35
ཤབ༌བད༌དི༌ ངལ༌ཚོའེ༌ ཞག༌གི༌ ཁྲིམས༌།
35:1-3
1 མོ༌ཟེས༌སི༌ ཨིས༌ར༌ཨེལ༌པ༌ ཚང༌མའ༌ ཛོམ༌ཅེས༌ལ༌ བོདས༌ ཡང༌ ཟེརས༌, “ཡ༌ཝའེ༌ ཁྱོ༌ཞའ༌, འི༌གུན༌ ཅོ༌ཅེས༌ལ༌ བཀའ༌ སལས༌།
2 ཁྱོ༌ཞ༌གུན༌ནི༌ ཞག༌མ༌ དྲུག༌ ལས༌ ཅོས༌ ཨིན༌ནའང༌ ཞག༌མ༌ རྡུན༌པའེ༌ ཞག༌ག༌ ལས༌ མ༌ཅོའ༌ ངལ༌ཚོས༌ ཅིའ༌ཟེར༌ན༌ ཏེ༌ ཞག༌པོ༌ ཏམ༌པ༌ ཨིན༌ ཡང༌ ཏེ༌བོ༌ ཡ༌ཝའེ༌ ཕིའ༌ ཏང༌གོས༌། ཏེ༌ ཞག༌ག༌ ལས༌ ཅོ༌ཁན༌གུན༌ སད༌གོས༌།
3 ཤབ༌བད༌དི༌ ཞག༌ག༌ ཁྱོ༌ཞ༌གུན༌ནི༌ ཁང༌པའེ༌ ནང༌ང༌ མེ༌ ཏུག༌ མ༌གོས༌།”
ཏམ༌པ༌ ཀུར༌རི༌ ཕིའ༌ ཆོད༌པ༌ ཕུལ༌།
35:4-29
4 མོ༌ཟེས༌སི༌ ཨིས༌ར༌ཨེལ༌པ༌ ཚང༌མ༌ལ༌ མོལས༌, “ཡ༌ཝའེ༌ བཀའ༌ སལ༌ཁན༌བོ༌ འི༌གུན༌ ཨིན༌།
5 ཁྱོ༌ཞའ༌ ཡོད༌ཁན༌གུན༌ནི༌ ནང༌ནེ༌ ཁྱོ༌ཞའེ༌ ཡ༌ཝའེ༌ ཕིའ༌ ཆོད༌པ༌ ཕུལ༌། ཏང༌ང༌ ཐད༌ཁན༌གུན༌ནི༌ ཡ༌ཝའེ༌ ཕིའ༌ སེར༌, མུལ༌, དང༌ ར༌གན༌ནི༌ ཆོད༌པ༌ ཁྱོང༌,
6 སྔོན༌པོ༌, སྔོ༌མར༌ དང༌ མར༌པོ༌ ནས༌མ༌, གྱལ༌ལ༌ ཀུས༌པོ༌ རས༌ དང༌ ར༌མའེ༌ བལ༌,
7 རང༌ མར༌པོ༌ ཏང༌ཁན༌ནི༌ ལུག༌ཕོའེ༌ པགས༌པ༌ དང༌ ཀོའ༌ གྱལ༌ལ༌, ཨ༌ཀ༌ཤིའེ༌ ཤིང༌,
8 འོད༌དི༌ ཕིའ༌ ཨོ༌ལིཝ༌ཝི༌ མར༌ནག༌, ཁྲུས༌ཏང༌ཅེས༌སི༌ མར༌ནག༌ ཏང༌ ཏྲི༌ཞིམ༌ཅན༌ནི༌ སྤོས༌སི༌ ཕིའ༌ ཚ༌མིག༌གུན༌,
9 ཨེ༌ཕོད༌ དང༌ ཀྲང༌ང༌ ཀབ༌ཅེས༌སི༌ཀ༌ ཏག༌ཅེས༌ལ༌ ཨོ༌ནེཀས༌ དང༌ ཞན༌ ཁྲ༌རྡོའ༌ རིན༌ཅན༌གུན༌ ཁྱོང༌།”
10 “ཁྱོ༌ཞ༌གུན༌ནི༌ ཕྲོ༌ནེ༌ ལག༌ཁས༌པ༌གུན༌ ཡོངས༌ཏེ༌ ཡ༌ཝའེ༌ བཀའ༌ སལ༌ཁན༌ ནང༌ཞིན༌ ཅི༌ཚང༌མ༌ ཅོས༌,
