34
རྡོའ༌ ལེབ༌ལེབ༌ སོ༌མ༌གུན༌།
34:1-28
1 ཡ༌ཝའེ༌ མོ༌ཟེས༌ལ༌ མོལས༌, “གོ༌མའེ༌ ཙོགས༌ རྡོའ༌ ལེབ༌ལེབ༌ ཉིས༌ ཅོད༌, ཡང༌ ཁྱོ༌རང༌ངི༌ ཅག༌ཁན༌ སྔོན༌ནི༌ རྡོའ༌ ལེབ༌ལེབ༌གུན༌ནི༌ཀ༌ བྲིས༌ཁན༌ནི༌ ཚིགས༌གུན༌ ངའེ༌ འི༌གུན༌ནི༌ཀ༌ བྲི༌ཨིན༌།
2 ཐོ༌རེ༌ ང༌མོ༌ནེ༌ གྲལ༌གྲིག༌ ཅོས༌ཏེ༌ ཀེན༌ལ༌ སི༌ནཱའི༌ རིའི༌ གོའེ༌ཀ༌ ང༌ ཉམ༌པོ༌ ཐུག༌ག༌ལ༌ ཡོང༌།
3 སུ༌ཞིག༌གའང༌ ཁྱོ༌རང༌ ཉམ༌པོ༌ རི༌ཀ༌ ཡ༌ རིའི༌ དུན༌ལ༌ ཡོང༌ མ༌གོས༌, ཡང༌ ལུག༌ དང༌ བ༌ལང༌ གུན༌ རི༌ དུན༌ལ༌ ཚོའ༌ལ༌ ཁྱོང༌ མ༌གོས༌།”
4 ཏེ༌ནེ༌ མོ༌ཟེས༌སི༌ སྔུན༌མ༌ ཙོགས༌ རྡོའ༌ ལེབ༌ལེབ༌ ཉིས༌ ཅདས༌ ཡང༌ ཡ༌ཝའེ༌ བཀའ༌ སལ༌ཁན༌ ནང༌ཞིན༌ ཐོ༌རེ༌ཟུག༌པོ༌ ང༌མོ༌ནེ༌ ཏེ༌གུན༌ ཁུར༌ཏེ༌ ཁོ༌ སི༌ནཱའི༌ རི༌ཀ༌ སོང༌།
5 ཡ༌ཝ༌ སྲིན༌ནི༌ ནང༌ང༌ བབས༌ཏེ༌ སྐྱོདས༌, ཡང༌ ཁོ༌ ཉམ༌པོ༌ ཏེ༌རུ༌ ཞངས༌ཏེ༌ ཁོང༌རང༌ངི༌ ཚན༌ ཡ༌ཝ༌ ཨིན༌ཁན༌བོ༌ ཁོའ༌ ཤད༌ད༌ ཛདས༌།
6 མོ༌ཟེས༌སི༌ དུན༌ནེ༌ སྐྱོད༌ཨིན༌ ཡ༌ཝའེ༌ མོལས༌, “ཡ༌ཝ༌, ཡ༌ཝ༌, སྙིང༌རྗེ༌ དང༌ ཐུག༌རྗེ༌ གངས༌ཁན༌ དཀོན༌མཆོག༌, སྲོ༌ གྱོགས༌པ༌ མ༌ ཡོང༌ཁན༌, གྱུར༌ཇ༌ མེད༌ཁན༌ནི༌ ཅམས༌པ༌ སྟན༌ཁན༌ དང༌ ཨིད༌ཤེས༌ཅན༌།
