25
དཀོན༌མཆོག༌གི༌ ཀུར༌རི༌ ཕིའ༌ ཆོད༌པ༌།
25:1-9
1 ཡ༌ཝའེ༌ མོ༌ཟེས༌ལ༌ མོལས༌,
2 “ཨིས༌ར༌ཨེལ༌པ༌གུན༌ལ༌ ‘ངའ༌ ཆོད༌པ༌ ཕུལ༌ཅེས༌ ཁྱོང༌’ ཟེར༌། ཐད༌པོ༌ ཉམ༌པོ༌ ཆོད༌པ༌ ཕུལ༌ཅེས༌ལ༌ ཁྱོང༌ཁན༌ ཚང༌མ༌ ལེན༌།
3 མི༌གུན༌ནི༌ ཀ༌ནེ༌ འི༌ ཆོད༌པ༌གུན༌ ལེན༌: སེར༌, མུལ༌ དང༌ ར༌གན༌,
4 སྔོན༌པོ༌, སྔོ༌མར༌ ཡང༌ མར༌པོ༌ ནས༌མ༌ ཡང༌ གྱལ༌ལ༌ ཀུས༌པོ༌ རས༌ དང༌ ར༌མའེ༌ བལ༌,
5 རང༌ མར༌པོ༌ ཏང༌ཁན༌ནི༌ ལུག༌ཕོའེ༌ པགས༌པ༌ དང༌ ཀོའ༌ གྱལ༌ལ༌, ཨ༌ཀ༌ཤིའེ༌ ཤིང༌,
6 འོད༌དི༌ ཕིའ༌ ཨོ༌ལིཝ༌ཝི༌ མར༌ནག༌, ཁྲུས༌ཏང༌ཅེས༌སི༌ མར༌ནག༌ དང༌ ཏྲི༌ཞིམ༌ཅན༌ནི༌ སྤོས༌སི༌ ཕིའ༌ ཚ༌མིག༌གུན༌,
7 ཨེ༌ཕོད༌ དང༌ ཀྲང༌ང༌ ཀབ༌ཅེས༌སི༌ཀ༌ ཏག༌ཅེས༌ལ༌ ཨོ༌ནེཀས༌ དང༌ ཞན༌ ཁྲ༌རྡོའ༌ རིན༌ཅན༌གུན༌།”
8 “མི༌གུན༌ལ༌ ངའེ༌ ཕིའ༌ ཏམ༌པའེ༌ ཀུར༌ ཙེམ༌ཅུག༌, ཏེ༌ནེ༌ ང༌ ཁོང༌གུན༌ ཉམ༌པོ༌ དུག༌ཨིན༌།
9 ཀུར༌ དང༌ ཏེ༌ ནང༌ང༌ ཡོང༌གོ༌ཤེས༌སི༌ ཅ༌ལག༌ ཚང༌མ༌ ངའེ༌ ཁྱོ༌རང༌ང༌ སྟན༌ཅེས༌ཅན༌ ནང༌ཞིན༌ ཅོ༌གོས༌།”
ཆད༌དོན༌ནི༌ སྒམ༌།
25:10-22
10 “ཁོང༌གུན༌ལ༌ ཨ༌ཀ༌ཤིའེ༌ ཤིང༌ངི༌ སྒམ༌ཞིག༌ ཅོ༌ཅུག༌ ཀ༌བོའེ༌ རིང༌བོ༌ སེན༌ཀྲི༌མི༌ཀྲར༌ 110, ཞང༌ དང༌ ཐོན༌བོ༌ སེན༌ཀྲི༌མི༌ཀྲར༌ 66 ཡོང༌གོས༌།
11 ཏེ༌བོའེ༌ ནང༌ཀུག༌ དང༌ ཕི༌ལོག༌ ཉིས༌ཀོ༌ སེར༌ ཉམ༌པོ༌ ཏུམ༌ ཡང༌ ཏེ༌བོའེ༌ ཐའ༌མ༌ ཚང༌མ༌ ཀིར༌ སྐོར༌ཏེ༌ ཅའང༌ མ༌དྲེས༌ཁན༌ སེར༌རི༌ ཐའ༌རིལ༌ ཏོང༌།
12 སེར༌རི༌ ཀྱི༌ལྡིར༌ ཞི༌ ཅོས༌ཏེ༌ ཏེ༌བོའེ༌ རྐང༌ ཞི༌ཀོའ༌ ཏག༌གོས༌, འི༌ངོ༌ ཆོགས༌ལ༌ ཉིས༌ ཡང༌ འ༌ངོ༌ ཆོགས༌ལ༌ ཉིས༌།
