36
1 མོ༌ཟེས༌སི༌ མི༌གུན༌ལ༌ ཟེརས༌, “ཡ༌ཝའེ༌ བེ༌ཟ༌ལེལ༌, ཨོ༌ཧོ༌ལིའབ༌ དང༌ ཞན༌ ཟོ༌ལས༌པ༌གུན༌ལ༌ ཏམ༌པའེ༌ ཀུར༌ ཅོ༌ཅེས༌སི༌ ནང༌ང༌ སྒོས༌དོམ༌མི༌ ལས༌གུན༌ ཅོ༌ཅེས༌ལ༌ ཧ༌གོ༌ དང༌ ཁྱུད༌ སལ༌ཏེ༌ ཨིན༌ནོག༌ ཡང༌ ཁོང༌གུན༌ནི༌ ཡ༌ཝའེ༌ བཀའ༌ ནང༌ཞིན༌ ལས༌ ཅོ༌གོས༌།”
2 མོ༌ཟེས༌སི༌ བེ༌ཟ༌ལེལ༌ དང༌ ཨོ༌ཧོ༌ལིའབ༌ ཡང༌ ཡ༌ཝའེ༌ ཁྱུད༌ སལ༌ཏེ༌ ལས༌ ཅོའ༌ལ༌ ཐད༌པོ༌ ཡོད༌ཁན༌ ཚང༌མ༌ལ༌ བོད༌ཏེ༌ ལས༌ གོ༌ཟུག༌ ཅོ༌ཅེས༌སི༌ ཕིའ༌ ཟེརས༌།
3 ཏམ༌པའེ༌ ཀུར༌ ཅོ༌ཅེས༌སི༌ ཕིའ༌ ཨིས༌ར༌ཨེལ༌པ༌གུན༌ནི༌ ཁྱོངས༌ཁན༌ནི༌ ཆོད༌པ༌ ཚང༌མ༌ མོ༌ཟེས༌སི༌ ཀ༌ནེ༌ ཁོང༌གུན༌ནི༌ ལེནས༌། མི༌གུན༌ནི༌ ཆད༌མ༌ཅུག༌ག༌ ཞག༌ཏང༌ ང༌མོ༌ ཆོད༌པ༌གུན༌ ཕུལ༌ཅེས༌ལ༌ ཁྱོང༌ངད༌པིན༌།
4 ཏེ༌ནེ༌ ཟོ༌ལས༌སི༌ ལས༌ སྣ༌ཚོགས༌ ཅོ༌ཨིན༌ ཡོད༌ཁན༌ནི༌ ཁས༌པ༌ མི༌ ཚང༌མ༌ སོང༌ཏེ༌
5 མོ༌ཟེས༌ལ༌ ཟེརས༌, “ཡ༌ཝའེ༌ བཀའ༌ སལ༌ཁན༌ནི༌ ལས༌སི༌ ནང༌ང༌ སྒོས༌དོམ༌ ཡོད༌ཁན༌ནི༌ སང༌ མང༌ང༌ མི༌གུན༌ནི༌ ཁྱོང༌དུག༌།”
6 ཏེ༌བོའེ༌ཕིའ༌ མོ༌ཟེས༌སི༌ མི༌ཚང༌མ༌ལ༌ ལོན༌ ཀལ༌ཏེ༌ ཟེརས༌, “བུ༌ཚ༌ དང༌ བུ༌མོ༌ གུན༌ ཏམ༌པའེ༌ ཀུར༌རི༌ ཕིའ༌ ཆོད༌པ༌ མ༌ཁྱོང༌ཤིག༌།” ཏེ༌ནེ༌ མི༌གུན༌ལ༌ ཆོད༌པ༌ ཁྱོང༌ ཚར༌ཁན༌བོའེ༌སང༌ མང༌ང༌ ཁྱོང༌ མ༌ཅུགས༌,
7 ཅིའ༌ཟེར༌ན༌ ཁྱོང༌ཚར༌ཁན༌ནི༌ ཆོད༌པ༌གུན༌, ལས༌ ཚང༌མ༌ ཅོ༌ཅེས༌ལ༌ སྒོས༌དོམ༌ ཡོད༌ཁན༌ནི༌ སང༌ མང༌ང༌ ཡོད༌པིན༌།
ཏམ༌པ༌ ཀུར༌།
36:8-38
