28
བླ༌མའེ༌ ཀོས༌ལག༌།
28:1-5
1 ཡ༌ཝའེ༌ མོ༌ཟེས༌ལ༌ མོལས༌, “ཨིས༌ར༌ཨེལ༌པ༌གུན༌ནི༌ ཕྲོ༌ནེ༌ ཁྱོ༌རང༌ངི༌ ཨ༌ཅོ༌ ཨ༌རོན༌ དང༌ ཁོའེ༌ བུ༌ཚ༌ ན༌དབ༌, ཨ༌བི༌ཧུ༌, ཨེ༌ལི༌འ༌ཟར༌ དང༌ ཨི༌ཐ༌མར༌ གུན༌ བོད༌ཏེ༌ ངའ༌ བླ༌མའེ༌ ཚུལ༌ལ༌ ཞབས༌ཏོག༌ ཞུ༌ཅེས༌ལ༌, ཁོང༌གུན༌ ལྡོམ༌།
2 ཁྱོ༌རང༌ངི༌ ཨ༌ཅོ༌ ཨ༌རོན༌ནི༌ ཕིའ༌ བླ༌མའེ༌ ཏམ༌པ༌ ཀོས༌ལག༌གུན༌ ཙེམ༌ཅུག༌, ཏེ༌བོའེ༌ ཁོའ༌ སྤལ༌ དང༌ རྩི༌ཝ༌ ཁྱོང༌ཨིན༌།
3 ངའེ༌ རིག༌པ༌ ཏང༌ཁན༌ནི༌ ལག༌ཁས༌པ༌གུན༌ལ༌ ཨ༌རོན༌ནི༌ ཕིའ༌ ཀོས༌ལག༌ ཙེམ༌ ཟེར༌ ཏེ༌བོའེ༌ ཁོ༌ ངའེ༌ ཕིའ༌ བླ༌མའེ༌ ཚུལ༌ལ༌ ཞབས༌ཏོག༌ ཞུའ༌ ལྡམས༌ཏེ༌ ཨིན༌ཁན༌བོ༌ སྟན༌ཨིན༌།
4 ཁོང༌གུན༌ནི༌ འི༌ ཀོས༌ལག༌གུན༌ ཙེམ༌གོས༌, ཀྲང༌ང༌ ཀབ༌ཅེས༌, ཨེ༌ཕོད༌, ཀོས༌ ཕུ༌ཏུང༌ མེད༌ཁན༌, ཐགས༌ཁན༌ནི༌ ཀོས༌, གོའ༌ སྲིལ༌ཅེས༌ དང༌ སྐྱེ༌རགས༌ གུན༌། ཨ༌རོན༌ དང༌ ཁོའེ༌ བུ༌ཚ༌གུན༌ནི༌ ཕིའ༌ ཁོང༌གུན༌ནི༌ ཏེ༌ ཏམ༌པ༌ ཀོས༌ལག༌ ཚང༌མ༌ ཙེམ༌གོས༌, ཁོང༌གུན༌ནི༌ བླ༌མའེ༌ ཚུལ༌ལ༌ ངའ༌ ཞབས༌ཏོག༌ ཞུ༌ ཟ༌ནེ༌ ཏེ༌གུན༌ གོན༌ཨིན༌།
5 ཁོང༌གུན༌ནི༌ སེར༌ཀུད༌, སྔོན༌པོ༌, སྔོ༌མར༌ དང༌ མར༌པོ༌ ནས༌མ༌ ཡང༌ རས༌ ཀུས༌པོ༌ གུན༌ ཀོལ༌གོས༌།”
ཏམ༌པའེ༌ སྟུད༌ཏུང༌ རིང༌མོ༌ ༼ཨེ༌ཕོད༌།༽
28:6-14