13 ཨ༌ཀ༌ཤིའེ༌ ཤིང༌ངི༌ ཀྲ༌ལུ༌ ཁྱོངས༌ཏེ༌ ཏེ༌གུན༌ སེར༌རི༌ ཏུམ༌,
14 ཡང༌ སྒམ༌བོ༌ ཁུར༌ཅེས༌ལ༌ ཀྲ༌ལུ༌གུན༌ ཏེ༌བོའེ༌ ཆོགས༌ ཉིས༌ཀོའ༌ ཡོད༌ཁན༌ནི༌ ཀྱི༌ལྡིར༌ གུན༌ནི༌ ནང༌ང༌ གྱུད༌།
15 ཀྲ༌ལུ༌གུན༌ ཀྱི༌ལྡིར༌གུན༌ནི༌ ནང༌ནེ༌ མ༌ཕིང༌ང༌ ཏེ༌གུན༌ནི༌ ནང༌ང༌ གྱུད༌ཏེ༌ བོར༌གོས༌།
16 ཏེ༌ནེ༌ ངའེ༌ བཀའ༌རྒྱ༌ རྕུ༌ རྡོའ༌ ལེབ༌ལེབ༌ གུན༌ནི༌ཀ༌ བྲིས༌ཏེ༌ ཏང༌ཅེས༌ཅན༌བོ༌ ཏེ༌ སྒམ༌མི༌ ནང༌ང༌ བོར༌།
17 སྒམ༌བོའ༌ ཅའང༌ མ༌དྲེས༌ཁན༌ སེར༌རི༌ ཁ༌ཅོད༌ ཅོས༌ ཀ༌བོའེ༌ རིང༌བོ༌ སེན༌ཀྲི༌མི༌ཀྲར༌ 110 དང༌ ཞང༌བོ༌ སེན༌ཀྲི༌མི༌ཀྲར༌ 66 ཡོང༌གོས༌། ཏེ༌ ཁའ༌ལེབ༌པོའེ༌ཀ༌ མི༌གུན༌ནི༌ སྡིག༌པའ༌ ཤགས༌པའེ༌ ཕིའ༌ རིན༌ ཤལ༌ཨིན༌།
18 སྒམ༌མི༌ ཐུག༌རྗེ༌ ཁའ༌ལེབ༌པོའེ༌ ཁེ༌ཐོག༌གི༌ ཐའ༌མ༌ ཉིས༌ཀོའེ༌ཀ༌ སེར༌ རྡུངས༌ཏེ༌ ཆེ༌ར༌བེམ༌ ཉིས༌ ཅོས༌།
19 འི༌ངོ༌ ཐའ༌མ༌ ཅིག༌ ཡང༌ འ༌ངོ༌ ཐའ༌མ༌ ཅིག༌, ཏེ༌གུན༌ ཐུག༌རྗེ༌ ཁའ༌ལེབ༌པོའ༌ ཐུད༌ཏེ༌ ཅིག༌ ཡོང༌གོས༌།
20 ཆེ༌ར༌བེམ༌གུན༌ནི༌ ཤོག༌པ༌ ཀེན༌ལ༌ རྐྱངས༌ཏེ༌ ཐུག༌རྗེ༌ ཁའ༌ལེབ༌པོ༌ ཀབ༌གོས༌། ཏེ༌གུན༌ ཅིག༌ དང༌ ཅིག༌ག༌ ལྟས༌ཏེ༌ ཐུག༌རྗེ༌ ཁའ༌ལེབ༌ ཆོགས༌ལ༌ གོ༌ སྒུས༌ཏེ༌ ཡོང༌གོས༌།
21 ཏེ༌ སྒམ༌མི༌ ནང༌ང༌ ངའེ༌ བཀའ༌རྒྱ༌ བྲིས༌ཏེ༌ ཏང༌ཅེས༌ཅན༌ནི༌ རྡོའ༌ ལེབ༌གུན༌ བོར༌ཏེ༌ ཐུག༌རྗེ༌ ཁའ༌ལེབ༌པོ༌ ཀོབ༌།
