37
ཆད༌དོན༌ནི༌ སྒམ༌།
37:1-9
1 བེ༌ཟ༌ལེལ༌ལི༌ ཨ༌ཀ༌ཤིའེ༌ ཤིང༌ང༌ ཆད༌དོན༌ནི༌ སྒམ༌བོ༌ ཅོས༌ ཀ༌བོའེ༌ རིང༌བོ༌ སེན༌ཀྲི༌མི༌ཀྲར༌ 110, ཞང༌ དང༌ ཐོན༌ དྲན༌དྲའ༌ སེན༌ཀྲི༌མི༌ཀྲར༌ 66 ཡོད༌པིན༌།
2 ཁོའེ༌ ཏེ༌བོའེ༌ ནང༌ཀུག༌ དང༌ ཕི༌ལོག༌ ཉིས༌ཀོ༌ སེར༌རི༌ ཏུམས༌ ཡང༌ ཕི༌ལོག༌གི༌ ཟུར༌ལ༌ སེར༌རི༌ ཐའ༌རིལ༌ ཏངས༌།
3 ཁོའེ༌ སེར༌རི༌ ཀྱི༌ལྡིར༌ ཞི༌ ཅོས༌ ཡང༌ ཏེ༌གུན༌ ཏེ༌བོའེ༌ རྐང༌ ཞི༌ཀོའེ༌ཀ༌ ཏགས༌, ཆོག༌ རེ༌རེ༌ཀ༌ ཀྱི༌ལྡིར༌ ཉིས༌།
4 ཁོའེ༌ སྒམ༌བོ༌ ཁུར༌ཅེས༌ལ༌ ཨ༌ཀ༌ཤིའེ༌ ཤིང༌ངི༌ ཀྲ༌ལུའ༌ སེར༌ ཏུམས༌ཏེ༌
5 ཏེ༌བོའེ༌ ལྡ༌ལྡོ༌ ཉིས༌ཀོའ༌ ཡོད༌ཁན༌ནི༌ ཀྱི༌ལྡིར༌གུན༌ནི༌ ནང༌ང༌ ཏེ༌གུན༌ གྱུད༌།
6 ཁོའེ༌ ཏེ༌ སྒམ༌མ༌ མི༌གུན༌ནི༌ སྡིག༌པའ༌ ཤགས༌པ༌ སལ༌ཁན༌ སེར༌རི༌ ཁའ༌ལེབ༌ ཅོས༌, ཏེ༌བོའེ༌ རིང༌བོ༌ སེན༌ཀྲི༌མི༌ཀྲར༌ 110 ཡང༌ ཞང༌བོ༌ སེན༌ཀྲི༌མི༌ཀྲར༌ 66 ཡོད༌པིན༌།
7 ཁོའེ༌ ཏེ༌བོའེ༌ ཐའ༌མ༌ ཉིས༌ཀོའ༌ སེར༌ རྡུངས༌ཏེ༌ ཆེ༌ར༌བེམ༌ ཉིས༌ ཅོས༌།
8 འི༌ངོ༌ ཆོགས༌སི༌ ཐའ༌མ༌ ཅིག༌ ཡང༌ འ༌ངོ༌ ཆོགས༌སི༌ ཐའ༌མ༌ ཅིག༌, ཏེ༌གུན༌ ཐུག༌རྗེ༌ ཁའ༌ལེབ༌ ཉམ༌པོ༌ ཐུད༌ཏེ༌ སེར༌ ཅིག༌ཅིག༌ག༌ ཅོས༌ཏེ༌ ཡོད༌པིན༌།
9 ཆེ༌ར༌བེམ༌གུན༌ནི༌ ཤོག༌པ༌ ཀེན༌ལ༌ རྐྱངས༌ཏེ༌ ཐུག༌རྗེ༌ ཁའ༌ལེབ༌པོ༌ ཀབས༌ཏེ༌ ཡོད༌པིན༌། ཏེ༌གུན༌ ཅིག༌ དང༌ ཅིག༌ག༌ ལྟས༌ཏེ༌ ཐུག༌རྗེ༌ ཁའ༌ལེབ༌ ཆོགས༌ལ༌ གོ༌ སྒུས༌ཏེ༌ ཡོད༌པིན༌།
ཅོག༌ཙེ༌།
37:10-16
10 བེ༌ཟ༌ལེལ༌ལི༌ ཨ༌ཀ༌ཤིའེ༌ ཤིང༌ངི༌ ཅོག༌ཙེ༌ ཅོས༌ ཀ༌བོའེ༌ རིང༌བོ༌ སེན༌ཀྲི༌མི༌ཀྲར༌ 88, ཞང༌བོ༌ སེན༌ཀྲི༌མི༌ཀྲར༌ 44 དང༌ ཐོན༌བོ༌ སེན༌ཀྲི༌མི༌ཀྲར༌ 66 ཡོད༌པིན༌།
