33
1 ཡ༌ཝའེ༌ མོ༌ཟེས༌ལ༌ མོལས༌, “ཁྱོ༌རང༌ དང༌ ཁྱོ༌རང༌ངི༌ ཨི༌ཇིབ༌ནེ༌ ཕིངས༌ཏེ༌ ཁྱོང༌ཁན༌ ཚང༌མ༌ འི༌ ས༌ཆ༌ནེ༌ བིང༌ཏེ༌ ངའེ༌ ཨབ༌ར༌ཧམ༌, ཨི༌སཱག༌, ཡ༌ཀོབ༌ གུན༌ལ༌ ‘ངའེ༌ ཁྱོ༌རང༌ངི༌ པུར༌གྱུད༌གུན༌ལ༌ ཏེ༌བོ༌ ཏང༌ཨིན༌’ ཟེར༌ཏེ༌ ཁ༌ཆད༌ ཅོ༌ཁན༌ནི༌ ས༌ཆ༌བོའ༌ སོང༌།
2 ངའེ༌ ཁྱོ༌རང༌ངི༌ སང༌ སྔུན༌ལ༌ ཕོ༌ཉ༌ ལམ༌ཅུགས༌ཏེ༌ ཀེ༌ནན༌པ༌, ཨ༌མོར༌པ༌, ཧེད༌པ༌, པེ༌རིཟ༌པ༌, ཧིཝ༌པ༌ ཡང༌ ཡེ༌བས༌པ༌ གུན༌ ཕིང༌ཨིན༌།
3 ཁྱོ༌ཞ༌གུན༌ འོ༌མ༌ དང༌ རང༌རྩི༌ གྱུག༌སའེ༌ ས༌ཆ༌ སོང༌། ཨིན༌ནའང༌ ང༌ ཁྱོ༌ཞ༌གུན༌ ཉམ༌པོ༌ མི༌ཡོང༌, ཁྱོ༌ཞ༌གུན༌ མི༌ མ༌སྐྱོང༌པོ༌ ཨིན༌ པ༌སང༌ ངའེ༌ ལམ༌བར༌ལ༌ ཁྱོ༌ཞའ༌ མེད༌ཁན༌ ཅོ༌སྲིད༌ཅེས༌ ཨིན༌ནོག༌།”
4 མི༌གུན༌ནི༌ ཏེ༌ སྤེ༌ར༌ སྐྱོང༌པོ༌ ཚོར༌ར༌ཅིག༌ ཁོང༌གུན༌ནི༌ ཉ༌ངན༌ ཅོས༌ཏེ༌ གྱན༌ཆ༌གུན༌ མ༌ཏགས༌
5 ཅིའ༌ཟེར༌ན༌ ཡ༌ཝའེ༌ མོ༌ཟེས༌ལ༌ མོལ༌ཏེ༌ ཨིན༌པིན༌, “ཨིས༌ར༌ཨེལ༌པ༌གུན༌ལ༌ ཟེར༌, ‘ཁྱོ༌ཞ༌གུན༌ མི༌ མ༌སྐྱོང༌པོ༌ ཨིན༌ནོག༌། ཀལ༌ཏེས༌ ང༌ ཁྱོ༌རང༌གུན༌ ཉམ༌པོ༌ ཏུས༌ ཙ༌པིག༌ཤིག༌གི༌ ཕིའ༌ ཆ༌ནའང༌ ངའེ༌ ཁྱོ༌ཞ༌གུན༌ མེད༌ཁན༌ ཅོ༌སྲིད༌ཅེས༌ ཨིན༌ནོག༌། ཏ༌ ཁྱོ༌ཞ༌གུན༌ནི༌ གྱན༌ཆ༌གུན༌ ཕུད༌ ཡང༌ ཁྱོ༌རང༌གུན༌ ཉམ༌པོ༌ ཅི༌ ཅོ༌གོ༌ཤེས༌པོ༌ ངའེ༌ ཐག༌ཅད༌ཨིན༌།’ ”