8 ཟོ༌ལས༌ལ༌ ཁས༌པ༌ ཚང༌མའེ༌ ཏམ༌པའེ༌ ཀུར༌བོ༌ ཐགས༌ཁན༌ནི༌ རས༌ ཀུས༌པོའེ༌ཀ༌ སྔོན༌པོ༌, སྔོ༌མར༌ དང༌ མར༌པོ༌ ནས༌མ༌ ཉམ༌པོ༌ ཆེ༌ར༌བེམ༌མི༌ པར༌ སྲུལ༌ཏེ༌ ཡོ༌ལ༌ 10 ཉམ༌པོ༌ ཅོས༌།
9 ཏེ༌ ཡོ༌ལ༌ ཚང༌མ༌ དྲན༌དྲ༌, རིང༌བོ༌ མི༌ཀྲར༌ 12 ཡང༌ ཞང༌བོ༌ མི༌ཀྲར༌ 2 ཟམ༌ཤིག༌ ཡོད༌པིན༌།
10 ཁོང༌གུན༌ནི༌ ཡོ༌ལ༌ ལྔ༌བོ༌ ཙེམས༌ཏེ༌ ཆའ༌ཅིག༌ ཅོས༌, ཏེན༌ན༌ ཙོགས༌ ཞན༌ ལྔ༌བོ༌ ཉམ༌པོའང༌ ཅོས༌།
11 ཁོང༌གུན༌ནི༌ ཡོ༌ལའེ༌ ཆ༌ ཉིས༌ཀོའེ༌ ཟུར༌གུན༌ནི༌ཀ༌ རས༌ སྔོན༌པོའེ༌ གུག༌ ཅོས༌།
12 ཡོ༌ལའེ༌ ཆ༌ ཅིག༌པོའེ༌ཀ༌ གུག༌ ལྔབ༌ཅུ༌, ཡང༌ ཞན༌ ཆ༌ ཅིག༌པོའེ༌ཀའང༌ གུག༌ ལྔབ༌ཅུ༌ ཅོས༌། གུག༌གུན༌ ཅིག༌ དང༌ ཅིག༌ག༌ ལྟས༌ཏེ༌ ཡོད༌པིན༌།
13 ཁོང༌གུན༌ནི༌ སེར༌ཀུག༌ ལྔབ༌ཅུ༌ ཅོས༌ཏེ༌ ཡོ༌ལའེ༌ ཆ༌ ཉིས༌ཀོ༌ ཐུད༌ཅེས༌སི༌ ཕིའ༌ ཀོལས༌། ཏེན༌ན༌ཟུག༌གི༌ ཀུར༌བོ༌ ཁག༌ཅིག༌ གྱུར༌།
14 ཏེ༌ནེ༌ ཁོང༌གུན༌ནི༌ ཏམ༌པའེ༌ ཀུར༌ལ༌ ཀབ༌ཅེས༌ ར༌མའེ༌ སྤུའེ༌ ཡོ༌ལ༌ ཅུག༌ཤིག༌ ཅོས༌།
15 ཏེ༌ ཚང༌མ༌ དྲན༌དྲ༌, རིང༌བོ༌ མི༌ཀྲར༌ 13.5 ཡང༌ ཞང༌བོ༌ མི༌ཀྲར༌ 2 ཟམ༌ཤིག༌ ཡོད༌པིན༌།
16 ཁོང༌གུན༌ནི༌ ཏེ༌ ལྔ༌བོ༌ ཙེམས༌ཏེ༌ ཆའ༌ཅིག༌ ཅོས༌། ཏེན༌ན༌ ཙོགས༌ ཞན༌ དྲུག༌པོ༌ ཙེམས༌ཏེ༌ ཆའ༌ཅིག༌ ཅོས༌།
17 ཁོང༌གུན༌ནི༌ ཆ༌ ཅིག༌གི༌ ཟུར༌རི༌ཀ༌ གུག༌ ལྔབ༌ཅུ༌ ཡང༌ ཆ༌ ཅིག༌པོའེ༌ ཟུར༌རི༌ཀའང༌ གུག༌ ལྔབ༌ཅུ༌ ཅོས༌།
18 ཁོང༌གུན༌ནི༌ ཏེ༌ ཆ༌ ཉིས༌ཀོ༌ ཐུད༌ཅེས༌སི༌ ཕིའ༌ ར༌གན༌ནི༌ ཀུག༌ཀུག༌ ལྔབ༌ཅུ༌ ཅོས༌, ཏེན༌ན༌ཟུག༌གི༌ ཀབ༌ཅེས༌པོ༌ ཁག༌ཅིག༌ གྱུར༌།