7 ངའེ༌ མི༌རབས༌ སྟོང༌ ཚག༌པ༌ ཅམས༌པ༌ སྟན༌ཨིན༌ ཡང༌ ངན༌པ༌, ངོ༌ལོག༌ དང༌ སྡིག༌པ༌ ཅོ༌ཁན༌གུན༌ལ༌ ཤགས༌པ༌ ཏང༌ཨིན༌། ཨིན༌ནའང༌ ནོངས༌ཅན༌གུན༌ལ༌ ཆད༌པ༌ མ༌ཏང༌ང༌ མི༌བོར༌, ཁོང༌གུན༌ ཅིག༌པོའ༌ མན༌པ༌ ཁོང༌གུན༌ནི༌ ཕྲུ༌གུ༌གུན༌ དང༌ ཚ༌འོ༌ ཚ༌མོ༌ གུན༌, མི༌རབས༌ སུམ༌ ཡང༌ ཞི༌ ཚག༌པ༌ ཁོང༌གུན༌ནི༌ ཕ༌མེས༌པོའེ༌ ཅོ༌ཁན༌ནི༌ སྡིག༌པའེ༌ ཞས༌ཏེ༌ ཆད༌པ༌ ཕོག༌ཨིན༌།”
8 མོ༌ཟེས༌སི༌ གྱོགས༌པ༌ སའེ༌ཀ༌ གོ༌ སྒུས༌ཏེ༌ ཁོང༌ང༌ ཅོལས༌
9 ཡང༌ ཟེརས༌, “ཡ༌ཝ༌ལེ༌ ཀལ༌ཏེས༌ ཉེ༌རང༌ ངའེ༌ཀ༌ ཐུག༌ཉེས༌ས༌ ཛད༌དད༌ན༌, ཉེ༌རང༌ ང༌ཞའ༌ ཉམ༌པོ༌ སྐྱོད༌ད༌ ཛད༌། འི༌ མི༌གུན༌ སྐྱོང༌པོ༌ ཨིན༌ནའང༌ ང༌ཞ༌གུན༌ནི༌ ངན༌པ༌ དང༌ སྡིག༌པ༌གུན༌ལ༌ ཤགས༌པ༌ སལ༌ལ༌ ཛད༌ཏེ༌ ང༌ཞའ༌ ཉེ༌རང༌ངི༌ མིག༌སལ༌ལི༌ མི༌གུན༌ནི༌ ཚུལ༌ལ༌ ལེན༌ན༌ ཛད༌།”
10 ཡ༌ཝའེ༌ མོ༌ཟེས༌ལ༌ མོལས༌, “ངའེ༌ ཁྱོ༌ཞའ༌ ཉམ༌པོ༌ ཆད༌དོན༌ ཅོའད༌། ཇིག༌རྟེན༌ ཡ༌ གྱལ༌ཁམས༌ ཚང༌མའེ༌ ནང༌ང༌ སུ༌ཞིག༌གིའང༌ མ༌ཅོ༌ཁན༌ ཧ༌ལས༌ཤེས༌སི༌ ལྟས༌ རིག༌ ངའེ༌ ཨིས༌ར༌ཨེལ༌པ༌གུན༌ནི༌ དུན༌ལ༌ ཅོ༌ཨིན༌། ང༌ ཡ༌ཝའེ༌ ཁྱོ༌ཞའེ༌ ཕིའ༌ ཅོ༌ཁན༌ནི༌ ལས༌གུན༌ ཏེ༌ཟམ༌ ཧ༌ལས༌ཤེས༌ ཡོད༌ཁན༌བོ༌ མི༌ཚང༌མའེ༌ ཐོང༌ཨིན༌ ཀ༌གུན༌ནི༌ ཕྲོའ༌ ཁྱོ༌ཞའ༌ དུག༌གད༌།
11 དི༌རིང༌ ངའེ༌ ཁྱོ༌ཞ༌གུན༌ལ༌ བཀའ༌ ཏང༌ཁན༌གུན༌ ཅོས༌ ཡང༌ ངའེ༌ ཁྱོ༌ཞའེ༌ དུན༌ལ༌ འི༌ ནས༌སའེ༌ ནང༌ང༌ དུག༌ཁན༌ ཨ༌མོར༌པ༌, ཀེ༌ནན༌པ༌, ཧེད༌པ༌, པེ༌རིཟ༌པ༌, ཧིཝ༌པ༌ ཡང༌ ཡེ༌བས༌པ༌ གུན༌ ཕིང༌ཨིན༌།