6 ཏེན༌ན༌བོའེ༌ཕིའ༌ སི༌ནཱའི༌ རི༌ཀ༌ ཨིས༌ར༌ཨེལ༌པ༌གུན༌ནི༌ གྱན༌ཆ༌གུན༌ ཕུད༌ཏེ༌ ཡང༌སྐྱར༌ མ༌ནེ༌ མ༌ཏགས༌།
7 ཏུས༌གྱུན༌ མོ༌ཟེས༌སི༌ ཀུར༌ ཙུགས༌ཏེ༌ དུག༌སའེ༌ ས༌ཆའེ༌ བན༌ཤིག༌ ཐག༌རིང༌ང༌ ཀུར༌ཞིག༌ ཙུགས༌ཏེ༌ ཏེ༌བོའ༌ ཡ༌ཝའ༌ ཐུག༌སའེ༌ ཀུར༌ ཟེར༌རད༌པིན༌། ཡང༌ ཡ༌ཝའ༌ ཏྲི༌ཝ༌ ཏྲི༌ཉིན༌ ཡོད༌ཁན༌གུན༌ ཀུར༌ ཙུགས༌ཏེ༌ ཡོད༌སའེ༌ ཕི༌ལོག༌ག༌ ཏམ༌པ༌ ཀུར༌རི༌ཀ༌ ཆའད༌པིན༌།
8 མོ༌ཟེས༌ ཏེ༌ ཀུར༌རི༌ ནང༌ང༌ ཆ༌ ཟ༌ནེ༌ མི༌གུན༌ རང༌རང༌ངི༌ ཀུར༌རི༌ སྒོའེ༌ཀ༌ ལངས༌ཏེ༌ མོ༌ཟེས༌ ཏེ༌ནང༌ཀུག༌ག༌ ཞུགས༌ ཞུགས༌ ཚོག༌པ༌ ལྟའད༌པིན༌།
9 མོ༌ཟེས༌ ཏེ༌ནང༌ང༌ ཞུགས༌ ཚར༌ར༌ཅིག༌ སྲིན༌ནི༌ ཀ༌ཝ༌ བབས༌ཏེ༌ ཀུར༌རི༌ སྒོའེ༌ཀ༌ དུག༌གད༌པིན༌ ཡང༌ ཡ༌ཝའེ༌ མོ༌ཟེས༌ལ༌ ཞལ༌ཏ༌ སལ༌ལད༌པིན༌།
10 མི༌གུན༌ནི༌ ཀུར༌རི༌ སྒོའེ༌ཀ༌ སྲིན༌ནི༌ ཀ༌ཝ༌ ཐོང༌ང༌ཅིག༌ ཁོང༌ ཚང༌མའེ༌ རང༌རང༌ངི༌ ཀུར༌རི༌ སྒོའེ༌ དུན༌ལ༌ ཆག༌ཕུལ༌ཏེ༌ ཡ༌ཝའ༌ ཅོལ༌ལད༌པིན༌།
11 ཛ༌འོ༌ དུན༌ལ༌ ཡོད༌ཏེ༌ སྤེ༌ར༌ ཏང༌ཁན༌ ཙོགས༌ལ༌ ཡ༌ཝའེ༌ མོ༌ཟེས༌ ཉམ༌པོ༌ ཞལ༌ཏ༌ སལ༌ལད༌པིན༌། ཏེ༌ སྟིང༌ནེ༌ མོ༌ཟེས༌ ཞན༌ ཀུར༌གུན༌ ཙུགས༌ཏེ༌ ཡོད༌སའ༌ ལོགས༌ཏེ༌ ཡོང༌ངད༌པིན༌, ཨིན༌ནའང༌ ཁོའ༌ རོགས༌ཅོ༌ཁན༌ ཡོ༌ཤུའ༌ ནུན༌ནི༌ བུ༌ཚ༌ ཡ༌ཝ༌ ཐུག༌སའེ༌ ཀུར༌རི༌ ནང༌ནེ༌ བིངས༌ཏེ༌ མ༌ཡོངས༌།
