30
སྤོས༌ ཏུག༌སའེ༌ ཆོད༌ཁྲི༌།
30:1-10
1 ཡ༌ཝའེ༌ མོ༌ཟེས༌ལ༌ མོལས༌, “སྤོས༌ ཏུག༌ཅེས༌སིི༌ ཕིའ༌ ཨ༌ཀ༌ཤིའེ༌ ཤིང༌ངི༌ ཆོད༌ཁྲི༌ ཅོས༌།
2 ཏེ༌བོ༌ ཀྲུབ༌ཞི༌, ལྡོ༌གུན༌ སེན༌ཀྲི༌མི༌ཀྲར༌ 45 ཡང༌ ཐོན༌བོ༌ སེན༌ཀྲི༌མི༌ཀྲར༌ 90 ཡོང༌གོས༌། ཏེ༌བོའེ༌ ཀྲུ༌ ཞི༌ཀོ༌ རཱ༌ཅོ༌ ཙོགས༌ ཙེབ༌ཙེབ༌ ཅོ༌གོས༌ ཡང༌ ཏེ༌གུན༌ ཆོད༌ཁྲི༌ ཉམ༌པོ༌ ཤིང༌ཅིག༌ག༌ ཞོག༌གོས༌།
3 ཆོད༌ཁྲི༌ གང༌པོ༌ ཡང༌ན༌ ཏེ༌བོའེ༌ ཐོག༌, ཆོག༌ ཞི༌ཀོ༌ དང༌ རཱ༌ཅོ༌ གུན༌ ཅའང༌ མ༌དྲེས༌ཁན༌ནི༌ སེར༌ ཉམ༌པོ༌ ཏུམ༌ ཡང༌ ཏེ༌བོའེ༌ ཐའ༌མ༌ ཀྱིར༌སྐོར༌ཏེ༌ སེར༌རི༌ ཐའ༌རིལ༌ ཏོང༌།
4 སེར༌རི༌ ཀྱི༌ལྡིར༌ ཅོས༌ཏེ༌ ཆོགས༌ ཉིས༌ཀོའེ༌ཀ༌ སེར༌རི༌ ཐའ༌རིལ༌ ཏང༌ཁན༌ནི༌ ཡོག༌ག༌ ཏོག༌, ཏེ༌ནེ༌ ཏེ༌བོ༌ ཁུར༌ཅེས༌སི༌ ཀྲ༌ལུ༌ གུན༌ ཏེ༌ནང༌ང༌ གྱུད༌ ཉན༌ཨིན༌།
5 ཏེ༌ ཀྲ༌ལུ༌གུན༌ ཨ༌ཀ༌ཤིའེ༌ ཤིང༌, སེར༌ ཉམ༌པོ༌ ཏུམས༌ཏེ༌ ཡོང༌གོས༌།
6 ཆོད༌ཁྲི༌བོ༌ ཆད༌དོན༌ནི༌ སྒམ༌ དང༌ མི༌གུན༌ནི༌ སྡིག༌པའ༌ ཤགས༌པ༌ ཏང༌སའེ༌ སྒམ༌མི༌ ཁའ༌ལེབ༌, ང༌ ཁྱོ༌རང༌ ཉམ༌པོ༌ ཐུག༌སའེ༌ དུན༌ ཆོགས༌ལ༌ ཡོད༌ཁན༌ནི༌ ཡོ༌ལའེ༌ ཉེ༌མོའ༌ ཏམ༌པའེ༌ ནས༌སའེ༌ ནང༌ང༌ བོར༌།”
7 “ཞག༌ཏང༌ ང༌མོ༌ ཨ༌རོན༌ འོད༌སྟག༌གི༌ འོད༌གུན༌ནི༌ སྟ༌སྟོག༌ ཅོའ༌ ཆ༌ ཟ༌ནེ༌ ཁོའེ༌ ཏེ༌ ཆོད༌ཁྲི༌ཀ༌ ཏྲི༌ཞིམ༌ཅན༌ནི༌ སྤོས༌ དུག༌གོས༌།
