31
བེ༌ཟ༌ལེལ༌ དང༌ ཨོ༌ཧོ༌ལིའབ༌ ལག༌པ༌ ཁས༌པ༌གུན༌།
31:1-11
1 ཡ༌ཝའེ༌ མོ༌ཟེས༌ལ༌ མོལས༌,
2 “ངའེ༌ ཡ༌ཧུ༌དཱའེ༌ སྡེ༌ ནང༌ནེ༌ ཨུ༌རི༌ བུ༌ཚ༌, ཧུར༌རི༌ ཚ༌འོ༌ བེ༌ཟ༌ལེལ༌ ལྡམས༌ཏེ༌ ཨིན༌
3 ཡང༌ ཁོའེ༌ ནང༌ང༌ ངའེ༌ ཐུག༌ཉིད༌ སྐངས༌ཏེ༌ ཁོ༌ ཟོ༌ལས༌སི༌ རིགས༌ ཚང༌མའེ༌ ནང༌ང༌ ཁས༌པ༌, ཡང༌ ཁོའ༌ ཁྱུད༌ དང༌ རིག༌པ༌ ཏངས༌ཏེ༌ ཨིན༌།
4 སེར༌, མུལ༌ དང༌ ར༌གན༌ ཉམ༌པོ༌ མ༌ ཁས༌པ༌ རི༌མོ༌ སྲུལ༌ཁན༌,
5 ཁྲ༌རྡོའ༌ ཅད༌ཏེ༌ སེར༌རི༌ ནང༌ང༌ ཅུག༌ཅེས༌ ཡང༌ ཤིང༌ སྐོས༌ དང༌ ཟོ༌ལས༌སི༌ རིགས༌ ཚང༌མའེ༌ ནང༌ང༌ ཁས༌པ༌ ཅོས༌ཏེ༌ ཨིན༌།
6 ངའེ༌ དཱན༌ནི༌ སྡེ༌ ནང༌ནེ༌ ཨ༌ཧི༌ས༌མག༌གི༌ བུ༌ཚ༌ ཨོ༌ཧོ༌ལིའབ༌ ཁོའ༌ ཡ༌ཏོ༌ ཅོ༌ཅེས༌ལ༌ ལྡམས༌ཏེ༌ ཨིན༌, ཡང༌ ངའེ༌ བཀའ༌ ཏང༌ཁན༌ ནང༌ཞིན༌ ཅོ༌ཅེས༌ལ༌ ངའེ༌ ཞན༌ ལག༌ཤེས༌ ཚང༌མའ༌ ཁས༌པ༌ ལས༌ ཅོ༌ཅེས༌སི༌ ཁྱུད༌ ཏངས༌ཏེ༌ ཨིན༌།
7 ཡ༌ཝའ༌ ཐུག༌སའེ༌ ཀུར༌, ཆད༌དོན༌ནི༌ སྒམ༌ དང༌ ཏེ༌བོ༌ ཀབས༌ཁན༌ནི༌ ཐུག༌རྗེ༌ ཁའ༌ལེབ༌ ཡང༌ ཀུར༌རི༌ ནང༌ཀུག༌ག༌ ཡོད༌ཁན༌ནི༌ ཅ༌ལག༌ ཚང༌མ༌ ངའེ༌ བཀའ༌ ཏང༌ཁན༌ ནང༌ཞིན༌ ཅོ༌གོས༌:
8 ཡང༌ན༌ ཅོག༌ཙེ༌ དང༌ ཏེ༌ཀ༌ ཀོལ༌ཁན༌ ཚང༌མ༌, ཅའང༌ མ༌དྲེས༌ཁན༌ནི༌ སེར༌རི༌ འོད༌སྟགས༌ དང༌ ཏེ༌ཀ༌ ཀོལ༌ཅེས༌སི༌ ཅ༌ལག༌ ཚང༌མ༌, སྤོས༌ དུག༌ཅེས༌སི༌ ཆོད༌ཁྲི༌,
9 ཆོད༌པ༌ མེའ༌ སྲག༌ཅེས༌སི༌ ཆོད༌ཁྲི༌ དང༌ ཏེ༌ཀ༌ ཀོལ༌ཅེས༌སི༌ ཅ༌ལག༌ ཚང༌མ༌, ཡང༌ ལག༌པ༌ ཁྲུ༌ཅེས༌སི༌ ཞོང༌པ༌ དང༌ ཏེ༌བོ༌ བོར༌ས༌,
10 ཀོས༌ལག༌ ཙེམས༌ཁན༌ ལྡེ༌མོ༌གུན༌ ཡང༌ན༌ ཨ༌རོན༌ བླ༌མའེ༌ ཕིའ༌ ཏམ༌པ༌ ཀོས༌ལག༌ དང༌ ཁོའེ༌ བུ༌ཚ༌གུན༌ནི༌ བླ༌མའེ༌ ཚུལ༌ལ༌ ཞབས༌ཏོག༌ ཞུ༌ ཟ༌ནེ༌ གོན༌ཅེས༌སི༌ ཀོས༌ལག༌གུན༌,