མོ༌ཟེས༌སི༌ ཡ༌ཝའེ༌ ཟིར༌རྗིད༌ ཇལ༌།
33:12-23
12 མོ༌ཟེས༌སི༌ ཡ༌ཝའ༌ ཟེརས༌, “ཉེ༌རང༌ངི༌ ངའ༌ མོལས༌, ‘འི༌ མི༌གུན༌ ངའེ༌ ཁ༌ཆད༌ ཅོ༌ཁན༌ནི༌ ས༌ཆ༌ ཁྱེར༌། ངའེ༌ ཁྱོ༌རང༌ གྱལ༌ལ༌ ཅོས༌ཏེ༌ ཤེས༌སད༌ ཡང༌ ཁྱོ༌རང༌ ཉམ༌པོ༌ ང༌ ཐད༌པོ༌ ཨིན༌།’ ཨིན༌ནའང༌ ཉེ༌རང༌ངི༌ སུ༌ ངའ༌ རོགས༌ ཅོའ༌ལ༌ ཀལ༌ལ༌ ཛད༌ཅེས༌པོ༌ སྔོན༌ཅུག༌ག༌ མ༌ཛདས༌།
13 ཀལ༌ཏེས༌ ཉེ༌རང༌ ང༌ ཉམ༌པོ༌ དེན༌བ༌ ཐད༌པོ༌ ཨིན༌ན༌ ཉེ༌རང༌ངི༌ ལམ༌མི༌ཀ༌ ངའ༌ ཁྲིད༌ད༌ ཛད༌ ཏེ༌ནེ༌ ངའེ༌ ཉེ༌རང༌ངི༌ ཐུག༌གོངས༌ ཤེས༌ཏེ༌ ངའེ༌ ཏུས༌གྱུན༌ ཉེ༌རང༌ ཐུགས༌ཐད༌ཅུག༌ ཉན༌ཨིན༌། ཨིད༌ཏུ༌ ཛད༌དའང༌, འི༌ གྱལ༌ཁམས༌པོ༌ ཉེ༌རང༌ངི༌ མི༌ ཨིན༌ནོག༌།”
14 ཡ༌ཝའེ༌ མོལས༌, “ང༌ ཁྱོ༌རང༌ ཉམ༌པོ༌ ཆེན༌ ཡང༌ ངའེ༌ ཁྱོ༌རང༌ངི༌ སྙིང༌ངི༌ ནང༌ང༌ ཞི༌དེ༌ ཏང༌ཨིན༌།”
15 མོ༌ཟེས༌སི༌ ལན༌ཏངས༌, “ཀལ༌ཏེས༌ ཉེ༌རང༌ ང༌ཞ༌གུན༌ ཉམ༌པོ༌ མ༌སྐྱོད༌ན༌ ང༌ཞའ༌, འི༌ ས༌ཆ༌ བོར༌ཏེ༌ ཆ༌ཅུག༌ག༌ མ༌ཛད༌།
16 ཀལ༌ཏེས༌ ཉེ༌རང༌ ང༌ཞ༌གུན༌ ཉམ༌པོ༌ མ༌སྐྱོད༌ན༌ ཉེ༌རང༌ ང༌ དང༌ ཉེ༌རང༌ངི༌ མི༌གུན༌ ཉམ༌པོ༌ ཐུག༌ཉེས༌ཁན༌ ཇིག༌རྟེན༌པ༌གུན༌ལ༌ ཀ༌ཟུག༌གི༌ ཧ༌གོ༌ཨིན༌། ཉེ༌རང༌ ང༌ཞ༌གུན༌ ཉམ༌པོ༌ སྐྱོད༌ན༌, ང༌ཞའ༌ ཇིག༌རྟེན༌ནི༌ ཞན༌ མི༌ ཚང༌མའེ༌ སང༌ སོ༌སོ༌ ཨིན༌ཁན༌བོ༌ ཧ༌གོ༌ཨིན༌།”