8 ཕི༌ཏོག༌ འོད༌སྟག༌གུན༌ནི༌ འོད༌ སྤར༌ར༌ ཆ༌ ཟ༌ནེ༌ ཡ༌ཝའེ༌ སྐུན༌དུན༌ལ༌ ཁོའེ༌ ཆོད༌ཁྲི༌ཀ༌ སྤོས༌ དུག༌གོས༌། མི༌རབས༌ནེ༌ མི༌རབས༌ ཏེ༌བོ༌ ཅོ༌གོས༌།
9 འི༌ ཆོད༌ཁྲི༌ཀ༌ ཏམ༌པ༌ མན༌ཁན༌ནི༌ སྤོས༌ ཡ༌ ཞན༌ མེའ༌ སྲག༌ཁན༌ནི༌ ཆོད༌པ༌ ཡ༌ ཀྲོ༌ནས༌སི༌ ཆོད༌པ༌ གུན༌ མ༌ཕུལ༌ ཡང༌ ཏེ༌ཀ༌ རྒུན༌ཆང༌ངི༌ ཆོད༌པའང༌ མ༌ཕུལ༌།
10 ལོའེ༌ ནང༌ང༌ ལན༌ཅིག༌ ཨ༌རོན༌ནི༌ ཆོད༌ཁྲི༌ རྩང༌མ༌ ཅོ༌ཅེས༌ལ༌ མི༌གུན༌ནི༌ སྡིག༌པའེ༌ ཤགས༌པའེ༌ ཕིའ༌ ཆོད༌པ༌ ཕུལ༌ཁན༌ནི༌ ཁྲག༌ ཏེ༌བོའེ༌ རཱ༌ཅོ༌གུན༌ནི༌ཀ༌ སྐུ༌གོས༌། འི༌བོ༌ མི༌རབས༌ནེ༌ མི༌རབས༌ ཅོ༌གོས༌། ཡ༌ཝའེ༌ འི༌ ཆོད༌ཁྲི༌བོ༌ ཚང༌མའེ༌སང༌ ཏམ༌པ༌ ཐེའ༌ཛདས༌།”
ཏམ༌པའེ༌ ཀུར༌རི༌ ཕིའ༌ པེ༌ནེ༌།
30:11-21
11 ཡ༌ཝའེ༌ མོ༌ཟེས༌ལ༌ མོལས༌,
12 “ཁྱོ༌རང༌ངི༌ ཨིས༌ར༌ཨེལ༌པ༌གུན༌ནི༌ ཀྲངས༌ཀ༌ ལེན༌ ཟ༌ནེ༌ མི༌ རེ༌རེའེ༌ ཁོ༌རང༌ངི༌ མི༌ཚེ༌ ཕིའ༌ ཡ༌ཝའ༌ རིན༌ ཤལ༌གོས༌། ཏེ༌ནེ༌ མིང༌ ཅུག༌ ཟ༌ནེ༌ ཁོང༌གུན༌ནི༌ཀ༌ ཅའང༌ ནོད༌སྐྱལ༌ མི༌ཡོང།
13 མི༌ ཀྲངས༌སི༌ ནང༌ང༌ མིང༌ཆུད༌ཁན༌ རེ༌རེའེ༌ མུལ༌ གརམ༌ 5.5 ཟམ༌ཤིག༌ ཡ༌ཝའ༌ ཆོད༌པའེ༌ ཚུལ༌ལ༌ ཏང༌གོས༌, ཏེ༌བོ༌ ཏམ༌པའེ༌ ཀུར༌རི༌ ནང༌ང༌ ཏབ༌བ༌ ཀོལ༌ཁན༌ནི༌ ཚད༌ ནང༌ཞིན༌ ཡོང༌གོས༌།
14 ལོ༌ ཉི༌ཤུ༌ ཡང༌ ཏེ༌སང༌ མང༌ང༌ ཨིན༌ཁན༌ནི༌ མི༌ཚང༌མ༌, མི༌ ཀྲངས༌སི༌ ནང༌ང༌ རྩི༌གོས༌ ཡང༌ ཁོང༌གུན༌ནི༌ ཡ༌ཝའ༌ ཆོད༌པ༌བོ༌ ཕུལ༌གོས༌།
