5
མོ༌ཟེས༌ དང༌ ཨ༌རོན༌ ཨི༌ཇིབ༌བི༌ གྱལ༌པོའེ༌ཀ༌ སོང༌།
5:1-5
1 ཏེ༌ སྟིང༌ནེ༌ མོ༌ཟེས༌ དང༌ ཨ༌རོན༌ ཨི༌ཇིབ༌བི༌ གྱལ༌པོ༌ ཡོད༌ས༌ སོང༌ཏེ༌ ཟེརས༌, “ཡ༌ཝ༌, ཨིས༌ར༌ཨེལ༌པའེ༌ དཀོན༌མཆོག༌གི༌ འི༌ཟུག༌ མོལས༌, ‘རི༌སྟོང༌ངི༌ ནང༌ང༌ ངའ༌ རྩི༌ཝ༌ ཅོས༌ཏེ༌ གའ༌སྟོན༌ རྩི༌ཅེས༌ལ༌ ངའེ༌ མི༌གུན༌ ཆ༌ཅུག༌།’ ”
2 གྱལ༌པོའེ༌ ཟེརས༌, “ཡ༌ཝ༌ སུ༌ ཨིན༌ནོག༌, ངའེ༌ ཁོའེ༌ ཁའ༌ཉན༌ཏེ༌ ཨིས༌ར༌ཨེལ༌པ༌གུན༌ ཅིའ༌ ཆ༌ཅུག༌ཨིན༌? ངའེ༌ ཡ༌ཝ༌ ཤེས༌ས༌མེད༌ ཡང༌ ངའེ༌ ཨིས༌ར༌ཨེལ༌པ༌གུན༌ ཆ༌ མི༌ཅུག༌།”
3 ཨིན༌ནའང༌ ཁོང༌གུན༌ནི༌ ལན༌ཏངས༌, “ཨིབ༌རི༌པ༌གུན༌ནི༌ དཀོན༌མཆོག༌ ང༌ཞའེ༌ ཇལ༌, ཏ༌ ཡ༌ཝ༌ ང༌ཞའེ༌ དཀོན༌མཆོག༌ག༌ ཆོད༌པ༌ ཕུལ༌ཅེས༌ལ༌ ང༌ཞ༌གུན༌ རི༌སྟོང༌ངི༌ ནང༌ང༌ ཞག༌ སུམ༌མི༌ བེས༌ལ༌ ཆ༌ཅུག༌། ཏེ༌ མན༌ན༌ ཁོང༌ངི༌ ང༌ཞ༌གུན༌ལ༌ ནད༌ རྩོག༌པོ༌ ཡ༌ ར༌འི༌ ཉམ༌པོ༌ ཤི༌ཅུག༌ཨིན༌།”
4 ཨིན༌ནའང༌ གྱལ༌པོའེ༌ ཟེརས༌, “མོ༌ཟེས༌ དང༌ ཨ༌རོན༌, ཅིའ༌ མི༌གུན༌ལ༌ ཁོ༌རང༌གུན༌ནི༌ ལས༌ ཅོ༌ཅུག༌ག༌ མེད༌? རང༌ངི༌ ལས༌ ཅོའ༌ལ༌ ལོགས༌ཏེ༌ སོང༌།
5 ལྟོས༌, འི༌ ས༌ཆའེ༌ ནང༌ང༌ ང༌ཞའེ༌སང༌ མང༌ང༌ ཁྱོ༌ཞ༌གུན༌ནི༌ མི༌ ཡོད༌ཏེ༌ ཨིན༌ནོག༌ ཡང༌ ཁྱོ༌རང༌ངི༌ ཁོང༌གུན༌ལ༌ ལས༌ ཅོ༌ཅེས༌ནེ༌ སྒག༌ ཉིན༌རག༌ག༌?”