17 ཡ༌ཝའེ༌ མོ༌ཟེས༌ལ༌ མོལས༌, “ངའེ༌ ཁྱོ༌རང༌ངི༌ ཟེར༌ཁན༌བོ༌ ཅོ༌ཨིན༌ ཅིའ༌ཟེར༌ན༌ ངའེ༌ ཁྱོ༌རང༌ གྱལ༌ལ༌ ཅོས༌ཏེ༌ ཤེས༌སད༌ ཡང༌ ང༌ ཁྱོ༌རང༌ ཉམ༌པོ༌ ཐད༌པོ༌ ཨིན༌།”
18 ཏེ༌ནེ༌ མོ༌ཟེས༌སི༌ ཞུ༌ཝ༌ ཕུལས༌, “ཉེ༌རང༌ངི༌ སྤལ༌ ངའ༌ སྟན༌ན༌ ཛད༌དའང༌།”
19 ཡ༌ཝའེ༌ ལན༌སལས༌, “ངའེ༌ ང༌རང༌ངི༌ ཟང༌པོ༌ ཚང༌མ༌ ཁྱོ༌རང༌ངི༌ དུན༌ནེ༌ ཆ༌ཅུག༌ཨིན༌ ཡང༌ སལ༌པོ༌ ཅོས༌ཏེ༌ ཁྱོ༌རང༌ང༌ ངའེ༌ མིང༌ ཡ༌ཝ༌ ཨིན༌ཁན༌བོ༌ ཟེར༌ཨིན༌། སྙིང༌རྗེ༌ སྟན༌ན༌ ཐད༌ཁན༌གུན༌ལ༌ ངའེ༌ སྙིང༌རྗེ༌ སྟན༌ཨིན༌ ཐུག༌རྗེ༌ སྟན༌ན༌ ཐད༌ཁན༌གུན༌ལ༌ ངའེ༌ ཐུག༌རྗེ༌ སྟན༌ཨིན༌།
20 ཨིན༌ནའང༌ ཁྱོ༌རང༌ངི༌ ངའེ༌ ལྡོང༌ང༌ ལྟ༌ མི༌ཆོག༌ ཅིའ༌ཟེར༌ན༌ སུ༌ཞིག༌གའང༌ ངའེ༌ ལྡོང༌ ཐོང༌ཏེ༌ སྟིང༌ནེ༌ སོན༌ཏེའ༌ མི༌ལུས༌།”
21 ཡ༌ཝའེ༌ མོལས༌, “འི༌ཀ༌ ངའེ༌ དུན༌ལ༌ ཡོད༌ཁན༌ནི༌ བྲག༌གི༌ཀ༌ ཁྱོ༌རང༌ ལངས༌ཏེ༌ དུག༌།
22 ངའེ༌ ཟིར༌རྗིད༌ ཁྱོ༌རང༌ངི༌ དུན༌ནེ༌ ཆའ༌ཅིག༌ ངའེ༌ ཁྱོ༌རང༌ བྲག༌གི༌ པར༌ལ༌ བོར༌ཏེ༌ ང༌ ཏེ༌ཀ༌ནེ༌ ཆ༌ ཚར༌ཚར༌ ཚག༌པ༌ ང༌རང༌ངི༌ ལག༌པ༌ ཁྱོ༌རང༌ངི༌ ལྡོང༌ང༌ ཀབ༌ཨིན༌།
23 ཆ༌ ཚར༌ཏེ༌ སྟིང༌ནེ༌ ངའེ༌ ལག༌པ༌བོ༌ ཐེན༌ཨིན༌ ཡང༌ ཁྱོ༌རང༌ངི༌ ངའེ༌ གྱབ༌པོ༌ ཐོང༌ཨིན༌ ཨིན༌ནའང༌ ངའེ༌ ལྡོང༌ མི༌ཐོང༌།”