15 མི༌ཚེ༌ སྐྱོབ༌ཅེས༌ལ༌ རིན༌ ཤལ༌ཏེ༌ ཡ༌ཝའ༌ ཆོད༌པ༌ ཕུལ༌ ཟ༌ནེ༌ ཆུག༌པོ༌གུན༌ནི༌ མུལ༌ གརམ༌ 5.5 སང༌ མང༌ང༌ ཡང༌ ཉལ༌བ༌ཅན༌གུན༌ནི༌ ཏེ༌སང༌ ཉུ༌ངུན༌ ཏང༌ མ༌གོས༌།
16 ཨིས༌ར༌ཨེལ༌པ༌གུན༌ནི༌ ཀ༌ནེ༌ ཆོད༌པ༌ ཕུལ༌ཁན༌ནི༌ པེ༌ནེ༌ ཏམ༌པ༌ ཀུར༌རི༌ ཟོབ༌སྐྱོར༌ དང༌ ཞན༌ ལས༌གུན༌ནི༌ ཕིའ༌ ཀོལ༌གོས༌། ཏེ༌བོའེ༌ ཡ༌ཝའེ༌ སྐུན༌དུན༌ལ༌ ཁོང༌གུན༌ནི༌ མི༌ཚེའེ༌ ཕིའ༌ རིན༌ ཤལ༌ཁན༌བོ༌ ཁོང༌གུན༌ལ༌ ཨིད༌ཏུ༌ སྐུལ༌ཨིན༌།”
17 ཡ༌ཝའེ༌ མོ༌ཟེས༌ལ༌ མོལས༌,
18 “ར༌གན༌ནི༌ ལག༌པ༌ ཁྲུ༌ཅེས༌སི༌ ཞོང༌པ༌ ཡང༌ ཏེ༌བོ༌ བོར༌ཅེས༌པོའང༌ ར༌གན༌ནི༌ ཅོས༌། ཏེ༌བོ༌ ཏམ༌པ༌ ཀུར༌ དང༌ ཆོད༌པ༌ མེའ༌ སྲག༌སའེ༌ ཆོད༌ཁྲི༌ པར༌ལ༌ བོར༌ཏེ༌ ཆུ༌ སྐོང༌།
19 ཏེ༌ ཆུ༌ ཉམ༌པོ༌ ཨ༌རོན༌ དང༌ ཁོའེ༌ བུ༌ཚ༌གུན༌ལ༌ ལག༌པ༌ དང༌ རྐང༌པ༌ གུན༌ ཁྲུ༌ཅུག༌།
20 ཤི༌ཅུག༌ག༌ མི༌ཛད༌ཅེས༌ལ༌ ཡ༌ཝའ༌ ཐུག༌སའེ༌ ཀུར༌རི༌ ནང༌ང༌ ཆའེ༌སང༌ སྔུན༌ལ༌ ཡང༌ ཡ༌ཝའེ༌ ཕིའ༌ ཆོད༌ཁྲི༌ཀ༌ ཆོད༌པ༌ ཕུལ༌ཏེ༌ མེའ༌ སྲག༌གི༌སང༌ སྔུན༌ལ༌ ཁོང༌གུན༌ནི༌ ཏེ༌ ཆུ༌ ཉམ༌པོ༌ ལག༌པ༌ ཁྲུ༌གོས༌།
21 ཤི༌ཅུག༌ག༌ མི༌ཛད༌ཅེས༌སི༌ ཕིའ༌ ཁོང༌གུན༌ནི༌ ལག༌པ༌ དང༌ རྐང༌པ༌ གུན༌ ཁྲུ༌གོས༌། འི༌ ཁྲིམས༌པོ༌ མི༌རབས༌ནེ༌ མི༌རབས༌ ཨ༌རོན༌ དང༌ ཁོའེ༌ པུར༌གྱུད༌གུན༌ནི༌ སྲུང༌གོས༌།”
མར༌ནག༌ དང༌ སྤོས༌།
30:22-38
22 ཡ༌ཝའེ༌ མོ༌ཟེས༌ལ༌ མོལས༌,