11 ཏེ༌གུན༌ ཏམ༌པ༌ ཀུར༌, ཏེ༌བོའ༌ ཀབ༌ཅེས༌, ཏེ༌བོའེ༌ ལྕག༌ཀུག༌གུན༌ དང༌ རིབ༌ཞི༌གུན༌, པ༌ར༌ཁ༌ ཏང༌ཅེས༌སི༌ ཀྲ༌ལུ༌གུན༌, ཀ༌ཝ༌གུན༌ དང༌ ཏེ༌གུན༌ ལང༌ཅེས༌སི༌ ཞབ༌ལྡན༌གུན༌,
12 ཆད༌དོན༌ནི༌ སྒམ༌ དང༌ ཏེ༌བོ༌ ཁུར༌ཅེས༌སི༌ ཀྲ༌ལུ༌གུན༌, ཐུག༌རྗེ༌ ཁའ༌ལེབ༌ ཡང༌ པར༌ ཕེ༌ཅེས༌ལ༌ ཡོ༌ལ༌,
13 ཅོག༌ཙེ༌, ཏེ༌བོ༌ ཁུར༌ཅེས༌སི༌ ཀྲ༌ལུ༌གུན༌ ཏང༌ ཏེ༌ཀ༌ ཀོལ༌ཅེས༌སི༌ ནོད༌ ཚང༌མ༌, དཀོན༌མཆོག༌ག༌ ཕུལ༌ཁན༌ནི༌ ཏམ༌པ༌ ཏ༌གི༌,
14 འོད༌དི༌ ཕིའ༌ འོད༌སྟགས༌ ཡང༌ ཏེ༌བོའེ༌ ལག༌ཆ༌གུན༌, འོད༌གུན༌ དང༌ ཏེ༌གུན༌ནི༌ ཕིའ༌ མར༌ནག༌,
15 སྤོས༌ དུག༌སའེ༌ ཆོད༌ཁྲི༌ ཡང༌ ཏེ༌བོ༌ ཁུར༌ཅེས༌སི༌ ཀྲ༌ལུ༌, ཁྲུས༌ཏང༌ཅེས༌སི༌ མར༌ནག༌, ཏྲི༌ཞིམ༌ཅན༌ནི༌ སྤོས༌, ཏམ༌པའེ༌ ཀུར༌རི༌ ནང༌ང༌ ཞུག༌སའེ༌ སྒོའེ༌ ཕིའ༌ ཡོ༌ལ༌,
16 ཆོད༌པ༌ མེའ༌ སྲག༌ཅེས༌སི༌ ཕིའ༌ ཆོད༌ཁྲི༌, ཏེ༌བོའེ༌ ར༌གན༌ནི༌ ཀྲ༌མིག༌, ཏེ༌བོ༌ ཁུར༌ཅེས༌སི༌ ཀྲ༌ལུ༌ དང༌ ཏེ༌བོའེ༌ ལག༌ཆ༌ ཚང༌མ༌ ཡང༌ ལག༌པ༌ ཁྲུ༌ཅེས༌སི༌ ཞོང༌པ༌ དང༌ ཏེ༌བོ༌ བོར༌སའེ༌ ཕོས༌སྟག༌,
17 ནང༌སྐོར༌རི༌ ཕིའ༌ ཡོ༌ལ༌, ཏེ༌བོའེ༌ ཀ༌ཝ༌ དང༌ ཞབ༌ལྡན༌ གུན༌, ཏེ༌ནང༌ང༌ ཞུག༌སའེ༌ སྒོའེ༌ ཕིའ༌ ཡོ༌ལ༌།
18 ཏམ༌པའེ༌ ཀུར༌ དང༌ ནང༌སྐོར༌རི༌ ཕིའ༌ ཕུར༌ཅ༌གུན༌ དང༌ ཐག༌པ༌གུན༌།
19 ཏམ༌པའེ༌ ཀུར༌རི༌ ནང༌ང༌ བླ༌མའེ༌ ཚུལ༌ལ༌ ཞབས༌ཏོག༌ ཞུ༌ ཟ༌ནེ༌ ཨ༌རོན༌ དང༌ ཁོའེ༌ བུ༌ཚ༌གུན༌ གོན༌ཅེས༌སི༌ ཀོས༌ལག༌ ཏམ༌པ༌ གུན༌།”
