24
ཨིས༌ར༌ཨེལ༌པ༌གུན༌ ཉམ༌པོ༌ ཡ༌ཝའེ༌ ཆད༌དོན༌ ཛདས༌།
24:1-18
1 ཡ༌ཝའེ༌ མོ༌ཟེས༌ལ༌ མོལས༌, “ཁྱོ༌རང༌, ཨ༌རོན༌, ན༌དབ༌, ཨ༌བི༌ཧུ༌ དང༌ ཨིས༌ར༌ཨེལ༌ལི༌ སྤོན༌བོ༌ རྡུན༌ཅུ༌ ང༌ ཡོད༌ས༌ རིའི༌ཀ༌ ཀེན༌ལ༌ ཡོང༌། ཁྱོ༌ཞ༌གུན༌ ཐག༌རིང༌ང༌ དུགས༌ཏེ༌ ངའ༌ ཅོལ༌གོས༌།
2 མོ༌ཟེས༌ ཁྱོ༌རང༌ ཅིག༌པོ༌ ང༌ ཡ༌ཝའེ༌ ཉེ༌མོའ༌ ཡོང༌ནའང༌ གྲིག༌ ཨིན༌ནའང༌ ཞན༌གུན༌ ངའེ༌ ཉེ༌མོའ༌ ཡོང༌ མ༌གོས༌། རི༌ ཡོག༌ག༌ ཡོད༌ཁན༌ ཞན༌ མི༌གུན༌ རིའི༌ཀ༌ ཀེན༌ལ༌ ཡོང༌ མི༌ཆོགས༌།”
3 མོ༌ཟེས༌ ཐུར༌ལ༌ ཡོངས༌ཏེ༌ མི༌གུན༌ལ༌ ཡ༌ཝའེ༌ མོལ༌ཁན༌ ཚང༌མ༌ དང༌ ཁྲིམས༌གུན༌ ཤདས༌། ཏེ༌ནེ༌ མི༌ ཚང༌མའེ༌ སྐད༌ ཅིག༌གི༌ ནང༌ང༌ ལན༌ཏངས༌, “ང༌ཞའེ༌ ཡ༌ཝའེ༌ མོལ༌ཁན༌ ཚང༌མ༌ ཅོ༌ཨིན༌།”
4 མོ༌ཟེས༌སི༌ ཡ༌ཝའེ༌ མོལ༌ཁན༌ ཚང༌མ༌ བྲིས༌། ཐོ༌རེ༌ཟུག༌པོ༌ ང༌མོ༌ནེ༌ ཁོའེ༌ རིའི༌ དུན༌ལ༌ ཆོད༌ཁྲི༌ཞིག༌ རྩིགས༌ ཡང༌ ཨིས༌ར༌ཨེལ༌ལི༌ མི༌སྡེ༌ རྕུག༌ཉིས༌སི༌ ཕིའ༌ རྡོའ༌ རྕུག༌ཉིས༌ ཀ༌ཝ༌ ཙོགས༌ལ༌ ལངས༌།
5 ཏེ༌ནེ༌ ཁོའེ༌ ཞུ༌ནུ༌ ཁ༌ཅིག༌ ལྡམས༌ ཡང༌ ཁོང༌གུན༌ནི༌ མེའ༌ སྲག༌ཁན༌ནི༌ ཆོད༌པ༌ དང༌ ཞི༌དེ༌ ཐུན༌བྲེལ༌ལི༌ ཕིའ༌ ལོ༌ ཆུ༌ངུན༌ ལང༌ཏོ༌གུན༌ ཡ༌ཝའ༌ ཆོད༌པ༌ ཕུལས༌།
6 མོ༌ཟེས༌སི༌ སེམས༌ཅན༌ནི༌ ཁྲག༌ ཕེད༌པོ༌ ནོད༌དི༌ ནང༌ང༌ བོརས༌ ཡང༌ ཕེད༌པོ༌ ཆོད༌ཁྲི༌ཀ༌ ཡོགས༌།
7 ཏེ༌ནེ༌ ཁོའེ༌ ཆད༌དོན༌ནི༌ སྤེ༌ཆ༌ ཁུར༌ཏེ༌ མི༌གུན༌ནི༌ དུན༌ལ༌ སིལས༌། ཁོང༌གུན༌ནི༌ ཟེརས༌, “ང༌ཞ༌གུན༌ནི༌ ཡ༌ཝའེ༌ ཁའ༌ ཉན༌ཏེ༌ ཁོང༌ངི༌ མོལ༌ཁན༌ ཚང༌མ༌ ཅོ༌ཨིན༌།”
8 ཏེ༌ནེ༌ མོ༌ཟེས༌སི༌ ནོད༌དི༌ ནང༌ང༌ ཡོད༌ཁན༌ནི༌ ཁྲག༌པོ༌ ཁུར༌ཏེ༌ མི༌གུན༌ནི༌ཀ༌ ཐོར༌མ༌ ཏངས༌ ཡང༌ ཟེརས༌, “འི༌ ཁྲག༌པོ༌, ཆད༌དོན༌ སྟན༌པོ༌ ཅོ༌ཁན༌ནི༌ ཐེ༌ཙེ༌ ཨིན༌ ཀ༌བོ༌ ཡ༌ཝའེ༌ འི༌ ལབ༌ཞ༌གུན༌ སལ༌ཏེ༌ ཁྱོ༌ཞ༌གུན༌ ཉམ༌པོ༌ ཅོའ༌ ཛད༌ཏེ༌ ཨིན༌།”