23 “འི༌ ཚ༌མིག༌ གྱལ༌ལ༌གུན༌ ཁྱོང༌, མའེར༌ ཟེར༌ཁན༌ནི༌ མར༌ ཀྱི༌ལོ༌ 6, ཏྲི༌ཞིམ༌ཅན༌ནི༌ དཱལ༌ཅིན༌ནི༌ ཀྱི༌ལོ༌ 3 དང༌ ཏྲི༌ཞིམ༌ཅན༌ནི༌ ལྡམ༌བུ༌ ཀྱི༌ལོ༌ 3,
24 ཀ༌སིའ༌ ཟེར༌ཁན༌ ཏྲི༌ཞིམ༌ཅན༌ནི༌ ཤིང༌ ཀྱི༌ལོ༌ 6 ཡང༌ ཨོ༌ལིཝ༌ཝི༌ མར༌ནག༌ ལི༌ཀྲར༌ ཞི༌། ཏེ༌གུན༌ ཏམ༌པའེ༌ ཀུར༌རི༌ ནང༌ང༌ ཏབ༌བ༌ ཀོལ༌ཁན༌ནི༌ ཚད༌ ནང༌ཞིན༌ ཡོང༌གོས༌།
25 ཏྲི༌ཞིམ༌ ཅོ༌ཁན༌ ཁས༌པ༌ མི༌ ཙོགས༌ལ༌ ཏེ༌གུན༌ སྲེས༌ཏེ༌ ཁྲུས༌ཏང༌ཅེས༌སི༌ ཏམ༌པའེ༌ མར༌ནག༌ ཅོས༌།
26 ཏེ༌བོ༌ ཡ༌ཝའ༌ ཐུག༌སའེ༌ ཀུར༌ དང༌ ཆད༌དོན༌ནི༌ སྒམ༌མི༌ཀ༌,
27 ཅོག༌ཙེ༌ དང༌ ཏེ༌ཀ༌ ཀོལ༌ཅེས༌སི༌ ཅ༌ལག༌ ཚང༌མ༌, འོད༌སྟགས༌ དང༌ ཏེ༌ཀ༌ ཀོལ༌ཅེས༌སི༌ ཅ༌ལག༌ ཚང༌མ༌ དང༌ སྤོས༌ དུག༌སའེ༌ ཆོད༌ཁྲི༌,
28 ཆོད༌པ༌ མེའ༌ སྲག༌སའེ༌ ཆོད༌ཁྲི༌ དང༌ ཏེ༌ཀ༌ ཀོལ༌ཅེས༌སི༌ ཅ༌ལག༌ ཚང༌མ༌ ཡང༌ ལག༌པ༌ ཁྲུ༌ཅེས༌སི༌ ཞོང༌པ༌ དང༌ ཏེ༌བོ༌ བོར༌ས༌ གུན༌ ཏམ༌པ༌ ཅོ༌ཅེས༌ལ༌ ཡོག༌།
29 ཁྱོ༌རང༌ངི༌ ཅ༌ལག༌ ཚང༌མ༌ ཏེ༌ཟུག༌གི༌ རྩང༌མ༌ ཅོས༌ ཏེ༌ནེ༌ ཏེ༌གུན༌ ཏེ༌ཟམ༌ ཏམ༌པ༌ གྱུར༌ཨིན༌, ཏེ༌གུན༌ལ༌ ཐུག༌ཁན༌ གུན༌ ཏམ༌པ༌ གྱུར༌ཨིན༌།”
30 “བླ༌མའེ༌ ཚུལ༌ལ༌ ངའ༌ ཞབས༌ཏོག༌ ཞུ༌ཅེས༌སི༌ ཕིའ༌ ཨ༌རོན༌ དང༌ ཁོའེ༌ བུ༌ཚ༌གུན༌ལ༌ མར༌ནག༌ ལུགས༌ཏེ༌ ཁྲུས༌ཏོང༌།