20 མོ༌ཟེས༌སི༌ སྤེ༌ར༌ ཟེར༌ ཚར༌ར༌ཅིག༌, ཨིས༌ར༌ཨེལ༌པ༌ ཚང༌མ༌ ཁོའེ༌ དུན༌ནེ༌ སོང༌
21 ཡང༌ སེམས༌སི༌ ཐིལ༌ནེ༌ ཐད༌ཁན༌གུན༌ནི༌ ཡ༌ཝའ༌ ཆོད༌པ༌ ཕུལས༌ ཡང༌ན༌ ཏམ༌པ༌ ཀུར༌, ཏེ༌ནང༌ང༌ སྒོས༌དོམ༌ ཡོད༌ཁན༌ དང༌ བླ༌མ༌གུན༌ནི༌ ཏམ༌པ༌ ཀོས༌ལག༌, ཏེ༌ ཚང༌མ༌ ཅོ༌ཅེས༌སི༌ ཕིའ༌ ཆོད༌པ༌ ཕུལས༌།
22 ཏང༌ང༌ ཐད༌ཁན༌ བུ༌ཚ༌ དང༌ བུ༌མོ༌ ཚང༌མའེ༌ སེར༌རི༌ གྱན༌ཆ༌ སྣ༌ཚོགས༌; ནམ༌ཅོག༌གི༌ ཨ༌ལི༌, སྐྱེ༌ཆ༌, སེར༌དུབ༌, ཀྲང༌ངི༌ཀ༌ ཏག༌ཅེས༌ དང༌ ཞན༌གུན༌ ཁྱོངས༌། ཁོང༌གུན༌ནི༌ རང༌ངི༌ སེར༌གུན༌ ཡ༌ཝའེ༌ སྐུན༌དུན༌ལ༌ ལན༌ ཁ༌ཅིག༌ སྟགས༌ ཡང༌ ཕབས༌།
23 སྔོན༌པོ༌, ཡ༌ སྔོ༌མར༌ ཡ༌ མར༌པོ༌ ནས༌མ༌ ཡ༌ ཀུས༌པོ༌ རས༌ ཡ༌ ར༌མའེ༌ སྤུ༌ ཡ༌ རང༌ མར༌པོ༌ ཏང༌ཁན༌ ལུག༌ཕོའེ༌ པགས༌པ༌ ཡ༌ ཀོའ༌ གྱལ༌ལ༌ ཡོད༌ཁན༌གུན༌ནི༌ ཏེ༌གུན༌ ཁྱོངས༌།
24 ཏང༌ ཉན༌ཁན༌གུན༌ནི༌ མུལ༌ ཡ༌ ར༌གན༌ནི༌ ཆོད༌པ༌ ཡ༌ཝའ༌ ཕུལས༌, ཡང༌ ཨ༌ཀ༌ཤིའེ༌ ཤིང༌ ཡོད༌ཁན༌གུན༌ནི༌ ཏེ༌གུན༌ ཏེ༌ ལས༌སི༌ ནང༌ང༌ ཀོལ༌ཅེས༌ལ༌ ཕུལས༌།
25 ལག༌ཤེས༌ ཁས༌པ༌ བུ༌མོ༌གུན༌ནི༌ རས༌ ཐགས༌ཁན༌ ཀུས༌པོ༌ ཡང༌ སྔོན༌པོ༌, སྔོ༌མར༌ དང༌ མར༌པོ༌ ནས༌མ༌ ཁལ༌ཏེ༌ ཁྱོངས༌།
26 ཁས༌པ༌ ཡང༌ སྙིང༌ནེ༌ ཅོའ༌ལ༌ ཐད༌ཁན༌ བུ༌མོ༌གུན༌ནི༌ ར༌མའེ༌ སྤུ༌ ཁལ༌ཏེ༌ ནས༌མ༌ ཅོས༌།
27 སྤོན༌བོ༌གུན༌ནི༌ ཨོ༌ནེཀས༌ དང༌ ཞན༌ ཁྲ༌རྡོའ༌ གུན༌ ཨེ༌ཕོད༌ དང༌ ཀྲང༌ང༌ ཀབ༌ཅེས༌སི༌ཀ༌ ཅུག༌ཅེས༌ལ༌ ཁྱོངས༌།