12 ཁྱོ༌ཞའ༌ ཆ༌ཅེས༌ཅན༌ནི༌ ནས༌སའེ༌ མི༌གུན༌ ཉམ༌པོ༌ ཞི༌དེའེ༌ ཆད༌དོན༌ མ༌ཅོ༌, ཀལ༌ཏེས༌ ཅོ༌ན༌ ཁོང༌གུན༌ནི༌ ངན༌པ༌ མི༌ཚེ༌ ཕུད༌ཨིན༌ ཡོད༌ཁན༌བོའེ༌ ནང༌ང༌ ཁྱོ༌ཞ༌གུན༌ ཁད༌ད༌ནོག༌།
13 ཁོང༌གུན༌ནི༌ ཆོད༌ཁྲི༌གུན༌ ཤིག༌, ཁོང༌ངི༌ ཏམ༌པ༌ ཀ༌ཝ༌གུན༌ ཅོག༌ ཡང༌ ཨ༌ཤེ༌རཧ༌ ཟེར༌ཁན༌ནི༌ ཁོང༌གུན༌ནི༌ ལྷ༌མོའེ༌ རྡུང༌མ༌ ལངས༌ཁན༌གུན༌ མེད༌ཁན༌ ཅོས༌།
14 ཞན༌ ལྷ༌ལྷ༌མོ༌ གུན༌ལ༌ ཅོལ༌ མ༌ཅོལ༌ ཅིའ༌ཟེར༌ན༌ ང༌ ཡ༌ཝ༌ ཅིག༌པོ༌ མ༌ནེ༌ སུ༌ཞིག༌གའང༌ ཏེ༌ སྤལ༌ལི༌ འོས༌པ༌ མན༌།”
15 “ཏེ༌ ཡུལ༌ལི༌ མི༌གུན༌ ཉམ༌པོ༌ ཞི༌དེའེ༌ ཆད༌དོན༌ མ༌ཅོ༌ ཅིའ༌ཟེར༌ན༌ ཁོང༌གུན༌ནི༌ ཁོང༌རང༌གུན༌ནི༌ ལྷ༌ དང༌ ལྷ༌མོ༌ གུན༌ལ༌ ཅོལ༌ཏེ༌ སྲོག༌ཆོད༌ ཏང༌ཁན༌ནི༌ ཁར༌ཇི༌ ཁྱོ༌ཞའ༌ ཟའ༌ལ༌ བོད༌ན༌ ཁྱོ༌ཞའ༌ ཏེ༌བོ༌ ཟའ༌ལ༌ ཆ༌སྲིད༌ཅེས༌ ཨིན༌ནོག༌
16 ཡང༌ ཁྱོ༌ཞའེ༌ བུ༌ཚ༌གུན༌ནི༌ ཏེ༌ ཡུལ༌ལི༌ བུ༌མོ༌གུན༌ ཉམ༌པོ༌ བག༌མ༌ ཅོས༌ཏེ༌ ཁོང༌གུན༌ནི༌ ཁྱོ༌ཞའེ༌ བུ༌ཚ༌གུན༌ནི༌ སེམས༌ གྱུར༌ཅུགས༌ཏེ༌ ཁོང༌གུན༌ནི༌ ལྷ༌ལྷ༌མོ༌ གུན༌ལ༌ ཅོལ༌ ཅུག༌ཨིན༌།”
17 “ཁྱོ༌ཞ༌གུན༌ནི༌ ཁྱོ༌ཞ༌རང༌ངི༌ ཕིའ༌ སེར༌ ཡ༌ མུལ༌ ཡ༌ ཞན༌ ལྕགས༌ རིགས༌གུན༌ནི༌ སྐུན༌དྲ༌ ཅོ༌ མ༌གོས༌།”