6 “རས༌ ཀུས༌པོའེ༌ཀ༌ སེར༌ཀུད༌ ཡང༌ སྔོན༌པོ༌, སྔོ༌མར༌, མར༌པོ༌ ནས༌མ༌ ཉམ༌པོ༌ ལག༌ཁས༌པ༌གུན༌ལ༌ ལག༌སྲུལ༌ ཏང༌ཅུགས༌ཏེ༌ ཨེ༌ཕོད༌ ཅོས༌།
7 ཏེ༌བོའེ༌ གྱབ༌ དང༌ དུན༌བོ༌ ཐུད༌ཅེས༌ལ༌ སྤུང༌པ༌ ཉིས༌ཀོའེ༌ཀ༌ རས༌སི༌ ཐུད༌ ཏོང༌།
8 སྐྱེ༌རག༌པོ༌ ཨེ༌ཕོད༌ དང༌ ཙོགས༌ ཀུས༌པོ༌ ཪས༌སི༌ཀ༌ སེར༌ཀུད༌ ཡང༌ སྔོན༌པོ༌, སྔོ༌མར༌ དང༌ མར༌པོ༌ ནས༌མ༌ སྲུལ༌ཏེ༌ ཨེ༌ཕོད༌ ཉམ༌པོ༌ ཐུད༌གོས༌།”
9 “ཨོ༌ནེཀས༌ ཟེར༌ཁན༌ནི༌ ཁྲ༌རྡོའ༌ རིན༌ཅན༌ ཉིས༌སི༌ཀ༌ ཨིས༌ར༌ཨེལ༌ལི༌ བུ༌ཚ༌གུན༌ནི༌ མིང༌ སྐོས༌ཏེ༌ བྲིས༌།
10 མིང༌གུན༌ སྐྱེ༌ ཚིར༌ལ༌, ཁྲ༌རྡོའ༌ ཅིག༌པོའེ༌ཀ༌ དྲུག༌ དང༌ ཡང༌ ཅིག༌པོའེ༌ཀ༌ དྲུག༌ བྲིས༌།
11 ཁྲ༌ ཙོག༌ཁན༌གུན༌ནི༌ ཐེ༌ཙེ༌ སྐོའ༌ ཙོགས༌ལ༌ ཁྲ༌རྡོའ༌ ཉིས༌ཀོའེ༌ཀ༌ མིང༌གུན༌ སྐོས༌ཏེ༌ ཏེ༌བོ༌ སེར༌རི༌ རིབ༌ཞི༌ ནང༌ང༌ ཅུག༌།
12 ཨིས༌ར༌ཨེལ༌ལི༌ སྡེ༌ རྕུག༌ཉིས༌པོ༌ ཨིད༌ཏུ༌ ལུས༌ཤེས༌ལ༌ ཏེ༌གུན༌ ཨེ༌ཕོད༌དི༌ སྤུང༌པའེ༌ རས༌སི༌ཀ༌ ཏག༌ཅུག༌། ཨ༌རོན༌ནི༌ ཏེ༌ མིང༌གུན༌ ཁོ༌རང༌ངི༌ སྤུང༌པའེ༌ཀ༌ ཁུར༌ཏེ༌ ཁོང༌གུན༌ ཨིད༌ཏུ༌ བོར༌ར༌ ཛད༌ཅེས༌པོ༌ ཡ༌ཝའ༌ ཨིད༌ཏུ༌ སྐུལ༌ཨིན༌།
13 ཁྲ༌གུན༌ ཅུག༌ཅེས༌ལ༌ སེར༌རི༌ རིབ༌ཞི༌ ཉིས༌ ཅོས༌
14 ཡང༌ སེར༌ ལྕུས༌ཏེ༌ ཉག༌ཐག༌ ཐུ༌ངུན༌ ཉིས༌ ཅོས༌ཏེ༌ ཏེ༌གུན༌ ཁྲ༌ ཅུག༌ཁན༌ སེར༌རི༌ རིབ༌ཞི༌གུན༌ལ༌ ཐུད༌ཅུག༌།”
ཀྲང༌ང༌ ཀབ༌ཅེས༌
28:15-30
