32
སེར༌རི༌ བེ༌ཙོ༌།
32:1-33:11
1 མོ༌ཟེས༌ རི༌ ཀ༌ནེ༌ ལོགས༌ཏེ༌ ཡོང༌ང༌ ཏུས༌ མང༌པོ༌ གོར༌པ༌ མི༌གུན༌ ཨ༌རོན༌ ཡོད༌ས༌ ཛོམས༌ཏེ༌ ཟེརས༌, “ཡོང༌, ང༌དང༌གུན༌ལ༌ ལམ༌སྟན༌ཁན༌ནི༌ ལྷ༌ལྷ༌མོ༌གུན༌ ཅོས༌། ཏེ༌ མི༌ མོ༌ཟེས༌, ང༌དང༌ ཨི༌ཇིབ༌ནེ༌ ཕིང༌ཏེ༌ ཁྱོང༌ཁན༌བོའ༌ ཅི༌ སོང༌ ང༌ཞའ༌ གྱུས༌མེད༌།”
2 ཨ༌རོན༌ནི༌ ཁོང༌གུན༌ལ༌ ཟེརས༌, “ཁྱོ༌ཞའེ༌ ན༌མ༌གུན༌, བུ༌ཚ༌གུན༌ དང༌ བུ༌མོ༌གུན༌ནི༌ ནམ༌ཅོག༌གི༌ སེར༌རི༌ ཨ༌ལོང༌གུན༌ ཕུད༌ཏེ༌ ངའ༌ ཁྱོང༌།”
3 ཏེ༌ནེ༌ མི༌ ཚང༌མའེ༌ ནམ༌ཅོག༌གི༌ སེར༌རི༌ ཨ༌ལོང༌གུན༌ ཕུད༌ཏེ༌ ཨ༌རོན༌ནི༌ཀ༌ ཁྱོངས༌།
4 ཁོའེ༌ ཁྱོང༌ཁན༌ནི༌ སེར༌གུན༌ ཞུ༌ ཅུགས༌ཏེ༌ བེ༌ཙོའེ༌ ཟོས༌ཏའེ༌ པར༌རི༌ ནང༌ང༌ ལུགས༌ཏེ༌ སྐུན༌དྲ༌ ཞིག༌ ཅོས༌། ཏེ༌ནེ༌ མི༌གུན༌ནི༌ ཟེརས༌, “ཨིས༌ར༌ཨེལ༌པ༌གུན༌, འི༌བོ༌ ང༌དང༌གུན༌ ཨི༌ཇིབ༌བི༌ ཡུལ༌ནེ༌ ཕིངས༌ཏེ༌ ཁྱོང༌ཁན༌ནི༌ དཀོན༌མཆོག༌ ཨིན༌ནོག༌།”
5 ཨ༌རོན༌ནི༌ ཏེ༌བོ༌ ཐོང༌ང༌ཅིག༌ སེར༌རི༌ བེ༌ཙོའེ༌ དུན༌ལ༌ ཆོད༌ཁྲི༌ཞིག༌ རྩིགས༌ཏེ༌ ཟེརས༌, “ཐོ༌རེ༌ ཡ༌ཝའ༌ རྩི༌ཝ༌ ཕུལ༌ཅེས༌སི༌ ཕིའ༌ གའ༌སྟོན༌ རྩི༌ཨིན༌།”
6 ཐོ༌རེ༌ ཟུག༌པོ༌ ང༌ཏོག༌ནེ༌ མི༌གུན༌ནི༌ མེའ༌ སྲག༌ཁན༌ནི༌ ཆོད༌པ༌ དང༌ ཞི༌དེ༌ ཆོད༌པ༌ གུན༌ ཕུལས༌། མི༌གུན༌ ཟའ༌ཅེས༌ དང༌ ཆང༌ ཐུང༌ཅེས༌ལ༌ སའེ༌ཀ༌ དུགས༌ ཡང༌ ལངས༌ཏེ༌ སྕོད༌པ༌ ངན༌པ༌ དང༌ ཁྲེལ༌མེད༌དི༌ ལས༌ ཅོ༌ཅེས༌ གོ༌ཟུག༌།