22 ཏེ༌ ཁེ༌ཐོག༌ག༌ ཁྱོ༌རང༌ང༌ ང༌ ཐུག༌ཨིན༌ ཡང༌ ཐུག༌རྗེ༌ ཁའ༌ལེབ༌པོའེ༌ཀ༌ ཡོད༌ཁན༌ནི༌ ཆེ༌ར༌བེམ༌ ཉིས༌ཀོའེ༌ པར༌ནེ༌ ངའེ༌ ཁྱོ༌རང༌ང༌ ཨིས༌ར༌ཨེལ༌པ༌གུན༌ནི༌ ཕིའ༌ ང༌རང༌ངི༌ བཀའ༌ཁྲིམས༌ ཚང༌མ༌ ཏང༌ཨིན༌།”
ཏམ༌པའེ༌ ཅོག༌ཙེ༌།
25:23-30
23 “ཨ༌ཀ༌ཤིའེ༌ ཤིང༌ངི༌ ཅོག༌ཙེ༌ ཞིག༌ ཅོས༌, ཀ༌བོའེ༌ རིང༌ སེན༌ཀྲི༌མི༌ཀྲར༌ 88, ཞང༌ སེན༌ཀྲི༌མི༌ཀྲར༌ 66 དང༌ ཐོན༌ སེན༌ཀྲི༌མི༌ཀྲར༌ 99 ཡོང༌གོས༌།
24 ཏེ༌བོ༌ ཅའང༌ མ༌དྲེས༌ཁན༌ནི༌ སེར༌ ཉམ༌པོ༌ ཏུམ༌ ཡང༌ ཐའ༌མ༌ གུན༌ལ༌ སེར༌རི༌ ཐའ༌རིལ༌ ཏོང༌།
25 ཏེ༌བོའ༌ ཀིར༌ སྐོར༌ཏེ༌ སེན༌ཀྲི༌མི༌ཀྲར༌ 7 ཞང༌ངི༌ སྐྱོར༌ར༌ ཏོང༌ ཡང༌ ཏེ༌བོའེ༌ ཐའ༌མ༌ སེར༌རི༌ ཐའ༌རིལ༌ ཏོང༌།
26 སེར༌རི༌ ཀྱི༌ལྡིར༌ ཞི༌ ཅོས༌ ཡང༌ ཏེ༌གུན༌ རྐང༌གུན༌ ཡོད༌སའེ༌ ཀྲུ༌ ཞི༌ཀོའ༌ ཏོག༌།
27 ཏེ༌ ཀྱི༌ལྡིར༌གུན༌ སྐྱོར༌རེ༌ ཉེ༌མོའ༌ ཅོག༌ཙེ༌ ཁུར༌ཅེས༌སི༌ ཕིའ༌ ཀྲ༌ལུ༌གུན༌ གྱུད༌ཅེས༌ལ༌ ཏག༌གོས༌།
28 ཀྲ༌ལུ༌གུན༌ ཨ༌ཀ༌ཤིའེ༌ ཤིང༌ངི༌ ཡོང༌གོས༌ ཡང༌ ཏེ༌གུན༌ལ༌ སེར༌ ཏུམས༌ཏེ༌ ཏེ༌གུན༌ ཅོག༌ཙེ༌ ཁུར༌ཅེས༌ལ༌ ཀོལ༌གོས༌།
29 ངའ༌ རྒུན༌ཆང༌ངི༌ ཆོད༌པ༌ ཕུལ༌ཅེས༌སི༌ ཕིའ༌ ཐལ༌ལི༌, ཀོ༌རེ༌, གོར༌མོ༌ དང༌ ཞན༌ ནོད༌ གུན༌ ཅའང༌ མ༌དྲེས༌ཁན༌ སེར༌རི༌ ཅོ༌གོས༌།
30 ཆད༌དོན༌ནི༌ སྒམ༌མི༌ དུན༌ལ༌ ཅོག༌ཙེ༌ཀ༌ ཏུས༌གྱུན༌ ང༌ ཕུལ༌ཁན༌ནི༌ ཏམ༌པའེ༌ ཏ༌གི༌བོ༌ བོར༌གོས༌།”
སེར༌རི༌ འོད༌སྟགས༌།
25:31-40
31 “ཅའང༌ མ༌དྲེས༌ཁན༌ སེར༌རི༌ འོད༌སྟགས༌ ཅོས༌, ཏེ༌བོའེ༌ ཞབ༌ལྡན༌, རྐང༌གུན༌, མེན༌ཏོག༌ ཙོགས༌ ཀོ༌རེ༌གུན༌, པ༌ཏུམ༌ དང༌ མེན༌ཏོག༌ བར༌ཁན༌ གུན༌ སེར༌ ཅིག༌ཅིག༌ རྡུངས༌ཏེ༌ ཅོ༌གོས༌།
