1 ཡ༌ཝའེ༌ མོ༌ཟེས༌ལ༌ མོལས༌, “ཏམ༌པ༌ ཀུར༌བོ༌ རས༌ ཀུས༌པོ༌ ཐགས༌ཁན༌ནི༌ ཡོ༌ལ༌ རྕུའ༌ ཅོས༌། སྔོན༌པོ༌, སྔོ༌མར༌ དང༌ མར༌པོ༌ ནས༌མ༌ ཉམ༌པོ༌ ཏེ༌གུན༌ནི༌ཀ༌ ལག༌པ༌ ཁས༌པ༌ མི༌གུན༌ལ༌ ཆེ༌ར༌བེམ༌མི༌ པར༌ སྲུལ༌ཅུག༌། 2 ཡོ༌ལ༌ ཚང༌མ༌ དྲན༌དྲ༌, རིང༌བོ༌ མི༌ཀྲར༌ 12 ཡང༌ ཞང༌བོ༌ མི༌ཀྲར༌ 2 ཟམ༌ཤིག༌ ཡོང༌གོས༌། 3 ཡོ༌ལ༌ ལྔ༌ལྔ༌ ཐུད༌ཏེ༌ ཆ༌ ཉིས༌ ཅོས༌། 4 རས༌ སྔོན༌པོའེ༌ གུག༌ ཅོས༌ཏེ༌ ཆ༌ ཉིས༌ཀོའེ༌ ཇུག༌གི༌ ཡོ༌ལའེ༌ ཟུར༌གུན༌ནི༌ཀ༌ ཏོག༌། 5 ཡོ༌ལའེ༌ ཆ༌ ཅིག༌པོའེ༌ཀ༌ གུག༌ ལྔབ༌ཅུ༌ དང༌ ཞན༌ ཆ༌ ཅིག༌པོའེ༌ཀའང༌ གུག༌ ལྔབ༌ཅུ༌ ཅོས༌། གུག༌གུན༌ ཅིག༌ དང༌ ཅིག༌ག༌ ལྟས༌ཏེ༌ ཡོང༌གོས༌། 6 སེར༌ཀུག༌ ལྔབ༌ཅུ༌ ཅོས༌ཏེ༌ ཡོ༌ལ༌ ཉིས༌ཀོའེ༌ གུག༌གུན༌ ལྡོམ༌ ཏེ༌ནེ༌ ཏམ༌པ༌ ཀུར༌བོ༌ ཁག༌ཅིག༌ གྱུར༌ཨིན༌།”

7 “ཏམ༌པ༌ ཀུར༌ ཀབ༌ཅེས༌སི༌ ཕིའ༌ ར༌མའེ༌ སྤུའ༌ ཐགས༌ཁན༌ནི༌ ཡོ༌ལ༌ 11 ཅོས༌། 8 ཏེ༌ ཚང༌མ༌ དྲན༌དྲ༌, རིང༌བོ༌ མི༌ཀྲར༌ 13 དང༌ ཞང༌བོ༌ མི༌ཀྲར༌ 2 ཟམ༌ཤིག༌ ཡོང༌གོས༌། 9 ཡོ༌ལ༌ ལྔ༌བོ༌ ཅིག༌ ཅོས༌ཏེ༌ ཐུད༌, ཞན༌ ཡོ༌ལ༌ དྲུག༌ཀོ༌ ཡང༌ ཁག༌ ཅིག༌གི༌ ནང༌ང༌ ཐུད༌། ཁག༌ དྲུག༌པོའེ༌ ཡོ༌ལ༌བོ༌ ཀུར༌རི༌ དུན༌ལ༌ ཉི༌ལྟབ༌ ཅོས༌ཏེ༌ བོར༌། 10 ཆ༌ ཅིག༌པོའེ༌ ཇུག༌གི༌ ཡོ༌ལའེ༌ ཟུར༌རི༌ཀ༌ གུག༌ ལྔབ༌ཅུ༌ ཅོས༌ ཡང༌ ཞན༌ ཆ༌ ཅིག༌པོའེ༌ ཇུག༌གི༌ ཡོ༌ལའེ༌ ཟུར༌རི༌ཀའང༌ གུག༌ ལྔབ༌ཅུ༌ ཅོས༌། 11 ར༌གན༌ནི༌ ཀུག༌ཀུག༌ ལྔབ༌ཅུ༌ ཅོས༌ཏེ༌ གུག༌གུན༌ནི ནང༌ང༌ གྱུད༌ ཡང༌ ཀུར༌རི༌ ཁག༌ ཉིས༌པོ༌ ཅིག༌ ཅོས༌ཏེ༌ ཐུད༌། 12 ཀབ༌ཅེས༌ ཐེ༌བ༌ ལུས༌ཁན༌བོ༌ ཏམ༌པ༌ ཀུར༌རི༌ གྱབ༌པོའེ༌ཀ༌ ཆར༌ཆར༌ལ༌ བོར༌། 13 ཆོག༌ ཉིས༌ཀོའ༌ ཡོ༌ལ༌ མི༌ཀྲར༌ ཕེད༌ ཐེ༌བ༌ ལུས༌ཁན༌བོ༌ ཀུར༌ ཀབ༌ཅེས༌ལ༌ ཆར༌ཆར༌ལ༌ བོར༌། 14 ཏེ༌བོའ༌ ཀབ༌ཅེས༌ ལུག༌ཕོའེ༌ པགས༌པ༌ རང༌ མར༌པོ༌ ཏང༌ཁན༌ ཉམ༌པོ༌ ཡང༌ ཏེ༌བོའེ༌ ཁེ༌ཐོག༌ག༌ ཞན༌ ཀབ༌ཅེས༌ཤིག༌ སེམས༌ཅན༌ནི༌ གྱལ༌ལ༌ པགས༌པའ༌ ཅོ༌ཅུག༌།”

15 “ཏམ༌པ༌ ཀུར༌ ལང༌ཅེས༌ལ༌ ཨ༌ཀ༌ཤིའེ༌ ཤིང༌ངི༌ རིབ༌ཞི༌ ཅོ༌ཅུག༌། 16 རིབ༌ཞི༌ རེ༌རེའེ༌ རིང༌བོ༌ མི༌ཀྲར༌ 4 དང༌ ཞང༌ མི༌ཀྲར༌ ཕེད༌ ཟམ༌ཤིག༌ ཡོང༌གོས༌། 17 རིབ༌ཞི༌ རེ༌རེའེ༌ ཁད༌ཅེས༌ལ༌ ཇུག༌པོ༌ ཞོགས༌ཏེ༌ ཟེར༌ ཙོགས༌ ཉིས༌ ཡོང༌གོས༌། ཏམ༌པ༌ ཀུར༌རི༌ རིབ༌ཞི༌ ཚང༌མ༌ ཙོགས༌ ཅོ༌གོས༌། 18 ཀུར༌རི༌ ལྷོ༌ ཆོགས༌ལ༌ རིབ༌ཞི༌ 20 ཅོས༌, 19 ཡང༌ རིབ༌ཞི༌གུན༌ ལང༌ཅེས༌ལ༌ མུལ༌ལི༌ ཞིབ༌ཅུ༌ ཅོ༌ཅུག༌། རིབ༌ཞི༌ རེ༌རེའ༌ ཞབ༌ལྡན༌ ཉིས༌, ཟེར༌ རེ༌རེ༌ ཡོག༌ག༌ ཞབ༌ལྡན༌ རེ༌རེ༌། 20 ཀུར༌རི༌ བྱང༌ ཆོགས༌ལའང༌ རིབ༌ཞི༌ 20 ཅོས༌, 21 ཡང༌ མུལ༌ལི༌ ཞབ༌ལྡན༌ ཞིབ༌ཅུ༌, རིབ༌ཞི༌ རེ༌རེ༌ ཡོག༌ག༌ ཞབ༌ལྡན༌ ཉིས༌། 22 ཀུར༌རི༌ གྱབ༌, ཡང༌ན༌ ནུབ༌ ཆོགས༌ལ༌ རིབ༌ཞི༌ 6 ཅོས༌, 23 ཡང༌ ཏམ༌པ༌ ཀུར༌རི༌ གྱབ༌ ཆོགས༌སི༌ ཀྲུ༌ ཉིས༌ཀོའེ༌ ཕིའ༌ ཐེ༌བ༌ རིབ༌ཞི༌ ཉིས༌ ཅོས༌། 24 ཀྲུའི༌ རིབ༌ཞི༌གུན༌ནི༌, ཡོག༌པོ༌ བེ༌ཏེ༌ ཨིན༌ནའང༌ ཁེ༌ཐོག༌པོ༌ སེར༌རི༌ ཀྱི༌ལྡིར༌ ཉམ༌པོ༌ ནང༌ཀུག༌གི༌ རིབ༌ཞིའ༌ ཐུད༌ཏེ༌ ཡོང༌གོས༌། ཏེན༌ན༌ ཙོགས༌ ཞན༌ ཀྲུའི༌ རིབ༌ཞིའི༌ ཉམ༌པོ༌ ཅོས༌། 25 ཏེ༌ནེ༌ རིབ༌ཞི༌ 8 དང༌ མུལ༌ལི༌ ཞབ༌ལྡན༌ 16 ཡོང༌གོས༌, རིབ༌ཞི༌ རེ༌རེའ༌ ཞབ༌ལྡན༌ ཉིས༌།”

26 “པ༌ར༌ཁ༌ ཏང༌ཅེས༌ལ༌ ཨ༌ཀ༌ཤིའེ༌ ཤིང༌ ཀོལ༌། ཏམ༌པ༌ ཀུར༌རི༌ ཆོགས༌ ཅིག༌གི༌ རིབ༌ཞིའི༌ ཕིའ༌ ལྔ༌, 27 ཞན༌ཆོགས༌ ཅིག༌གི༌ ཕིའ༌ ལྔ༌ ཡང༌ ནུབ༌ ཆོགས༌སི༌ རིབ༌ཞིའི༌ ཕིའ༌ ལྔ༌ ཀ༌བོ༌ ཏམ༌པ༌ ཀུར༌རི༌ གྱབ༌བོ༌ ཨིན༌། 28 ཞུང༌སྐྱིལ༌ལི༌ པར༌ཁའེ༌ ཀྲ༌ལུ༌བོ༌ ཀུར༌རི༌ གོ༌ནེ༌ ཇུག༌ ཚག༌པ༌ ལེབ༌གོས༌ ཀ༌བོ༌ རིབ༌ཞི༌ ཞུང༌སྐྱིལ༌ལི༌ཀ༌ ཡོད༌ཏེ༌ ཨིན༌ནོག༌། 29 རིབ༌ཞི༌གུན༌ སེར༌རི༌ ཀོབ༌ ཡང༌ པར༌ཁའེ༌ ཀྲ༌ལུ༌ གྱུད༌ཅེས༌སི༌ ཀྱི༌ལྡིར༌གུན༌ སེར༌རི༌ ཡོང༌གོས༌། ཡང༌ པ༌ར༌ཁ༌ ཏང༌ཅེས༌སི༌ ཀྲ༌ལུ༌གུན༌ལའང༌ སེར༌ ཏུམ༌།”

30 “ངའེ༌ རི༌ཀ༌ ཁྱོ༌རང༌ང༌ སྟན༌ཁན༌ ནང༌ཞིན༌ ཏམ༌པ༌ ཀུར༌བོ༌ ཙུག༌།”