15 “ལག༌ཁས༌པ༌གུན༌ལ༌ ཀྲང༌ང༌ ཀབ༌ཅེས༌ ཅོ༌ཅུག༌ ཀ༌བོ༌ ཐག༌ཅད༌ ཏང༌ཅེས༌ལ༌ ཀོལ༌ཨིན༌། ཏེ༌བོ༌ ཨེ༌ཕོད༌ ཙོགས༌ ཀུས༌པོ༌ རས༌སི༌ཀ༌ སེར༌ཀུད༌ ཡང༌ སྔོན༌པོ༌, སྔོ༌མར༌ དང༌ མར༌པོ༌ ནས༌མ༌ སྲུལ༌ཏེ༌ ཅོས༌།
16 ཏེ༌བོ༌ ཀྲུབ༌ཞི༌, ལྡོ༌ རེ༌རེ༌ སེན༌ཀྲི༌མི༌ཀྲར༌ 22 ཡང༌ ཉི༌ལྡབ༌ གི༌གུ༌ ཙོགས༌ ཡོང༌གོས༌།
17 ཏེ༌བོའེ༌ཀ༌ ཁྲ༌རྡོའ༌ རིན༌ཅན༌གུན༌ནི༌ ཀྲལ༌ཞི༌ ཅོས༌ ཡང༌ གོ༌མའེ༌ ཀྲལ༌ལི༌ ནང༌ང༌ རུ༌བི༌, ཏོ༌པཟ༌ དང༌ བེ༌རེལ༌;
18 ཀྲལ༌ ཉིས༌པའེ༌ ནང༌ང༌ ཏར༌ཀོའེས༌, ནི༌ལིམ༌ དང༌ ཨི༌མ༌རལད༌;
19 ཀྲལ༌ སུམ༌པའེ༌ ནང༌ང༌ ཇེ༌སིནཐ༌, ཨ༌གཏ༌ དང༌ ཨ༌མེ༌ཐིསཏ༌;
20 ཀྲལ༌ ཞི༌པའེ༌ ནང༌ང༌ ཀརི༌སོ༌ལཱེཏ༌, ཨོ༌ནེཀས༌ དང༌ ཇས༌པར༌ གུན༌ ཡོང༌གོས༌། ཏེ༌ ཚང༌མ༌ སེར༌རི༌ ནང༌ང༌ ཅུགས༌ཏེ༌ ཡོང༌གོས༌།
21 ཁྲ༌ ཙོག༌ཁན༌གུན༌ལ༌ ཏེ༌ ཁྲ༌རྡོའ༌གུན༌ནི༌ཀ༌ ཡ༌ཀོབ༌བི༌ བུ༌ཚ༌གུན༌ནི༌ མིང༌ ཐེ༌ཙེ༌ ཙོགས༌ལ༌ སྐོ༌ཅུག༌, ཀ༌གུན༌ ཨིས༌ར༌ཨེལ༌པའེ༌ སྡེ༌ རྕུག༌ཉིས༌པོ༌ ཨིན༌ནོག༌།”
22 “ཀྲང༌ང༌ ཀབ༌ཅེས༌པོ༌ ཨེ༌ཕོད༌ ཉམ༌པོ༌ ཐུད༌ཅེས༌ལ༌ སེར༌ ལྕུས༌ཏེ༌ ཉག༌ཐག༌ ཅོས༌།
23 སེར༌རི༌ ཀྱི༌ལྡིར༌ ཉིས༌ ཅོས༌ ཡང༌ ཏེ༌གུན༌ ཀྲང༌ང༌ ཀབ༌ཅེས༌པོའེ༌ སྟག༌གི༌ ཀྲུ༌ ཉིས༌ཀོའེ༌ཀ༌ ཏོག༌།
24 ཡང༌ སེར༌རི༌ ཉག༌ཐག༌ ཉིས༌ཀོའེ༌ ཇུག༌ རེ༌རེ༌ གྲང༌ང༌ གྱབ༌ཅེས༌སི༌ ཀྲུའི༌ ཀྱི༌ལྡིར༌ རེ༌རེ༌ཀ༌ ཏོག༌།