7 ཡ༌ཝའེ༌ མོ༌ཟེས༌ལ༌ མོལས༌, “དག༌ས༌རང༌ ཡོག༌ག༌ བབས༌ཏེ༌ སོང༌ ཅིའ༌ཟེར༌ན༌ ཁྱོ༌རང༌ངི༌ ཨི༌ཇིབ༌ནེ༌ ཕིངས༌ཏེ༌ ཁྱོང༌ཁན༌ནི༌ མི༌གུན༌ ངན༌པ༌ གྱུར༌ཏེ༌ སྡིག༌པ༌ ཅོ༌རུག༌།
8 ཁོང༌གུན༌ནི༌ ངའེ༌ བཀའ༌ ཏང༌ཁན༌བོ༌ འི༌ཟམ༌ གྱོགས༌པ༌ རྗེད༌ཏེ༌ ཁོ༌རང༌གུན༌ནི༌ ཕིའ༌ བེ༌ཙོའེ༌ ཟོས༌ཏེ༌ ནང༌ང༌ སེར༌རི༌ སྐུན༌དྲ༌ ཅོས༌ཏེ༌ ཅོལ༌དུག༌ ཡང༌ ཏེ༌བོའ༌ ཆོད༌པ༌ ཕུལ༌ཏེ༌ ‘འི༌བོ༌ ང༌དང༌གུན༌ ཨི༌ཇིབ༌ནེ༌ ཕིངས༌ཏེ༌ ཁྱོང༌ཁན༌ནི༌ དཀོན༌མཆོག༌ ཨིན༌’ ཟེར༌དུག༌།”
9 ཏེ༌ནེ༌ ཡ༌ཝའེ༌ མོ༌ཟེས༌ལ༌ མོལས༌, “འི༌ མི༌གུན༌ནི༌ སྙིང༌ ཙམ༌ཤིག༌གི༌ སྐྱོང༌པོ༌ ཨིན༌ཁན༌བོ༌ ངའེ༌ ཐོང༌།
10 ཏ༌ ངའེ༌ དུན༌ནེ༌ སོང༌, ང༌ ཁོང༌གུན༌ནི༌ཀ༌ སྲོ༌ སྲན༌ཏྲེ༌ ཡོང༌ཏེ༌ རག༌, ངའེ༌ ཁོང༌གུན༌ མེད༌ཁན༌ ཅོ༌ཨིན༌། ཏེ༌ནེ༌ ངའེ༌ ཁྱོ༌རང༌ངི༌ པུར༌གྱུད༌གུན༌ གྱལ༌ཁམས༌ ཀྲག༌པོ༌ ཞིག༌ གྱུར༌ཅུག༌ཨིན༌།”
11 ཨིན༌ནའང༌ མོ༌ཟེས༌སི༌ ཁོ༌རང༌ངི༌ དཀོན༌མཆོག༌ ཡ༌ཝའེ༌ ཐུགས༌སྲོ༌ ཞུ༌ཅུག༌ཅེས༌སི༌ རྩོན༌གྲུས༌ ཅོས༌ཏེ༌ ཟེརས༌, “ཡ༌ཝ༌ལེ༌, ཉེ༌རང༌ངི༌ སྟོབས༌ དང༌ ཝང༌ ཀྲག༌པོ༌ ཉམ༌པོ༌ ཨི༌ཇིབ༌ནེ༌ ཕིངས༌ཏེ༌ ཁྱོང༌ང༌ ཛད༌ཁན༌ནི༌ ཉེ༌རང༌ངི༌ མི༌གུན༌ནི༌ཀ༌ ཅིའ༌ ཐུགས༌སྲོ༌ སྐྱོད༌དད༌?