19 ཁོང༌གུན༌ནི༌ ཀུར༌ལ༌ ཀབ༌ཅེས༌པོ༌ ལུག༌ཕོའེ༌ པགས༌པ༌ རང༌ མར༌པོ༌ ཏང༌ཁན༌ ཉམ༌པོ༌ ཡང༌ ཏེ༌བོའེ༌ ཁེ༌ཐོག༌ག༌ ཞན༌ ཀབ༌ཅེས༌ཤིག༌ སེམས༌ཅན༌ནི༌ གྱལ༌ལ༌ པགས༌པའ༌ ཅོས༌།
20 ཁོང༌གུན༌ནི༌ ཏམ༌པའེ༌ ཀུར༌ ལང༌ཅེས༌ལ༌ ཨ༌ཀ༌ཤིའེ༌ ཤིང༌ངི༌ རིབ༌ཞི༌ ཅོས༌།
21 རིབ༌ཞི༌ རེ༌རེ༌ རིང༌བོ༌ མི༌ཀྲར༌ 4.5 ཡང༌ ཞང༌བོ༌ སེན༌ཀྲི༌མི༌ཀྲར༌ 66 ཡོད༌པིན༌།
22 རིབ༌ཞི༌ རེ༌རེའེ༌ ཁད༌ཅེས༌ལ༌ ཇུག༌པོ༌ ཞོགས༌ཏེ༌ ཟེར༌ ཙོགས༌ ཉིས༌ ཅོས༌། ཏམ༌པ༌ ཀུར༌རི༌ རིབ༌ཞི༌ ཚང༌མ༌ ཙོགས༌ ཅོས༌།
23 ཁོང༌གུན༌ནི༌ ཏམ༌པའེ༌ ཀུར༌རི༌ ལྷོ༌ ཆོགས༌སི༌ ཕིའ༌ རིབ༌ཞི༌ ཉི༌ཤུ༌ ཅོས༌
24 ཡང༌ ཏེ༌གུན༌ ལང༌ཅེས༌ལ༌ མུལ༌ལི༌ ཞབ༌ལྡན༌ ཞིབ༌ཅུ༌, རིབ༌ཞི༌ ཅིག༌ག༌ ཞབ༌ལྡན༌ ཉིས༌, ཟེར༌ ཅིག༌གི༌ ཡོག༌ག༌ ཞབ༌ལྡན༌ ཅིག༌།
25 ཁོང༌གུན༌ནི༌ ཏམ༌པའེ༌ ཀུར༌རི༌ བྱང༌ ཆོགས༌ལ༌ རིབ༌ཞི༌ ཉི༌ཤུ༌
26 ཡང༌ མུལ༌ལི༌ ཞབ༌ལྡན༌ ཞིབ༌ཅུ༌ ཅོས༌, རིབ༌ཞི༌ རེ༌རེའེ༌ ཡོག༌ག༌ ཞབ༌ལྡན༌ ཉིས༌།
27 ཏམ༌པའེ༌ ཀུར༌རི༌ གྱབ༌, ནུབ༌ ཆོགས༌ལ༌ ཁོང༌གུན༌ནི༌ རིབ༌ཞི༌ དྲུག༌ ཅོས༌,
28 ཡང༌ རིབ༌ཞི༌ ཐེ༌བ༌ ཉིས༌ ཏམ༌པའེ༌ ཀུར༌རི༌ གྱབ༌བི༌ ཀྲུ༌གུན༌ནི༌ ཕིའ༌ ཅོས༌།
29 ཀྲུའི༌ རིབ༌ཞི༌གུན༌ ཡོག༌ནེ༌ བེ༌ཏེ༌ ཨིན༌ནའང༌ ཁེ༌ཐོག༌པོ༌ སེར༌རི༌ ཀྱི༌ལྡིར༌ ཉམ༌པོ༌ ཐུདས༌, ཏེ༌ རིབ༌ཞིའི༌ ཉིས༌ཀོ༌ ཙོགས༌ ཅོས༌།
30 ཏ༌ རིབ༌ཞི༌ 8 ཡང༌ མུལ༌ལི༌ ཞབ༌ལྡན༌ 16 ཡོད༌པིན༌, རིབ༌ཞི༌ རེ༌རེའེ༌ ཡོག༌ག༌ ཞབ༌ལྡན༌ ཉིས༌།