18 “སྐྱུར༌ མེད༌ཁན༌ནི༌ ཏ༌གི༌ ཏུས༌ཆེན༌ རྩིས༌། ངའེ༌ ཁྱོ༌ཞ༌གུན༌ལ༌ བཀའ༌ ཏང༌ཁན༌ ནང༌ཞིན༌ ཨ༌བིབ༌བི༌ ཟླ༌ཝའེ༌ ནང༌ང༌ ཞག༌མ༌ རྡུན༌ སྐྱུར༌ མེད༌ཁན༌ནི༌ ཏ༌གི༌ ཟོ༌ ཅིའ༌ཟེར༌ན༌ འི༌ ཟླ༌ཝའེ༌ ནང༌ང༌ ཁྱོ༌ཞའ༌ ཨི༌ཇིབ༌ནེ༌ བིངས༌ཏེ༌ ཡོངས༌ཏེ༌ ཨིན༌པིན༌།”
19 “གོ༌སྐྱེས༌ བུ༌ཚ༌ ཚང༌མ༌ ངའེ༌ ཨིན༌, ཏེ༌ནང༌ང༌ ཁྱོ༌ཞའེ༌ སྲལ༌ཁན༌ནི༌ སེམས༌ཅན༌ ཚང༌མའེ༌ གོ༌སྐྱེས༌ ཕོ༌གུན༌ནའང༌ ཐེས༌ཏེ༌ ཨིན༌།
20 ལུ༌གུ༌ཞིག༌ ཚབས༌ལ༌ ཏངས༌ཏེ༌ གོ༌སྐྱེས༌ བུང༌བུ༌ ལོགས༌ཏེ༌ ཉོ༌ཉན༌ཨིན༌། ཀལ༌ཏེས༌ ལོགས༌ཏེ༌ མ༌ཉོ༌ན༌ ཏེ༌བོའེ༌ ཇིང༌བ༌ ཅགས༌ཏེ༌ སད༌ཏོང༌། ཁྱོ༌ཞའེ༌ གོ༌སྐྱེས༌ བུ༌ཚ༌ ཚང༌མ༌ ལོགས༌ཏེ༌ ཉོ༌གོས༌།”
“ལག༌པ༌ སྟོང༌པ༌ སུ༌ཞིག༌གའང༌ ངའེ༌ དུན༌ལ༌ མ༌ཡོང༌།”
21 “ཁྱོ༌ཞའེ༌ ཞག༌མ༌ དྲུག༌ ལས༌ ཅོས༌ ཨིན༌ནའང༌ ཞག༌མ༌ རྡུན༌པའེ༌ ཞག༌ག༌ ལས༌ མ༌ཅོའ༌ ངལ༌ཚོ༌གོས༌། སྟོན༌ཐོག༌ ཏབ༌ཅེས༌ དང༌ རྔ༌ཅེས༌སི༌ ཏུས༌ལའང༌ ཏེ༌ བཀའ༌ཁྲིམས༌པོ༌ སྲུང༌གོས༌།
22 ཁྱོ༌ཞའེ༌ གོ༌མའེ༌ ཀྲོའེ༌ སྟོན༌ཐོག༌པོ༌ རྔའ༌ཅིག༌ རྔབ༌སའེ༌ ཏུས༌ཆེན༌ ཡང༌ སྟོན༌ལ༌ ཁྱོ༌ཞའེ༌ ཁ༌ཟས༌གུན༌ ལྡུམ༌ ཚར༌ར༌ཅིག༌ སྟོན༌ཐོག༌ ནང༌ང༌ ཁྱོང༌ཅེས༌སི༌ ཏུས༌ཆེན༌ རྩི༌གོས༌།
23 ལོའེ༌ ནང༌ང༌ ལན༌ སུམ༌ ཁྱོ༌ཞའེ༌ བུ༌ཚ༌ ཚང༌མ༌ ཡ༌ཝ༌ ཨིས༌ར༌ཨེལ༌པའེ༌ དཀོན༌མཆོག༌གི༌ དུན༌ལ༌ ཁོང༌ང༌ ཅོལ༌ཅེས༌ལ༌ ཛོམ༌གོས༌།
