27
ཆོད༌ཁྲི༌།
27:1-8
1 ཡ༌ཝའེ༌ མོ༌ཟེས༌ལ༌ མོལས༌, “ཨ༌ཀ༌ཤིའེ༌ ཤིང༌ངི༌ ཆོད༌ཁྲི༌ཞིག༌ ཅོས༌, ཏེ༌བོ༌ ཀྲུབ༌ཞི༌, རིན༌ དང༌ ཞང༌ མི༌ཀྲར༌ 2 ཡང༌ ཐོན༌བོ༌ མི༌ཀྲར༌ ཅིག༌ དང༌ ཕེད༌ ཟམ༌ཤིག༌ ཡོང༌གོས༌།
2 ཀྲུ༌ ཞི༌ཀོ༌ ཞོགས༌ཏེ༌ རཱ༌ཅོ༌ ཙོགས༌ ཙེབ༌ཙེབ༌ ཅོས༌། ཆོད༌ཁྲི༌ དང༌ རཱ༌ཅོ༌གུན༌ ཤིང༌ ཅིག༌གི༌ ཀ༌ནེ༌ སྐོས༌ཏེ༌ ཡོང༌གོས༌ ཡང༌ ཆོད༌ཁྲི༌ གང༌པོ༌ ར༌གན༌ ཉམ༌པོ༌ ཏུམ༌།
3 ཏེ༌ཀ༌ ཀོལ༌ཅེས༌སི༌ ཅ༌ལག༌ ཚང༌མ༌ ར༌གན༌ནི༌ ཅོས༌, ཀ༌བོ༌ ཀོག༌ཐལ༌ གྱང༌ཅེས༌སི༌ ནོད༌གུན༌, ཁྱེམ༌གུན༌, སྒོར༌མོ༌གུན༌, ཤ༌ ལོག༌ཅེས༌སི༌ མེ༌ལེན༌གུན༌ དང༌ མེ༌ ཏུག༌ཅེས༌སི༌ ཏ༌འོ༌གུན༌ ཨིན༌ནོག༌།
4 ཤིང༌ དང༌ སོལ༌ལ༌ བར༌ཨིན༌ ཡོད༌ཁན༌གུན༌ ཁད༌ཅེས༌ལ༌ ར༌གན༌ནི༌ ཀྲ༌མིག༌ ཅོས༌ ཡང༌ ཏེ༌བོའེ༌ ཀྲུ༌གུན༌ནི༌ཀ༌ ར༌གན༌ནི༌ ཀྱི༌ལྡིར༌ ཞི༌ ཏགས༌ཏེ༌
5 ཏེ༌བོ༌ ནང༌ལོག༌ག༌ ཆོད༌ཁྲིའ༌ ཀྱིར༌སྐོར༌ཏེ༌ ཀོང༌ང༌ ཏགས༌ཏེ༌ ཡོད༌ཁན༌ནི༌ ཡོག༌ག༌ བོར༌, ཕེད༌ ཞིག༌གི༌ཀ༌ ཏེ༌བོ༌ ཁད༌ཨིན༌།
6 ཆོད༌ཁྲི༌བོ༌ ཁུར༌ཅེས༌ལ༌ ཨ༌ཀ༌ཤིའེ༌ ཤིང༌ངི༌ ཀྲ༌ལུ༌ ཞོགས༌ཏེ༌ ཅོས༌ ཡང༌ ཏེ༌བོའ༌ ར༌གན༌ ཏུམ༌།
7 ཏེ༌གུན༌ ཆོད༌ཁྲི༌ ལྡོ༌ ཉིས༌ཀོའ༌ ཡོད༌ཁན༌ནི༌ ཀྱི༌ལྡིར༌གུན༌ནི༌ ནང༌ང༌ ཁུར༌ཅེས༌ལ༌ གྱུད༌།
8 ཆོད༌ཁྲི༌བོ༌ ཤིང༌ལེབ༌ ཉམ༌པོ༌ སྟོང༌པ༌ སྒམ༌ ཙོགས༌ ཅོས༌། ཁྱོ༌རང༌ང༌ རིའི༌ཀ༌ སྟན༌ཁན༌ ནང༌ཞིན༌ ཏེ༌བོ༌ ཅོས༌།”