11 ཁོའེ༌ ཏེ༌བོ༌ ཅའང༌ མ༌དྲེས༌ཁན༌ནི༌ སེར༌ ཉམ༌པོ༌ ཏུམས༌ ཡང༌ ཐའ༌མ༌ གུན༌ལ༌ སེར༌རི༌ ཐའ༌རིལ༌ ཏངས༌།
12 ཏེ༌བོའ༌ ཀིར༌ སྐོར༌ཏེ༌ སེན༌ཀྲི༌མི༌ཀྲར༌ 7 ཞང༌ངི༌ སྐྱོར༌ར༌ ཏངས༌ ཡང༌ ཏེ༌བོའེ༌ ཐའ༌མ༌ སེར༌རི༌ ཐའ༌རིལ༌ ཏངས༌།
13 སེར༌རི༌ ཀྱི༌ལྡིར༌ ཞི༌ ཅོས༌ ཡང༌ ཏེ༌གུན༌ ཀྲུ༌ ཞི༌ཀོའེ༌ རྐང༌ངི༌ཀ༌ ཏགས༌།
14 ཅོག༌ཙེ༌ ཁུར༌ཅེས༌སི༌ ཀྲ༌ལུ༌གུན༌ གྱུད༌ཅེས༌ལ༌ ཀྱི༌ལྡིར༌གུན༌ ཏེ༌བོའེ༌ ཐོག༌གི༌ ཟུར༌རི༌ དུན༌ལ༌ ཡོད༌པིན༌།
15 ཀྲ༌ལུ༌གུན༌ ཨ༌ཀ༌ཤིའེ༌ ཤིང༌ང༌ སེར༌ ཏུམས༌ཏེ༌ ཨིན༌པིན༌།
16 ཅོག༌ཙེ༌ཀ༌ ཀོལ༌ཅེས༌སི༌ ཅ༌ལག༌གུན༌ ཅའང༌ མ༌དྲེས༌ཁན༌ནི༌ སེར༌ལ༌ ཅོས༌། ཏེ༌གུན༌ ཐལ༌ལི༌, ཀོ༌རེ༌, སྒོར༌མོ༌ ཡང༌ རྒུན༌ཆང༌ངི༌ ཆོད༌པ༌ ལུག༌ཅེས༌སི༌ ནོད༌ གུན༌ ཨིན༌ནོག༌།
འོད༌སྟགས༌།
37:17-24
17 ཁོའེ༌ ཅའང༌ མ༌དྲེས༌ཁན༌ སེར༌རི༌ འོད༌སྟགས༌ ཅོས༌, ཏེ༌བོའེ༌ ཞབ༌ལྡན༌, རྐང༌གུན༌, མེན༌ཏོག༌ ཙོགས༌ ཀོ༌རེ༌གུན༌, པ༌ཏུམ༌ དང༌ མེན༌ཏོག༌ བར༌ཁན༌ གུན༌ སེར༌ ཅིག༌ཅིག༌ རྡུངས༌ཏེ༌ ཅོས༌།
18 ཏེ༌བོའ༌ རྐང༌ དྲུག༌ ཅོས༌, ལྡོ༌ རེ༌རེའ༌ རྐང༌ སུམ༌སུམ༌།
19 རྐང༌ རེ༌རེ༌ཀ༌ བ༌དམ༌མི༌ མེན༌ཏོག༌ བར༌ཁན༌ ཙོགས༌ སུམ༌སུམ༌ ཡང༌ པ༌ཏུམ༌ དང༌ ཏེ༌བོ༌ ཀབས༌ཁན༌ནི༌ ལོ༌མ༌ གུན༌ ཅོས༌། ཏེན༌ན༌ ཙོགས༌ འོད༌སྟག༌གི༌ རྐང༌ དྲུག༌པོའེ༌ཀ༌ ཅོས༌།
20 འོད༌སྟག༌གི༌ ཞུང༌སྐྱིལ༌ལི༌ རྐང༌ངི༌ཀ༌ བ༌དམ༌མི༌ མེ༌ཏོག༌ བར༌ཁན༌ ཙོགས༌ ཞི༌ ཡང༌ པ༌ཏུམ༌ དང༌ ཏེ༌བོ༌ ཀབས༌ཁན༌ནི༌ ལོ༌མ༌ གུན༌ ཅོས༌།