24 ངའེ༌ ཁྱོ༌ཞའེ༌ དུན༌ལ༌ ཞན༌ ཡུལ༌ལི༌ མི༌གུན༌ ཐེན༌ཏེ༌ ཁྱོ༌ཞའེ༌ ས༌ཆའེ༌ སན༌ཚམས༌ སྐྱེད༌ཨིན༌ ཡང༌ ཡ༌ཝའེ༌ དུན༌ལ༌ ལོ༌ཞུང༌ ལན༌ སུམ༌ ཏུས༌ཆེན༌ རྩེའ༌ ཆ༌ ཟ༌ནེ༌ ཞན༌ གྱལ༌ཁམས༌གུན༌ནི༌ ཁྱོ༌ཞའེ༌ ས༌ཆའ༌ ཀོགས༌ཏེ༌ མི༌ཁྱེར༌།”
25 “ངའ༌ སེམས༌ཅན༌ སྲོག༌ཆོད༌ལ༌ ཕུལ༌ ཟ༌ནེ༌ ཏེ༌བོ༌ ཉམ༌པོ༌ སྐྱུར༌ཅན༌ནི༌ ཏ༌གི༌ མ༌ཕུལ༌ ཡང༌ པེ༌སག༌གི༌ ཏུས༌ཆེན༌ནི༌ ཕིའ༌ སད༌ཁན༌ནི༌ སེམས༌ཅན༌ནི༌ ཤའ༌ ཐོ༌རེ༌ ང༌མོ༌ ཚག༌པ༌ བོར༌ མ༌གོས༌།”
26 “ཁྱོ༌ཞའེ༌ ཏབ༌ཁན༌ནི༌ སྟོན༌ཐོག༌གི༌ གོ༌མའེ༌ བྲས༌བུ༌ གྱལ༌ཤོག༌པོ༌ ཡ༌ཝ༌ ཁྱོ༌ཞ༌གུན༌ནི༌ དཀོན༌མཆོག༌གི༌ ཆོད༌ཁང༌ང༌ ཁྱོང༌།”
“རི༌གུའི༌ ཤ༌ ཏེ༌བོའེ༌ ཨ༌མའེ༌ འོ༌མའེ༌ ནང༌ང༌ མ༌ སྐོལ༌།”
27 ཡ༌ཝའེ༌ མོ༌ཟེས༌ལ༌ མོལས༌, “འི༌ ཚིགས༌གུན༌ བྲིས༌ ཅིའ༌ཟེར༌ན༌ འི༌ བཀའ༌ཁྲིམས༌གུན༌ གྱུད༌ཏེ༌ ངའེ༌ ཁྱོ༌རང༌ དང༌ ཨིས༌ར༌ཨེལ༌པ༌གུན༌ ཉམ༌པོ༌ ཆད༌དོན༌ ཅོའད༌།”
28 ཟའ༌ཅེས༌ ཡ༌ ཐུང༌ཅེས༌ མེད༌ད༌ ཉི༌མ༌ ཞིབ༌ཅུ༌ དང༌ ཚན༌ ཞིབ༌ཅུ༌ མོ༌ཟེས༌ རི༌ཀ༌ ཡ༌ཝ༌ ཉམ༌པོ༌ དུགས༌། ཁོའེ༌ རྡོའ༌ ལེབ༌ལེབ༌གུན༌ནི༌ཀ༌ ཆད༌དོན༌ནི༌ ཚིགས༌གུན༌ བྲིས༌ ཡང༌ན༌ བཀའ༌རྒྱ༌ རྕུ༌།
མོ༌ཟེས༌སི༌ ལྡོང༌ འོད༌ ཙོགས༌ ལྡང༌ཤན༌།
34:29-35