ཏམ༌པའེ༌ ཀུར༌རི༌ ནང༌སྐོར༌།
27:9-19
9 “ཏམ༌པ༌ ཀུར༌ལ༌ ནང༌སྐོར༌ ཅོས༌། ལྷོ༌ ཆོགས༌ལ༌ ཐགས༌ཁན༌ནི༌ རས༌ ཀུས༌པོའེ༌ ཡོ༌ལ༌ མི༌ཀྲར༌ 46 རིང༌མོ༌ ཅོས༌།
10 ཀ༌ཝ༌ ཉི༌ཤུ༌ དང༌ ཏེ༌གུན༌ ལང༌ཅེས༌ལ༌ ར༌གན༌ནི༌ ཞབ༌ལྡན༌ ཉི༌ཤུ༌ ཡང༌ ཀ༌ཝ༌གུན༌ནི༌ཀ༌ མུལ༌ལི༌ ཀུག༌ཀུག༌གུན༌ དང༌ ཀྱི༌ལྡིར༌གུན༌ ཅོས༌།
11 ཏེན༌ན༌ ཙོགས༌ བྱང༌ ཆོགས༌སི༌ སྐྱོར༌རེ༌ ཕིའང༌ ཀ༌ཝ༌ ཉི༌ཤུ༌, ར༌གན༌ནི༌ ཞབ༌ལྡན༌ ཉི༌ཤུ༌, མུལ༌ལི༌ ཀུག༌ཀུག༌གུན༌ དང༌, ཀྱི༌ལྡིར༌གུན༌ ཡང༌ མི༌ཀྲར༌ 44 རིང༌ངི༌ ཡོ༌ལ༌ ཅོས༌།”
12 “ནུབ༌ ཆོགས༌སི༌ སྐྱོར༌རེ༌ ཕིའ༌ མི༌ཀྲར༌ 22 རིང༌ངི༌ ཡོ༌ལ༌ ཅོས༌, ཀ༌བོ༌ ཞབ༌ལྡན༌ རྕུའི༌ཀ༌ ལངས༌ཁན༌ནི༌ ཀ༌ཝ༌ རྕུའི༌ཀ༌ ཆར༌ལ༌ ཏོང༌།
13 ཤར༌ ཆོགས༌སི༌ སྐྱོར༌ར༌ ཀ༌རུ༌ ནང༌ཀུག༌ག༌ ཞུག༌སའེ༌ སྒོ༌ ཡོད༌, ཏེ༌བོ༌ མི༌ཀྲར༌ 22 ཞང༌ཅན༌ ཡོང༌གོས༌།
14 སྒོའེ༌ ཆོགས༌ ཅིག༌པོའེ༌ཀ༌ ཞབ༌ལྡན༌ སུམ༌མི༌ཀ༌ ཀ༌ཝ༌ སུམ༌ ལངས༌ཏེ༌ མི༌ཀྲར༌ དྲུག༌ དང༌ ཕེད༌ ཟམ༌ཤིག༌ རིང༌ངི༌ ཡོ༌ལ༌ ཆར༌ལ༌ ཏོང༌།
15 སྒོའེ༌ འ༌ངོ༌ ཆོགས༌པོའང༌ ཞབ༌ལྡན༌ སུམ༌མི༌ཀ༌ ཀ༌ཝ༌ སུམ༌ ལངས༌ཏེ༌ མི༌ཀྲར༌ དྲུག༌ དང༌ ཕེད༌ ཟམ༌ཤིག༌ རིང༌ངི༌ ཡོ༌ལ༌ ཆར༌ལ༌ ཏོང༌།