21 ཞུང༌ངི༌ རྐང༌ངི༌ཀ༌ ཞན༌ རྐང༌ ཆ༌ སུམ༌ཀོ༌ ཐུད༌ཏེ༌ ཡོད༌ས༌ རེ༌རེ༌ ཡོག༌ག༌ པ༌ཏུམ༌ ཅོས༌, ཏེ༌ ཚང༌མ༌ ཁོའེ༌ སེར༌ ཅིག༌ རྡུངས༌ཏེ༌ ཅོས༌,
22 པ༌ཏུམ༌ དང༌ རྐང༌ ཚང༌མ༌ འོད༌སྟགས༌ ཉམ༌པོ༌ སེར༌ ཅིག༌ཅིག༌ རྡུངས༌ཏེ༌ ཅོས༌།
23 ཁོའེ༌ འོད༌སྟག༌གི༌ ཕིའ༌ མར༌ནག༌ སྐང༌ཅེས༌ལ༌ ཀོ༌རེ༌ རྡུན༌, སར༌ ཀྲུམ༌ཅེས༌ དང༌ ཏེ༌བོའེ༌ ཏ༌བག༌ ཚང༌མ༌ ཅའང༌ མ༌དྲེས༌ཁན༌ནི༌ སེར༌ལ༌ ཅོས༌།
24 འོད༌སྟགས༌ དང༌ ཏེ༌བོའེ༌ ལག༌ཆ༌ ཚང༌མ༌ ཅོ༌ཅེས༌ལ༌ ཁོའེ༌ ཅའང༌ མ༌དྲེས༌ཁན༌ནི༌ སེར༌ ཀི༌ལོ༌ 35 ཀོལས༌།
སྤོས༌ ཏུག༌ཅེས༌སི༌ ཕིའ༌ ཆོད༌ཁྲི༌།
37:25-29
25 ཁོའེ༌ སྤོས༌ ཏུག༌ཅེས༌སི༌ ཕིའ༌ ཨ༌ཀ༌ཤིའེ༌ ཤིང༌ངི༌ ཆོད༌ཁྲི༌ ཅོས༌། ཐོན༌བོ༌ སེན༌ཀྲི༌མི༌ཀྲར༌ 90 ཡང༌ ཏེ༌བོའེ༌ ཐོག༌པོ༌ ཀྲུབ༌ཞི༌, རིང༌ དང༌ ཞང༌ སེན༌ཀྲི༌མི༌ཀྲར༌ 45 ཡོད༌པིན༌། ཀྲུ༌ ཞི༌ཀོ༌ ཙེབ༌ཙེབ༌ ར༌ཅོ༌ ཙོགས༌, ཆོད༌ཁྲི༌ ཉམ༌པོ༌ ཨ༌ཀ༌ཤིའེ༌ ཤིང༌ ཅིག༌ཅིག༌ག༌ ཅོས༌།
26 ཁོའེ༌ ཆོད༌ཁྲི༌ གང༌པོ༌ ཡང༌ན༌ ཏེ༌བོའེ༌ ཐོག༌, ཆོག༌ ཞི༌ཀོ༌ དང༌ རཱ༌ཅོ༌ གུན༌ ཅའང༌ མ༌དྲེས༌ཁན༌ནི༌ སེར༌ ཉམ༌པོ༌ ཏུམས༌ ཡང༌ ཏེ༌བོའེ༌ ཐའ༌མ༌ ཀྱིར༌སྐོར༌ཏེ༌ སེར༌རི༌ ཐའ༌རིལ༌ ཏངས༌།
27 ཟུར༌རི༌ ཡོག༌ག༌ ཆོགས༌ ཉིས༌ཀོའེ༌ཀ༌ སེར༌རི༌ ཀྱི༌ལྡིར༌ ཉིས༌ཉིས༌ ཏེ༌བོ༌ ཁུར༌ཅེས༌སི༌ ཀྲ༌ལུ༌གུན༌ གྱུད༌ཅེས༌ལ༌ ཏགས༌།
28 ཁོའེ༌ ཀྲ༌ལུ༌གུན༌ ཨ༌ཀ༌ཤིའེ༌ ཤིང༌ང༌ ཅོས༌ཏེ༌ སེར༌ ཏུམས༌།
29 ཏྲི༌ཞིམ༌ ཅོ༌ཁན༌ནི༌ ལས༌ ཙོགས༌, ཁོང༌གུན༌ནི༌ ཁྲུས༌ཏང༌ཅེས༌སི༌ མར༌ནག༌ ཡང༌ ཏྲི༌ཞིམ༌ཅན༌ནི༌ སྤོས༌ གུན༌ ཅོས༌།