29
བླ༌མ༌གུན༌ ཏམ༌པ༌ ཅོ༌ཅེས༌།
29:1-46
1 ཡ༌ཝའེ༌ མོ༌ཟེས༌ལ༌ མོལས༌, “ཨ༌རོན༌ དང༌ ཁོའེ༌ བུ༌ཚ༌གུན༌ ཏམ༌པ༌ ཅོ༌ཅེས༌ལ༌ འི༌གུན༌ ཅོས༌, ཏེ༌ནེ༌ ཁོང༌གུན༌ནི༌ བླ༌མའེ༌ ཚུལ༌ལ༌ ངའ༌ ཞབས༌ཏོག༌ ཞུ༌ཨིན༌། ལང༌ཏོ༌ ལོ༌ ཆུ༌ངུན༌ ཅིག༌ དང༌ ལུག༌ཕོ༌ ཉིས༌ ཁྱོང༌, ཏེ༌གུན༌ སྐྱོན༌མེད༌ཁན༌ ཡོང༌གོས༌།
2 པག༌ཕེ༌ གྱལ༌ཤོག༌ ཀོལ༌ཏེ༌ སྐྱུར༌ མེད༌ཁན༌ནི༌ ཏ༌གི༌ སྣ༌ སུམ༌ ཅོས༌ ཀ༌གུན༌ མར༌ ཡོད༌ཁན༌, མར༌ མེད༌ཁན༌ དང༌ མར༌ སྐུས༌ཁན༌ནི༌ ཏ༌གི༌ སྲ༌མོ༌།
3 ཏེ༌གུན༌ པག༌ཙེ༌ ནང༌ང༌ གྱོང༌ ཡང༌ ལང༌ཏོ༌ དང༌ ལུག༌ཕོ༌ ཉིས༌ཀོ༌ ཉམ༌པོ༌ ང༌ ཆོད༌པ༌ ཕུལ༌།
4 ཨ༌རོན༌ དང༌ ཁོའེ༌ བུ༌ཚ༌གུན༌ ཡ༌ཝའ༌ ཐུག༌སའེ༌ ཀུར༌རི༌ སྒོའེ༌ཀ༌ ཁྱོངས༌ཏེ༌ ཆུ༌ ཉམ༌པོ༌ ཁྲུས༌།
5 ཏེ༌ནེ༌ ཨ༌རོན༌ལ༌ བླ༌མའེ༌ ཀོས༌ལག༌, ནང༌ཀུག༌གི༌ ཀོས༌, ཨེ༌ཕོད༌དི༌ ཡོག༌གི༌ ཀོས༌, ཨེ༌ཕོད༌ དང༌ ཀྲང༌ང༌ ཀབ༌ཅེས༌ གུན༌ སྐོན༌། ཨེ༌ཕོད༌དི༌ སྐྱེ༌རག༌ ལག༌སྲུལ༌ ཏང༌ཁན༌བོ༌ ཉམ༌པོ༌ ཏེ༌བོ༌ ལྡོམ༌།
6 ཁོའེ༌ གོའེ༌ཀ༌ ཐོད༌ སྐོན༌ ཡང༌ ཏེ༌བོའེ༌ཀ༌ ཐོར༌ཤོག༌ ཏམ༌པ༌བོ༌ ཐོད༌པོའེ༌ཀ༌ ཏོག༌།
7 ཏེ༌ནེ༌ ཁོའེ༌ གོའེ༌ཀ༌ མར༌ ལུགས༌ཏེ༌ ཁོ༌ བླ༌མའེ༌ ལས༌སི༌ ཕིའ༌ སྐོས༌།
8 ཁོའེ༌ བུ༌ཚ༌གུན༌ ཁྱོང༌ ཡང༌ ཁོང༌གུན༌ལའང༌ ནང༌ཀུག༌གི༌ ཀོས༌པོ༌ སྐོན༌།
9 ཁོང༌གུན༌ནི༌ སྐྱེད༌པའེ༌ཀ༌ སྐྱེ༌རགས༌ ལྡོམ༌ ཡང༌ གོའེ༌ཀ༌ ཏི༌བི༌ སྐོནས༌། ཏེ༌ནེ༌ ཁྲིམས༌ ནང༌ཞིན༌ ཏུས༌གྱུན༌ནི༌ ཕིའ༌ ཞབས༌ཏོག༌ ཞུ༌ཅེས༌སི༌ བླ༌མའེ༌ ལས༌པོ༌ ཁོང༌གུན༌ནི༌ གྱུར༌ཨིན༌། ཏེན༌ན༌ཟུག༌གི༌ ཁྱོ༌རང༌ངི༌ ཨ༌རོན༌ དང༌ ཁོའེ༌ བུ༌ཚ༌གུན༌ སྐོ༌གོས༌།”
