལ༌ཁན༌ནི༌ མི༌གུན༌ནི༌ ནང༌ང༌ ཐེ༌ཚོམས༌ སྐྱེ༌ཅུག༌ཨིན༌ ཡང༌ ངའེ༌ ཁྱོ༌ཞའེ༌ གྲ༌འོ༌གུན༌ ལོགས༌ཏེ༌ ཤོར༌ ཅུག༌ཨིན༌།
28 ངའེ༌ ཁྱོ༌ཞ༌གུན༌ནི༌ གྲ༌འོ༌ ཧིཝ༌པ༌, ཀེ༌ནན༌པ༌, ཧེད༌པ༌ གུན༌ལ༌ ཇིགས༌ནང༌ སྲན༌ཏྲེ༌ སྟན༌ཏེ༌ ཁྱོ༌ཞའེ༌ དུན༌ལ༌ ཁོང༌གུན༌ ཏེ༌ ས༌ཆའེ༌ ནང༌ནེ༌ ཕིང༌ཨིན༌།
29 ངའེ༌ ཁོང༌ ཚང༌མ༌ ལོ༌ ཅིག༌གི༌ ནང༌ང༌ ཕིངས༌ཏེ༌ མི༌ཏང༌, ཀལ༌ཏེས༌ ཏང༌ན༌ ས༌ཆ༌བོ༌ ཐང༌སྟོང༌ གྱུར༌ཏེ༌ རིའི༌ སེམས༌ཅན༌ མང༌པོ༌ ཕེལ༌ཏེ༌ ཁྱོ༌ཞའ༌ ཇིགས༌ནང༌ ཆེན༌།
30 ཁྱོ༌ཞ༌གུན༌ ཕེལ༌ཏེ༌ འི༌ ས༌ཆ༌ ཁྱོ༌ཞའེ༌ གྱུར༌གྱུར༌ ཚག༌པ༌ ངའེ༌ ཁོང༌གུན༌ ཉུ༌ངུན༌ ཉུ༌ངུན༌ ཅོས༌ཏེ༌ ཕིང༌ཨིན༌།”
31 “ངའེ༌ ཁྱོ༌ཞའེ༌ སན༌ཚམས༌གུན༌ ཚོ༌ མར༌པོ༌ནེ༌ མེ༌གྲི༌ཀྲེ༌རིའན༌ནི༌ ཚོ༌ ཚོག༌པ༌ ཡང༌ རི༌སྟོང༌ནེ༌ ཡུཕ༌རེ༌ཀྲས༌སི༌ ལྩངས༌པོ༌ ཚོག༌པ༌ ཕེལ༌ ཅུག༌ཨིན༌། ངའེ༌ ཁྱོ༌ཞའེ༌ ལག༌ག༌ ཏེ༌ ས༌ཆའེ༌ ནང༌ང༌ ནས༌ཁན༌ནི༌ མི༌གུན༌ ཏང༌ཨིན༌ ཡང༌ ཁྱོ༌ཞའ༌ ཏེ༌ ནས༌སའེ༌ ནང༌ང༌ ཡོང༌ ཟ༌ནེ༌ ཁྱོ༌ཞའེ༌ ཁོང༌གུན༌ ཕིངས༌ཏེ༌ ཏང༌ཨིན༌།
32 ཁྱོ༌ཞའེ༌ ཁོང༌གུན༌ ཡ༌ ཁོང༌གུན༌ནི༌ ལྷ༌ལྷ༌མོ༌ གུན༌ ཉམ༌པོ༌ ཆད༌དོན༌ ཅོ༌ མ༌གོས༌།
33 ཁོང༌གུན༌ ཁྱོ༌ཞའེ༌ ཡུལ༌ལི༌ ནང༌ང༌ དུག༌ མ༌ཅུག༌, ཀལ༌ཏེས༌ དུག༌ཅུག༌ན༌ ཁོང༌གུན༌ནི༌ ལྷ༌ལྷ༌མོ༌ གུན༌ལ༌ ཅོལ༌ཅེས༌སི༌ ནང༌ང༌ ཁྱོ༌ཞའ༌ ཁད༌ཅུགས༌ཏེ༌ ངའེ༌ གྱབ༌གལ༌ལ༌ སྡིག༌པ༌ ཅོ༌ཅུག༌ཨིན༌།”