12 ཅིའ༌ ཨི༌ཇིབ༌པ༌གུན༌ལ༌ ཟེར༌ཅུག༌ག༌ ཛད༌དད༌, ‘ངན༌པ༌ ཐབས༌ ཅོས༌ཏེ༌ ཁོའེ༌ ཁོ༌རང༌ངི༌ མི༌གུན༌ ཨི༌ཇིབ༌ནེ༌ ཕིང༌ཏེ༌ རི༌སྟོང༌ངི༌ ནང༌ང༌ སད༌ཏེ༌ མེད༌ཁན༌ ཅོའ༌ལ༌ ཁྱེར༌ཏེ༌ ཨིན༌ནོག༌?’ ཇུ༌ཇུ༌ ཐུགས༌སྲོ༌ སྐྱོད༌ད༌ མ༌ཛད༌། ཉེ༌རང༌ངི༌ ཐུགས༌སམ༌ གྱུར༌ར༌ ཛད༌ཏེ༌ ཉེ༌རང༌ངི༌ མི༌གུན༌ལ༌ ཆད༌པ༌ སལ༌ལ༌ མ༌ཛད༌།
13 ཉེ༌རང༌ངི༌ ཞབས༌ཏོག༌པ༌ ཨབ༌ར༌ཧམ༌, ཨི༌སཱག༌, དང༌ ཡ༌ཀོབ༌ གུན༌ལ༌ ཞལ༌ཆད༌ དང༌ ནའ༌ ཁུར༌ར༌ ཛད༌ཏེ༌, ‘ཁྱོ༌ཞའེ༌ མིར༌གྱུད༌ ནམ༌ཁའེ༌ སྐར༌མ༌ ཙོགས༌ མང༌པོ༌ ཡང༌ འི༌ ས༌ཀྱད༌ ཚང༌མ༌ ཁྱོ༌ཞའེ༌ པུར༌གྱུད༌གུན༌ལ༌ སལ༌ལ༌ ཛད༌ཏེ༌ ཏུས༌གྱུན༌ནི༌ ཕིའ༌ ཁོང༌གུན༌ནི༌ ནོར༌སྐལ༌ གྱུར༌ཨིན༌’ མོལ༌ཁན༌བོ༌ ཨིད༌ཏུ༌ ཛད༌།”
14 ཏེ༌ནེ༌ ཡ༌ཝའེ༌ ཁོང༌རང༌ངི༌ ཐུགས༌སམ༌ གྱུར༌ར༌ ཛད༌ཏེ༌ ཁོང༌རང༌ངི༌ མི༌གུན༌ལ༌ ཇིགས༌ནང༌ཅན༌ནི༌ ཆད༌པ༌ སལ༌ཨིན༌ མོལ༌ཁན༌བོ༌ ཅོའ༌ མ༌ཛདས༌།
15 མོ༌ཟེས༌སི༌ བཀའ༌རྒྱ༌ བྲིའ༌ཛད༌ཁན༌ནི༌ རྡོའེ༌ ལེབ༌ལེབ༌ ཉིས༌ཀོ༌ ལག༌པའེ༌ ནང༌ང༌ ཁུར༌ཏེ༌ རི༌ནེ༌ བབས༌ཏེ༌ ཡོངས༌། ཏེ༌གུན༌ནི༌ དུན༌ དང༌ གྱབ༌ ཉིས༌ཀོའེ༌ཀ༌ བྲིའ༌ཛད༌ཏེ༌ ཡོད༌པིན༌།