10 “ཡ༌ཝའ༌ ཐུག༌སའེ༌ ཀུར༌རི༌ སྒོའེ༌ དུན༌ལ༌ ལང༌ཏོ༌ ཁྱོངས༌ཏེ༌ ཨ༌རོན༌ དང༌ ཁོའེ༌ བུ༌ཚ༌གུན༌ལ༌ ཏེ༌བོའེ༌ གོའེ༌ཀ༌ ལག༌པ༌ བོར༌ཅུག༌།
11 ཡ༌ཝའེ༌ དུན༌ལ༌ སྒོའེ༌ཀ༌ ལང༌ཏོའེ༌ སྐེ༌ ཅད༌ཏེ༌ སོད༌།
12 ལང༌ཏོའེ༌ ཁྲག༌ ཙ༌པིག༌ཞིག༌ ཁྱོ༌རང༌ངི༌ ཛི༌གུ༌ ཉམ༌པོ༌ ཆོད༌ཁྲི༌ ཀྲུའི༌ རི༌ཅོ༌གུན༌ལ༌ སྐུས༌ ཡང༌ ལུས༌ཁན༌ནི༌ ཁྲག༌པོ༌ ཆོད༌ཁྲིའི༌ མག༌ལྡན༌ནི༌ཀ༌ ལུག༌།
13 ཏེ༌ནེ༌ ནང༌ཆ༌གུན༌ ཀབས༌ཁན༌ནི༌ ཚིལ༌ ཚང༌མ༌, ཆིན༌པའེ༌ ཁག༌ གྱལ༌ཤོག༌པོ༌ ཡང༌ ཁལ༌མ༌ ཉིས༌ཀོ༌ ཚིལ༌ ཉམ༌པོ༌ སྲོག༌ཆོད༌ ཕུལ༌སའེ༌ ཆོད༌ཁྲི༌ཀ༌ མེའ༌ སྲོག༌།
14 ཨིན༌ནའང༌ ལང༌ཏོའེ༌ ཤ༌, པགས༌པ༌ དང༌ གྱུ༌མ༌གུན༌ ལྕ༌ ཉམ༌པོ༌ ཀུར༌ ཙུགས༌ཏེ༌ ཡོད༌སའེ༌ ཕི༌ལོག༌ག༌ མེའ༌ སྲོག༌། ཏེ༌བོ༌ སྡིག༌པའེ༌ ཕིའ༌ ཆོད༌པ༌ ཨིན༌།”
15 “ལུག༌ཕོ༌ ཅིག༌པོ༌ ཁྱོང༌ ཡང༌ ཨ༌རོན༌ དང༌ ཁོའེ༌ བུ༌ཚ༌གུན༌ལ༌ ཏེ༌བོའེ༌ གོའེ༌ཀ༌ ལག༌པ༌ བོར༌ཅུག༌།
16 ཏེ༌བོ༌ སོད༌ ཡང༌ ཏེ༌བོའེ༌ ཁྲག༌གི༌ ཐོར༌མ༌ ཆོད༌ཁྲིའི༌ ཆོགས༌ ཞི༌ཀོའེ༌ཀ༌ ཏོང༌།
17 ལུག༌གི༌ ཤ༌ ཏུམ༌པ༌ཏུམ༌པ༌ ཅོས༌ཏེ༌ ནང༌ཆ༌ དང༌ ཡན༌ལག༌ ཚང༌མ༌ ཁྲུས༌ ཡང༌ ཏེ༌གུན༌ གོ༌ དང༌ ཞན༌ ཁག༌གུན༌ ཉམ༌པོ༌ བོར༌།
18 ལུག༌ གང༌པོ༌ ཆོད༌ཁྲི༌ཀ༌ མེའ༌ སྲོག༌། ཏེ༌བོ༌ ཡ༌ཝའེ༌ ཕིའ༌ མེའ༌ སྲག༌ཁན༌ནི༌ ཆོད༌པ༌ ཡང༌ ཏེ༌བོའེ༌ ཏྲི༌མའེ༌ ང༌ ཡ༌ཝ༌ ཐད༌ ཅུག༌ཨིན༌།”