9 མོ༌ཟེས༌, ཨ༌རོན༌, ན༌དབ༌, ཨ༌བི༌ཧུ༌ དང༌ ཨིས༌ར༌ཨེལ༌ལི༌ སྤོན༌བོ༌ རྡུན༌ཅུ༌ ཀེན༌ལ༌ རིའི༌ཀ༌ སོང༌
10 ཡང༌ ཁོང༌གུན༌ནི༌ ཨིས༌ར༌ཨེལ༌པའེ༌ དཀོན༌མཆོག༌ ཇལ༌། ཁོང༌ངི༌ ཞབས༌སི༌ ཡོག༌ག༌ རིན༌ཅན༌ རྡོའ༌ སྔོན༌པོ༌ ནི༌ལིམ༌ ཏིང༌ཁན༌ ཙོགས༌ ཀ༌བོ༌ ནམ༌ ཙོགས༌ སལ༌པོ༌ དུག༌པིན༌།
11 ཨིས༌ར༌ཨེལ༌ལི༌ སྤོན༌བོ༌གུན༌ནི༌ དཀོན༌མཆོག༌ ཇལ༌ ཨིན༌ནའང༌ ཁོང༌ངི༌ ཁོང༌གུན༌ལ༌ ནོད༌པ༌ སྐྱལ༌ལ༌ མ༌ཛདས༌ ཡང༌ ཁོང༌གུན༌ ཟེན༌, ཐུང༌ཨིན༌ ཡོད༌ ཟ༌ནེ༌ ཁོང༌ ཁོང༌གུན༌ ཉམ༌པོ༌ ཞུགས༌ཏེ༌ ཡོད༌པིན༌།
12 ཡ༌ཝའེ༌ མོ༌ཟེས༌ལ༌ མོལས༌, “ང༌ ཡོད༌ས༌ རིའི༌ཀ༌ ཀེན༌ལ༌ ཡོངས༌ཏེ༌ ཏེ༌ཀ༌ དུག༌, ངའེ༌ ཁྱོ༌རང༌ང༌ རྡོའ༌ ལེབ༌ལེབ༌ ཉིས༌སི༌ཀ༌ མི༌གུན༌ལ༌ ལབ༌ཞ༌ ཏང༌ཁན༌ནི༌ བཀའ༌ དང༌ ཁྲིམས༌གུན༌ བྲིས༌ཏེ༌ ཏང༌ཨིན༌།”
13 མོ༌ཟེས༌སི༌ ཁོའ༌ རོགས༌ཅོ༌ཁན༌ ཡོ༌ཤུའ༌ ཁྲིད༌ཏེ༌ ཀེན༌ལ༌ དཀོན༌མཆོག༌གི༌ རི༌ཀ༌ སོང༌།
14 མོ༌ཟེས༌སི༌ སྤོན༌བོ༌གུན༌ལ༌ ཟེརས༌, “ང༌ཞའ༌ ལོགས༌ཏེ༌ ཡོང༌ཡོང༌ ཚོག༌པ༌ ཁྱོ༌ཞ༌གུན༌ འི༌ཀ༌ སྲུངས༌ཏེ༌ དུག༌། ཨ༌རོན༌ དང༌ ཧུར༌ ཁྱོ༌ཞའ༌ ཉམ༌པོ༌ ཨིན༌ནོག༌ ཡང༌ ཛིང༌མོ༌ ཆ༌ན༌ ཁོང༌ ཉིས༌ཀོའ༌ ཐག༌ཅད༌ ཏང༌ཅུག༌།”
15 མོ༌ཟེས༌ ཀེན༌ལ༌ རི༌ཀ༌ སོང༌ ཡང༌ རི༌བོ༌ སྲིན༌ནི༌ ཀབས༌,
16 ཡང༌ ཡ༌ཝའེ༌ ཟིར༌རྗིད༌ སི༌ནཱའི༌ རི༌ཀ༌ བབས༌ས༌ ཛད༌ཏེ༌ ཞག༌ དྲུག༌ ཏེ༌བོ༌ སྲིན༌ནི༌ ཀབས༌ཏེ༌ ལུས༌ ཡང༌ ཞག༌ རྡུན༌པའེ༌ ཞག༌ག༌ སྲིན༌ནི༌ ནང༌ནེ༌ ཡ༌ཝའེ༌ མོ༌ཟེས༌ལ༌ བོད༌ད༌ ཛདས༌།
17 ཨིས༌ར༌ཨེལ༌པ༌གུན༌ལ༌ ཡ༌ཝའེ༌ ཟིར༌རྗིད༌པོ༌ རི༌གོའ༌ མེ༌ ཞེན༌ཁན༌ ཙོགས༌ ཐོང༌ངད༌པིན༌།
18 མོ༌ཟེས༌ ཀེན༌ལ༌ རི༌ཀ༌ སྲིན༌ནི༌ ནང༌ང༌ སོང༌ ཡང༌ ཏེ༌རུ༌ ཁོ༌ ཉི༌མ༌ ཞིབ༌ཅུ༌ དང༌ ཚན༌ ཞིབ༌ཅུ༌ དུགས༌།