16 རྡོའ༌ ལེབ༌ལེབ༌ གུན༌ དཀོན༌མཆོག༌གི༌ ཆག༌ལས༌ ཡང༌ བྲིའ༌ ཛད༌ཁན༌བོ༌ དཀོན༌མཆོག༌གི༌ ཆག༌བྲིས༌ རྡོའེ༌ཀ༌ སྐོའ༌ ཛད༌ཏེ༌ ཨིན༌པིན༌།
17 ཡོ༌ཤུའ༌ མི༌གུན༌ནི༌ ཀུ༌ཅོ༌ ཏང༌ཨིན༌ ཚོར༌ར༌ཅིག༌ ཁོའེ༌ མོ༌ཟེས༌ལ༌ ཟེརས༌, “ཀུར༌ ཙུགས༌ཏེ༌ ཡོད༌ས༌ནེ༌ མག༌གི༌ སྐད༌ ཚོར༌ར༌རག༌།”
18 མོ༌ཟེས༌སི༌ ལན༌ཏངས༌, “འི༌བོ༌ གྱལ༌ཁའ༌ ཐོབ༌ཁན༌ནི༌ ཡ༌ མག༌ ཕམས༌ཁན༌ནི༌ སྐད༌ མ༌ནོག༌། ངའེ༌ ཚོར༌ཁན༌བོ༌ ནི༌ ལུ༌ ཏང༌ཁན༌ནི༌ སྐད༌ ཨིན༌རག༌།”
19 མོ༌ཟེས༌ ཀུར༌ ཙུགས༌ཏེ༌ ཡོད༌སའེ༌ ཉེ༌མོའ༌ ལེབས༌ཏེ༌ བེ༌ཙོའེ༌ སྐུན༌དྲ༌ དང༌ མི༌གུན༌ རྩེའ༌ ཐོང༌པ༌ ཁོའ༌ སྲོ༌ སྲན༌ཏྲེ༌ ཡོངས༌ ཡང༌ ལག༌པའེ༌ ནང༌ང༌ ཁུར༌ཏེ༌ ཡོད༌ཁན༌ནི༌ རྡོའ༌ ལེབ༌ལེབ༌གུན༌ རི༌ ཀ༌ནེ༌ ཡོག༌ག༌ གྱབས༌ ཏངས༌ ཡང༌ ཏེ༌གུན༌ ཆག༌།
20 ཏེ༌ནེ༌ ཁོའེ༌ བེ༌ཙོའེ༌ སྐུན༌དྲ༌ མེ༌ ནང༌ང༌ ཕངས༌ཏེ༌ ཞུ༌ ཅུགས༌། སྟིང༌ནེ༌ ཏེ༌བོ༌ ཐགས༌ཏེ༌ ཆུའི༌ ནང༌ང༌ སྲེས༌ ཡང༌ ཨིས༌ར༌ཨེལ༌པ༌གུན༌ལ༌ ཐུང༌ཅུགས༌།
21 ཁོའེ༌ ཨ༌རོན༌ལ༌ ཟེརས༌, “ཁྱོ༌རང༌ངི༌ འི༌ མི༌གུན༌ལ༌ འི༌ཟམ༌ ངན༌པ༌ སྡིག༌པ༌ ཅོ༌ཅུགས༌ཏེ༌ ཁོང༌གུན༌ནི༌ ཁྱོ༌རང༌ང༌ ཅི༌ ཅོས༌?”