16 ཞུག༌སའེ༌ སྒོའ༌ མི༌ཀྲར༌ 9 རིང༌ངི༌ ཡོ༌ལ༌ ཀ༌བོ༌ ཀུས༌པོ༌ རས༌སི༌ཀ༌ སྔོན༌པོ༌, སྔོ༌མར༌ དང༌ མར༌པོ༌ ནས༌མ༌ ཉམ༌པོ༌ རི༌མོ༌ སྲུལ༌ཏེ༌ ཡོང༌གོས༌། ཡང༌ ཏེ༌བོ༌ ཞབ༌ལྡན༌ ཞི༌ཀ༌ ལངས༌ཁན༌ནི༌ ཀ༌ཝ༌ ཞི༌ཀ༌ ཆར༌ལ༌ ཏོང༌།
17 ནང༌སྐོར༌རི༌ སྐྱོར༌རེ༌ ཀ༌ཝ༌ ཚང༌མའེ༌ཀ༌ མུལ༌ལི༌ ཀྱི༌ལྡིར༌, མུལ༌ཀུག༌གུན༌ ཡང༌ ཀ༌ཝ༌ ལང༌ཅེས༌སི༌ ཞབ༌ལྡན༌གུན༌ ར༌གན༌ནི༌ ཡོང༌གོས༌།
18 སྐྱོར༌ར༌བོ༌ མི༌ཀྲར༌ 44 རིང༌, མི༌ཀྲར༌ 22 ཞང༌ དང༌ མི༌ཀྲར༌ 2 ཟམ༌ཤིག༌ ཐོན༌པོ༌ ཡོང༌གོས༌། ཡོ༌ལ༌གུན༌ ཐགས༌ཁན༌ནི༌ ཀུས༌པོ༌ རས༌སི༌ ཡང༌ ཞབ༌ལྡན༌གུན༌ ར༌གན༌ནི༌ ཡོང༌གོས༌།
19 ཏམ༌པ༌ ཀུར༌རི༌ ནང༌ང༌ ཀོལ༌ཁན༌ནི༌ ལག༌ཆ༌ ཚང༌མ༌ ཡང༌ ཀུར༌ དང༌ སྐྱོར༌རེ༌ པུར༌ཆ༌ ཚང༌མ༌ ར༌གན༌ནི༌ ཅོ༌གོས༌།”
འོད༌དི༌ ཕིའ༌ མར༌ནག༌།
27:20-21
20 “འོད༌གུན༌ ཏུས༌གྱུན༌ སྤར༌ཏེ༌ བོར༌ཅེས༌སི༌ ཕིའ༌ ཨིས༌ར༌ཨེལ༌པ༌གུན༌ལ༌ ཨོ༌ལིཝ༌ ཙིར༌ཁན༌ནི༌ མར༌ནག༌ ལག༌མོ༌ ཁྱོང༌ཅེས༌ལ༌ བཀའ༌ ཏོང༌།
21 ཡ༌ཝའ༌ ཐུག༌སའེ༌ ཀུར༌རི༌ ནང༌ང༌, ཆད༌དོན༌ནི༌ སྒམ༌མི༌ དུན༌ལ༌ ཡོད༌ཁན༌ནི༌ ཡོ༌ལའེ༌ དུན༌ ཆོགས༌ལ༌ འོད༌སྟག༌པོ༌ བོར༌། ཨ༌རོན༌ དང༌ ཁོའེ༌ བུ༌ཚ༌གུན༌ནི༌ ཡ༌ཝའེ༌ སྐུན༌དུན༌ལ༌ ཏེ༌ འོད༌གུན༌ ཕི༌ཏོག༌ནེ༌ ང༌མོ༌ ཚོག༌པ༌ སྤར༌ཏེ༌ བོར༌གོས༌། ཨིས༌ར༌ཨེལ༌པ༌གུན༌ དང༌ ཁོང༌གུན༌ནི༌ པུར༌གྱུད༌ ཚང༌མའེ༌ ཏུས༌གྱུན༌ འི༌ ཁྲིམས༌པོ༌ ཁའ༌ཉན༌ གོས༌།”