19 “ཞན༌ ལུག༌ཕོ༌ ཅིག༌པོ༌ ཁྱོང༌ ཡང༌ ཨ༌རོན༌ དང༌ ཁོའེ༌ བུ༌ཚ༌གུན༌ལ༌ ཏེ༌བོའེ༌ གོའེ༌ཀ༌ ལག༌པ༌ བོར༌ཅུག༌།
20 ཏེ༌བོ༌ སོད༌ ཡང༌ ཏེ༌བོའེ༌ ཁྲག༌ ཙ༌པིག༌ཞིག༌ ཁུར༌ཏེ༌ ཨ༌རོན༌ དང༌ ཁོའེ༌ བུ༌ཚ༌གུན༌ནི༌ ནམ༌ཅོག༌ ཡས༌པ༌, ལག༌པ༌ དང༌ རྐང༌པ༌ ཡས༌པའེ༌ ཐེ༌པོ༌ གུན༌ནི༌ཀ༌ སྐུས༌ ཡང༌ ཆོད༌ཁྲིའི༌ ཆོགས༌ ཞི༌ཀོའེ༌ཀ༌ ལུས༌ཁན༌ནི༌ ཁྲག༌གི༌ ཐོར༌མ༌ ཏོང༌།
21 ཆོད༌ཁྲི༌ཀ༌ ཡོད༌ཁན༌ནི༌ ཁྲག༌ ཙ༌པིག༌ དང༌ མར༌ནག༌ ཙ༌པིག༌ ཁུར༌ཏེ༌ ཨ༌རོན༌ དང༌ ཁོའེ༌ བུ༌ཚ༌གུན༌ དང༌ ཁོང༌ ཚང༌མའེ༌ ཀོས༌ལག༌གུན༌ནི༌ཀ༌ ཐོར༌མ༌ ཏོང༌། ཏེ༌ནེ༌ ཁོ༌, ཁོའེ༌ བུ༌ཚ༌གུན༌ ཡང༌ ཁོང༌གུན༌ནི༌ ཀོས༌ལག༌གུན༌ ཏམ༌པ༌ གྱུར༌ཨིན༌།”
22 “འི༌ ལུག༌ཕོ༌ ཨ༌རོན༌ དང༌ ཁོའེ༌ བུ༌ཚ༌གུན༌ བླ༌མའ༌ སྐོས༌ཁན༌བོའེ༌ ཕིའ༌ ཨིན༌ པ༌སང༌ ཏེ༌བོའེ༌ རྔ༌མ༌ དང༌ ནང༌ཆ༌གུན༌ནི༌ ཚིལ༌, ཆིན༌པའེ༌ ཁག༌ གྱལ༌ཤོག༌, ཁལ༌མ༌ ཉིས༌ཀོ༌ ཚིལ༌ ཉམ༌པོ༌ ཡང༌ རྐང༌པ༌ ཡས༌པའེ༌ ཤ༌ ཁུར༌།
23 ཏེ༌ནེ༌ ང༌ ཡ༌ཝའ༌ ཕུལ༌ཁན༌ནི༌ སྐྱུར༌ མེད༌ཁན༌ནི༌ ཏ༌གི༌ པག༌ཙེ༌ ནང༌ནེ༌ མར༌ ཡོད༌ཁན༌ ཅིག༌, མར༌ མེད༌ཁན༌ ཅིག༌ དང༌ མར༌ སྐུས༌ཁན༌ནི༌ ཏ༌གི༌ སྲ༌མོ༌ ཅིག༌ ཁུར༌།
24 ཏེ༌ ཚང༌མ༌ ཨ༌རོན༌ དང༌ ཁོའེ༌ བུ༌ཚ༌གུན༌ནི༌ ལག༌པའེ༌ ནང༌ང༌ ཏོང༌ ཡང༌ ཏེ༌བོ༌ ཡ༌ཝའེ༌ སྐུན༌དུན༌ལ༌ ལན༌ ཁ༌ཅིག༌ སྟགས༌ཏེ༌ ཕབ༌ཅུག༌། ཏེ༌བོ༌ ངའེ༌ ཕིའ༌ ཡུག༌ཁན༌ནི༌ ཆོད༌པ༌ གྱུར༌ཨིན༌།