ཕུག༌མ༌ མེད༌ཁན༌ནི༌ པག༌བུ༌།
5:6-6:13
6 ཏེན༌ན༌ ཞག༌ག༌ གྱལ༌པོའེ༌ ཨི༌ཇིབ༌པ༌ ཚེ༌ཡོག༌ སྲུལ༌ཁན༌ དང༌ ཨིས༌ར༌ཨེལ༌པ༌ ལས༌སྤོན༌ གུན༌ལ༌ བཀའ༌ ཏངས༌,
7 “སྔུན༌ ཙོགས༌ལ༌ ཨིས༌ར༌ཨེལ༌པ༌གུན༌ལ༌ པག༌བུ༌ ཅོ༌ཅེས༌ལ༌ ཕུག༌མ༌ མ༌ཏང༌། ཁོང༌རང༌གུན༌ལ༌ ཕུག༌མ༌ ཙལ༌ཏེ༌ པག༌བུ༌ ཅོ༌ཅུག༌།
8 ཨིན༌ནའང༌ ཁོང༌གུན༌ནི༌ པག༌བུ༌ སྔུན༌ ཙོགས༌ དྲན༌དྲ༌ ཡོང༌གོས༌, པག༌བུའི༌ རྩི༌རུག༌ ཉུ༌ངུན༌ མ༌ཅོ༌། ཁོང༌གུན༌ལ༌ ལས༌ ཅོ༌མ༌ལམ༌ པ༌སང༌ ཁོང༌གུན༌ནི༌ ཀུ༌ཅོ༌ ཏངས༌ཏེ༌ ‘དཀོན༌མཆོག༌ག༌ ཆོད༌པ༌ ཕུལ༌ལ༌ལ༌ ང༌ཞའ༌ ཆ༌ཅུག༌’ ཟེར༌ར༌ནོག༌།
9 ཟུན༌ཇན༌ སྤེ༌ར༌གུན༌ལ༌ ནང༌སྟག༌ ཏང༌ལོང༌ མི༌ཡོང༌ཅེས༌སི༌ ཕིའ༌ ཁོང༌གུན༌ལ༌ ལས༌ མ༌སྲན༌ཏྲེ༌ ཅོ༌ཅུག༌།”
10 ཏེ༌ནེ༌ ཚེ༌ཡོག༌ སྲུལ༌ཁན༌ དང༌ ཨིས༌ར༌ཨེལ༌པ༌ ལས༌སྤོན༌ གུན༌ ཕི༌ལོག༌ག༌ སོང༌ཏེ༌ མི༌གུན༌ལ༌ ཟེརས༌, “གྱལ༌པོའེ༌ མོལ༌ལ༌རག༌, ‘ངའེ༌ ཏན༌ནེ༌ པར༌ལ༌ ཁྱོ༌ཞ༌གུན༌ལ༌ ཕུག༌མ༌ མི༌ཏང༌།
11 སོང༌ ཡང༌ ཀ༌ནེ༌ ཐོབ༌ནའང༌ ཁྱོ༌ཞ༌གུན༌ནི༌ ཕུག༌མ༌ ཙལ༌ཏེ༌ སྔུན༌ ཙོགས༌ལ༌ དྲན༌དྲ༌ པག༌བུ༌ ཅོས༌།’ ”
12 ཏེ༌ནེ༌ ཨིས༌ར༌ཨེལ༌པ༌གུན༌ ཨི༌ཇིབ༌ གང༌པོའེ༌ ནང༌ང༌ ཡན༌ཏེ༌ ཕུག༌མ༌ ཙལ༌ལ༌ལ༌ སོང༌།
13 ཨི༌ཇིབ༌པ༌ ཚེ༌ཡོག༌ སྲུལ༌ཁན༌གུན༌ནི༌ ཁོང༌གུན༌ནི༌ཀ༌ ཝང༌ ཀོལ༌ཏེ༌ ཟེརས༌, “ཕུག༌མ༌ ཏང༌ ཟ༌ནེ༌ ཞག༌ག༌ པག༌བུ༌ ཅོ༌ཁན༌ དྲན༌དྲ༌ དག༌སའང༌ ཅོ༌གོས༌།”
14 ཡང༌ ཁོང༌གུན༌ནི༌ ཨིས༌ར༌ཨེལ༌པ༌ ལས༌སྤོན༌ལ༌ སྐོས༌ཁན༌ གུན༌ལ༌ རྡུངས༌ཏེ༌ ཏྲིའད༌པིན༌, “སྔུན༌ ཙོགས༌ལ༌ དའང༌ དང༌ དི༌རིང༌ ཁྱོ༌ཞ༌གུན༌ནི༌ པག༌བུ༌ དྲན༌དྲ༌ ཅིའ༌ མ༌ཅོའ༌ ཨིན༌ནོག༌?”
15 ཏེ༌ནེ༌ ཨིས༌ར༌ཨེལ༌པ༌ ལས༌སྤོན༌གུན༌ གྱལ༌པོ༌ ཡོད༌ས༌ སོང༌ཏེ༌ ཞུ༌ཝ༌ ཕུལས༌, “ཉེ༌རང༌ངི༌ ཡོག༌པོ༌གུན༌ལ༌ འི༌ཟུག༌ ནགས༌ ཅིའ༌ སྟན༌ན༌ ཛད༌དད༌?