32 ཏེ༌བོའ༌ རྐང༌ དྲུག༌ ཡོང༌གོས༌, ཆོག༌ ཉིས༌ཀོའ༌ སུམ༌སུམ༌།
33 རྐང༌ རེ༌རེ༌ཀ༌ བ༌དམ༌མི༌ མེན༌ཏོག༌ བར༌ཁན༌ ཙོགས༌ སུམ༌སུམ༌ ཡང༌ པ༌ཏུམ༌ དང༌ ཏེ༌བོ༌ ཀབས༌ཁན༌ནི༌ ལོ༌མ༌ ཡོང༌གོས༌། ཏེན༌ན༌ ཙོགས༌ འོད༌སྟག༌གི༌ རྐང༌ དྲུག༌ཀོའེ༌ཀ༌ ཡོང༌གོས༌།
34 འོད༌སྟག༌གི༌ ཞུང༌སྐྱིལ༌ལི༌ རྐང༌བོའེ༌ཀ༌ བ༌དམ༌མི༌ མེན༌ཏོག༌ བར༌ཁན༌ ཙོགས༌ ཞི༌, པ༌ཏུམ༌ དང༌ ཏེ༌བོ༌ ཀབས༌ཁན༌ནི༌ ལོ༌མ༌ ཉམ༌པོ༌ ཡོང༌གོས༌།
35 ཞུང༌ངི༌ རྐང༌ངི༌ཀ༌ ཞན༌ རྐང༌གུན༌ ཐུད༌ཏེ༌ ཡོད༌ས༌ རེ༌རེ༌ ཡོག༌ག༌ པ༌ཏུམ༌ ཡོང༌གོས༌། ཏེ༌བོའེ༌ཕིའ༌ ཞུང༌ངི༌ རྐང༌ངི༌ ཀ༌ནེ༌ ཞན༌རྐང༌ དྲུག༌ རྐྱངས༌ཏེ༌ ཡོད༌ཏེ༌ ཨིན༌ནོག༌, ལྡལ༌དོ༌ ཉིས༌ཀོའེ༌ཀ༌ སུམ༌སུམ༌།
36 པ༌ཏུམ༌ དང༌ ཡལ༌ག༌ ཚང༌མ༌ ཐེས༌ཏེ༌ འོད༌སྟགས༌ གང༌པོ༌, ཅའང༌ མ༌དྲེས༌ཁན༌ནི༌ སེར༌ གྲོག༌གྲོག༌ ཅིག༌ཅིག༌ རྡུངས༌ཏེ༌ ཅོ༌གོས༌།”
37 “འོད༌སྟག༌གི༌ཀ༌ མར༌ནག༌ ལུགས༌ཏེ༌ འོད༌ ཏུག༌སའེ༌ ཀོ༌རེ༌ རྡུན༌ ཅོས༌ ཀ༌གུན༌ནི༌ ཏེ༌བོའེ༌ དུན༌ཆོགས༌ལ༌ འོད༌ ཏང༌ཨིན༌།
38 འོད༌དི༌ སར༌ ཅད༌ཅེས༌སི༌ ཅབ༌རྩེ༌ དང༌ བོ༌ཁན༌གུན༌ ལྡུ༌ཅེས༌སི༌ ཏ༌འོ༌གུན༌ ཅའང༌ མ༌དྲེས༌ཁན༌ སེར༌རི༌ ཅོ༌གོས༌།
39 འོད༌སྟགས༌ དང༌ ཏེ༌ཀ༌ ཀོལ༌ཅེས༌སི༌ ཅ༌ལག༌གུན༌ ཅོ༌ཅེས༌ལ༌ ཅའང༌ མ༌དྲེས༌ཁན༌ནི༌ སེར༌ ཀི༌ལོ༌ 35 ཀོལ༌གོས༌།
40 ཏེ༌གུན༌ ངའེ༌ ཁྱོ༌རང༌ང༌ རི༌ཀ༌ ལབ༌ཞའ༌ ཏང༌ཁན༌ ནང༌ཞིན༌ ཅོ༌ ཅུག༌ཅེས༌ ཏན༌ཏན༌ ཅོས༌།”