25 ཏེ༌ནེ༌ ཏེ༌གུན༌ ཁོང༌གུན༌ནི༌ ལག༌ནེ༌ ཁྱེར༌ཏེ༌ ཆོད༌ཁྲི༌ཀ༌ ཞན༌ མེའ༌ སྲག༌ཁན༌ནི༌ ཆོད༌པ༌ ཉམ༌པོ༌ མེའ༌ སྲོག༌། ཏེ༌བོའེ༌ ཏྲི༌མའེ༌ ང༌ ཡ༌ཝ༌ ཐད༌ ཅུག༌ཨིན༌ ཡང༌ ཏེ༌བོ༌ ངའེ༌ ཕིའ༌ མེའ༌ སྲག༌ཁན༌ནི༌ ཆོད༌པ༌ ཨིན༌ནོག༌།
26 ཆོད༌པ༌ ཕུལ༌ཁན༌ ལུག༌ཕོ༌ ཉིས༌པ༌བོའེ༌ ཀྲང༌ཤ༌ ཁུར༌ ཡང༌ ཡ༌ཝའེ༌ སྐུན༌དུན༌ལ༌ ལན༌ ཁ༌ཅིག༌ སྟགས༌ཏེ༌ ཕབས༌ཏེ༌ ཡུག༌ཁན༌ནི༌ ཆོད༌པ༌ ཕུལ༌། ཏེ༌ནེ༌ ཤའེ༌ ཏེ༌ ཁག༌པོ༌ ཁྱོ༌ཞའེ༌ གྱུར༌ཨིན༌།”
27 “ཨ༌རོན༌ དང༌ ཁོའེ༌ བུ༌ཚ༌གུན༌ བླ༌མའེ༌ ལས༌སི༌ ཕིའ༌ སྐོ༌ ཟ༌ནེ༌ ལུག༌ཕོའེ༌ ཤ༌ ཕུལ༌ཁན༌གུན༌ ཕེས༌ཏེ༌ བོར༌, ཀ༌བོའེ༌ ནང༌ང༌ ཡ༌ཝའེ༌ སྐུན༌དུན༌ལ༌ ཡུག༌ཁན༌ནི༌ ལུག༌གི༌ ཀྲང༌ དང༌ སྟག༌ཁན༌ནི༌ རྐང༌པའེ༌ ཤ༌ གུན༌ ཐེས༌ཏེ༌ ཨིན༌ནོག༌།
28 དཀོན༌མཆོག༌ ཉམ༌པོ༌ ཞི༌དེ༌ བྲེལ༌ལི༌ ཕིའ༌ ཨིས༌ར༌ཨེལ༌པ༌གུན༌ནི༌ ཡ༌ཝའ༌ ཆོད༌པ༌ ཕུལ༌ཁན༌ནི༌ ཤའེ༌ ཁག༌པོ༌ ཨ༌རོན༌ དང༌ ཁོའེ༌ བུ༌ཚ༌གུན༌ལ༌ ཏུས༌གྱུན༌ ཏང༌གོས༌།”
29 “ཨ༌རོན༌ ཤི༌ཏེ༌ སྟིང༌ནེ༌ ཏམ༌པའེ༌ ཀོས༌ལག༌གུན༌ ཁོའེ༌ བུ༌ཚ༌གུན༌ལ༌ སྟད༌གོས༌། ཁོང༌གུན༌ལ༌ ཏེ༌གུན༌ སྐོན༌ཏེ༌ ཁོང༌གུན༌ནི༌ གོའེ༌ཀ༌ མར༌ ལུགས༌ཏེ༌ བླ༌མའེ༌ ཚུལ༌ལ༌ ཞབས༌ཏོག༌ ཞུ༌ཅེས༌ལ༌ སྐོས༌།
30 ཨ༌རོན༌ནི༌ ཚབས༌ལ༌ བླ༌མ༌ གྱུར༌ཁན༌ནི༌ ཁོའེ༌ བུ༌ཚ༌, ཡ༌ཝའ༌ ཐུག༌སའེ༌ ཀུར༌རི༌ ཏམ༌པ༌ ནས༌སའེ༌ ནང༌ང༌ ལུག༌སྲོལ༌གུན༌ ཅོ༌ཨིན༌ ཞག༌མ༌ རྡུན༌ དུག༌ ཟ༌ནེ༌ ཏེ༌ ཀོས༌ལག༌གུན༌ གོན༌གོས༌།”