16 ང༌ཞ༌གུན༌ལ༌ ཕུག༌མ༌ ཏང༌ང༌ མི༌དུག༌ ཨིན༌ནའང༌ ཚེ༌ཡོག༌ སྲུལ༌ཁན༌གུན༌ནི༌ ‘པག༌བུ༌ དྲན༌དྲ༌ ཅོས༌’ ཟེར༌ཏེ༌ ང༌ཞ༌གུན༌ལ༌ རྡུང༌དུག༌། ཨིན༌ནའང༌ ཏེ༌བོ༌ ང༌ཞའེ༌ སྐྱོན༌ མན༌ ཉེ༌རང༌ངི༌ མི༌གུན༌ནི༌ སྐྱོན༌ ཨིན༌ནོག༌།”
17 གྱལ༌པོའེ༌ ཟེརས༌, “ཁྱོ༌ཞ༌གུན༌ ལས༌མི༌ལམ༌ གྱུར༌ཏེ༌ ལས༌ ཅོ༌ཉིན༌མེད༌པ༌ ཁྱོ༌ཞ༌གུན༌ནི༌ ‘ང༌ཞའ༌ དཀོན༌མཆོག༌ག༌ ཆོད༌པ༌ ཕུལ༌ལ༌ ཆ༌ཅུག༌’ ཟེར༌ར༌ནོག༌།
18 ཏ༌ ལོགས༌ཏེ༌ ལས༌ ཅོའ༌ལ༌ སོང༌། ཁྱོ༌ཞ༌གུན༌ལ༌ ཕུག༌མ༌ མི༌ཏང༌ ཨིན༌ནའང༌ ཁྱོ༌ཞ༌གུན༌ནི༌ པག༌བུ༌ དྲན༌དྲ༌ ཅོ༌གོས༌།”
19 “པག༌བུའི༌ ཀྲངས༌ཀ༌ དྲན༌དྲ༌ ཡོང༌གོས༌” ཟེར༌ཏེ༌ བཀའ༌ ཏང༌ང༌ཅིག༌ ཨིས༌ར༌ཨེལ༌པ༌ ལས༌སྤོན༌གུན༌ལ༌ ནས༌ལུག༌ ཀགས༌པོ༌ གྱུར༌ཅེས༌པོ༌ ཧ༌གོ༌།
20 ཡང༌ ཁོང༌གུན༌ གྱལ༌པོའེ༌ ཁར༌ནེ༌ བིང༌ཏེ༌ ཆ༌ ཟ༌ནེ༌ མོ༌ཟེས༌ དང༌ ཨ༌རོན༌ ཁོང༌གུན༌ལ༌ ཐུག༌ག༌ སྲུངས༌ཏེ༌ ཡོད༌ཁན༌བོ༌ ཐོང༌།
21 ལས༌སྤོན༌གུན༌ནི༌ ཟེརས༌, “ཁྱོ༌ཞའེ༌ གྱལ༌པོ༌ དང༌ ཁོང༌ངི༌ སྤོན༌བོ༌གུན༌ལ༌ ང༌ཞའེ༌ཀ༌ སྲོ༌ ཡོང༌ཅུགས༌པ༌ ཡ༌ཝའེ༌ ཁྱོ༌ཞའ༌ ཁྲིམས༌ཅད༌ དང༌ ཆད༌པ༌ སལ༌ཤིག༌། ཁྱོ༌ཞའེ༌ ཁོང༌གུན༌ལ༌ ང༌ཞའ༌ སད༌ཅེས༌ལ༌ ཉད༌ ཐོབ༌ཅུགས༌ཏེ༌ ཨིན༌ནོག༌།”
22 ཏེ༌ནེ༌ མོ༌ཟེས༌ སོང༌ཏེ༌ ཡང༌སྐྱར༌ ཡ༌ཝ༌ མོས༌ལམ༌ ཞུས༌, “ཡ༌ཝ༌, ཉེ༌རང༌ངི༌ ཅིའ༌ རང༌ངི༌ མི༌གུན༌ལ༌ འི༌ ཙོགས༌སི༌ ནགས༌ སྟན༌ན༌ ཛད༌དད༌? ཅིའ༌ ཉེ༌རང༌ངི༌ ང༌ ཀལ༌ལ༌ ཛད༌པིན༌?
23 ཉེ༌རང༌ངི༌ མོལ༌ཁན༌གུན༌ གྱལ༌པོའ༌ ཟེར༌པ༌ནེ༌ ཕར༌ལ༌ ཁོའེ༌ ཉེ༌རང༌ངི༌ མི༌གུན༌ལ༌ མང༌ང༌ ནགས༌ སྟནས༌ ཡང༌ ཉེ༌རང༌ངི༌ ཁོང༌གུན༌ ཐར༌ཅུག༌ཅེས༌ལ༌ ཅའང༌ ཛད༌ད༌ མི༌དུག༌།”