31 “སྔོན༌པོ༌, སྔོ༌མར༌ དང༌ མར༌པོ༌ ནས༌མ༌ ཡང༌ རས༌ ཐགས༌ཁན༌ ཀུས༌པོའེ༌ ཡོ༌ལ༌ ཅོས༌ ཀ༌བོའེ༌ཀ༌ ལག༌ཤེས༌ ཁས༌པ༌གུན༌ལ༌ ཆེ༌ར༌བེམ༌མི༌ པར༌ སྲུལ༌ཅུག༌། 32 ཨ༌ཀ༌ཤིའེ༌ ཤིང༌ངི༌ ཀ༌ཝ༌ སེར༌རི༌ ཏུམ༌ཁན༌ ཞི༌, མུལ༌ལི༌ ཞབ༌ལྡན༌ རེ༌རེ༌ཀ༌ ལངས༌ཏེ༌ སེར༌ཀུག༌ ཉམ༌པོ༌ ཏེ༌གུན༌ནི༌ཀ༌ ཡོ༌ལ༌བོ༌ ཏོག༌། 33 ཀུར༌རི༌ ཐོག༌གི༌ཀ༌ ཡོད༌ཁན༌ སེར༌ཀུག༌གུན༌ནི༌ཀ༌ ཡོ༌ལ༌བོ༌ ཆར༌ལ༌ ཏོང༌ ཡང༌ ཡོ༌ལའེ༌ གྱབ༌བ༌ ཆད༌དོན༌ནི༌ སྒམ༌བོ༌ བོར༌། ཡོ༌ལ༌བོའེ༌ ཏམ༌པའེ༌ ནས༌ས༌, ཚང༌མའེ༌ སང༌ ཏམ༌པའེ༌ ནས༌ས༌ནེ༌ སོ༌སོ༌ ཕེ༌ཨིན༌། 34 ཚང༌མའེ༌སང༌ ཏམ༌པ༌ ནས༌སའེ༌ ནང༌ང༌ ཡོད༌ཁན༌ ཆད༌དོན༌ནི༌ སྒམ༌བོའ༌ ཐུག༌རྗེ༌ ཁའ༌ལེབ༌པོ༌ ཀོབ༌། 35 ཡོ༌ལའེ༌ དུན༌ ཆོགས༌, ཏམ༌པའེ༌ ནས༌སའེ༌ བྱང༌ ཆོགས༌ལ༌ ཅོག༌ཙེ༌ ཡང༌ ལྷོ༌ ཆོགས༌ལ༌ འོད༌སྟག༌པོ༌ བོར༌།”

36 “ཀུར༌རི༌ ནང༌ང༌ ཞུག༌སའེ༌ སྒོའ༌ ཀབ༌ཅེས༌ལ༌ ཡོ༌ལ༌ རས༌ ཀུས༌པོ༌ ཉམ༌པོ༌ ཙེམས༌ཏེ༌ ཏེ༌བོའེ༌ཀ༌ མི༌ ལག༌ཤེས༌ ཁས༌པ༌གུན༌ལ༌ སྔོན༌པོ༌, སྔོ༌མར༌ དང༌ མར༌པོ༌ ནས༌མ༌ སྲུལ༌ཏེ༌ ལྡེ༌མོ༌ ཅོ༌ཅུག༌། 37 ཏེ༌ ཡོ༌ལ༌ ཨ༌ཀ༌ཤིའེ༌ ཤིང༌ང༌ ཞོག༌ཁན༌ནི༌ ཀ༌ཝ༌ སེར༌རི༌ ཏུམ༌ཁན༌ ལྔའེ༌ཀ༌ སེར༌ཀུག༌ ཉམ༌པོ༌ ཆར༌ལ༌ ཏོང༌ ཡང༌ ཀ༌ཝ༌གུན༌ ལང༌ཅེས༌ལ༌ ར༌གན༌ནི༌ ཞབ༌ལྡན༌ ལྔ༌ ཅོས༌།”