31 “ཨ༌རོན༌ དང༌ ཁོའེ༌ བུ༌ཚ༌གུན༌ སྐོ༌ ཟ༌ནེ༌ ལུག༌ཕོའེ༌ ཤ༌ ཆོད༌པ༌ ཕུལ༌ཁན༌བོ༌ ཏམ༌པ༌ ཀུར༌རི༌ ནང༌སྐོར༌རི༌ ནས༌ས༌ ཞིག༌གི༌ཀ༌ ཁྱེར༌ཏེ༌ སྐོལ༌།
32 ཨ༌རོན༌ དང༌ ཁོའེ༌ བུ༌ཚ༌གུན༌ནི༌ ལུག༌ཕོའེ༌ ཤ༌ དང༌ པག༌ཙེ༌ ནང༌ང༌ ཡོད༌ཁན༌ནི༌ ཏ༌གི༌ ཏམ༌པ༌ གུན༌ ཀུར༌རི༌ སྒོའེ༌ དུན༌ལ༌ ཟ༌གོས༌།
33 བླ༌མའེ༌ ལས༌སི༌ ཕིའ༌ སྐོ༌ ཟ༌ནེ༌ ཁོང༌གུན༌ནི༌ སྡིག༌པ༌གུན༌ནི༌ ཤགས༌པའེ༌ ཕིའ༌ ཆོད༌པ༌ ཏང༌ཁན༌ནི༌ ཤ༌ ཟ༌གོས༌། བླ༌མ༌གུན༌ མན༌པ༌ ཞན༌སུའིང༌ ཏེ༌གུན༌ ཟའ༌ མི༌ཆོག༌ ཅིའ༌ཟེར༌ན༌ ཏེ༌གུན༌ ཏམ༌པ༌ ཨིན༌ནོག༌།
34 ཀལ༌ཏེས༌ ཆོད༌པ༌ ཕུལ༌ཁན༌ནི༌ ཤ༌ ཡ༌ ཏ༌གི༌ ང༌མོ༌ ཚག༌པ༌ ལུས༌ན༌ ཏེ༌གུན༌ མེའ༌ སྲག༌གོས༌། ཏེ༌གུན༌ ཟའ༌ མི༌ཆོག༌ ཅིའ༌ཟེར༌ན༌ ཏེ༌བོ༌ ཏམ༌པ༌ ཨིན༌ནོག༌།”
35 “ངའེ༌ ཁྱོ༌རང༌ང༌ བཀའ༌ ཏང༌ཁན༌ ཚང༌མ༌ ཨ༌རོན༌ དང༌ ཁོའེ༌ བུ༌ཚ༌གུན༌ལ༌ ཅོས༌། ཁོང༌གུན༌ བླ༌མའེ༌ ལས༌ལ༌ སྐོ༌ཅེས༌སི༌ ལུག༌སྲོལ༌གུན༌ ཅོ༌ཅེས༌ལ༌ ཞག༌པོ༌ རྡུན༌ གོར༌ཨིན༌།
36 ཏེ༌ རྡུན༌ཞག༌པོའེ༌ ནང༌ང༌ སྡིག༌པ༌གུན༌ནི༌ ཤགས༌པའེ༌ ཕིའ༌ ཞག༌ཏང༌ ལང༌ཏོ༌ ཅིག༌ ཆོད༌པ༌ ཕུལ༌, ཆོད༌ཁྲི༌ རྩང༌མ༌ ཅོས༌ ཡང༌ ཨོ༌ལིཝ༌ཝི༌ མར༌ ལུགས༌ཏེ༌ ཏེ༌བོ༌ ཏམ༌པ༌ ཅོས༌།
37 ཆོད༌ཁྲི༌ ཏམ༌པ༌ ཅོ༌ཅེས༌ལ༌ ཞག༌མ༌ རྡུན༌ ཆོད༌པ༌ ཕུལ༌། ཏེ༌ནེ༌ ཏེ༌བོ༌ ཏེ༌ཟམ༌ ཏམ༌པ༌ གྱུར༌ཨིན༌ ཏེ༌བོའ༌ ལག༌པ༌ རྩེ༌ཁན༌ ཡ༌ ཐུག༌ཁན༌བོའང༌ ཏམ༌པ༌ གྱུར༌ཨིན༌།”
38 “ཞག༌ཏང༌ ཆོད༌ཁྲི༌ཀ༌ ལོ༌ ཅིག༌པ༌ ལུ༌གུ༌ ཉིས༌ ཆོད༌པ༌ ཕུལ༌།