31 ཁོང༌གུན༌ནི༌ པ༌ར༌ཁ༌ ཏང༌ཅེས༌གུན༌ ཨ༌ཀ༌ཤིའེ༌ ཤིང༌ངི༌ ཅོས༌, ཏམ༌པའེ༌ ཀུར༌རི༌ འི༌ངོ༌ ཆོགས༌སི༌ རིབ༌ཞི༌ ཕིའ༌ ལྔ༌,
32 འ༌ངོ༌ ཆོགས༌སི༌ རིབ༌ཞི༌ ཕིའ༌ ལྔ༌ ཡང༌ ཏམ༌པ༌ ཀུར༌རི༌ གྱབ༌ ནུབ༌ ཆོགས༌སི༌ རིབ༌ཞི༌ ཕིའ༌ ལྔ༌།
33 ཞུང༌སྐྱིལ༌ལི༌ པར༌ཁའེ༌ ཀྲ༌ལུ༌བོ༌ ཀུར༌རི༌ གོ༌ནེ༌ ཇུག༌ ཚག༌པ༌ ལེབ༌ཅེས༌ ཅོས༌ ཀ༌བོ༌ རིབ༌ཞི༌ ཞུང༌སྐྱིལ༌ལི༌ཀ༌ ཡོད༌པིན༌།
34 ཁོང༌གུན༌ནི༌ རིབ༌ཞི༌གུན༌ སེར༌རི༌ ཏུམས༌ ཡང༌ ཏེ༌གུན༌ནི༌ཀ༌ པ༌ར༌ཁ༌ ཏང༌ཅེས༌སི༌ ཤིང༌གུན༌ གྱུད༌ཅེས༌ལ༌ སེར༌རི༌ ཀྱི༌ལྡིར༌ ཅོས༌། པ༌ར༌ཁ༌ ཏང༌ཅེས༌སི༌ ཤིང༌གུན༌ནའང༌ སེར༌རི༌ ཏུམས༌།
35 ཁོང༌གུན༌ནི༌ སྔོན༌པོ༌, སྔོ༌མར༌ དང༌ མར༌པོ༌ ནས༌མ༌ ཡང༌ རས༌ ཐགས༌ཁན༌ ཀུས༌པོའེ༌ ཡོ༌ལ༌ ཅོས༌ ཀ༌བོའེ༌ཀ༌ ལག༌ཤེས༌ ཁས༌པ༌གུན༌ནི༌ ཆེ༌ར༌བེམ༌མི༌ པར༌ སྲུལ༌ཏེ༌ ཡོད༌པིན༌།
36 ཁོང༌གུན༌ནི༌ ཡོ༌ལའེ༌ ཕིའ༌ སེར༌ཀུག༌ དང༌ ཨ༌ཀ༌ཤིའེ༌ ཤིང༌ངི༌ ཀ༌ཝ༌ ཞི༌ ཅོས༌ཏེ༌ སེར༌རི༌ ཏུམས༌ ཡང༌ ཏེ༌གུན༌ ལང༌ཅེས༌ལ༌ མུལ༌ལི༌ ཞབ༌ལྡན༌ ཞི༌ ཅོས༌།
37 ཀུར༌རི༌ ནང༌ང༌ ཆ༌ཅེས༌སི༌ སྒོའ༌ ཡོ༌ལ༌ རས༌ ཐགས༌ཁན༌ ཀུས༌པོའེ༌ཀ༌ སྔོན༌པོ༌, སྔོ༌མར༌ དང༌ མར༌པོ༌ ནས༌མའེ༌ རི༌མོ༌ སྲུལ༌ཏེ༌ ཅོས༌།
38 ཏེ༌བོའེ༌ ཕིའ༌ ཀ༌ཝ༌ ལྔ༌ དང༌ ཏེ༌གུན༌ནི༌ ལྕག༌ཀུག༌གུན༌ ཅོས༌ ཡང༌ ཏེ༌ ཀ༌ཝ༌གུན༌ནི༌ ཁེ༌ཐོག༌པོ༌ དང༌ ཏེ༌གུན༌ནི༌ ཀྱི༌ལྡིར༌གུན༌ སེར༌རི༌ ལྡུམ༌ ཨང༌ ཏེ༌གུན༌ ལང༌ཅེས༌ལ༌ ར༌གན༌ནི༌ ཞབ༌ལྡན༌ ལྔ༌ ཅོས༌།