25 སེར༌རི༌ ཉག༌ཐག༌གི༌ ཞན༌ ཇུག༌པོ༌ ཨེ༌ཕོད༌དི༌ དུན༌ ཆོགས༌སི༌ སྤུང༌པའེ༌ཀ༌ ཁྲ༌ ཅུག༌ཁན༌ནི༌ སེར༌རི༌ རིབ༌ཞི༌ཀ༌ ཏོག༌།
26 སེར༌རི༌ ཀྱི༌ལྡིར༌ ཡང༌ ཉིས༌ ཅོས༌ཏེ༌ ཀྲང༌ང༌ ཀབ༌ཅེས༌པོའེ༌ ཡོག༌གི༌ ཀྲུ༌ ཉིས༌ཀོའེ༌ ཐིལ༌ལ༌ ཨེ༌ཕོད༌ ཆོགས༌ལ༌ ཏོག༌།
27 སེར༌རི༌ ཀྱི༌ལྡིར༌ ཡང༌ ཉིས༌ ཅོས༌ཏེ༌ ཨེ༌ཕོད༌དི༌ དུན༌ ཆོགས༌ལ༌ སྤུང༌པའེ༌ རས༌སི༌ ཇུག༌པོའེ༌ཀ༌ ཨེ༌ཕོད༌ དང༌ སྐྱེ༌རགས༌ ཐུད༌སའེ༌ སྟག༌པོའེ༌ཀ༌ ཏོག༌།
28 ཀྲང༌ང༌ ཀབ༌ཅེས༌སི༌ ཀྱི༌ལྡིར༌གུན༌ དང༌ ཨེ༌ཕོད༌དི༌ སྐྱེ༌རག༌གི༌ ཁེ༌ཐོག༌ག༌ ཡོད༌ཁན༌ནི༌ ཀྱི༌ལྡིར༌གུན༌ སྔོན༌པོ༌ རས༌སི༌ སྐྱེ༌རག༌ ཁྲ༌མོ༌ ཉམ༌པོ༌ ལྡོམ༌། ཏེ༌ནེ༌ ཀྲང༌ང༌ ཀབ༌ཅེས༌པོ༌ གྲུལ༌ མ༌གྲུལ༌ལ༌ ཨེ༌ཕོད༌ ཉམ༌པོ༌ སྟན༌པོ༌ ལུས༌ཨིན༌།”
29 “ཨ༌རོན༌ ཁོ༌རང༌ངི༌ སྙིང༌ངི༌ཀ༌ ཨིས༌ར༌ཨེལ༌པའེ༌ སྡེ༌གུན༌ནི༌ མིང༌ སྐོས༌ཁན༌ནི༌ ཀྲང༌ང༌ ཀབ༌ཅེས༌པོ༌ གོན༌ཏེ༌ ཏམ༌པ༌ ནས༌སའེ༌ ནང༌ང༌ ཆའ༌ཅིག༌ ང༌ ཡ༌ཝའ༌ ཁོང༌གུན༌ མི༌རྗེད༌ཅེས༌པོ༌ ཨིད༌ཏུ༌ སྐུལ༌ཨིན༌།
30 ཀྲང༌ང༌ ཀབ༌ཅེས༌པོའེ༌ ནང༌ཀུག༌ག༌ ཨུ༌རིམ༌ དང༌ ཐུ༌མིམ༌ གུན༌ གྱོང༌། ཨ༌རོན༌ ཡ༌ཝའེ༌ དུན༌ལ༌ ཏམ༌པའེ༌ ནས༌སའེ༌ ནང༌ང༌ ཆ༌ ཟ༌ནེ༌ ཏེ༌གུན༌ ཁོའེ༌ སྙིང༌ངི༌ དུན༌ལ༌ ལུས༌ཨིན༌། ཏེ༌ནེ༌ ཨ༌རོན༌ནི༌ ཏེ༌གུན༌ ཀོལ༌ཏེ༌ ཨིས༌ར༌ཨེལ༌པ༌གུན༌ནི༌ ཕིའ༌ ངའེ༌ ཐུག༌གོངས༌པོ༌ སྔོན༌ཅུག༌ཨིན༌།”