22 ཨ༌རོན༌ནི༌ ལན༌ཏངས༌, “ངའེ༌ཀ༌ སྲོ༌ མ༌ཡོང༌། འི༌ མི༌གུན༌ལ༌ ཏུས༌གྱུན༌ ངན༌པ༌ ཅོ༌ཅེས༌སི༌ དོད༌པ༌ ཡོད༌ཁན༌བོ༌ ཁྱོ༌རང༌ང༌ གྱུས༌ཨིན༌ནོག༌།
23 ཁོང༌གུན༌ནི༌ ང༌ ཟེར༌ར༌རག༌, ‘ང༌དང༌གུན༌ལ༌ ལམ༌སྟན༌ཁན༌ནི༌ དཀོན༌མཆོག༌ ཤིག༌ ཅོས༌། ཏེ༌ མི༌ མོ༌ཟེས༌, ང༌དང༌ ཨི༌ཇིབ༌ནེ༌ ཕིང༌ཏེ༌ ཁྱོང༌ཁན༌བོའ༌ ཅི༌ སོང༌ ང༌ཞའ༌ གྱུས༌མེད༌།’
24 ཏེ༌ནེ༌ ངའེ༌ ཁོང༌གུན༌ལ༌ ཟེར༌པིན༌, ‘ཁྱོ༌རང༌གུན༌ནི༌ སེར༌རི༌ གྱན༌ཆ༌གུན༌ ཕུད༌ཏེ༌ ཁྱོང༌’ ཡང༌ ཁོང༌གུན༌ནི༌ ཁྱོང༌ཁན༌ ཚང༌མ༌ ངའེ༌ མེའེ༌ ནང༌ང༌ ཕངས༌པ༌ འི༌ སེར༌རི༌ བེ༌ཙོ༌བོ༌ བིང༌།”
25 ཨ༌རོན༌ལ༌ མི༌གུན༌ ཅུན༌ མ༌ཉན༌ན༌ ཉོན༌བ༌ ཙོགས༌, གྲ༌འོ༌གུན༌ནི༌ ཕིའ༌ སྟན༌མོ༌ གྱུར༌ཏེ༌ ཡོད༌ཁན༌བོ༌ མོ༌ཟེས༌ལ༌ ཐོང༌།
26 ཏེ༌བོའེ༌ཕིའ༌ ཁོ༌ ཁོང༌གུན༌ ཚུགས༌ཏེ༌ ཡོད༌སའེ༌ སྒོའེ༌ཀ༌ ལངས༌ཏེ༌ ཟེརས༌, “ཡ༌ཝའེ༌ ཆོགས༌ལ༌ ཨིན༌ཁན༌གུན༌ ང༌ ཡོད༌ས༌ ཡོང༌” ཡང༌ ལི༌ཝི༌པ༌ ཚང༌མ༌ ཁོ༌ ཡོད༌ས༌ ཛོམ༌།
27 ཏེ༌ནེ༌ ཁོའེ༌ ཁོང༌གུན༌ལ༌ ཟེརས༌, “ཡ༌ཝ༌ ཨིས༌ར༌ཨེལ༌པའེ༌ དཀོན༌མཆོག༌གི༌ མོལས༌, ‘ཁྱོ༌ཞ༌ རེ༌རེ༌ ར༌འི༌གུན༌ ལྡོའ༌ ཏགས༌ཏེ༌ ང༌དང༌ ཚུགས༌ཏེ༌ ཡོད༌སའེ༌ གོ༌ནེ༌ ཇུག༌ ཚག༌པ༌ སོང༌ཏེ༌ རང༌ངི༌ སྤུན༌, ཛ༌འོ༌ དང༌ ཁྱིམ༌ཚེས༌ གུན༌ སོད༌།’ ”
28 ལི༌ཝི༌པ༌གུན༌ནི༌ མོ༌ཟེས༌སི༌ བཀའ༌ ཏང༌ཁན༌བོ༌ ཅོས༌ ཡང༌ ཏེ༌ ཞག༌ག༌ མི༌ ཧ༌ལམ༌ སྟོང༌སུམ༌ ཤི༌།