39 ཅིག༌པོ༌ ང༌མོ༌, ཡང༌ ཅིག༌པོ༌ ཕི༌ཏོག༌།
40 ལུ༌གུ༌ ཏང༌པོ༌ ཉམ༌པོ༌ ཀྱི༌ལོ༌ ཅིག༌ གྱལ༌ལ༌ པག༌ཕེ༌ ནང༌ང༌ ལི༌ཀྲར༌ ཅིག༌གི༌ ཨོ༌ལིཝ༌ཝི༌ མར༌ནག༌ སྲེས༌ཁན༌ ཡང༌ རྒུན༌ཆང༌ ལི༌ཀྲར༌ ཅིག༌ ཆོད༌པའ༌ ཕུལ༌།
41 ལུ༌གུ༌ ཉིས༌པ༌བོ༌ ཕི༌ཏོག༌ ཆོད༌པ༌ ཕུལ༌ ཡང༌ ཏེ༌བོ༌ ཉམ༌པོ༌ ང༌ཏོག༌ ཕུལ༌ཁན༌ ཟམ༌ཞིག༌གི༌ པག༌ཕེ༌, ཨོ༌ལིཝ༌ཝི༌ མར༌ནག༌ དང༌ རྒུན༌ཆང༌ གུན༌ ཕུལ༌། ཏེ༌གུན༌ ང༌ ཡ༌ཝའེ༌ ཕིའ༌ ཆོད༌པ༌ མེའ༌སྲགས༌ཁན༌ ཡང༌ ཏེ༌བོའེ༌ ཏྲི༌མའེ༌ ང༌ ཡ༌ཝ༌ ཐད༌ ཅུག༌ཨིན༌།”
42 “མི༌རབས༌ནེ༌ མི༌རབས༌ འི༌ མེའ༌ སྲག༌ཁན༌ནི༌ ཆོད༌པ༌བོ༌ ཀུར༌རི༌ སྒོའེ༌ཀ༌ ཡ༌ཝའེ༌ དུན༌ལ༌ ཅད༌མ༌ཅུག༌ག༌ ཕུལ༌གོས༌། ཏེ༌ཀ༌ ང༌ ཁྱོ༌ཞའ༌ ཉམ༌པོ༌ ཐུགས༌ཏེ༌ ཁྱོ༌རང༌ང༌ སྤེ༌ར༌ ཏང༌ཨིན༌།
43 ཏེ༌ཀ༌ ང༌ ཨིས༌ར༌ཨེལ༌པ༌གུན༌ ཉམ༌པོ༌ ཐུག༌ཨིན༌ ཡང༌ ངའེ༌ སྤལ༌ ཏེ༌ཀ༌ ཡོད༌ཅེས༌པའེ༌ ཏེ༌ ནས༌ས༌བོ༌ ཏམ༌པ༌ ཅོ༌ཨིན༌།
44 ངའེ༌ ཀུར༌ དང༌ ཆོད༌ཁྲི༌ ཏམ༌པ༌ ཅོ༌ཨིན༌ ཡང༌ ངའེ༌ ཨ༌རོན༌ དང༌ ཁོའེ༌ བུ༌ཚ༌གུན༌ ཏམ༌པ༌ ཅོས༌ཏེ༌ བླ༌མའེ༌ ཚུལ༌ལ༌ ངའ༌ ཞབས༌ཏོག༌ ཞུ༌ཅེས༌ལ༌ སྐོ༌ཨིན༌།
45 ང༌ ཨིས༌ར༌ཨེལ༌པ༌གུན༌ནི༌ ཕྲོའ༌ དུགས༌ཏེ༌ ཁོང༌གུན༌ནི༌ དཀོན༌མཆོག༌ གྱུར༌ཨིན༌།
46 ང༌ ཁོང༌གུན༌ནི༌ ཕྲོའ༌ དུག༌ཅེས༌ ཡང༌ ཁོང༌གུན༌ ཨི༌ཇིབ༌ནེ༌ ཕིངས༌ཏེ༌ ཁྱོང༌ཁན༌ ང༌ ཡ༌ཝ༌ ཁོང༌གུན༌ནི༌ དཀོན༌མཆོག༌ ཨིན༌ཁན༌བོ༌ ཁོང༌གུན༌ནི༌ ཧ༌གོ༌ཨིན༌། ང༌ ཡ༌ཝ༌ ཁོང༌གུན༌ནི༌ དཀོན༌མཆོག༌ ཨིན༌།”