11 ཏམ༌པ༌ ནས༌སའེ༌ ཕིའ༌ ཁྲུས༌ཏང༌ཅེས༌སི༌ མར༌ནག༌ དང༌ ཏྲི༌ཞིམ༌ཅན༌ནི༌ སྤོས༌། འི༌ ཚང༌མ༌ ངའེ༌ བཀའ༌ ཏང༌ཁན༌ ནང༌ཞིན༌ ཅོ༌གོས༌།”
ཤབ༌བད༌དི༌ ངལ༌ཚོའེ༌ ཞག༌།
31:12-18
12 ཡ༌ཝའེ༌ མོ༌ཟེས༌ལ༌ མོལས༌,
13 “ཨིས༌ར༌ཨེལ༌པ༌གུན༌ལ༌ ཟེར༌, ‘ཁྱོ༌ཞའེ༌ ངའེ༌ ཤབ༌བད༌, ངལ༌ཚོའེ༌ ཞག༌པོ༌ སྲུང༌གོས༌། ཡོང༌ཅེས༌ཅན༌ནི༌ མི༌རབས༌གུན༌ནི༌ ཕིའ༌ འི༌བོ༌ ཁྱོ༌ཞའ༌ དང༌ ངའེ༌ པར༌ལ༌ སྟགས༌ཤིག༌ ཨིན༌, ཏེ༌ནེ༌ ང༌ ཡ༌ཝའེ༌ ཁྱོ༌ཞའ༌ ཏམ༌པ༌ ཅོ༌ཅེས༌པོ༌ ཁྱོ༌ཞའེ༌ ཤེས༌ཨིན༌།’ ”
14 “ཁྱོ༌ཞའེ༌ ཤབ༌བད༌དི༌ ངལ༌ཚོའེ༌ ཞག༌ སྲུང༌གོས༌ ཅིའ༌ཟེར༌ན༌ ཏེ༌ ཞག༌པོ༌ ཁྱོ༌ཞའེ༌ ཕིའ༌ ཏམ༌པ༌ ཨིན༌། ཏེ༌ ཞག༌པོ༌ ཏམ༌པ༌ མ༌རྩི༌ཁན༌ནི༌ མི༌བོ༌ སད༌གོས༌, ཡང༌ ཏེ༌ ཞག༌ག༌ ལས༌ ཅོ༌ཁན༌གུན༌ ངའེ༌ མི༌གུན༌ནི༌ ཕྲོ༌ནེ༌ ཕིང༌གོས༌།
15 ཞག༌ དྲུག༌ ཁྱོ༌ཞ༌གུན༌ནི༌ ལས༌ ཅོས༌ ཨིན༌ནའང༌ ཞག༌ རྡུན༌པ༌བོ༌ ཡ༌ཝའེ༌ ཕིའ༌ ཏམ༌པ༌, ཤབ༌བད༌ ངལ༌ཚོའེ༌ ཞག༌ ཨིན༌། ཏེ༌ ཞག༌ག༌ ལས༌ ཅོ༌ཁན༌ནི༌ མི༌བོ༌ སད༌གོས༌།
16 ཨིས༌ར༌ཨེལ༌པ༌གུན༌ནི༌ མི༌རབས༌ནེ༌ མི༌རབས༌ འི༌ ཤབ༌བད༌དི༌ ཞག༌པོ༌ སྲུང༌གོས༌། འི༌ ཆད༌དོན༌བོ༌ ཁྱོ༌ཞའེ༌ ཏུས༌གྱུན༌ བོར༌གོས༌།
17 འི༌བོ༌ ཨིས༌ར༌ཨེལ༌པ༌གུན༌ དང༌ ངའེ༌ པར༌ལ༌ ཏུས༌གྱུན༌ ལུས༌ཤེས༌ཅན༌ནི༌ སྟགས༌ཤིག༌ ཨིན༌ ཅིའ༌ཟེར༌ན༌ ང༌ ཡ༌ཝའེ༌ ཞག༌པོ༌ དྲུག༌གི༌ ནང༌ང༌ ནམ༌ཁའ༌ དང༌ ཇིག༌རྟེན༌ ཅོས༌པིན༌, ཡང༌ ཞག༌ རྡུན༌པའེ༌ ཞག༌ག༌ ལས༌ མ༌ཅོའ༌ ངལ༌ཚོས༌པ༌ ངའེ༌ ནང༌ང༌ ཡང༌སྐྱར༌ སྟོབས༌ སོ༌མའེ༌ གང༌།”
18 ཡ༌ཝའེ༌ སི༌ནཱའི༌ རི༌ཀ༌ མོ༌ཟེས༌ ཉམ༌པོ༌ ཞལ༌ཏ༌ སལ༌ ཚར༌ར༌ཅིག༌, ཁོང༌ངི༌ ཁོའ༌ རྡོའ༌ ལེབ༌ལེབ༌ ཉིས༌ སལས༌ ཀ༌བོའེ༌ཀ༌ ཡ༌ཝ༌ ཁོང༌རང༌ངི༌ ཆག༌ ཉམ༌པོ༌ བཀའ༌རྒྱ༌གུན༌ བྲིའ༌ ཛད༌ཏེ༌ ཡོད༌པིན༌།