བླ༌མ༌གུན༌ནི༌ ཞན༌ ཀོས༌ལག༌གུན༌།
28:31-43
31 “ཨེ༌ཕོད༌དི༌ ཡོག༌ག༌ གོན༌ཅེས༌སི༌ ཀོས༌ གང༌པོ༌ སྔོན༌པོ༌ ཡོང༌གོས༌,
32 གོའེ༌ ཕིའ༌ བི༌ཡང༌ ཡོང༌གོས༌ ཡང༌ མི༌ཅད༌ཅེས༌སི༌ ཕིའ༌ ཏེ༌བོའེ༌ ཐའ༌མ༌ ལྟབས༌ཏེ༌ ཙེམ༌།
33 སེར༌རི༌ ཀྲི༌ལུ༌ དང༌ སྔོན༌པོ༌, སྔོ༌མར༌ དང༌ མར༌པོ༌ ནས༌མ༌ ཉམ༌པོ༌ ཨ༌ནར༌རི༌ ཟོས༌ཏ༌ ཅོས༌ཏེ༌ ཀོས༌སི༌ ཇུག༌གི༌ ཟུར༌རི༌ཀ༌ ཏོག༌།
34 ཀྲ༌ལུ༌ དང༌ ཨ༌ནར༌ གུན༌ སྤེལ༌ཏེ༌ ༼ཨ༌ནར༌ ཅིག༌ ཀྲི༌ལུ༌ ཅིག༌༽ ཀོས༌སི༌ ཇུག༌གི༌ ཟུར༌ ཀྱིར༌སྐོར༌ཏེ༌ ཏོག༌།
35 བླ༌མའེ༌ ཚུལ༌ལ༌ ཡ༌ཝ༌ ཞབས༌ཏོག༌ ཞུ༌ ཟ༌ནེ༌ ཨ༌རོན༌ནི༌ ཏེ༌བོ༌ གོན༌གོས༌། ཡ༌ཝའེ༌ སྐུན༌དུན༌ལ༌ ཏམ༌པའེ༌ ནས༌སའེ༌ ནང༌ང༌ ཆ༌ ཡ༌ བིང༌ ཟ༌ནེ༌ ཀྲ༌ལུའི༌ སྐད༌པོ༌ སན༌ཏེ༌ ཁོ༌ སད༌ད༌ མི༌ཛད༌།”
36 “ཅའང༌ མ༌དྲེས༌ཁན༌ནི༌ སེར༌ རྡུངས༌ཏེ༌ ལེབ༌ལེབ༌ ཀྲུབ༌ཞི༌ ཅོས༌ ཡང༌ ཏེ༌བོའེ༌ཀ༌ ‘ཡ༌ཝའེ༌ ཁོང༌རང༌ངི༌ ཕིའ༌ ཁོ༌ ཏམ༌པ༌ ཛདས༌’ སྐོས༌ཏེ༌ བྲིས༌།
37 ཏེ༌བོ༌ ཐོད༌དི༌ དུན༌ཆོགས༌ལ༌ ཟུར༌རི༌ཀ༌ སྔོན༌པོ༌ རས༌སི༌ སྐྱེ༌རགས༌ ཁྲ༌མོ༌ ཉམ༌པོ༌ ལྡོམ༌།
38 ཏེ༌བོ༌ ཨ༌རོན༌ནི༌ ཐོད༌པའེ༌ཀ༌ གོན༌གོས༌ ཏེ༌ནེ༌ ཁོའེ༌ ཨིས༌ར༌ཨེལ༌པ༌གུན༌ནི༌ ཡ༌ཝའ༌ ཕུལ༌ཁན༌ནི༌ ཆོད༌པའེ༌ ནང༌ང༌ ནོར༌ཁྲུལ༌ ཆའ༌ཁན༌ནི༌ སྐྱོན༌གུན༌ ཁོའེ༌ ལེན༌ཨིན༌ ཡང༌ ང༌ ཡ༌ཝའེ༌ ཁོང༌གུན༌ནི༌ ཆོད༌པ༌ ཕུལ༌ཁན༌གུན༌ ཐད༌པོ༌ ཉམ༌པོ༌ ལེན༌ཨིན༌།”