29 མོ༌ཟེས༌ བཀའ༌རྒྱ༌ རྕུ༌ བྲིའ༌ཛད༌ཁན༌ནི༌ རྡོའ༌ ལེབ༌ལེབ༌ ཉིས༌ཀོ༌ ཁུར༌ཏེ༌ སི༌ནཱའི༌ རི༌ནེ༌ བབས༌ཏེ༌ ཡོང༌ ཟ༌ནེ༌, ཡ༌ཝ༌ ཉམ༌པོ༌ སྤེ༌ར༌ ཏང༌ པ༌སང༌ ཁོའེ༌ ལྡོང༌ འོད༌ ཙོགས༌ ལྡང༌ཤན༌ ཡོད༌ཁན༌བོ༌ ཁོའ༌ གྱུས༌ མེད༌པིན༌།
30 ཨ༌རོན༌ དང༌ མི༌ཚང༌མའེ༌ མོ༌ཟེས༌ལ༌ ལྟའ༌ཅིག༌ ཁོའེ༌ ལྡོང༌ འོད༌ ཙོགས༌ ལྡང༌ཤན༌ ཐོང༌པ༌ ཁོང༌གུན༌ ཁོའེ༌ དུན༌ལ༌ ཆ༌ཅེས༌ལ༌ ཇིགས༌།
31 ཨིན༌ནའང༌ མོ༌ཟེས༌སི༌ ཁོང༌གུན༌ལ༌ བོདས༌པ༌ ཨ༌རོན༌ དང༌ ཨིས༌ར༌ཨེལ༌པའེ༌ སྤོན༌བོ༌ ཚང༌མ༌ ཁོ༌ ཡོད༌ས༌ སོང༌ ཡང༌ མོ༌ཟེས༌སི༌ ཁོང༌གུན༌ལ༌ སྤེ༌ར༌ ཏངས༌།
32 ཏེ༌ སྟིང༌ནེ༌ ཨིས༌ར༌ཨེལ༌པ༌ ཚང༌མ༌ ཁོའེ༌ དུན༌ལ༌ ཛོམ༌ ཡང༌ ཡ༌ཝའེ༌ སི༌ནཱའི༌ རི༌ཀ༌ ཁོའ༌ སལ༌ལ༌ ཛད༌ཁན༌ནི༌ བཀའ༌ཁྲིམས༌ ཚང༌མ༌ མོ༌ཟེས༌སི༌ ཁོང༌གུན༌ལ༌ ཏངས༌།
33 མོ༌ཟེས༌སི༌ ཁོང༌གུན༌ ཉམ༌པོ༌ སྤེ༌ར༌ ཏང༌ ཚར༌ར༌ཅིག༌ ཁོའེ༌ ཁོ༌རང༌ངི༌ ལྡོང༌བོ༌ རས༌ཤིག༌ ཉམ༌པོ༌ ཀབས༌།
34 མོ༌ཟེས༌ ཡ༌ཝ༌ ཐུག༌སའེ༌ ཀུར༌རི༌ ནང༌ང༌ ཁོང༌ ཉམ༌པོ༌ སྤེ༌ར༌ ཏང༌ང༌ ཆ༌ ཟ༌ནེ༌ ཁོའེ༌ ལྡོང༌ ཀབས༌ཁན༌ནི༌ རས༌པོ༌ ཐེན༌ནད༌པིན༌། ཕི༌ལོག༌ག༌ ཡོངས༌ཏེ༌ ཁོའེ༌ ཨིས༌ར༌ཨེལ༌པ༌གུན༌ལ༌ ཡ༌ཝའེ༌ བཀའ༌ སལ༌ཁན༌ ཚང༌མ༌ ཤད༌དད༌པིན༌
35 ཡང༌ ཁོའེ༌ ལྡོང༌ ལྡང༌ཤན༌བོ༌ ཁོང༌གུན༌ནི༌ ཐོང༌ངད༌པིན༌, ཏེ༌ནེ༌ མོ༌ཟེས༌ ཡང༌སྐྱར༌ ཡ༌ཝ༌ ཉམ༌པོ༌ སྤེ༌ར༌ ཏང༌ང༌ ཆ༌ཆ༌ ཚག༌པ༌ ཁོའེ༌ ལྡོང༌ ཀབས༌ཏེ༌ བོར༌རད༌པིན༌།