28 ཁོང༌གུན༌ནི༌ འོད༌, ཁྲུས༌ཏང༌ཅེས༌ དང༌ ཏྲི༌ཞིམ༌ཅན༌ནི༌ སྤོས༌སི༌ ཕིའ༌ ཨོ༌ལིཝ༌ཝི༌ མར༌ནག༌ དང༌ ཚ༌མིག༌གུན༌ ཁྱོངས༌།
29 ཡ༌ཝའེ༌ མོ༌ཟེས༌ གྱུད༌ཏེ༌ བཀའ༌ སལ༌ཁན༌ནི༌ ལས༌གུན༌ ཅོ༌ཅེས༌སི༌ ཕིའ༌ ཨིས༌ར༌ཨེལ༌པ༌ ཚང༌མའེ༌ རང༌རང༌ ཐད༌ཁན༌ནི༌ ཆོད༌པ༌ ཐད༌པོ༌ ཉམ༌པོ༌ ཁྱོངས༌།
བེ༌ཟ༌ལེལ༌ དང༌ ཨོ༌ཧོ༌ལིའབ༌།
35:30-36:7
30 ཏེ༌ནེ༌ མོ༌ཟེས༌སི༌ ཨིས༌ར༌ཨེལ༌པ༌གུན༌ལ༌ ཟེརས༌, “ཡ༌ཝའེ༌ ཡ༌ཧུ༌དཱའེ༌ སྡེ༌ ནང༌ནེ༌ ཨུ༌རི༌ བུ༌ཚ༌, ཧུར༌རི༌ ཚ༌འོ༌ བེ༌ཟ༌ལེལ༌ ལྡམ༌མ༌ ཛདས༌,
31 ཡང༌ དཀོན༌མཆོག༌གི༌ ཁོའེ༌ ནང༌ང༌ ཁོང༌རང༌ངི༌ ཐུག༌ཉིད༌ སྐང༌ང༌ ཛད༌ཏེ༌ ཁོའ༌ ཟོ༌ལས༌ ཚང༌མའེ༌ ནང༌ང༌ ཁས༌པ༌, རིག༌པ༌ དང༌ ཁྱུད༌ སལས༌,
32 ཏེ༌གུན༌ སེར༌, མུལ༌ དང༌ ར༌གན༌ ཉམ༌པོ༌ ཁས༌པ༌ རི༌མོ༌ སྲུལ༌ཅེས༌,
33 ཁྲ༌རྡོའ༌ ཅད༌ཅེས༌, ཤིང༌ སྐོས༌ཏང༌ཅེས༌ ཡང༌ ཟོ༌ལས༌སི༌ ལས༌ སྣ༌ཚོགས༌ ཅོ༌ཅེས༌།
34 ཡ༌ཝའེ༌ ཁོ༌ དང༌ དཱན༌ནི༌ སྡེ༌ ནང༌ནེ༌ ཨ༌ཧི༌ས༌མག༌གི༌ བུ༌ཚ༌ ཨོ༌ཧོ༌ལིའབ༌ ཉིས༌ཀོའ༌, ཞན༌ཡང༌ ཟོ༌ལས༌པ༌གུན༌ལ༌ ལབ༌ཅེས༌སི༌ ཁྱུད༌ སལས༌།
35 ཡ༌ཝའེ༌ ཁོང༌གུན༌ལ༌, ཟོ༌ལས༌ སྣ༌ཚོགས༌ ཅོ༌ཁན༌, རི༌མོ༌ སྲུལ༌ཁན༌, ཀུས༌པོ༌ རས༌སི༌ཀ༌ ནས༌མ༌ སྔོན༌པོ༌, སྔོ༌མར༌ དང༌ མར༌པོ༌ ཉམ༌པོ༌ རི༌མོ༌ སྲུལ༌ཁན༌ ཡང༌ ཐགས༌ཐག༌ཁན༌ གུན༌ནི༌ ཅོ༌ཁན༌ནི༌ ལས༌ རིགས༌ ཚང༌མ༌ ཅོ༌ཅེས༌སི༌ ཁྱུད༌ སལས༌། ཁོང༌ ཉིས༌ཀོ༌ ཟོ༌ལས༌ དང༌ རི༌མོ༌ སྲུལ༌ཅེས༌སི༌ ནང༌ང༌ མ༌ ཁས༌པ༌ ཡོད༌པིན༌།”