39 “ཨ༌རོན༌ནི༌ ནང༌ཀུག༌གི༌ ཀོས༌ དང༌ ཐོད༌ གུན༌ ཐགས༌ཁན༌ནི༌ ཀུས༌པོ༌ རས༌སི༌ ཡོང༌གོས༌ ཡང༌ སྐྱེ༌རག༌པོའང༌ ལག༌སྲུལ༌ ཏངས༌ཏེ༌ ཡོང༌གོས༌།
40 ཨ༌རོན༌ནི༌ བུ༌ཚ༌གུན༌ནི༌ ཕིའ༌ ནང༌ཀུག༌གི༌ ཀོས༌, སྐྱེ༌རགས༌ དང༌ ཏི༌བི༌ གུན༌ ཅོས༌ ཀ༌བོའེ༌ ཁོང༌གུན༌ལ༌ སྤལ༌ དང༌ རྩི༌ཝ༌ ཁྱོང༌ཨིན༌།
41 འི༌ ཀོས༌ལག༌གུན༌ ཁྱོ༌རང༌ངི༌ ཨ༌ཅོ༌ ཨ༌རོན༌ དང༌ ཁོའེ༌ བུ༌ཚ༌ གུན༌ལ༌ སྐོན༌ ཡང༌ ཁོང༌གུན༌ནི༌ གོའེ༌ཀ༌ ཨོ༌ལིཝ༌ཝི༌ མར༌ནག༌ ལུགས༌ཏེ༌ བླ༌མའེ༌ ལས༌སི༌ ཕིའ༌ སྐོས༌། བླ༌མའེ༌ ཚུལ༌ལ༌ ང༌ ཞབས༌ཏོག༌ ཞུ༌ཅེས༌ལ༌ ཁོང༌གུན༌ སོ༌སོ༌ ཕེས༌།”
42 “ཁོང༌གུན༌ ཇང༌སྟོང༌ མེད༌ཅེས༌སི༌ ཕིའ༌ ནང༌ཀུག༌གི༌ ཀང༌ཙེ༌, ཀུས༌པོ༌ རས༌སི༌ ཙེམ༌ ཀ༌བོ༌ སྐྱེད༌པ༌ནེ༌ ཇང༌བར༌ ཚོག༌པ༌ ཡོང༌གོས༌།
43 ཡ༌ཝའ༌ ཐུག༌སའེ༌ ཀུར༌རི༌ ནང༌ང༌ ཆ༌ ཟ༌ནེ༌ ཡ༌ ཆོད༌ཁྲིའི༌ དུན༌ལ༌ ཏམ༌པའེ༌ ནས༌སའེ༌ ནང༌ང༌ ཞབས༌ཏོག༌ ཞུ༌ ཟ༌ནེ༌ ཨ༌རོན༌ དང༌ ཁོའེ༌ བུ༌ཚ༌གུན༌ནི༌ ཏེ༌ ཀོས༌ལག༌གུན༌ གོན༌གོས༌། ཏེ༌ཟུག༌ ཅོ༌ན༌ ཁོང༌གུན༌ལ༌ སྐྱོན༌ ཕོགས༌ཏེ༌ ཤི༌ མི༌ཤི༌། ཏེ༌ ཁྲིམས༌པོ༌ ཨ༌རོན༌ དང༌ ཁོའེ༌ པུར༌གྱུད༌གུན༌ནི༌ ཏུས༌གྱུན༌ ཁའ༌ཉན༌ གོས༌།”