29 མོ༌ཟེས༌སི༌ ལི༌ཝི༌པ༌གུན༌ལ༌ ཟེརས༌, “དི༌རིང༌ ཁྱོ༌རང༌གུན༌ནི༌ ཁྱོ༌ཞ༌རང༌ ཡ༌ཝའེ༌ ཞབས༌ཏོགས༌སི༌ འོས༌པ༌ ཅོས༌ཏེ༌ ཨིན༌ནོག༌ ཅིའ༌ཟེར༌ན༌ ཁྱོ༌ཞ༌གུན༌ནི༌ རང༌ངི༌ བུ༌ཚ༌གུན༌ དང༌ སྤུན༌ལ༌གུན༌ སདས༌ ཡང༌ ཡ༌ཝའེ༌ ཁྱོ༌ཞ༌གུན༌ལ༌ དི༌རིང༌ ཅིན༌ལབས༌ སལས༌།”
30 སྟིང༌མ༌ཞག༌པོ༌ མོ༌ཟེས༌སི༌ མི༌གུན༌ལ༌ ཟེརས༌, “ཁྱོ༌ཞ༌གུན༌ནི༌ སྡིག༌པ༌ ཆེན༌མོ༌ ཅོས༌ཏེ༌ ཨིན༌ནོག༌། ཨིན༌ནའང༌ ང༌ རི༌ཀ༌ ཡ༌ཝ༌ ཡོད༌ས༌ ཤགས༌པ༌ ཞུའ༌ ཆེན༌, ཅི༌གྱུས༌ ཁོང༌ངི༌ ཐུགས༌སམ༌ གྱུར༌ཏེ༌ ཁྱོ༌ཞའེ༌ སྡིག༌པ༌ ཤགས༌པ༌ སལ༌སྲིད༌ཅེས༌ ཨིན༌ནོག༌།”
31 ཏེ༌ནེ༌ མོ༌ཟེས༌ རི༌ཀ༌ ཡ༌ཝ༌ ཡོད༌ས༌ ལོགས༌ཏེ༌ སོང༌ ཡང༌ ཟེརས༌, “འི༌ མི༌གུན༌ནི༌ སེར༌རི༌ སྐུན༌དྲ༌ ཅོས༌ ཡང༌ ཏེ༌བོའ༌ ཅོལ༌ཏེ༌ སྡིག༌པ༌ ཆེན༌མོ༌ ཅོས༌ཏེ༌ ཨིན༌ནོག༌།
32 ཇུ༌ཇུ༌ ཁོང༌གུན༌ནི༌ སྡིག༌པ༌ ཤགས༌པ༌ སལ༌ལ༌ ཛད༌། ཨིན༌ནའང༌ མ༌ སལ༌ན༌ ཏེ༌ནེ༌ ཉེ༌རང༌ངི༌ མི༌གུན༌ནི༌ མིང༌ བྲིའ༌ ཛད༌ཁན༌ནི༌ སྤེ༌ཆའེ༌ ནང༌ནེ༌ ངའེ༌ མིང༌ ཐེན༌ན༌ ཛད༌།”
33 ཡ༌ཝའེ༌ ལན༌སལས༌, “ངའེ༌ གྱབ༌གལ༌ལ༌ སྡིག༌པ༌ ཅོ༌ཁན༌གུན༌ནི༌ མིང༌ ངའེ༌ སྤེ༌ཆའེ༌ ནང༌ནེ༌ ཐེན༌ཨིན༌།
34 ཏ༌ སོང༌ ཡང༌ མི༌གུན༌ ངའེ༌ ཤད༌ཁན༌ནི༌ ནས༌སའེ༌ ནང༌ང༌ ཁྲིད༌ ཡང༌ ངའེ༌ ཕོ༌ཉ༌ ཁྱོ༌རང༌ངི༌ སྔུན༌ལ༌ ཆེན༌། ཨིན༌ནའང༌ ཏུས༌པོ༌ ལེབ༌བ༌ཅིག༌ ངའེ༌ ཁོང༌གུན༌ནི༌ སྡིག༌པ༌ ཅོ༌ཁན༌བོའ༌ ཆད༌པ༌ ཏང༌ཨིན༌།”
35 ཡང༌ ཡ༌ཝའེ༌ མ༌ སད༌ཁན༌ནི༌ མི༌གུན༌ལ༌ ནད༌ རྩོག༌པོ༌ ཡོང༌ ཅུག༌ག༌ ཛདས༌ ཅིའ༌ཟེར༌ན༌ ཁོང༌གུན༌ནི༌ ཨ༌རོན༌ལ༌ སེར༌རི༌ བེ༌ཙོའེ༌ སྐུན༌དྲ༌ ཅོ༌ཅུགས༌ཏེ༌ ཨིན༌པིན༌།