31 ཨིས༌ར༌ཨེལ༌པ༌གུན༌ལ༌ ཟེར༌, ‘འི༌ ཁྲུས༌ཏང༌ཅེས༌སི༌ ཏམ༌པའེ༌ མར༌བོ༌ ཡོང༌ཅེས༌ཅན༌ནི༌ མི༌རབས༌གུན༌ནི༌ ངའ༌ ཞབས༌ཏོག༌ ཞུ༌ཅེས༌སི༌ ནང༌ང༌ ཀོལ༌གོས༌།
32 འི༌བོ༌ ཨམ༌ མི༌ ཟུགས༌པོའ༌ ལུག༌ མ༌གོས༌ ཡང༌ ཁྱོ༌ཞའེ༌ ཏེ༌ ཚ༌མིག༌གུན༌ སྲེས༌ཏེ༌ ཏེན༌ན༌ ཙོགས༌ མར༌ ཅོ༌ མ༌གོས༌། ཏེ༌བོ༌ ཏམ༌པ༌ ཨིན༌ནོག༌ ཡང༌ ཁྱོ༌ཞེའང༌ ཏེ༌བོ༌ ཏམ༌པ༌ རྩི༌གོས༌།
33 སུ༌ཞིག༌གི༌ ཏེ༌ ཙོགས༌ ཏྲི༌ཞིམ༌མི༌ མར༌ ཅོ༌ན༌ ཡ༌ ཏེ༌བོ༌ བླ༌མ༌ མན༌ཁན༌ནི༌ མིའ༌ ཁྲུས༌ཏང༌ཅེས༌ལ༌ ཀོལ༌ན༌ ཏེ༌ མི༌བོ༌ ངའེ༌ མི༌གུན༌ནི༌ ཕྲོ༌ནེ༌ ཕིངས༌ཏོང༌།’ ”
34 ཡ༌ཝའེ༌ མོ༌ཟེས༌ལ༌ མོལས༌, “འི༌ ཏྲི༌ཞིམ༌ཅན༌ནི༌ ཚ༌མིག༌, ཡང༌ན༌ སྐྲག༌ཀྲེ༌, ཨོ༌ནའི༌ཅ༌, གལ༌བ༌ནམ༌ དང༌ ཅའང༌ མ༌དྲེས༌ཁན༌ནི༌ ཕརང༌ཀེན༌སེནས༌ གུན༌ ཁྱོང༌, ཏེ༌ ཚང༌མ༌ དྲན༌དྲའ༌ ཡོང༌གོས༌།
35 ཏྲི༌ཞིམ༌ ཅོ༌ཁན༌ ཁས༌པ༌ མི༌ ཙོགས༌ལ༌ ཏེ༌གུན༌ སྲེས༌ ཡང༌ ཚཱ༌ ཏབས༌ཏེ༌ ཏེ༌བོ༌ ལག༌མོ༌ དང༌ ཏམ༌པ༌ ཅོས༌།
36 ཏེ༌བོའེ༌ ནང༌ནེ༌ ཙ༌པིག༌ཤིག༌ ཇམ༌པོ༌ ཀྲལ༌ཏེ༌ ང༌ ཁྱོ༌རང༌ ཉམ༌པོ༌ ཐུག༌སའེ༌ ཏམ༌པ༌ ཀུར༌རི༌ ནང༌ང༌ ཆད༌དོན༌ནི༌ སྒམ༌མི༌ དུན༌ལ༌ བོར༌། ཁྱོ༌ཞའེ༌ ཏེ༌བོ༌ ཚང༌མའེ༌སང༌ ཏམ༌པ༌ རྩི༌གོས༌།
37 ཁྱོ༌ཞ༌རང༌ངི༌ ཕིའ༌ འི༌ ཙོགས༌ སྤོས༌ ཅོ༌ མ༌གོས༌། ཡ༌ཝའེ༌ ཕིའ༌ ཏེ༌བོ༌ ཏམ༌པ༌ རྩིས༌།
38 སུ༌ཞིག༌གི༌ ཏེ༌ ཙོགས༌ ཏྲི༌ཞིམ༌ ཅོས༌ཏེ༌ ཁོ༌རང༌ངི༌ ཕིའ༌ ཀོལ༌ན༌ ཁོ༌ ངའེ༌ མི༌གུན༌ནི༌ ཕྲོ༌ནེ༌ ཕིངས༌ཏོང༌།”